यसैया 23 - लिम्बुतुरोस ये़क्यक्किल्ले़ कुयाःम्बेओ माङ्निङ्वाॽपान् 1 तुरोस ये़क्यक्किल्ले़ कुयाःम्बेओ माङ्निङ्वाॽपान्— ले़ङ्हङ् के़जोःक्पा यम्बा वालाधाहाॽओ के़याक्पा मनासे, मे़रिङ् थक्ताम्मे़ॽओ, थेआङ्भे़ल्ले़ तुरोस ये़क्यक्किन् खाप्पुथ्यःङ् पोःक्खे़आङ् ने़रो, हे़क्क्याङ् खे़ॽयो हिम्धाःङ् नु वागप्खेःङ्हाॽ थेआङ् मे़याःक्ते़न्नाङ् मे़ने़ने़न्लो॥ खे़ङ्हाॽरे़ खुन्छिॽ लागि साइप्रसलाम् लत्छा इङ्घङ्धिक् त्ये़आङ् वाॽरो॥ 2 वागप्खाम्मो के़युङ्बा मनासे, हे़क्क्याङ् सिदोन ये़क्यक्को के़युङ्बा ले़ङ्हङ् के़जोःक्पा मनासे! वरःङ्ङो ले़ङ्हङ् के़जोःक्पाहाॽरे़ खे़निॽ ये़क्यक्किन् याङ्साकुन्धेसाबा के़जोगुम्लो, खे़निॽ स्वाःत् वये़म्मे़ॽओ॥ 3 यम्बा च्वाःत्तोलाम् सिहोरबा पोगुगे़न् कुजाहाॽ त्ये़रो, निल वहःङ्ङोबा चासुम्मान् तुरोस ये़क्यक्को हुङ्मा के़बोङ्बा एःङ्याङ् वये़रो॥ हे़क्क्याङ् खे़न् लाजेन् वेॽ वेॽ सुवाङ्हाॽरे़ खुन्छिॽ सङ्इङ्दे़न् पोःक्खे़रो॥ 4 सिदोन नु वरःङ्ङिल्ले़ कुयाओ के़ने़बा हाङ्यक्को के़युङ्बासे, खे़निॽ सिरिङ् मये़म्मे़ॽओ, थेआङ्भे़ल्ले़ वरःङ्ङिल्ले़ अक्खे पाःत्तुआङ् वाॽरो, “आङ्गाॽग अङे़ःक्वा सावाःम्मा तुङ्ङे़ल्ले़आङ् मे़म्दे़म्मे कत्तारो, अङे़ःक्वा साआङ् मे़ङ्गत्ते वाॽआरो॥ हे़क्क्याङ् आङ्गाॽ अङे़ःक्वा ये़म्बित्छा नु मे़न्छुमा साहाॽआङ् मे़न्हिङ् मे़ङ्गुम्से वाॽआरो, खे़ब्याङ् यम्बा यम्माआङ् मे़न्जोःक्सिङ्ङे वाॽआरो॥” 5 तुरोस ये़क्यक्किन् खाप्पुथ्यःङ् पोङ्बा इङ्घङ्ङिन् मिस्र लाजेॽओ के़त्लो, हे़क्केःल्ले़ खे़प्मोबा मनाहाॽरे़ खे़न् इङ्घङ्ङिन् मे़घे़प्सुआङ् खे़ङ्हाॽ साॽरिक् मे़रिङ् मे़धक्लो॥ 6 वरःङ्ङिन् काःक्ताम्मे़ॽआङ् तर्सिस पेगाम्मे़ॽओ, वरःङ्ङिल्ले़ कुयाओ के़युङ्बा मनासे, खे़निॽ मे़रिङ् थक्ताम्मे़ॽआङ् हाबाम्मे़ॽओ॥ 7 उनाहुरिआङ्धो मे़ने़स्सुबा ससाङ्स्रोत् चोःक्मा तुरोस ये़क्यक्किन् हाबा कन्बि? वरःङ्ङाङ् नाधाःम्बि कुसङ् लाजेॽ फे़ःङ्से़ कुमना के़बाङ्बा ये़क्यक्किन् आम्भा कन्नेबि? 8 तिचहाॽ आबिबा तुरोस ये़क्यक्को ले़ङ्हङ् के़जोःक्पाहाॽग हाङ्सासिरो, कॽयो के़युङ्बा ले़ङ्हङ् के़जोःक्पाहाॽग इक्सादिङ् खाम्बेःक्को खुन्छिॽ मिङ् के़दिःप्पा मे़जोगे़रो खे़न् ये़क्यक्किन् मे़ङ्मा हाःत्ले़ अक्तङ्बा निङ्सेःक् चोगुबे? 9 खे़न् ये़क्यक्को के़युङ्बा मनाहाॽरे़ खुन्छिॽ के़रे़क् आङ्दिङ् लॽमे़न् कुसुम् मे़न्दम्मनाबा चोःक्मारे़ लागि हे़क्क्याङ् इक्सादिङ् खाम्बेःक्कोबा के़रे़क् कुमिङ् के़दिःप्पा मनाहाॽ मे़नःम्सिङ्ल चोःक्मासिरे़ लागि मुक्साम्दाङ्बा यहवे दाङ्बे़ल्ले़ कन् निङ्सेःक्के़न् चोगुबारो॥ 10 तार्सिसबा मनासे! पेगे़म्मे़ॽआङ् खे़ॽयोबा खाम्मिन् अगाम्मे़ॽओ! आल्ल खे़निॽ कम्ब्राङ् के़मे़प्पा हाःत्ताङ् होप्लो॥ 11 यहवे दाङ्बे़ल्ले़ कुहुक्हाॽ वरःङ्ङिल्ले़ कुसम्दाङ् सन्छुआङ् पत्लो हे़क्क्याङ् खे़ल्ले़ कुयाओ के़ने़बा हाङ्जुम्हाॽ मे़यङ्ल याःन्दुसिआङ् वाॽरो॥ खुने़ॽ वरःङ्ङिल्ले़ कुयाओ के़ने़बा फोनिसिया लाजेबा हाङ्यक्हाॽ खाप्पुथ्यःङ् चोःक्मा इङ्जाङ् पिरुसिआङ् वाॽरो॥ 12 यहवे दाङ्बे़ल्ले़ पाःत्तुरो, “सिदोने़ल्ले़ कुस्सा मे़न्छिन्से, आल्ल खे़निॽ ससाङ्स्रोत् लॽमे़न् मे़गे़आङ् वाॽरो॥ हे़क्क्याङ् ये़क्यक्को के़युङ्बा खिनिॽ मनाहाॽ तुक्खे मे़जाःत्तुसिआङ् मे़वाॽरो॥ खे़ङ्हाॽ मे़घे़त्छिङ्ङाङ् साइप्रस ले़प्माङ् मे़बेःक्साङ् खे़प्मोआङ् खुन्छिॽ तुक्खेन् चक्मे़लॽने़ल्लो॥” 13 बेबिलोनबा लाजेन् ओमे़त्ताम्मे़ॽओ, खे़न् लाजेॽओ के़युङ्बा सुवाङ्हाॽ आल्ल मे़होप्लो॥ अस्सुरबा मनाहाॽरे़ खे़न् लाजेन् मुरे़क् खारे़क्पा ये़ःङ्घादे़न्नो के़याक्पा थक्सापुसा याक्नादे़न् मे़जोगु मे़बिरुसिआङ् वाॽरो॥ खे़ङ्हाॽरे़ थङ् थक्मा चङ्हिम्हाॽ मे़भोःक्खुरो, हे़क्क्याङ् खे़ङ्हाॽरे़ हाङ्यक्हाॽ मे़लुःन्दुआङ् मे़लुप्सु मे़ने़स्सुरो॥ 14 ले़ङ्हङ् के़जोःक्पा यम्बा वालाधाहाॽओ के़याक्पा मनासे, मे़रिङ् थक्ताम्मे़ॽओ, थेआङ्भे़ल्ले़ खे़निॽ हाङ्यक्किन् खाप्पुथ्यःङ् मे़जोगुआङ् ने़रो॥ 15 खे़न् ये़म्मो तुरोस ये़क्यक्किन् तङ्बेॽ नुबोङ् थारिक् इग्र लत्छा हाङ्धिक्ले़ कुधाःक् थारिक् निङ्वाॽमुःन्॥ कर तङ्बेॽ नुबोङ् काःक्तुआङ् तुरोस ये़क्यक्किन् लत्छा के़त्निमाधिक्ले़ कुसाम्लो हे़क्तङ्बा पोङ्लो— 16 निङ्वाॽ के़मुःम्मा के़त्निमाए, मुक्लाहाॽ मुक्खे़ॽर ये़क्यक्किल्ले़ कुलुम्मोलाम् पोःक्खे़आङ् पेगे़ॽओ॥ मुक्ला मुक्खे़ॽआङ् यरिक् साम्लोहाॽ साम्मे़त्ते़ॽ खे़ल्ले़चोगुल्ले़ याम्मो खे़ने़ॽ निङ्वाॽसुम् के़लॽरो॥ 17 नुबोङ् तङ्बेरे़ कुनुप्मो यहवे दाङ्बे़ल्ले़ तुरोस ये़क्यक्किन् याम्मो आबाङे खुने़ॽ कुगे़त्निमा चोःक्मा याःम्बक्को नुःङ्मा पाङ्घुॽ, हे़क्क्याङ् इक्सादिङ् खाम्बेःक्कोबा के़रे़क् हाङ्जुम्हाॽनु खे़ल्ले़ ले़ङ्हङ् चोःक्मा याःम्बक् चोगुॽ॥ 18 हे़क्केसाङ् खे़ल्ले़ कुइन्धाःक्किन् नु खे़ल्ले़ याःम्बक् चोगुआङ् थगुबा कुयाङ्ङिन् यहवे दाङ्बे़ल्ले़ कुलागि लाःत्लाःत् मे़से़न्दुॽ॥ खे़न् लाःत्लाःत् मे़से़न्दुबा याङ्ङिन् याङ् याङ्मादे़न्नो मे़न्युक्खुन्ॽ॥ खे़ल्ले़ ले़ङ्हङ् चोगुआङ् थगुबा याङ्ङिन् यहवे दाङ्बे़ल्ले़ कुमनाहाॽरे़ लागि वे़त्ते़सरे़ चामा थुङ्मा नु नुःब्नुबा चाङ् चाङ्मारे़ लागि पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.