यसैया 21 - लिम्बुबेबिलोन ये़क्यक्किल्ले़ कुदक्ले़ङ्वाओ माङ्निङ्वाॽपान् 1 वरःङ्ङिल्ले़ कुयाओ के़ने़बा मुरे़क् खारे़क्पा ये़ःङ्घादे़न्निल्ले़ कुयाःम्बेओ माङ्निङ्वाॽपान्— लाङ्गे़त् पिसाङ्बा लाजेॽओ यम्बा साम्मिःत् इस्वारि पोःक्पा कुइसिक्, मुरे़क् खारे़क्पा ये़ःङ्घादे़न्नोलाम्, किप्मा के़घुबा लाजेॽलाम् लत्छा आसे़त्से़प्पाधिक् थाङ्ल पत्लो॥ 2 किप्मा के़घुबा लत्छा सुफोधिक् आङ्गाॽ ओसेःन्मे़धाक्ताङ्लो— इङ्ले़क् के़जोःक्पे़ल्ले़ इङ्ले़क्के चोगुरो, हे़क्क्याङ् के़मे़ङ्बे़ल्ले़ मे़क्खुरो॥ एलामबा थक्सुबासे, ते़न्धङ् चोगे़म्मे़ॽओ, मादिबा थक्सुबासे, ये़क्यक्हाॽ कब्रिङ् कबाम्सिम्मे़ॽओ बेबिलोनबाहाॽरे़ मे़याःत्ल मे़याःन्दुसिबान् आङ्गाॽ नुप्सुङ् पिरुङ्सिङ्लो॥ 3 कल्ले़चोगुल्ले़ आङ्गाॽ आधक्किन् के़रे़क् साॽरिक् तुक्लो, सागप्मा तुङ्ङिल्ले़ तरुमा मे़न्छुमान् कुइसिक् तुक्मे़ल्ले़ याङ्साङ्ङाङ् वाॽरो॥ थेःन् खे़प्सुङ् खे़ल्ले़ आङ्गाॽ याःन्नारो थेःन् निसुङ् खे़ल्ले़ आङ्गाॽ आनिङ्वाॽ तुक्लो॥ 4 आङ्गाॽ आलुङ्माॽ फ्याःङ्भ्याःङ् लॽआङ् वाॽआरो आङ्गाॽ पगि किए़आङ् यङ्ङारो॥ आसिराॽ के़धाङ्बा युःन्छिक्पा माक्चिवजि लॽमे़न्लो आङ्गाॽ आगिमा आयङ्मा पोःक्खे़आङ् वाॽरो॥ 5 ओमे़त्ते़म्मे़ॽ, खे़ङ्हाॽरे़ चामा थुङ्माहाॽ मे़धाबुरो, युङ्ना मे़भे़सुॽ, हे़क्क्याङ् मे़ज मे़धुङुरो सुहाङ्युक्पासे, पोगे़म्मे़ॽ, खोहाॽ यारिप् चोगाम्मे़ॽओ! 6 यहवे दाङ्बे़ल्ले़ आङ्गाॽ अक्खे मे़त्ताङ्लो, “पेगे़ॽ, इक्के़गोबा युक्खे़ॽओ खे़ल्ले़ थेःन् निसुॽ खे़न् पाःत्तुरो॥ 7 आल्ल खे़ल्ले़ कुदिःक् कुदिःक् अन्लाधा के़लोङ्बाहाॽ, अदङ्हाॽ नु उमेहाॽ के़युक्पाहाॽ मे़भे़न्ल मे़बप्पा निसुसिरो, हे़क्केःल्ले़ खे़न् चाःत्चाःत्ताङ् सिङ्सिङ् ये़क्ये़क् लॽरो॥” 8 खे़न् इक्के़गोबे़न् अक्खे लॽरे़आङ् अःक्ते़रो, “आदाङ्बे, आङ्गाॽ थिक्याःन्धक् इक्के़गोबे़न् चङ्हिम्मो ये़प्मागन्नारो, हे़क्क्याङ् से़न्दिक् थप्मे इक्कोमादे़न्नो वाॽआरो॥ 9 ओमे़त्ते़म्मे़ॽ, कुगाप्थिक् अन्ले़ उःङ्सुबा लत्छा लाधासम्धाङ् लत्छा मनाधिक् फे़न्ल पत्लो॥ हे़क्क्याङ् नुगप् पिरुसिर पाःत्तुरो, ‘बेबिलोन ये़क्यक्किन् खाप्पुथ्यःङ् पोःक्खे़रो, खाप्पुथ्यःङ् पोःक्खे़रो, खे़ब्याङ् खे़ॽयो मे़लक्तु मे़घोःन्दुआङ् मे़जोगुसिबा के़रे़क् माङ् नावाइत्लाहाॽ फल्लक् वरक् मे़ए़क्खुसिआङ् खाम्बाङ्ङो मे़गे़ङे़आङ् मे़ने़रो॥’” 10 आमनासे, याॽ थाम्मादे़न्नो सि मे़नुगुबा कुइसिक् खिनुक् खिनुक् मे़नुगुसिबासे! इस्राइलबा माङ्, मुक्साम्दाङ्बा यहवे दाङ्बान्लाम् खे़प्सुङ्बा पाःन्हाॽ आङ्गाॽ खे़निॽ मे़त्निङ्लो॥ ए़दोम लाजेःल्ले़ कुयाःम्बेओ माङ्निङ्वाॽपान् 11 ए़दोम लाजेःल्ले़ कुयाःम्बेओ माङ्निङ्वाॽपान्— “इक्के़गोबे, खाओःप्मा आक्ख्यारिक् वाॽ? इक्के़गोबे, खाओःप्मा आक्ख्यारिक् वाॽबे?” फाॽआङ् कुभारे़ सेइरलाम् आङ्गाॽ मे़मे़त्तार मे़बत्लो॥ 12 इक्के़गोबे़ल्ले़ नुगप् पिरुसिरो, “तानाम् पोङ्ल पत्, हे़क्क्याङ् खाधाम्लआङ् पत्लो॥ खे़ने़ॽ कुभा पाःन्हाॽ सेःन्दोमा के़गत्तुने़भग्र, सेःन्दोसे़ॽओ, खे़ब्याङ् याम्मो नुःक्खे़ॽआङ् फे़रे़ॽओ॥” अरब लाजेःल्ले़ कुयाःम्बेओ माङ्निङ्वाॽपान् 13 अरब लाजेःल्ले़ कुयाःम्बेओ माङ्निङ्वाॽपान्— ददान के़युङ्बा मनासे, खे़निॽ लाम्दिक् के़जोःक्पा तिःक्लाहाॽ अरब जाजेॽबा ये़ःङ्घादे़न्नोबा फात्ताप्हाॽओ याङ्मे़धोःक्लो॥ 14 कुवागे़मिःक्पाहाॽरे़ लागि च्वाःत् तारे़म्मे़ॽओ, तेमा लाजेॽ के़युङ्बाहाॽरे़ वे़प्मिबाहाॽरे़ खुन्छिॽ लागि चामा थुङ्मा तारे़म्मे़ॽओ॥ 15 खे़ङ्हाॽ ताभेलाम्, तरप् फिःङ्मनाबा से़ल्ले़ङ् से़ल्ले़ङ् के़लॽबा ताभेलाम् नु किक्तुःङ् के़दुःङ्बा लि लाम्, हे़क्क्याङ् साॽरिक् यम्बा ते़ङ्धङ्लाम् से़ःप्सिङ्से़ मे़घे़त्छिङ् मे़बेःक्लो॥ 16 खे़ब्याङ् यहवे दाङ्बे़ल्ले़ आङ्गाॽ अक्खे मे़त्ताङ्, “तङ्बेॽ थिक्ले़ लागि नाम्याक्को याःम्बक् के़जोःक्पा से़वारोबे़ल्ले़ तङ्बेन् निरुॽ, हे़क्केलॽरिक्के तङ्बेॽ थिक् ले़प् के़त्तिल्ले़सा केदारबा के़रे़क् हाङ्वा माङ्वान् मे़क्॥ 17 तोङ् लि के़आप्पाहाॽग के़दार के़युङ्बा मुक्के़गुबा मे़जोक्, कर खे़ङ्हाॽ चबे़ःत्छिक्लक् मे़हिङ् मे़याःक्॥” कन् पाःन्निन् आङ्गाॽ यहवे दाङ्बा इस्राइलबा निङ्वाॽफुमाङ्ङिल्ले़ पाःत्तुङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.