यसैया 18 - लिम्बुनिङ्वाॽफुमाङ्ङिल्ले़ कुस लाजेन् खुम्दिङ् पिरु 1 निःङ्घुक्वाहाॽरे़ मे़धिम्सुबा लाजेःङ्ग, चिःत्ते़स्ये़रो, कुस लाजेॽबा यङ्घङ्हाॽरे़ कुयाओ खे़न् ने़रो॥ 2 खे़प्मोबा मनाहाॽरे़ मिक्लाःल्ले़ चोःक्मनाबा के़जाप्पा खःङ्बेहाॽओ हाङ्लाइङ्बाहाॽ मे़बाङ्घुसिरो॥ के़जाप्पा इङ्घङ्साबासे, केःम्बा नु वरे़ङ्ले़ङ्बा होरिक् के़बप्पा मे़न्छाम् सुवाङ्हाॽओ पेगे़म्मे़ॽओ, खे़ङ्हाॽ निःत्ताङ्बा नु माःङ्घाबा मनाहाॽरे़ मे़गिरुसिरो, खे़ङ्हाॽ के़धुम्बा नु मुक्के़गुबा मे़जोक्लो, हे़क्क्याङ् खे़ङ्हाॽरे़ खुन्छिॽ लाजेन् वहःङ्हाॽरे़ कुलक् कुलक्को से़न्दुआङ् ने़रो॥ 3 इक्सादिङ् खाम्बेःक्मोबा के़रे़क् मे़न्छाम् याप्मिसे, खे़निॽग योॽबा लाजेॽओ के़युङिरो! कोःक्मा फाङ्जङ् थे़गु माङ्वाहाॽओ मिक्सेःन्ले़ लागि लत्छा निसाधिक् मे़हाक्तुरो, खिनिॽ खे़न् निसान के़निसुम्लो! हे़क्क्याङ् थङ्ले़ लागि थुत्थुरिःप्पान् लाइक्लो, खे़न् खे़निॽ के़घे़प्सुम्लो॥ 4 थेआङ्भे़ल्ले़ यहवे दाङ्बे़ल्ले़ कन् पाःन्निन् आङ्गाॽ मे़त्ताङ्ङाङ् वाॽरो, “साॽरिक् नाम्से़ःक्मा नु चासुम्मा हाङ्वासे़ःक्मा ये़म्मो सुसु के़लॽबा खाॽमित् हे़क्के आङ्गाॽ स्वाःत् युङ्ङारो, हे़क्क्याङ् आयुङ्मा ते़न्नोलाम् ओमे़त्तुङ्लो॥” 5 थेआङ्भे़ल्ले़ चासुम्मानुःल्ले़ तगि चाःल्ले़ कुभुङ् फे़क्मेःत्ते़न् फे़क्काङ् लुःक्पेःक्लो, हे़क्क्याङ् खे़न् कुभुङ् फे़क्मेःत्ते़न् के़दुम्बा चे़ल्ले़क्सेॽ पोङ्लो, खे़ब्याङ् यहवे दाङ्बे़ल्ले़ खे़न् चे़ल्ले़क्सेल्ले़ कुबोराःक्हाॽ वाभेःत्तिल्ले़ साःक्तुरो, हे़क्क्याङ् के़बोबा के़दाप्पा पोराःक्हाॽ आःत्तुदेसुरो॥ 6 खे़ङ्हाॽ के़रे़क् कोःक्मा फाङ्जङ् थे़गु माङ्वाहाॽओ के़याक्पा किथ नु ताम्भुङ् थक्साहाॽरे़ चामारे़ लागि युङ् याःक्लो॥ हे़क्केलॽरिक् पुसाहाॽरे़ हाङ्वामा ये़म् खाराक् मे़जरो हे़क्क्याङ् ताम्भुङ् थक्साहाॽरे़ चुङ्जिःक्मा ये़म् खाराक् मे़जरो॥ 7 खे़न् ये़न्नो मुक्साम्दाङ्बा यहवे दाङ्बे़ल्ले़ कुदगि मिक्तोक् मे़दारुरो॥ निःत्ताङ् नु माःङ्घाबा मनाहाॽरे़ मे़गिरुसिबा खे़न् केःम्बा नु वरे़ङ्ले़ङ्बा ने़क्सा के़गप्पा, के़धुम्बा नु मुक्के़गुबा, हे़क्क्याङ् खुन्छिॽ लाजेन् वहःङ्हाॽरे़ कुलक् कुलक् फःक्खुआङ् के़ने़बा सुवाङ्हाॽ मे़दाआङ् सियोन कोःक्माओ मुक्साम्दाङ्बा यहवे दाङ्बान् खे़ङ्हाॽरे़ चे़सुङ्हाॽ मे़हुॽरुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.