यसैया 25 - लिम्बुयहवे दाङ्बाल्ले़ कुमिमिदिङ् 1 यहवे दाङ्बाए, खे़ने़ॽग आङ्गाॽ आनिङ्वाॽफुमाङ्ने़रो, आङ्गाॽ खे़ने़ॽ मिङ्सो इङ्धाङ् पिने़रो हे़क्क्याङ् के़मिङ्ङो के़नारा फोसुङ्लो॥ थेआङ्भे़ल्ले़ खे़ने़ॽ के़रे़क् के़नसाःन्सामाओ निङ्वाॽ के़माबा याःम्बक्हाॽ के़जोगुरो, खे़न् याःम्बक्हाॽ उन्छोन् उनाहुरिओ निङ्सेक् पोःक्खे़आङ् वये़रो॥ 2 ये़क्यक्किन् आदाङ्बारे़ लुङ् के़लुम्सिङ्बाङ् के़ने़बा के़जोगुरो॥ से़ःप्सिङ्मादे़न् ये़क्यक्किन् खाप्पुथ्यःङ् के़जोगुरो॥ वेॽ लाजेॽबा मनाहाॽरे़ खुन्छिॽ हाङ्यक्किल्ले़ कुधिम् के़बोङ्बा ये़क्यक्किन् आल्ल ये़क्यक् मे़ने़ने़ल्लो, खे़न् याम्मो आभे़ल्ले़आङ् ये़क्यक् मे़न्जोगुन्लो॥ 3 खे़ल्ले़चोगुल्ले़ के़धुम्बा मे़न्छाम् सुवाङ्हाॽरे़ खे़ने़ॽ इङ्धाङ् के़म्बिरो, हे़क्क्याङ् कुनिङ्वाॽ के़जिःप्पा मे़न्छाम् सुवाङ्हाॽरे़ खुन्छिॽ ये़क्यक्को के़युङ्बा मनाहाॽरे़ खे़ने़ॽ के़नारा मे़भोसुरो॥ 4 याङ्गे़साॽबा मनाहाॽरे़ खुन्छिॽ लागि हे़क्क्याङ् ये़त्तुक्खे के़दुम्बा कुधेआङ् के़होःप्पाहाॽरे़ लागि खे़ने़ॽ से़ःप्सिङ्मादे़न् के़बोक्खे़आङ् के़वाॽरो, सुरित् केजङ् हुःल्ले़ वाइःप्सिङ्मादे़न् हे़क्क्याङ् नाम्से़ःक्किल्ले़ इःम्सिङ्मादे़न् नाम्जिःक्खोॽ के़बोक्खे़आङ् के़वाॽरो॥ थेआङ्भे़ल्ले़ कुनिङ्वाॽ के़जिःप्पाहाॽरे़ खुन्छिॽ सक्माःङ्ग लुङ्धाक्को के़दोःक्पा सुरित् केजङ् कुइसिःक्लक् लॽरो, 5 हे़क्क्याङ् मुरे़क् खारे़क्पा ये़ःङ्घादे़न्नो हाङ्वासे़ःक्पा कुइसिक् लॽरो॥ वेॽ लाजेॽ के़युङ्बा मनाहाॽरे़ मे़जोगुबा हयङ् किल्लिङ्ङिन् खे़ने़ॽ चिजि खक्खक् पोङ्ल के़जोगुरो॥ खाॽमिःत्ते़ल्ले़ नाम्मे़न् इःप्तुआङ् नाम्इःक्खङ् चोगुबा कुइसिक् कुनिङ्वाॽ के़जिःप्पाहाॽरे़ खुन्छिॽ साम्लोन् खे़ने़ॽ के़साक्तु के़बिरुसिरो॥ निङ्वाॽफुमाङ्ङिल्ले़ लत्छा साभःङ्जाधिक् यारिप् चोगु 6 मुक्साम्दाङ्बा यहवे दाङ्बे़ल्ले़ आम्भा कन् सियोन कोःक्माओ इक्सादिङ् खाम्बेःक्मोबा के़रे़क् मे़न्छाम् सुवाङ्हाॽरे़ खुन्छिॽ लागि कुजा के़नुॽबा साभःङ्जाधिक् यारिप् चोगुरो॥ खुने़ॽ खे़न् साभःङ्जाओ के़दुम्बा चे़ल्ले़क्सेॽ थि नु कुजा के़नुॽबा सा, तःक्हाॽ वे़त्ते़सरे़ पिरुसिरो॥ 7 खुने़ॽ हाबा कन् कोःक्माओ इक्सादिङ् खाम्बेःक्को मनाहाॽ के़दे़प्पाआङ् के़बप्पा चाङ् हे़क्तङ्बा खे़न् सिमे़ल्ले़ साम्म्रिःप्पान् नु के़रे़क् मे़न्छाम् सुवाङ्हाॽ के़धेःक्पा पःत्थाङ् हे़क्तङ्बा निङ्साम्ले़न् खाॽमिःप्पान् खे़त्तुदेसुरो॥ 8 मुक्साम्दाङ्बा यहवे दाङ्बा निङ्वाॽफुमाङ्ङिल्ले़ सदादिङ्ले़ लागि सिमे़न् थङ्ङो हारिदासुआङ् वाॽरो॥ खुने़ॽ के़रे़क्ले़ खुन्छिॽ मिक्कोलाम् मिक्वान् तुगु पिरुसिरो, खे़ब्याङ् काक् इक्सादिङ् खाम्बेःक्को कुमनाहाॽ कुनामे़न्छाॽ मे़मे़त्तुसिबान् खुने़ॽ खे़त्तुदेसु पिरुसिरो, कन् पाःन्निन् यहवे दाङ्बे़ल्ले़ आबाङे पाःत्तुआङ् वाॽरो॥ 9 कन् हिन्दोःक्के़न् पोङ्ङे़ल्ले़ के़रे़क् मनाहाॽरे़ मे़बाःत्तुरो, “से़क्खासाङ् खुने़ॽए आनिॽ निङ्वाॽफुमाङ्लो! आनिॽ खुने़ॽ कुलाम् ओआमे़त्तुम्लो हे़क्क्याङ् खुने़ॽए आनिॽ ताङ्आसे़ःप्ते़आङ् आवाॽरो॥ खुने़ॽए यहवे दाङ्बारो! खुने़ॽओ आनिॽ निङ्वाॽ आयुक्खुम्लो खुने़ॽ आनिॽ ताङ्आसे़ःप्ते़आङ् आवाॽरो, आनिॽ सःत्तिआङ् ये़ये़ लॽरिरो॥” निङ्वाॽफुमाङ्ङिल्ले़ मोआबिहाॽ खुम्दिङ् पिरुसिॽ 10 कन् सियोन कोःक्मान् यहवे दाङ्बे़ल्ले़ ताङ्से़ःप्तुरो कर याॽलाङ्ङिन् पिॽहिओ चिराक् चिराक् लाःक्मनाबा कुइसिक् मोआब लाजेन् खुने़ॽ कुलाङ्भो सिगाङ् पोङ्लो॥ 11 वरक् के़जाःक्पा मनाःल्ले़ वरक्के़न् चोगुल्ले़ आक्खेलॽरिक् कुहुक्के़न् सन्छुॽ, हे़क्केलॽरिक्के आबाङे से़ःप्सिङ्मारे़ लागि हुक्हाॽ मे़सन्छुरो॥ खे़ङ्हाॽरे़ खुन्छिॽ हुक्हाॽ ओगप् चोःक्मा के़ले़बा मे़ले़ङ्सिङ्साङ् निङ्वाॽफुमाङ्ङिल्ले़ खे़ङ्हाॽरे़ खुन्छिॽ आङ्दिङ् लॽमान् यो थासु पिरुसिरो॥ 12 यहवे दाङ्बे़ल्ले़ मोआबबा हाङ्यक् के़ने़बा खे़न् ये़क्यक्कोबा लुङ्धाक्हाॽ लुःन्दुदेसु पिरुसिरो, हे़क्क्याङ् खे़न् लुङ्धाक्हाॽ खाम्बेःक्को लरे़ःङ्भरे़ःङ् चोगुआङ् खाम्हिःक्को तङ्घुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.