यसैया 28 - लिम्बुथाङ्गे़त् ले़प्साङ्बा इस्राइल हाङ्जुम्मिन् साम्दिङ् 1 चिःत्ते़आङ्लक् स्ये़रो, सामरिया ये़क्यक्पा आङ्दिङ् के़लॽबाहाॽरे़ आक्तङ्बा तुक्खेन् मे़दुमुइरो— इस्राइलबा थिमसाङ्हाॽरे़ खुन्छिॽ हाङ्वा माङ्वा तिचःन्॥ कङ्ग चा के़नुॽबा ने़ने़बा ते़न्निल्ले़ कुजङ्ओ ने़रो, कर खे़ल्ले़ नुमा कुघे़म्सिङ्मे़न् फुङ् हे़क्के इरे़म्बेःक्लो, कङ्ग सेजङ्वाःल्ले़ फे़त्लाःन्दुबा मनाःल्ले़ कुआङ्दिङ् लॽमारो॥ 2 ओमे़त्ताम्मे़ॽ, यहवे दाङ्बे़ल्ले़ लत्छा मुक्साम्साबा नु तल्लिक् के़धुम्बाधिक् पाङ्घुरो॥ फःन् नु आमे़ङ्मे़ङ्बा सुरित् केजङ् मुक्पा हे़क्के, वधोःक्कोलाम् च्वाःत् हुङ्मनाबा हे़क्के हे़क्क्याङ् यम्बा सुरित् केजङ् हुःक्पा हे़क्के खुने़ॽ खे़न् साॽरिक्काङ् खाम्बाङ्ङो लाप्फुसुरो॥ 3 एफ्राइम ये़क्यक्को थिःल्ले़ के़मबा मनाहाॽरे़ मे़दिःक्सुआङ् खुन्छिॽ सित्लाओ मे़वारुबा आङ्दिङ् लॽमा फुङ्ङिन् मनाहाॽरे़ लाङ्ङे़ल्ले़ चिदोॽ चिदोॽ मे़दोॽरुरो॥ 4 कङ्ग चा के़नुॽबा ने़ने़बा ते़न्निल्ले़ कुजङ्ओ ने़रो, खे़ल्ले़ नुमा कुघे़म्सिङ्मे़न् फुङ्ङिन् कुइसिक् इरे़म्लो॥ खे़न् चासुम्मा ये़म्मिन्नुःल्ले़ तगि के़दुम्बा पःत्छेॽ कुइसिक् हाराए मे़दुबुआङ् मे़जमे़देसुरो॥ 5 खे़न् ये़न्नो मुक्साम्दाङ्बा यहवे दाङ्बे़न्ने इस्राइलरे़ कुघे़म्सिङ्मा तिच पोङ्लो॥ खुने़ॽए के़हिङ्बा के़याःक्पा कुमनाहाॽरे़ खुन्छिॽ लागि मिमिदिङ्गे़न् पोङ्लो॥ 6 खुने़ॽ खासे़न्लोम्मा फाॽआङ् के़युङ्बाहाॽ खुने़ॽ खासे़न्लोम्मा याम्साम् पिरुसिरो, हे़क्क्याङ् ये़क्यक्कोबा पयम् यम्बा लाम्धेःप्पो थङ् के़जोःक्पाहाॽरे़ लागि खुने़ॽ मुक्साम्ले़ कुबुङ् पोङ्लो॥ थिःल्ले़ के़मबा यहुदाबा लाम्लोबाहाॽ नु यसैयान् 7 कन् माङ्निङ्वाॽपान् के़बाःप्पाहाॽ नु निङ्वाॽफुसाम्बाहाॽ चे़ल्ले़क्सेॽ थिःल्ले़ चोगुल्ले़ होॽदोन् होॽदोन् मे़लॽरो॥ थिःल्ले़ चोगुल्ले़ खे़ङ्हाॽरे़ खुन्छिॽ ले़सोत् मे़ले़ङ्ने़न्लो, खे़ङ्हाॽ थिःल्ले़ चोगुल्ले़ इजो इजो मे़लॽरो॥ चे़ल्ले़क्सेॽ थिःल्ले़ खे़ङ्हाॽ थःत्ता मे़बोःक्खे़आङ् मे़वाॽरो, खे़ङ्हाॽ थिःल्ले़ मयुसिआङ् इजो इजो पे़ःङ्गक् पे़ःङ्गक् मे़लॽरो॥ निङ्वाॽफुमाङ्ङिल्ले़ पिरुसिबा सुफोन् मे़निसुल्ले़ खुन्छिॽ थना ले़ङ्लो, हे़क्क्याङ् खे़ङ्हाॽरे़ चोःक्मा मे़गोःत्तुबा पाःन्निन् निःन्धो चोःक्मा मे़न्छुक्तुन्लो॥ 8 थेआङ्भे़ल्ले़ खे़ङ्हाॽरे़ खुन्छिॽ के़रे़क् चाजामादे़न् साप्ने़त्हाॽ नाम्गे़सुबा पे़ॽमाःत्ते़ल्ले़ तिम्से़आङ् ने़रो, चिःन्जिःन् मे़ङ्घुःम्नादे़न् लत्थिक्काङ् होप्लो॥ 9 हे़क्क्याङ् अक्खे मे़लॽ, “खे़ल्ले़ हात् हुॽमा कोःत्तुबाबे? इङ्घङ्ङिल्ले़ कुबेन् खे़ल्ले़ हात् पोधक् चोगु पिरुर पप्पाबे? थे खारक् नुधुङ्मा के़ले़प्पा अङे़ःक्वाहाॽ हुॽरुसिबाबि? इ खारक् नुधुङ्मा ले़प्मा मे़बाङ्घुसिबा अङे़ःक्वाहाॽ हुॽरुसिबाबि? 10 थेआङ्भे़ल्ले़ खुने़ॽ आनिॽ आमे़त्लो— चोगे़म्मे़ॽआङ् युङे़म्मे़ॽ, चोगे़म्मे़ॽआङ् युङे़म्मे़ॽओ, हे़क्क्याङ् कॽयो चबे़ःत्छिक्, खे़ॽयो चबे़ःत्छिक् खासे़न् लोःन्दाम्मे़ॽ, खासे़न् लोःन्दाम्मे़ॽओ!” 11 खे़ल्ले़चोगुल्ले़ आल्ल वेॽ पाःन्दाङ्लाम्बा नु वेॽ कुसिङ् निःत्मे़न्दे़प्मनाबा पाःन्छेक्वालाम्बा यहवे दाङ्बान् कन् मनाहाॽनु पाःत्लो॥ 12 तगि यहवे दाङ्बे़ल्ले़ कन् लाजेॽओबा मनाहाॽ मे़त्तुसिरो, “नाःम्सिङ्मा ते़न्निङ्ग आम्भा कन्लो, के़नाबा के़घिःम्बाहाॽ हाबा कॽयो मे़नाःम्सिङ्लरो, थेआङ्भे़ल्ले़ सप्फाधिक् नाःम्सिङ्मा ते़न्निङ्ग पा कन्लो” हे़क्केसाङ् खे़ङ्हाॽरे़ खे़म्मा निङ्वाॽ मे़न्जोगुन्लो॥ 13 खे़ल्ले़चोगुल्ले़ यहवे दाङ्बे़ल्ले़ कुबाःन्जाःक्किन् इस्राइल लाजेॽओबा मनाहाॽरे़ खुन्छिॽ लागि अक्खे के़बोङ्बा वाॽरो— चोगाम्मे़ॽआङ् युङे़म्मे़ॽ, चोगाम्मे़ॽआङ् युङे़म्मे़ॽओ, खासे़न् लोःन्दाम्मे़ॽ, खासे़न् लोःन्दाम्मे़ॽओ, आजे़ःत्छिक् खे़ॽयो, आजे़ःत्छिक् कॽयो॥ अक्खेलॽरिक् खे़ङ्हाॽ तगि लाम्मे़लोररो हे़क्क्याङ् मे़गे़ङ्ङाङ् मे़भत्छिङ्लरो, मे़गाःन्नाङ् चे़न्नो मे़धार खे़ब्याङ् मे़दे़म्सु मे़देॽरुसिररो॥ सियोनरे़ कुलागि मालुङ् 14 खे़ल्ले़चोगुल्ले़ मनाहाॽ हिनाःम् के़मे़प्पासे, खे़निॽ यरुसले़म ये़क्यक्को के़युङ्बा मनाहाॽ युक् के़जोगुम्सिम्लो, यहवे दाङ्बे़ल्ले़ कुबाःन्जाःक्के़न् खे़प्साम्मे़ॽओ॥ 15 खे़निॽ अक्खे के़बाःत्तुम्माङ् आङ्दिङ् के़लॽरिरो, “सिमे़न्नु आनिगे माङ्हे़क् चोगुम्बे़आङ् वयिगे़रो, खे़ब्याङ् खे़मा यङ्सङ्ङिन्नु माङ्हे़क् चोगुम्बे़आङ् वयिगे़रो॥ साॽरिक् यम्बा तुक्खेलाक्खे नु सिमे़न् आनिगे सम्धाङ् तासाङ् खे़न् तुक्खे लाक्खेःल्ले़ आनिगे मे़सुसिगे़न्लो॥ थेआङ्भे़ल्ले़ आनिगे इङ्ले़क्के से़ःप्सिङ्मादे़न्निन् इःम्सिङ्मादे़न् चोगुम्बे़आङ् वयिगे़रो हे़क्क्याङ् से़क्खा मेःम्बे़न् आनिगे चिङ्सिङ्मादे़न् चोगुम्बे़आङ् वयिगे़रो॥” 16 खे़ल्ले़चोगुल्ले़ के़रे़क्नुःल्ले़ यम्बा यहवे दाङ्बे़ल्ले़ पाःत्तुरो, “ओमे़त्ते़म्मे़ॽ, आङ्गाॽ यरुसले़म ये़क्यक्को लत्छा लुङ्धिक् युक्खुङ्लो॥ हे़क्क्याङ् खे़ङ्ग से़क्खा चोःक्मनाबा लुङ् थधप् मे़ल्लॽमनाबा हिम्पाङ्यक्ले़ लागि लत्छा कुसुक्पोबा इमे़ल्लुङ्बा मालुङ्लो॥ खे़ॽयो नसान् के़जोःक्पा नु निङ्वाॽ के़युङ्बाहाॽ आप्फाल्ले़आङ् निङ्साङ् पुक्माओ मे़न्धाने़न्लो॥ 17 आङ्गाॽ खासे़न्निन् कुसिःक्मा थाक्पा चोगुङ्लो, हे़क्क्याङ् साम्योनिमान् तोःन्दोम्बा कुसिःक्मा चोगुङ्लो॥ फःन्निल्ले़ खा खे़निॽ इङ्ले़क्के से़ःप्सिङ्मा ते़न्निन् पक्खु तेॽरु के़बिरिरो, हे़क्क्याङ् खे़निॽ चिङ्सिङ्मा ते़न्निन् च्वाःत्तिल्ले़ हुम्सु के़बिरिरो॥ 18 खे़निॽ सिमे़न्नु के़जोगुम्बा माङ्हे़क्किन् थेनाधेबा पोङ्लो, हे़क्क्याङ् खे़मा यङ्सङ्ङिन्नु के़जोगुम्बा माङ्हे़क्किल्ले़आङ् यरिक् इदिक् मे़धरुन्लो॥ यम्बा तुक्खेलाक्खे नु मे़क्मासिमा के़दाःप्पा च्वाःत्तिन् कत्नालाम्बा कुङ्भे़न्नाङ् खे़ल्ले़ खे़निॽ के़हुम्सिरो॥ 19 आप्फाल्ले़साङ् खे़न् च्वाःत्तिन् कुङ्भे़न्ने़ल्ले़ खे़न् च्वाःत्तिल्ले़ खे़निॽ के़बक्खि के़देॽरिरो॥ तानाम् थक्मा हे़क्क्याङ् से़न्दिक् ले़न्दिक् खे़न् च्वाःत्तिन् खे़निॽना कुङ्भे़न्लो॥” कन् इङ्घङ्ङिल्ले़ थे़मा पाःप्मा कोःत्तुबा? खे़ल्ले़ कुबेन् कुसिङ् निःप्माल्ले़ग साॽरिक् किमा यङ्मा पोङ्लो॥ 20 सल्लिक् सन्छिङ्मार ने़मारे़ लागि ने़त्नादे़न्निन् साॽरिक् ताङ्बा पोङ्लो, आबाङे लागि खाम्मा खाम्देःत्तिन् साॽरिक् चुःक्पा पोङ्लो॥ 21 यहवे दाङ्बान् पराजिम कोःक्माओ पलिस्तिहाॽरे़ खुन्छिॽ तक्ले़ङ्वाओ थक्ते़बा कुइसिक् हे़क्क्याङ् गिबोनबा ते़म्बेॽओ एमोरिहाॽरे़ खुन्छिॽ तक्ले़ङ्वाओ थक्ते़बा कुइसिक् तारो॥ खुने़ॽ निङ्वाॽ के़माबा याःम्बक् चोःक्मारे़ लागि, वेॽ परिक्ले़ याःम्बक् चोःक्मारे़ लागि तारो॥ 22 आल्ल खे़निॽ कुनामे़न्छाॽ पाःप्मा ले़राम्मे़ॽओ, मेःन्ने़भग्र खे़निॽ के़म्घेःक्खिबा फे़न्थक्क्रङ्ङिन् आल्लसाङ् साॽरिक् के़लिःप्पा पोङ्लो॥ यहवे दाङ्बा, मुक्साम्दाङ्बा यहवे दाङ्बे़ल्ले़ के़रे़क् लाजेन् मे़क् फाॽआङ् आङ्गाॽ मे़त्ताङ्ङाङ् वाॽरो॥ निङ्वाॽफुमाङ्ङिन् सिक्कुम्साबा चोक् 23 आङ्गाॽ पाःत्तुङ्बा पाःन्निन् नु आइक्लान् खे़प्साम्मे़ॽओ, सिङ्सिङ् लॽरिक् नुरिक्काङ् आङ्गाॽ आबाःन्निन् खे़प्साम्मे़ॽओ॥ 24 हे़क्क्याङ् इक्मसाबा मनाहाॽरे़ कुजा लेःप्मा इग्र हेॽमारे़ लागि खाम्बेःक्किन् मे़दोःक्खुल्ले़ थे खे़ङ्हाॽरे़ आभे़ल्ले़साङ् हाबा मे़दोःक्खुआङ्लक् मे़याक्पि? खे़ब्याङ् खे़ङ्हाॽरे़ चक्मे़ल्लॽए खाम्मिन् मे़अगुआङ् खाम्बक्नान् मे़हिप्तुआङ्लक् मे़याक्पि? 25 खे़ङ्हाॽरे़ खाम्मे़न् ले़प्पे़प्पा मे़जोगुरो हे़क्क्याङ् थे खे़ङ्हाॽरे़ कुनाम् के़नुॽबा मारुक्के़न् नु सःप्फान् मे़न्हेॽरुन्बि? खे़ङ्हाॽरे़ सिन् हाबा खे़ॽयो मे़न्हेॽरुन्बि? खे़ब्याङ् हःक्सिन् आम्भा खे़न् मासिःल्ले़ कुयुक्नाओ मे़ल्लेःत्तुम्बि? खे़ब्याङ् वरे़ङ्ले़ङ्बा मासिन् प्याङ्सिओ मे़न्हेॽरुन्बि? 26 आबाङे कुनिङ्वाॽफुमाङ्ङिल्ले़ खुने़ॽ कुदोःप्मा निसाम् हुॽरुरो हे़क्क्याङ् के़वाॽबा सिक्कुम् निङ्वाॽ पिरुआङ् याःम्बक् चोःक्मा हुॽरुरो॥ 27 आत्तिल्ले़आङ् कुनाम् के़नुॽबा सःप्फान् सुप्सुल्ले़ यम्बा मरःङ्ग्याःल्ले़ मे़हिप्तुन्लो, हे़क्क्याङ् पित्लाधाःल्ले़ कुगाप्लोःक्के़ल्ले़ सःप्फान् मे़नुगुन्लो॥ कर कुनाम् के़नुॽबा सःप्फान् तक्काःत्तिल्ले़ खे़ब्याङ् सःप्फाःङ्ग लत्छा चुक्सा तक्काःत्तिल्ले़ हिप्तुरो॥ 28 खरे़ःङ् ले़ःङ्मा चाःन् लुङ्सुम्मो युःप्माए पोङ्लो, हे़क्क्याङ् मनाहाॽरे़ चानुक्मारे़ लागि पित्लाधाःल्ले़ कुगाप्लोःक्हाॽ खुन्छिॽ अन्हाॽ खे़न् चाःन् सम्धाङ् उःङ्मा मे़बाङ्घुसिसाङ् खे़न् फेॽरुम् मे़बोङ्ने़न्लो॥ 29 ताये़म्मो कन् के़रे़क् पाःन्हाॽ मुक्साम्दाङ्बा यहवे दाङ्बान् लाम्मे पोङ्लो, थेआङ्भे़ल्ले़ खुने़ॽए सुजा पिमाओ निङ्वाॽ के़माबा नु सिक्कुम्साबा चोक्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.