यसैया 24 - लिम्बुयहवे दाङ्बे़ल्ले़ इक्सादिङ् खाम्बेःक्मान् खुम्दिङ् पिरुॽ 1 ओमे़त्ते़म्मे़ॽओ! यहवे दाङ्बे़ल्ले़ इक्सादिङ् खाम्बेःक्मान् मे़ङ्मा चोगुरो॥ खुने़ॽ कन् इक्सादिङ् खाम्बेःक्मान् मे़क्खुआङ् खे़प्मो के़युङ्बा मे़न्छाम् याप्मिहाॽ फुत्छिङ्छाःङ् मे़से़ मे़बेःक्ल याःन्दुसिरो॥ 2 मनाहाॽरे़ मे़दुमुबा तुक्खे हे़क्तङ्बाए निङ्वाॽफुसाम्बाहाॽरे़आङ् मे़दुमुरो, से़वारोबाहाॽरे़ मे़दुमुबा कुइसिक् खुन्छिॽ दाङ्बाहाॽरे़आङ् मे़दुमुरो, सेवारोमाल्ले़ तुमुबा हे़क्केए कुन्दाङ्मे़ल्ले़आङ् तुमुरो, हे़क्क्याङ् चिगक्वा के़इङ्बाहाॽरे़ मे़दुमुबा हे़क्केए के़सङ्बाहाॽरे़आङ् मे़दुमुरो, थे़त्लङ् के़लक्पे़ल्ले़ तुमुबा कुइसिःक्के थे़त्लङ् के़बिबे़ल्ले़आङ् तुमुरो॥ सिङ्नात् के़देॽबाहाॽरे़ मे़दुमुबा हे़क्केए सिङ्नात् के़बिबाहाॽरे़आङ् तुक्खे मे़दुमुरो॥ 3 काक् इक्सादिङ् खाम्बेःक्मान् मुरे़ःक् खारे़क् पोङ्लो, हे़क्क्याङ् याङ्साकुन्धे नाप्सिङ्मा ताप्फे़ःम्बा याःम्बक् पोङ्लो थेआङ्भे़ल्ले़ कन् यहवे दाङ्बे़ल्ले़ आबाङे पाःत्तुआङ् वाॽरो॥ 4 इक्सादिङ् खाम्बेःक्मान् हेआङ् इरे़म्लो, के़रे़क् खाम्बेःक्मान् चप्पाङ् खे़क्तुरो॥ हे़क्क्याङ् योॽबा लाजेॽओबा यम्बयम्बा मनाहाॽ खुन्छिॽ साॽइ यक्लो॥ 5 इक्सादिङ् खाम्बेःक्मो के़युङ्बा मनाहाॽरे़ खुन्छिॽ लायोल्ले़ चोगुल्ले़ कन् इक्सादिङ् खाम्बेःक्मान् चिःन्जिःन् के़घुबा पोःक्खे़आङ् ने़रो॥ थेआङ्भे़ल्ले़ खे़ङ्हाॽरे़ निङ्वाॽफुमाङ्ङिल्ले़ कुइङ्जाङ्ङिन् मे़भेःन्दुआङ् वाॽरो, कुभाङ्हाॽ मे़भेःन्दुआङ् वाॽरो हे़क्क्याङ् सदादिङ्बा माङ्हुप्पिन् इःप्मा नाःप्मा मे़ले़रुआङ् वाॽरो॥ 6 कल्ले़चोगुल्ले़ लत्छा माङ्देधिक्ले़ इक्सादिङ् खाम्बेःक्मान् खाप्पुथ्यःङ् पोङ्लो॥ हे़क्क्याङ् खे़न् इक्सादिङ् खाम्बेःक्मो के़युङ्बा मनाहाॽरे़ खुन्छिॽ आप्तिक्किल्ले़ खुम्दिङ् मे़घोसुरए पोङ्लो॥ पा कल्ले़चोगुल्ले़ योॽबा लाजेॽओ के़युङ्बा मनाहाॽरे़ मिमे़धिक्खु मे़से़रुसिरो, हे़क्क्याङ् चबे़ःत्छिक् मनाहाॽरक् मे़हिङे़ मे़याःक्ते़आङ् मे़वाॽरो॥ 7 कुसङ् चे़ल्ले़क्सेॽ थिन् चप्लो, हे़क्क्याङ् चे़ल्ले़क्सेल्ले़ कुबुङ्ङिन् इले़म्लो॥ सोसोत्लराङ् के़जोःक्पा मनाहाॽ खुनिॽ सक्मा पुॽआङ् खोइक्वा मे़देरो॥ 8 निङ्वाॽ के़दाबा खित्चिङ् खित्चिङ् के़लॽबा मुक्लाःन् मुक्मा नाॽरे़आङ् वाॽरो॥ के़सःप्पा मनाहाॽरे़ खुन्छिॽ इक्लाःन्नाङ् लःम्मा नाॽरे़आङ् वाॽरो॥ निङ्वाॽ ये़ये़ के़मे़प्पा अन्मे खिङ्मनाबा मुक्लाःन् मुक्मा नाॽरे़आङ् वाॽरो॥ 9 आल्लआङ्धो खे़ङ्हाॽ साम्मे़लोःल्ले़ चे़ल्ले़क्सेॽ थिन् मे़न्धुङुन्लो॥ के़धुङ्बाहाॽरे़ चे़ल्ले़क्सेॽ थिन् पघिःक् खिःक्पा मे़निसुरो॥ 10 खाप्पुथ्यःङ् के़बोङ्बा ये़क्यक्किन् मुरे़क् खारे़क् पोःक्खे़आङ् ने़रो॥ हे़क्क्याङ् के़रे़क् हिम्हाॽओबा लाम्धेःप्पाहाॽ मे़ए़त्तुआङ् पत्लो॥ 11 सेजःङ्वा होप्पाल्ले़ चोगुल्ले़ माराम्हाॽओ मनाहाॽ मे़अःक्लो, के़रे़क् सःप्मा एःप्मा पाःन्हाॽ निङ्साङ् के़बुक्पा पोःक्खे़आङ् वाॽरो॥ इक्सादिङ् खाम्बेःक्कोलाम् निङ्वाॽ के़दाबा पाःन्हाॽ मये़बेआङ् होप्लो॥ 12 ये़क्यक्कोग मे़क्मा पाःन्हाॽरक् याःक्ते़आङ् वाॽरो, हे़क्क्याङ् निङ्मिहाॽरे़ पयम् यम्बा लाम्धेःत्हाॽ मे़यन्छुआङ् कुघे़ल्ले़क् कुघे़ल्ले़क् मे़जोगुआङ् ने़रो॥ 13 जैतुन सिङ्बुङ्ङिल्ले़ कुबुङ्ङिन् यङ्माआङ् कुजाॽहाॽ थामनाबा हे़क्के इग्र चे़ल्ले़क्सेल्ले़ कुजाॽइन् तुप्माआङ् थिक्ने़त्छि कुजाॽ पत्याःक्पा कुइसिक् खे़न् इक्सादिङ् खाम्बेःक्को आजे़ःत्छिक्लक् मे़न्छाम् सुवाङ्हाॽ मे़दाङ् मे़याःक्लो॥ 14 खे़ङ्हाॽरे़ खुन्छिॽ इक्लान् मे़उःक्खुरो, हे़क्क्याङ् खे़ङ्हाॽ मे़सःत्ताङ् यम्बा इक्लाओ मे़अःक्लो॥ खे़ब्याङ् यहवे दाङ्बे़ल्ले़ पयम् यम्बा कुमिमिदिङ्ङिल्ले़ लागि खे़ङ्हाॽरे़ तइ नाम्धा ले़प्साङ्लाम् तियाहा मे़लॽर कुनारा मे़भोसुरो॥ 15 खे़ल्ले़चोगुल्ले़ तइनाङ्गे़न् पिसाङ्बाहाॽरे़ यहवे दाङ्बान् मिमिदिङ्ङिन् पिरे़म्मे़ॽओ॥ वरःङ्ङो के़ने़बा वागप्खाम्हाॽओ के़युङ्बाहाॽरे़ इस्राइलबा निङ्वाॽफुमाङ् यहवे दाङ्बे़ल्ले़ कुमिङ्ङिन् थाःङ्धाःङ् फोःक्खाम्मे़ॽओ॥ 16 इक्सादिङ् खाम्बेःक्माल्ले़ नासमा कुसुक्पोलाम् “साम्योबाल्ले़ कुमिमिदिङ् पोङ्लो” के़लॽबा साम्लोन् साम्मे़मे़त्तुबा आनिगे खे़प्सुम्बे़रो॥ कर आङ्गाॽ मे़त्तुङ्सिङ्लो, “आङ्गाॽ हेआ चप्पार पत्तारो, आङ्गाॽ हेआ चप्पार पत्तारो आङ्गाॽ कुसुम् मे़दन्नान् चिःत्ताङ्लक् स्ये़रो! इङ्गे़ले़क्सिङ्बा मनाहाॽ इङ्मे़ले़क्सिङ्लो! इङ्मे़ले़क्सिङाङ्ङे इङ्ले़क् याःम्बक् के़जोःक्पा मनाहाॽ नसान् मे़ले़ङ्सिङ् मे़बिसिङ्लो!” 17 इक्सादिङ् खाम्बेःक्मोबा मे़न्छाम् याप्मिसे, किमा यङ्मा नु लुम्बाःत् हे़क्क्याङ् चे़न्ने़ल्ले़ खिनिॽ के़हाङ्घिआङ् के़वयिरो॥ 18 किमा यङ्मा इक्लान् के़घे़म्बाआङ् के़घे़त्छिङ्बा मनाहाॽ लुम्बाःत्तो मुप्मे़धारो, हे़क्क्याङ् लुम्बाःत्तोलाम् थाःङ् के़लःम्बा के़धाङ्बाहाॽ चे़न्नो मे़धारो॥ साङ्ग्राम्पेदाङ्ङोबा पेधाःप्हाॽ मे़हरे़आङ् मे़बत्लो, खे़ब्याङ् इक्सादिङ् खाम्बेःक्माल्ले़ कुयुक्नान् थुरुप्लुप्ना यङ्लो॥ 19 इक्सादिङ् खाम्बेःक्किन् काॽरे़आङ् ने़रो, हे़क्क्याङ् पःक्खे़आङ् कुलक् ने़त्छि पोःक्खे़आङ् ने़रो खे़ब्याङ् इक्सादिङ् खाम्बेःक्मान् थुरुप्लुप्ना यक्खे़रो॥ 20 थिःल्ले़ के़मबा मनान् होॽदोन् होॽदोन् लॽबा कुइसिक् इक्सादिङ् खाम्बेःक्मान् मुन्जिङ् मुन्जिङ् लॽरो॥ ते़हे़ॽहे़ॽबा याक्माहिम्मिन् सुरिःत्तिल्ले़ वाःन्दुबा हे़क्के इक्सादिङ् खाम्बेःक्मान् ना नु कत्ना मुन्लो॥ खुन्छिॽ आबाङे पिफ्युङ्ङिन् खे़न् इक्सा खाम्बेक् सम्धाङ् साॽरिक् लिःप्पाङ् पत्लो खे़ल्ले़चोगुल्ले़ खे़न् आफाल्ले़आङ् पोःक्मा मे़न्छुक्के चोःन्लो॥ 21 खे़न् ये़न्नो यहवे दाङ्बे़ल्ले़ थाःङ् साङ्ग्राम्पेदाङ्बा मुक्साम्हाॽ नु यो इक्सादिङ् खाम्बेःक्कोबा हाङ्हाॽ खुम्दिङ् पिरुसिरो॥ 22 पुङ्लाधाबाहाॽ पुङ्लाहिम्मो मे़घेःक्खुसिआङ् मे़युक्खुसिबा कुइसिक् खे़ङ्हाॽ के़रे़क् थिक्मे़त्थिक् मे़भुक्खुसिरो॥ खे़ङ्हाॽ पुङ्लाहिम्मो मे़साक्तुसिरो खे़ब्याङ् यरिक् ये़न् एगाङ् खे़ङ्हाॽ खुम्दिङ् मे़बिरुसिरो॥ 23 हे़क्क्याङ् लाबे़न् माक्ताङ्बा पोङ्ङाङ् मे़ओःत्ने़न्लो, खम्भ्याङ् नाम्मिन्नाङ् मे़से़ःक्ने़न्लो थेआङ्भे़ल्ले़ मुक्साम्दाङ्बा यहवे दाङ्बे़ल्ले़ सियोन कोःक्माओ नु यरुसले़म ये़क्यक्को के़वाॽबा साम्योसिक्साम्बाहाॽरे़ खुन्छिॽ तगि मिमिदिङ्गे़न् हाङ्युक् चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.