यसैया 17 - लिम्बुइस्राइल लाजेॽ नु दमस्कस ये़क्यक्को खुम्दिङ् 1 दमस्कसे़ल्ले़ कुयाःम्बेओ माङ्निङ्वाॽपान्—यहवे दाङ्बे़ल्ले़ पाःत्तुरो— “दमस्कस ये़क्यक्किन् आल्ल खाप्पुथ्यःङ् पोङ्लो, हे़क्क्याङ् के़धुप्पा के़लुःम्बा हिम्हाॽरे़ कुयक्हाॽ लुम्सिङ्लो॥ 2 अरोएरबा ये़क्यक्हाॽ मुरे़क् खारे़क् नु चिजि खक्खक् पोङ्लो, हे़क्क्याङ् माराम्हाॽओ मे़ल्लुक् मे़ःन्दा चामे़राम्माङ् मे़इम्माङ् मे़ने़रो, खे़ॽयो मे़ल्लुक्हाॽ के़नाःप्पा के़देबा हाःत्ताङ् होप्लो॥ 3 लुङ्धाक्किल्ले़ कब्रिङ् मे़गबुबा इस्राइलबा ये़क्यक्हाॽ खाप्पुथ्यःङ् पोङ्लो, हे़क्क्याङ् दमस्कसबा हाङ्युक् चोःक्मा मुक्साम्मिन् मे़क्लो॥ सिरियाबा के़दाङ्बा के़याःक्पा के़रे़क्ले़ खुन्छिॽ इङ्नाम्मिन् इस्राइलरे़ के़बेःक्पा कुइङ्नाम् कुइसिक् पोङ् फाॽआङ् आङ्गाॽ मुक्साम्दाङ्बे़ल्ले़ पाःत्तुङ्ङाङ् वाॽरो॥” 4 यहवे दाङ्बे़ल्ले़ पाःत्तुरो, “खे़न् ये़न्नो याकुबरे़ कुहाङ्वा कुमाङ्वान् माबेःक्लो, हे़क्क्याङ् याङ्साकुन्धेःल्ले़ कुले़क्वा याङ्साॽमा पोङ्लो॥ 5 के़दुम्बाआङ् के़ने़बा कुजान् चा के़सुम्बे़ल्ले़ सुप्सुबा हे़क्के, हे़क्क्याङ् आबाङे कुहुक्किल्ले़ के़दुम्बा चाःन् हे़गुबा हे़क्के, रपाइबा ने़ने़बा इक्ताप्पो लत्छा मनाधिक्ले़ के़माबा के़याःक्पा कुजाहाॽ कोःत्तुबा हे़क्के इस्राइले़न् पोङ्लो॥ 6 हे़क्केसाङ् लत्छा चैतुन सिङ्बुङ्ङिल्ले़ कुजाॽहाॽ तुप्माआङ् चे़ॽजे़ःत् कुजाॽ पप्पा कुइसिक्, खे़ॽयो कुभा कुजाॽहाॽ पत्याःक्लो— थोसमा कुबोराक्को कुजाॽ ने़त्छि सुम्सि नु कुजाॽ के़धोःक्पा कुबोराक्को कुजाॽ लिसि ङासि पप्पा हे़क्के इस्राइले़न् पोङ्लो,” यहवे दाङ्बा इस्राइलबा निङ्वाॽफुमाङ्ङिल्ले़ पाःत्तुरो॥ 7 हे़क्क्याङ् खे़न् कुनुप्मा ये़न्नो मनाहाॽरे़ खुन्छिॽ नावागे़न् चइःत्दाङ्बान् ओमे़मे़त्तुरो, हे़क्क्याङ् खे़ङ्हाॽरे़ खुन्छिॽ मिक्को सुरित् लाःत्ल थारिक् इस्राइलबा सेसे निङ्वाॽफुमाङ्ङिन् ओमे़मे़त्तुरो॥ 8 खे़ङ्हाॽरे़ खुन्छिॽ आबाङे हुक्किल्ले़ मे़जोगुबा ले़त्ति तोःम्मादे़न्हाॽ ओमे़म्मे़त्तुन्लो, हे़क्क्याङ् खे़ङ्हाॽरे़ खुन्छिॽ आबाङे हुक्चोःल्ले़ मे़जोगुसिबा असेरा माङ्ङिल्ले़न् सित्लाङ्हाॽ नु सुक्पा हाःम्मादे़न्हाॽ ओमे़म्मे़त्तुन्लो॥ 9 इस्राइलबा मनाहाॽरे़ खुन्छिॽ तगिलाम् हिब्बि नु अमोरिहाॽ मे़घे़त्छिङ्ङिल्ले़ मे़ले़रुधबा ये़क्यक्हाॽ चिजि खक्खक् पोःक्खे़, हे़क्केलॽरिक्के खे़न् ये़न्निन् ताःल्ले़ लुङ्धाक् मे़से़त्तुआङ् मे़से़ःप्तुबा ये़क्यक्हाॽ मुरे़क् खारे़क् पोङ्ॽ॥ 10 इस्राइलबा मनासे, खे़निॽ के़से़ःप्पा निङ्वाॽफुमाङ्ङिन् खे़निॽ निङ्वाॽ के़मुःत्छुम्माङ् के़वयिरो, हे़क्क्याङ् सियाक्पेॽ थे़याक्पेॽ से़ःप्सिङ्मादे़न् नु खे़निॽ हाङ्यक्किन् निङ्वाॽ के़न्इःत्तुम्मिन्लो॥ कल्ले़चोगुल्ले़, खे़निॽ साॽरिक् नुबा फुङ्हाॽ के़लेःत्तुम्लो हे़क्क्याङ् वेॽ लाजेॽलाम् के़दारुम्बा चे़ल्ले़क्सेॽइल्ले़ कुबुङ्हाॽ के़लेःत्तुम्लो, 11 हे़क्क्याङ् के़लेःत्तुम्बा ये़न्नो खे़निॽ खे़न् फुङ्हाॽ पोर के़याःन्दुम्लो, खे़म्ब्याङ् तानाम् थारिक्ले़ खे़न् चे़ल्ले़क्सेल्ले़ कुबुङ्हाॽ कुभुङ्फे़क्मेत् के़लःम्बा के़जोगुम्लो, हे़क्केसाङ् कुजाॽ मे़धोःक्ने़न्लो हे़क्क्याङ् यॽधे़त्तु चेॽरुआङ् तुक्खे तुम्मा ये़न्लक् पोङ्लो॥ निङ्मिहाॽ हारिमे़दाःॽ 12 आम्बि, इक्सादिङ् खाम्बेःक्मोबा यरिक् मे़न्छाम् सुवाङ्हाॽ मे़अःक् मे़भिःक्पा हयङ् किल्लिङ्हाॽ वरःङ्ङिन् सःक्पा कुइसिक् खे़म्दे़त्लो! आम्बि, यरिक् मे़न्छाम् सुवाङ्हाॽ मे़अःक्पा इक्लान् यम्बयम्बा वहःङ्हाॽ सःक्पा कुइसिक् लॽरो! 13 हे़क्केसाङ् के़गुङ्बा के़युबा च्वाःत्तिन् सःक्पा कुइसिक् इक्सादिङ् खाम्बेःक्मोबा मे़न्छाम् सुवाङ्हाॽ मे़अःक्लो, हे़क्क्याङ् निङ्वाॽफुमाङ्ङिल्ले़ खे़ङ्हाॽ फे़ःक्तुसिरो, हे़क्केःल्ले़ खे़ङ्हाॽ माःङ्घा मे़घे़त्छिङ् मे़बेःक्लो, खे़ब्याङ् सुरित् केजङ्ङिल्ले़ कोःक्माओ फे़सु तेॽरुबा चासिप् नु खइक् खइक् के़इक्सिङ्बा साम्मिःत् केजङ्ङिल्ले़ फे़सु तेॽरुबा याःन्सुङ्हाॽ कुइसिक् खे़ङ्हाॽ पुबेलाप्सा मे़नाःत्तुसिरो॥ 14 युःन्छिक्पा ये़म्मो खे़ङ्हाॽरे़ हक्चघत् किमा यङ्मा पोङ्ल मे़जोगुरो, कर तानाम्ग खाओःप्मानुःल्ले़ तगि खे़ङ्हाॽ मे़मा मे़बेःक्लो॥ आनिॽ याङ्साकुन्धे याप्मि के़नाप्पाहाॽरे़ खुन्छिॽ लक्किन्नाङ् आम्भा हे़क्तङ्बा पोङ्लो, खे़ब्याङ् आनिॽ याप्मि के़नाप्पा के़हिप्पाहाॽरे़आङ् हाबा हे़क्तङ्बाए मे़दुमुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.