यसैया 22 - लिम्बुयरुसले़म्मिल्ले़ कुयाःम्बेओ माङ्निङ्वाॽपान् 1 कङ्ग सुफो निमा ने़ने़बा ते़म्बेॽइल्ले़ कुयाःम्बेओ माङ्निङ्वाॽपान्लो— थे़मा पोङ्ल पत्ताङ् ये़क्यक्कोबा मनाहाॽ हिम्हाॽरे़ कुसम्धाङ् तङ्नाम् मे़दोर मे़याक्पाबे? 2 हयङ् किल्लिङ् नु अःक्मा फिःक्मारे़ के़दिम्बा ये़क्यक्कोबा मनासे, हे़क्क्याङ् सोसोत्लराङ् चोःक्मारे़ कुधिम् के़बोङ्बा ये़क्यक्कोबा मनासे॥ के़सिबा के़मनाहाॽ ताभेःल्ले़ मे़से़रुसिबा मेःन्लो, हे़क्क्याङ् थङ्ङो मे़से़रुसिबाआङ् मेःन्लो॥ 3 खे़ने़ॽ के़युक्साबाहाॽ के़रे़क् थिक्ले़ङ्ले़ सोरिक् मे़घे़त्छिङ् मे़बेरो, हे़क्क्याङ् खे़ङ्हाॽ तोङ् लिरे़ मे़न्आप्सिङ्ङेए इघेःङ्ङो मे़ध्ये़रो॥ निङ्मिहाॽ माःङ्घा मे़वये़ःल्ले़सा खे़निॽ के़घे़त्तासि के़बेगिरो, हे़क्क्याङ् खे़निॽ थिक्ले़ङ्ले़ सोरिक् इघेःङ्ङो के़धाबाहाॽ के़रे़क् के़म्दे़म्सिआङ् के़म्देॽरिरो॥ 4 खे़ल्ले़चोगुल्ले़ आङ्गाॽ मे़त्ने़रो, “आङ्गाॽ एःक्से़त्छा ले़राङ् थ्याङ्ङे़ॽओ॥ आङ्गाॽ उःक्काङ् उक् हाःप्मा खोआररो, पप्प्राॽमा आमनाहाॽ मे़मे़गे़ मे़मारे़बाल्ले़ चोगुल्ले़ आङ्गाॽ हाङ्हाङ् मे़प्मा तम्सिङ् मे़जोगाम्मिन्ने़ॽ॥” 5 सुफो निमा ने़ने़बा ते़म्बेॽओ यहवे दाङ्बा, मुक्साम्दाङ्बा यहवे दाङ्बान्लाम् पोःक्खे़बा कन् हयङ् किल्लिङ् हे़क्क्याङ् चिदोॽ चिदोॽ तोॽमा नु किमा यङ्मा ये़न्लो, खे़ब्याङ् लुङ्धाक्हाॽ लुःम्मा, नु आभाॽरे़ फाॽआङ् पेलि फाक्मनाबा इक्लान् कोःक्मा फाङ्जङ् थे़गु माङ्वाहाॽओ तोःक्काङ् लोःक्खुबा ये़न्लो॥ 6 एलाम के़युङ्बा अन्लाधा के़लोङ्बा थक्सुबाहाॽरे़ अन्हाॽनु सोरिक् तोङ् याङ्मा काःन्द्यान् मे़हेॽसिङ्लो॥ हे़क्क्याङ् किर ते़ङ्गप्पो के़युङ्बा थक्सुबाहाॽरे़ खोःन् कुसुःम्मोलाम् मे़लःत्तुआङ् मे़याङ्सिङ्लो॥ 7 नुःब्नुबा के़ने़वाला ते़म्बेॽहाॽ अन्लाधाहाॽरे़ सधे़क् तिम्लो, हे़क्क्याङ् अन्गे़लोङ्बाहाॽ ये़क्यक्कोबा मालाम्धेःत्हाॽओ कोमाआङ् ये़प्मारे़ लागि मुरा मे़मे़त्तुसिआङ् मे़वाॽरो॥ 8 यहुदा लाजेॽओबा कम्ब्राङ्हाॽ फे़जुम्भे़या मेःन्ने मे़जोगुसिआङ् मे़वाॽरो॥ खे़न् ये़न्नो ताम्भुङ्ङोबा हाङ्हिम्मो के़वाॽबा फे़जुम्भे़याहाॽ खे़निॽ के़गोःत्तुम्लो॥ 9 दाउद हाङ्ङिल्ले़ कुये़क्यक्कोबा से़ःप्सिङ्मादे़न् लुङ्धाक्हाॽओ यरिक् कुहङ्हाॽ पत्लत्छ फाॽआङ् खे़निॽ के़निसुम्लो, खे़निॽ योसमा वरक्को च्वाःत्तिन् के़धे़ङुम्लो॥ 10 खे़निॽ यरुसले़म ये़क्यक्को के़बेगिआङ् हिम्हाॽ के़निरुम्सिम्, हे़क्क्याङ् लुङ्धाक्के़न् से़प्मा फाॽआङ् हिम्हाॽ के़धुप्सुम्सिम्लो॥ 11 ये़क्यक्किल्ले़ कुलुम्मोबा लुङ्धाक्हाॽओ के़ने़बा तगिबा वरक्लाम् वागे़गुबाआङ् के़बेःक्पा च्वाःत्तिल्ले़ लागि खे़निॽ लत्छा च्वाःत् याङ्मा वरक् थिक् के़जोगुम्लो॥ कर उनाहुरिबा ये़म्माङ्धोए कन् निङ्सेःक् के़जोःक्पा निङ्वाॽफुमाङ्ङिन् खे़निॽ निङ्वाॽ के़न्इःत्तुम्मिन्लो॥ मे़रिङ्धक्मा के़बोङ्बा ये़न्धिक् ताःॽ 12 खे़न् ये़न्नो यहवे दाङ्बा, मुक्साम्दाङ्बा यहवे दाङ्बे़ल्ले़ खे़निॽ हाःप्मा नु मे़रिङ्धक्मा, थे़गेक् नःङ्मा हे़क्क्याङ् सागि तेत् चाङ्मारे़ लागि के़उःत्तिआङ् वये़रो॥ 13 कर ओमे़त्ते़म्मे़ॽओ, याम्नाःम् नु सासाङ् स्रोःत् चोःक्मा याःम्बक्नि पोङ्ल पत्लो॥ थक्साहाॽ मे़ङ्मासि नु मे़ल्लुक्हाॽ से़प्मासि, साजामा नु थि थुङ्मा याःम्बक्नि पोङ्ल पप्पा! खे़निॽ के़बाःत्तुम्, “ल, चाम् थुङुम्लो, थेआङ्भे़ल्ले़ ताःन्दिक्क आनिॽ आसिएरो!” 14 मुक्साम्दाङ्बा यहवे दाङ्बे़ल्ले़ आने़क्खोॽओ आङ्गाॽ कन् पाःन्निन् मे़त्ताङ्लो, “कन् लायोन् खे़निॽ सिमा ये़म्मो थारिक्साङ् ले़प्मि मे़बोङ्ने़न्लो॥” सेब्नाःल्ले़ कुलागि साम्दिङ् 15 कल्ले़चोगुल्ले़ मुक्साम्दाङ्बा यहवे दाङ्बे़ल्ले़ अक्खे पाःत्तुरो, “पेगे़ॽआङ् हाङ्हिम्मो हिमा तङ्मा याःम्बक् के़जोःक्पान् अक्खे मे़त्ते़ॽओ, 16 खे़ने़ॽ कॽयो थे़मा के़जोःक्ल के़वाॽ? हे़क्क्याङ् आबाङे खे़ने़ॽ के़लागि कॽयो इपुङ् खोःम्मा हाःत्ले़ युक् के़बिरे़? थेआङ् कन् चन्जम्बादे़न्नो आबाङे खे़ने़ॽ के़लागि इपुङ् चोःक्से़ नु याक्पेॽओ आप्फेक् के़ने़मादे़न् चोःक्से़ खे़ने़ॽ कॽयो के़घोःन्दुर के़याक्पाबे? 17 के़धुम्बा मनाए, ओमे़त्ते़! यहवे दाङ्बे़ल्ले़ खे़ने़ॽ थधप् लॽमा मे़ङ्घोए के़दे़म् हे़क्क्याङ् माःङ्घा लाप्पुङ् के़देरो॥ 18 “यहवे दाङ्बे़ल्ले़ खे़ने़ॽ चिरिक्किल्ले़ के़सुङ्ङाङ् लाङ्भङ्वा कुइसिक् लत्छा यम्बा लाजेॽओ लाप्के़देरो॥ आम्भा खे़ॽयो खे़ने़ॽ के़सिरो हे़क्क्याङ् कुमाङ्वा कुहाङ्वा के़याक्पा के़अन्लाधाहाॽ मे़गे़ङ्ङाङ् मे़ने़रो— खे़ने़ॽ के़न्दाङ्बे़ल्ले़ कुहिम्मो नाधामा साम्धामा पाःन्हाॽ के़दारुरो॥ 19 आङ्गाॽ खे़ने़ॽ के़याःम्बक्कोनु लाःक्कात् लःत्ने़देने़रो, हे़क्क्याङ् आबाङे के़युक्नादे़न्नोलाम् यो मक्थाःन्ने़रो॥” 20 यहवे दाङ्बे़ल्ले़ सेब्नाःन् मे़त्तु, “खे़न् ये़न्नो हिल्कियाहरे़ कुस्सा आङ्गाॽ आसे़वारोबा एल्याकिम्मे़न् खे़ने़ॽ के़ले़क्वाओ उःत्तुङ्ङाङ् युक्खुङ्ॽ॥ 21 आङ्गाॽ खे़न् मनान् खे़ने़ॽ के़जाङ्हाॽ चाक्तुङ्ॽ हे़क्क्याङ् खे़ने़ॽ के़भॽइन् खुने़ॽ युप्तुङ्ॽ, खे़ब्याङ् खे़ने़ॽ के़युक्के़न् खे़ल्ले़ कुहुक्को हुक्सुप्तुङ्ॽ॥ खे़न् मनान् यरुसले़म ये़क्यक्को के़युङ्बा नु यहुदा लाजेॽओ के़युङ्बा मनाहाॽरे़ खुन्छिॽ हिम्सयङ्ङोबा पानुदिङ् पा हे़क्के पोङ्ॽ॥ 22 दाउद हाङ्ङिल्ले़ कुहिम्सयङ्ङोबा तिमिक्के़न् आङ्गाॽ खे़ल्ले़ कुलक्पे़न्नो हुक्सुप्तुङ्ॽ॥ खे़ल्ले़ हन्दुबान् हाःत्ले़आङ् सुप्मा मे़सुक्तुन्ॽ, हे़क्क्याङ् खे़ल्ले़ सुबुबान् हाःत्ले़आङ् हम्मा मे़सुक्तुन्ॽ॥ 23 आङ्गाॽ खे़न् मनान् ये़प्थेःक्को के़बप्पा लत्छा तधप् मे़ल्लॽमनाबा वेॽमासिङ् कुइसिक् चोगुङ्ॽ॥ हे़क्क्याङ् खे़न् आबाङे कुम्बारे़ कुहिम्मिल्ले़ लागि लत्छा मिङ्सो थाःङ्सोरे़ युक्नादे़न् पोङ्ॽ॥ 24 “कर खुने़ॽ आबाङे कुहिम्सयङ्ङोबा के़रे़क् हाङ्वा माङ्वा कुमुॽइदाङ्साहाॽ नु कुधाःक्हाॽ, हे़क्क्याङ् कुहिम्सयङ्ङोबा खक्पे़त् चुजुक्सा मनाहाॽ लत्छा सित्लाङ्ङो यरिक् सामाहाॽ लिःप्ल फोःम्मनाआङ् के़बप्पा कुइसिक् खुने़ॽए कुलक्पे़न्नो थारो॥ 25 खे़न् ये़न्नो, ये़प्थेःक्को के़बप्पा थधप् मे़ल्लॽमनाबा खे़न् वेॽमासिङ्ङिन् चत्छिङ्ॽ॥ हे़क्क्याङ् खे़न् वेॽमासिङ्ङिन् मे़आःक्खु मे़देसुॽ, खे़ब्याङ् खे़न् वेॽमासिङ्ङो के़भोःन्छिङ्बाङ् के़बप्पा के़लिःप्पा कक्किन् मे़घक्तुआङ् मक्था॥” यहवे दाङ्बे़ल्ले़ आबाङे पाःत्तुआङ् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.