यसैया 26 - लिम्बुनिङ्वाॽफुमाङ्ङिल्ले़ कुमनाहाॽ थङ् के़नाःम्बा चोगुसिॽ 1 यहुदा लाजेॽओ मनाहाॽरे़ कन् साम्लोन् साम्मे़प्मा ये़न्निन् तार पत्लो— आनिॽ ये़क्यक्किन् लुङ्धाक्किल्ले़ कब्रिङ् कबुबा लिमा सुक्मे़न्दे़प्मनाबा चोक्लो॥ आनिॽग निङ्वाॽफुमाङ्ङिल्ले़ कुसे़न्लप्पिल्ले़ कुलुङ्धाक्हाॽरे़ कब्रिङ् आगबे़आङ् वाॽरो॥ 2 ये़क्यक्कोबा यम्बा लाम्धेःत्हाॽ हन्दे़ॽओ हे़क्क्याङ् साम्योबा मे़न्छाम् सुवाङ्, इग्र नसाःन्साबाहाॽ लाःप्मा मे़सुक्लरो॥ 3 आत्तिल्ले़ कुनिङ्वान् खे़ने़ॽओ इगेःक् लॽआङ् पत्, खे़न् मनान् नुरिक्काङ् सनारुङ्ङो के़गत्तुरो, थेआङ्भे़ल्ले़ खे़न् मनाःल्ले़ कुनिङ्वान् खे़ने़ॽओ युक्खुआङ् वाॽरो॥ 4 आफाल्ले़साङ् यहवे दाङ्बाओ खे़ने़ॽ के़निङ्वान् युक्खे़ॽओ, थेआङ्भे़ल्ले़ यहवे दाङ्बा, यहवे दाङ्बे़न्ने उनाहुरि उनाहुरिआङ्धोबा लुङ्याक्पेॽरो॥ 5 यहवे दाङ्बे़ल्ले़ आङ्दिङ् के़लॽबाआङ् यम्बा के़ले़ङ्सिङ्बाहाॽ मे़नःम्सिङ्ल याःन्दुसिरो॥ चन्जम्बादे़न्नो के़ने़बा ये़क्यक्हाॽ खुने़ॽ यो मे़धार याःन्दुसिरो, कोःक्माओ के़ने़बा खे़न् ये़क्यक्हाॽ खुने़ॽ यो खाम्बेःक्किन्नु तङ्ङाङ् ने़र मक्थाःन्दुसिरो हे़क्क्याङ् खुने़ॽ खे़ङ्हाॽ खाम्हिःक्को लाप्फुसुसिरो॥ 6 आल्लो तुक्खे मे़जाःत्तुसिबाहाॽरे़ खे़प्मो मे़दोॽरुरो, हे़क्क्याङ् याङ्गे़साॽबा मनाहाॽरे़ लाङ्ङिल्ले़ खे़न् मे़लाःक्तुरो॥ 7 साम्योबाहाॽरे़ खुन्छिॽ लाम्मिन् तोःन्दोम्बा चोक्लो, तोःन्दोम्बा खासे़न्लोःम्बाए, खे़ने़ॽए साम्योबाल्ले़ कुलाम्मिन् ले़प्पे़त् के़दङ्बा के़जोगुरो॥ 8 यहवे दाङ्बाए, खे़ने़ॽ कुदोःप्मा के़घासे़न् लोःम्मा लाम्मो, आनिगे हाङ्ङासिगे़रो॥ हे़क्क्याङ् आनिगे के़मिङ्ङिन् मिमिदिङ् चोःक्मा निङ्वाॽ कत्तुम्बे़रो॥ 9 से़न्दिक् आङ्गाॽ आसक्मा साम्मिल्ले़ खे़ने़ॽ के़हङ्लो, तानाम् आङ्गाॽ आयाम्साम्मिल्ले़ खे़ने़ॽ चाहाब् के़जोःक्लो॥ हे़क्क्याङ् खे़ने़ॽ के़घासे़न्निन् इक्सादिङ् खाम्बेःक्को ओसेःन्धाङ् पोङ्लो, खे़ब्याङ् इक्सादिङ् खाम्बेःक्कोबा मे़न्छाम् सुवाङ्हाॽरे़ साम्योबा पाःन्हाॽ मे़हुॽसिङ्लो॥ 10 कुइगे़भे़म्बाहाॽ लुङ्माॽ मे़दुक्तुसिसाङ् खे़ङ्हाॽरे़ साम्योबा याःम्बक्हाॽ चोःक्मा मे़न्हुॽसिङ्ङिल्लो॥ कुदोःप्मा मनाहाॽरे़ खुन्छिॽ लाजेॽओआङ् खे़ङ्हाॽरे़ चक्मे़न्लॽए फे़न्याःम्बक् मे़जोगुरो, हे़क्क्याङ् यहवे दाङ्बाल्ले़ कुमिमिदिङ्ङिन् खे़ङ्हाॽरे़ निनि खे़म्घे़म् मे़ल्लाप्तुन्लो॥ 11 यहवे दाङ्बाए, खे़ङ्हाॽ खुम्दिङ् पिमासिरे़ लागि के़हुक्किल्ले़ थाःङ् के़साःप्सुसिआङ् पत्लो, कर खे़ने़ॽ के़हुक्किल्ले़ के़साःप्सुसिसाङ् खे़ङ्हाॽरे़ निनिआङ् मे़ल्लाप्तुन्लो॥ आबाङे के़मनाहाॽरे़ खुनिॽ लागि खे़ने़ॽ के़सिक्सम्मान् खे़ङ्हाॽरे़ मे़निसुआङ् खे़ङ्हाॽ सिरिङ्ममो मे़धाररो॥ खे़ने़ॽ के़दक्ले़ङ्वाओ के़बोःक्पाहाॽरे़ लागि लाःत्लाःत् के़युक्सुबा मिःल्ले़ खे़ङ्हाॽ खाप्पुथ्यःङ् चोगुसिररो॥ 12 यहवे दाङ्बाए, खे़ने़ॽ आनिगे लागि सनारुङ् याप्मि के़बिरो, खे़न् आनिगे कुलिङ्दो के़रे़र खोसुम्बे़आङ् वयिगे़रो, आनिगे लागि खे़ङ्हाॽ के़रे़क् खे़ने़ॽए के़जोगुबारो॥ 13 यहवे दाङ्बाए, आनिगे निङ्वाॽफुमाङ्ङे, खे़ने़ॽनुःल्ले़ वेॽ याप्मि दाङ्बाहाॽरे़ आनिगे युक् मे़जोगिगे़रो, कर आनिगे़ग खे़ने़ॽ के़मिङ्ङे़न्लक् मिङ्सो इङ्धाङ् पिरुम्बे़रो॥ 14 आसेःन् आनिगे से़वा मे़त्तुम्सिम्बे़बाहाॽ मे़स्ये़ मे़घे़रे़आङ् मे़होप्लो, खे़ङ्हाॽरे़ खुन्छिॽ याम्साम्मिन् आफाल्ले़आङ् याम्मो मे़न्नुःङ्ने़न् मे़न्दाने़न्लो॥ खे़ने़ॽ खे़ङ्हाॽ खुम्दिङ् के़बिरुसिआङ् के़मे़क्खुसिरो खे़ब्याङ् खे़ङ्हाॽ के़रे़क् याम्मो निङ्वाॽसुम् मे़ल्लॽमनाबा के़जोगुसिरो॥ 15 खे़ने़ॽ मे़न्छाम् सुवाङ्हाॽ के़भोसुसिआङ् मे़वाॽरो, यहवे दाङ्बाए, आनिगे मे़न्छाम् सुवाङ्हाॽ के़भोसुसिआङ् मे़वाॽरो॥ हे़क्क्याङ् आनिगे लाजेःल्ले़न् इःन्दोहाॽ के़भोसुआङ् ने़रो, खे़ने़ॽ आबाङेए मिमिदिङ् के़घोसुआङ् के़वाॽरो, खे़ने़ॽ लाजेॽओबा के़रे़क् इःन्दोहाॽ के़भोसुआङ् ने़रो॥ यहवे दाङ्बे़ल्ले़ के़सिबाहाॽ हिङ्मन् पिरुसिॽ 16 यहवे दाङ्बाए, खे़ङ्हाॽ तुक्खे लाक्खे मे़दुमे़ल्ले़ खे़ने़ॽओ मे़द्ये़रो॥ खे़ब्याङ् खे़ने़ॽ खे़ङ्हाॽ के़घुम्सुसिआङ् सुक्मे़न्छुक् पेलि फाक्मा के़सुक्पा मे़बोःक्खे़रो॥ 17 मे़न्छुमाःन् सागप्मा तुङ्ङिल्ले़ तरुल्ले़ साॽरिक् तुक्लो, हे़क्क्याङ् कुदुक्माल्ले़ तरुआङ् अःक् हाःप्लो, हे़क्केलॽरिक्के यहवे दाङ्बाए, आनिगे़आङ् खे़ने़ॽ के़बेसाङ् हे़क्केए पोःक्खिगे़आङ् वयिगे़रो॥ 18 आनिगे तुक्खे च्ये़ॽइगे़ हे़क्क्याङ् तुगिगे़ लाःक्तिगे़रो, कर आनिगे थे़माःन्नाङ् सामे़न्वाःम्मनारो॥ आनिगे लाजेःल्ले़ लागि थङ्ङाङ् मे़न्नाःन्ने वयिगे़रो, हे़क्क्याङ् आनिगे थेःन्नाङ् कुलिङ्दो मे़ङ्गे़त्ते वयिगे़रो॥ 19 कर के़सिबाआङ् के़बेःक्पा आदाङ्बारे़ के़मनाहाॽ याम्मो मे़हिङ्लो, खे़ङ्हाॽ नासिङ्गे़न् थक्लाओ याम्मो मे़हिङ्लो॥ खाम्बाङ्ङो के़ने़बासे, पोगाम्मे़ॽओ हे़क्क्याङ् सःत्ताम्मे़ॽर अःक्ताम्मे़ॽओ॥ थेआङ्भे़ल्ले़ तानाम्बा सेःक्वाःल्ले़ खाम्बेःक्मान् वारक्खुबा कुइसिक्, यहवे दाङ्बाल्ले़ तगि के़सिबाहाॽ याम्मो कुहिङ्वे़त् चोगुसिरो॥ खासे़न् नु याम्मो नुॽमादामा 20 आङ्गाॽ आमनासे, खे़निॽ पेगाम्मे़ॽओ हे़क्क्याङ् खे़निॽ लक्सिङ्हाॽओ लासाम्मे़ॽआङ् लाम्धेःत्हाॽ सुबाम्मे़ॽओ॥ खुने़ॽ कुसाक्के़न्निन् मे़न्जिःक्के थारिक् सप्मारे़ लागि चिङ्ङासिम्मे़ॽआङ् युङाम्मे़ॽओ॥ 21 ओमे़त्ताम्मे़ॽ! इक्सादिङ् खाम्बेःक्कोबा मनाहाॽरे़ खुन्छिॽ लायोल्ले़ चोगुल्ले़ खे़ङ्हाॽ खुम्दिङ् पिमासिरे़ लागि यहवे दाङ्बान् साङ्ग्राम्पेदाङ्लाम् युर पत्लो॥ इक्सादिङ् खाम्बेःक्मोबा मनाहाॽरे़ मे़से़सुबा माक्खिन् ओसेःन्धाङ् मे़जोगुरो, हे़क्क्याङ् मे़स्ये़रुसिबाहाॽ आल्ल याम्मो इक्सादिङ् खाम्बेःक्माल्ले़ चिङ्मा मे़सुक्तुसिन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.