यसैया 29 - लिम्बुयरुसले़म ये़क्यक्को पयम् यम्बा तुक्खे 1 दाउदे़न् युङे़बा अरियल ये़क्यक्के, दाउदे़न् युङे़बा अरियल ये़क्यक्के, के़जिःत्ते़आङ् के़स्ये़रो! तङ्बेॽ सम्धाङ् तङ्बेॽ योॽसिङ्ल पेःक्लो, हे़क्क्याङ् तङ्नाम्हाॽआङ् तङ्बेॽ, तङ्बेधक्मा इदारो॥ 2 हे़क्केसाङ् आङ्गाॽ ये़क्यक् सम्धाङ् मे़क्मासिमे़न् तारुङ्लो, हे़क्क्याङ् खे़ॽयो के़युङ्बाहाॽ मे़हाःप्, मे़भिःक्लो खे़ब्याङ् अरियल ये़क्यक्किन् माक्खिल्ले़ ले़ःक्तुबा ले़त्ति तोःम्मादे़न् पोङ्लो॥ 3 आङ्गाॽ खे़न् कब्रिङ् तुरायक् लेःत्तुङ्लो, हे़क्क्याङ् चङ्हिम् चोगुङ्ङाङ् किर्गप् कबुङ्लो, खे़म्ब्याङ् कुदक्ले़ङ्वाओ के़रे़क् पिसाङ् थेःक्मा याःम्बक् चोगुङ्लो॥ 4 खे़ॽयोबा मनाहाॽ यो मक्मे़धाआङ् खाम्बाङ्लाम्मे मे़बाःत्लो, हे़क्क्याङ् कुसिङ् निःत्मे़न्दे़प्मनाबा खुन्छिॽ इक्लान् खाम्भुत्छ्रुःम्बालाम् लःन्लो, खुन्छिॽ इक्लान् च्याःङ्माङ् इक्ला कुइसिक् खाम्बेक् सिगाङ्लाम् लःन्लो, हे़क्क्याङ् खुन्छिॽ इक्लान् खाम्हिःक् सिगाङ्लाम् खुस्खुस् लॽरिक् पाःत्लो॥ 5 कर यरुसले़म ये़क्यक्को के़युङ्बा मनासे, वेॽ लाजेॽलाम् के़दाबा खे़निॽ यरिक् निङ्मिहाॽ खाम्हिःक् कुइसिक् मे़बोङ्लो, हे़क्क्याङ् खे़ङ्हाॽरे़ खुन्छिॽ थक्सुबाहाॽ याॽसिप् हे़क्के फुत्लुम् थ्यःङ् मे़से़ मे़बेःक्लो, हे़क्क्याङ् सप्फाधिक्ले़सा 6 मुक्साम्दाङ्बा यहवे दाङ्बे़ल्ले़ साॽरिक् किप्माघुर खे़रे़ङ्घुरुङ् लॽरिक् लुप्लि नु यम्बा इक्लाओ ताङ्गे़से़ःप्तिरो॥ हे़क्क्याङ् खुने़ॽ खइक् खइक् के़इक्सिङ्बा सुरित् केजङ् खे़ब्याङ् याप्मि खाप्पुथ्यःङ् के़जोःक्पा मिधुङ्दिङ् मिराःक्नु तारो॥ 7 हे़क्क्याङ् अरिएल ये़क्यक्किल्ले़ कुदक्ले़ङ्वाओ के़रे़क् सुवाङ्बा आत्तातान्ने यरिक् मनालुप्हाॽ खे़ॽयोबा हाङ्यक्को थङ् मे़जोक्लो, खे़ब्याङ् खे़न् ये़क्यक्किन् किर्गप् मे़गबुरो, कर खे़ङ्हाॽ से़न्दिक्पा सुफो नु से़प्माङ् हे़क्केए मे़मा मे़बेःक्लो॥ 8 कुसिक्के़लाःक्पा मनाःल्ले़ से़प्माङ्मो कुजा चबा निसुरो, कर कुमिक्सोःल्ले़ साक्मे़न्जाए वाॽरो, इग्र कुवागे़मिःक्पा मनाःल्ले़ से़प्माङ्मो च्वाःत् थुङुबा निसुरो, कर कुमिक्सोःल्ले़ कुवामिआङ् कुजाबोःप्मे़न् हेआङ् पत्लो॥ सियोन कोःक्माल्ले़ कुदक्ले़ङ्वाओ थङ् के़जोःक्पा मे़न्छाम् सुवाङ्लुप्हाॽरे़ खुन्छिॽ मे़क्मा सिमे़न्नाङ् हाबा हे़क्तङ्बाए पोङ्लो॥ मनारे़ खे़म्घे़म् मे़ल्लाप्तुम्बा साम्दिङ्हाॽ 9 आल्लसाङ् अदङ् पोःक्खे़म्मे़ॽओ! आल्लसाङ् मिक्मे़न्निमनाबा पोःक्खे़म्मे़ॽओ! कुदे़प्पक्वा थि थिक्काङ् मे़न्धुङ्ङे मआसिम्मे़ॽओ! कुजक्वा थिक्काङ् थि मे़न्धुङ्ङे खे़निॽ लाङ्हाॽ ए़त्तुरो॥ 10 यहवे दाङ्बे़ल्ले़ खे़निॽ मुरुक् खारुक् थेआङ् मे़न्निए इम्मा लाःप्मा के़जोगिरो॥ माङ्निङ्वाॽपान् के़बाःप्पाहाॽग खे़निॽ मिक्हाॽ नु थे़गेःक्सिरो कर निङ्वाॽफुमाङ्ङिल्ले़ खुन्छिॽ मिक्किन् सुबु पिरुसिआङ् पत्लो हे़क्क्याङ् खुन्छिॽ थे़गेःक्किन् ते़प्तु पिरुसिआङ् पत्लो॥ 11 खे़निॽ लागि कन् के़रे़क् मिक् निमा सुफोहाॽग एःप्साप् युक्मनाआङ् सुप्मनाबा साप्कित्तो के़बप्पा पाःन्छेःक्वा हे़क्तङ्बारक्लो॥ हे़क्क्याङ् साप्कित्तिन् निःप्मा के़सुक्पा कुभा मनाधिक् “निरे़ आबिरे़ॽ” फाॽआङ् खे़निॽ के़मे़त्तुम्ने़भग्र खे़ल्ले़ खे़निॽ अक्खेलॽरिक् नुगप् के़बिरिरो, “आहाॽ, कन् एःप्साप् मे़युक्तुआङ् मे़सुबुबा साप्कित्तिन् आङ्गाॽ निःप्मा मे़सुक्कान्लो॥” 12 इग्र कुभा साप्ला निःप्मा मे़न्छुक्मनाबाधिक् “कन् साप्कित्तिन् निरे़आबिरे़ॽओ” के़मे़त्तुम्माङ् के़बिरुम्ने़भग्र खुने़ॽ अक्खे के़मे़त्तिरो, “आङ्गाॽग निःप्माए मे़ले़आन्लो॥” 13 दाङ्बे़ल्ले़ अक्खे पाःत्तुरो, “कन् मनाहाॽ खुन्छिॽ नारा ओसेःन्धाक्से़ आङ्गाॽ आबेसाङ् मे़दारो हे़क्क्याङ् खुन्छिॽ मुराःल्ले़रक् आङ्गाॽ मिङ्सो इङ्धाङ् मे़बिआरो, कर खुन्छिॽ निङ्वान् आङ्गाॽलाम् माःङ्घा वाॽरो॥ खे़ङ्हाॽरे़ आङ्गाॽ से़वा मे़मे़त्ताबाङ्ग हने़ मनाहाॽरे़ मे़हुॽरुसिबा चोःक्थिम्लक्लो॥ 14 कल्ले़चोगुल्ले़ आङ्गाॽ याम्मो थिक्ले़ङ् कन् मनाहाॽरे़ खुन्छिॽ लुम्मो निङ्वाॽ के़माबा नु निङ्वाॽ के़ले़ङ्बा याःम्बक् चोगुङ्ङाङ् निङ्वाॽ ने़हि मार चोगुङ्लो॥ हे़क्क्याङ् सिक्कुम्साबाहाॽरे़ खुन्छिॽ सिक्कुम्निङ्वान् मे़क्लो, हे़क्क्याङ् खे़ङ्हाॽरे़ खुन्छिॽ के़रे़क्नुःल्ले़आङ् चाःत्चाःप्पा मनाःल्ले़ कुचाःत्चाःत् लॽमान् माबेःक्लो॥” के़दाबा ये़म्ले़ लागि लाम्ओमे़प्मा 15 यहवे दाङ्बालाम् के़जिङ्सिङ्बाआङ् स्वाःत् निङ्सेक् के़जोःक्पाहाॽ, खामाक्मो याःम्बक् के़जोःक्पाहाॽ, हे़क्क्याङ् “हाःत्ले़ आनिगे निसिगे़बे? हाःत्ले़ निङ्वाॽ खोसुबे?” फाॽआङ् निङ्वाॽ के़इःप्पाहाॽ मे़जिःत्ते़ मे़स्ये़रो॥ 16 खे़ङ्हाॽरे़ के़रे़क् पाःन्हाॽ ताङ्ग्रात्चि वक्रात्चि मे़जोगुरो, खाम् के़सॽबा कोम्भाल्यान् यम्बाबि खाम्मिन् यम्बाबि? चोःक्मनाबा चिगक्वाःल्ले़ “आङ्गाॽ खे़ने़ॽ के़जोगाङ्बा मेःन्लो” मे़प्मा सुक्तुबि? इग्र “खे़ने़ॽ चोःक्मा थेआङ् के़ल्ले़सुन्” मे़त्तुबि? 17 हाराए ले़बनानबा ताम्भुङ् याक्लाहाॽ प्याङ्सि मे़बोङ्ने़म्बि? हे़क्क्याङ् प्याङ्सिन् लिमे़न्दे़प्मनाबा ताम्भुङ् याक्ला मे़बोङ्ने़म्बि? 18 खे़ल्ले़ याःन्दिक् साप्कित्तो साप्ते़आङ् के़बप्पा पाःन्जाःक्किन् नाधाक्पाल्ले़ खे़प्सुरो, खे़ब्याङ् माक्सिःङ्ग्याःप्पा खामाक्मोलाम् मिक्फःम्बाल्ले़ कुमिक्किल्ले़ निसुरो॥ 19 नःम्नःम्बाहाॽ यहवे दाङ्बाओ मे़सःत्लो, हे़क्क्याङ् याङ्गे़साॽबाहाॽ इस्राइलबा सेसेबा निङ्वाॽफुमाङ्ङो खुन्छिॽ निङ्वाॽ पदादारो॥ 20 कुइगे़भे़म्बा मनाहाॽरे़ खुन्छिॽ मिङ्ङे मारो, हे़क्क्याङ् चे़क्या इङ्दो के़बाःप्पाहाॽ मे़मे़क्लो, खे़म्ब्याङ् ताप्फे़ःम्बा याःम्बक् चोःक्मा फाॽआङ् ओगे़मबा मनाहाॽ खाप्पुथ्यःङ् मे़बोङ्लो॥ 21 आत्तिन्हाॽरे़ मनाहाॽ पाःन्नो मे़धासुसिआङ् आप्तिक्साबा मे़जोगुसिरो, हे़क्क्याङ् खासे़न् लोःम्मादे़न्नो तुःन्देॽ मे़गुःत्तुसिआङ् चे़न्नो मे़धासुसिरो॥ खे़ब्याङ् कुदोःप्मा मनाहाॽ मे़न्वाॽमनाबा पान् मे़धिक्तुसिआङ् खासे़न्लोम्मा मे़ङ्घोम्नाबा मे़जोगुसिरो हे़क्तङ्बा मनाहाॽ यहवे दाङ्बे़ल्ले़ मे़क्खुसिरो॥ 22 कल्ले़चोगुल्ले़ अब्राहाम्मे़न् के़धे़ॽबा यहवे दाङ्बे़ल्ले़ याकुबरे़ कुमुॽइदाङ्साहाॽ अक्खे मे़त्तुसिरो, “याकुबरे़ आल्ल कुना मे़धाने़न्लो, हे़क्क्याङ् खे़ङ्हाॽरे़ खुन्छिॽ नाराआङ् सिरेःप् मे़लॽने़न्लो॥ 23 खे़ङ्हाॽरे़ खुन्छिॽ लुम्मो आङ्गाॽ पिरुङ्सिङ्बा आबाङे खुन्छिॽ साएहाॽ मे़निसुसिरो॥ हे़क्क्याङ् आहुक्कोबा याःम्बक्हाॽ मे़निसुरो, हे़क्केःल्ले़ खे़ङ्हाॽरे़ आङ्गाॽ आमिङ्ङिन् सेसेसाङ्साङ् मे़जोगुरो॥ खे़ङ्हाॽरे़ याकुबरे़ पयम् यम्बा कुसेसे निङ्वाॽफुमाङ्ङिन् सेसेबा फाॽआङ् मे़बाःत्तुरो, हे़क्क्याङ् इस्राइलबा निङ्वाॽफुमाङ्ङिन् मिङ्सो इङ्धाङ् मे़बिरुरो॥ 24 निङ्वाॽ ताक्के़गम्बा मनाहाॽआङ् खासिङ्गे़निःप्पा मे़बोङ्लो, हे़क्क्याङ् मुनुक्नुक् लॽरिक् मने़गे़धिक्पाहाॽरे़आङ् निसाम् हुॽसिङ्मा निङ्वाॽ मे़जोगुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.