यसैया 27 - लिम्बुइस्राइलिहाॽरे़ चोःक्युम्भो मे़घोसु 1 खे़न् ये़न्नो यहवे दाङ्बे़ल्ले़ किप्मा के़घुबा हे़क्क्याङ् कुमुक् के़याक्पा नु यम्बा ताभेःल्ले़ खे़न् खइक् खइक् के़इक्सिङ्बा के़उःङ्सिङ्बार लाङ्गे़घेःक्पा, वरःङ्ङो के़याक्पा आजाजाबा लिब्याताने़न् पाक्ले़ पाक्ले़ च्ये़प्तुरो, खे़ब्याङ् वरःङ्ङो खे़न् के़वे़ःङ्सिङ्बाआङ् के़युङ्बा असेःक्पे़न् खुम्दिङ् पिरुआङ् स्ये़रुरो॥ 2 खे़न् ये़न्नो, “कुजाॽ के़धोःक्पा लत्छा नुबा चे़ल्ले़क्सेॽ इक्के़ल्ले़ कुयाःम्बेओ खे़निॽ साम्लोराम्मे़ॽओ॥ 3 आङ्गाॽ, यहवे दाङ्बे़ल्ले़ खे़न् चे़ल्ले़क्सेॽ इक्किन् साःक्तुङ्लो, आङ्गाॽ खे़ॽयो थिक्याःन्धक् च्वाःत् केःत्तुङ्लो॥ आङ्गाॽ खे़न् चे़ल्ले़क्सेॽ इक्के़न् से़न्दिक् ले़न्दिक् कोसुङ्लो, मेःन्ने़भग्र मनाहाॽरे़ खे़न् इक्ताप्पिन् मे़दोॽरु मे़लाःक्तुरो॥ 4 आङ्गाॽ आल्ल आयाक् मे़ल्ले़ॽए वाॽआरो, सेर्दाःक्माहाॽ नु तिङ्हाॽ आङ्गाॽ आधेःक्से़ लिङे़बाने़भग्र खे़न् तिङ्हाॽ नु सेर्दाःक्माहाॽ ले़ःङ्मा से़प्मारे़ लागि थङ् चोःक्से़ आङ्गाॽ पेःक्कामे़न्लो, हे़क्क्याङ् आङ्गाॽ तिङ्हाॽ नु सेर्दाःक्हाॽ मिधिक्खुङ् से़रुङ्मे़न्लो॥ 5 खे़ङ्हाॽ आङ्गाॽओ से़ःप्सिङ्से़ मे़दाआङ् नादङ् मे़जोःक्लरो, ओवा, हे़क्केलॽरिक् खे़ङ्हाॽ आङ्गाॽनु मे़दङ्लरो॥” 6 के़दाबा ये़न्हाॽओ याकुबरे़ कुस्साहाॽ इस्राइलबा मनाहाॽ सिङ्बुङ् कुइसिक् कुसाःप् मे़लेःत्छिङ्लो, हे़क्क्याङ् सिङ्बुङ्ङिन् फे़क्काङ् कुजाॽइल्ले़ थिम्सुबा हे़क्के खे़ङ्हाॽ मे़बोन् मे़धे़ॽरो, खे़ब्याङ् काक् इक्सादिङ् खाम्बेःक्किन् मे़धिम्सुरो॥ 7 यहवे दाङ्बे़ल्ले़ इस्राइले़न् खुने़ॽ कुनिङ्मिहाॽ हे़क्के के़साक्पा खुम्दिङ् पिरुबा होप्लो हे़क्क्याङ् खे़म्भ्यारिक् यरिक् कुमनाहाॽआङ् स्ये़रुसिबा होप्लो॥ 8 खुने़ॽ कुमनाहाॽ खुम्दिङ् पिमासि फाॽआङ् वेॽ लाजेॽओ मे़दे़म्सु मे़देॽरुसिर याःन्दुसिरो॥ नाङ्गे़न् पिसाङ्बा किप्मा के़घुबा साम्मिःत् केजङ्ङिल्ले़ हे़क्के खे़न्हाॽ मुःत्तुदेसुसिरो॥ 9 आम्भा कल्ले़ए इस्राइलबा मनाहाॽरे़ खुन्छिॽ लायोन् ले़प्मि चोगुरो, हे़क्क्याङ् खे़ल्ले़ कुलायोन् माःङ्घा पोङ्बा मिक्सेःन्निङ्ग खे़ल्ले़ ले़त्ति तोःम्मा ते़न्हाॽओबा के़रे़क् लुङ्हाॽ खरि-लुङ् कुइसिक् फयःप्फयःप् यःप्सुदेसुरो, खे़ब्याङ् असेरा माङ्ङिल्ले़ कुसित्लाङ्हाॽ नु साङ्सिङ् सुक्पा हाःम्मा ते़रे़ःङ्हाॽ लत्छाआङ् तक्पे़त् मे़युक्खुल्लो॥ 10 कम्ब्राङ् मे़मे़त्तुसिबा ये़क्यक्हाॽ मुरे़क् खारे़क् नु चिजि खक्खक् पोःक्खे़रो, हे़क्क्याङ् मनाहाॽरे़ मे़ले़रुबा नु याङ्धोःक्मा मे़नाॽरुबा एःक्सादे़न् कुइसिक् पोःक्खे़रो॥ खे़ॽयो पित्साःत्हाॽ चामे़राम्लो, खे़न् पित्हाॽ खे़ॽयो मे़नाःम्सिङ्लो हे़क्क्याङ् खे़न् पित्हाॽरे़ खे़ॽयो के़युङ्बा सिङ्ङिल्ले़ कुबोराःक्हाॽ मे़ले़न्दुरो, खे़ब्याङ् कुभे़क्वान् मे़जआङ् मुरे़क् खारे़क् मे़जोगुरो॥ 11 हे़क्केलॽरिक् खे़ॽयोबा चुजुक्सा सिङ्बोराःक्हाॽ हेआङ् मे़ए़क्खुरो, खे़ब्याङ् मे़न्छुमाहाॽ मे़दाआङ् मिओ सिङ् मे़हाःन्दुरो॥ थेआङ्भे़ल्ले़ कङ्हाॽग सिक्कुम् निङ्वाॽ के़होप्पा लत्छा सुवाङ्सिरो खे़ल्ले़चोगुल्ले़ खुन्छिॽ के़जोःक्पा निङ्वाॽफुमाङ्ङिल्ले़ खे़ङ्हाॽ लुङ्माॽ मे़दुक्तुसिन्लो खे़ब्याङ् खुन्छिॽ नावागे़न् चइःत् के़जोक्पे़न् खे़ङ्हाॽओ कुलुङ्मास्याःत् मे़लॽने़न्लो॥ 12 खे़न् ये़न्नो यहवे दाङ्बे़ल्ले़ कुमनाहाॽ युफ्रेतिस वहःङ्ङाङ् कत्ना मिस्र लाजेॽबा वहःङ् थारिक् कुभा मनाहाॽ फुक्खुसि, हे़क्क्याङ् इस्राइलबा मनासे, खे़निॽग कुभा मनाहाॽरे़ सिन् कुसिप्पोलाम् कुजाॽहाॽ लत्छा लत्छा मे़सेगु मे़लःत्तुबा हे़क्के के़म्भुक्खिॽ॥ 13 हे़क्केलॽरिक् खे़न् ये़न्निन् ताःल्ले़ इस्राइलिहाॽ उःप्मासिरे़ लागि लत्छा यम्बा थुत्थुरिःप्पान् लाइक्॥ हे़क्क्याङ् अस्सुर नु मिस्र लाजेॽओ मे़लःत्तुसिआङ् के़वाॽबा इस्राइलि सुवाङ्हाॽ मे़दाआङ् यरुसले़ःम्बा सेसे सियोन कोःक्माओ यहवे दाङ्बान् से़वा मे़मे़त्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.