यसैया 16 - लिम्बुमोआब लाजेॽओ मे़क्मासिमा ताःॽ 1 सेला ये़क्यक्लाम् मुरे़क् खारे़क्पा ये़ःङ्घादे़न् नाधाःम्बिबा लाजेॽओ हाङ्युक् के़जोःक्पाल्ले़ कुलागि नुमासुक्मा सियोनओ थुःम्बाहाॽ मिक्तोक् हाङाम्देसाम्से़ॽओ॥ 2 पुहाॽ खुन्छिॽ हाप्हाॽओलाम् फङ्मादेमासिआङ् ना नु कत्ना मे़बे़आङ् मे़वाॽबा कुइसिक् मोआबबा मे़न्छुमाहाॽ अर्नोन वहःङ्ङिल्ले़ कुया कुया ना नु कत्ना मे़बोःक्खे़आङ् मे़वाॽरो॥ 3 खे़ङ्हाॽरे़ यहुदाबा मनाहाॽ मे़मे़त्तुसिरो, “आनिगे थे चोगुम्बे़बाबे? आनिगे याप्मि आमे़त्ते़ॽओ॥ ले़न्दिक् नाम्से़ःक्किल्ले़ सिङ्बुङ्ङिल्ले़ कुसिगाङ् सुसु के़लॽबा नाम्जिःक्खोॽ कुइसिक् आनिगे आइःप्ते़ॽओ॥ हे़क्केलॽरिक् खे़निॽ के़इःप्तुम्बा नाम्इःक्खङ्ङो आनिगे इःम्सिङ्मा खोसुम्बे़ररो॥ आनिगे वे़प्मिबासिगे़, हाःत्ले़आङ् मे़घोसिगे़न्बादे़न्नो आजिक्खे़ॽओ॥ 4 मोआबलाम् मे़लःत्तु मे़देसुसिबा मनाहाॽ खे़ने़ॽनु मे़युङ्लरो, आमे़ङ्मे़ङ्बा मनाहाॽलाम् खे़ङ्हाॽरे़ खुन्छिॽ लागि खे़निॽ लत्छा से़ःप्सिङ्मादे़न् पोःक्खे़ आबिरे़ॽओ॥” याप्मि तुक्खे के़जाःप्पा मनाहाॽ आल्ल हाराए मे़मे़क्काङ् तुक्खे सिमा मे़क्मा मे़बोङ्ने़न्लो, याप्मि निङ्घुम् तुक्खे के़जाःप्पाहाॽ लाजेॽलाम् मे़मा मे़बेःक्लो॥ 5 हे़क्क्याङ् निङ्वाॽफुमाङ्ङिल्ले़ दाउदरे़ कुहिम्सयङ्ङोलाम् लत्छा मनाधिक् हाङ् चोगुरो, हे़क्क्याङ् खे़न् हाङ्ङिन् नसाःन्साबा पोङ्ङाङ् चक्मे़ल्लॽए कुमनाहाॽ लुङ्माॽ तुक्तुसिरो खे़ब्याङ् कुदोःप्मा खासे़न् लोःन्दु पिरुसिरो॥ कुदोःप्मा याःम्बक्हाॽ खे़ल्ले़ खिमो चोगुदेसुरो खे़म्ब्याङ् कुदोःप्मा खासे़न् पोङ्ल याःन्दुरो॥ मोआब के़युङ्बा मनाहाॽ यम्बा मे़ले़ङ्सिङ् 6 यहुदाबा मनाहाॽरे़ मे़बाःत्तुरो, “मोआबबा मनाहाॽ यम्बा मे़ले़ङ्सिङ् के़लॽबे़न् खे़प्सुम्बे़आङ् वाॽरो, कन् लाजेॽओ के़युङ्बाहाॽ आङ्दिङ् मे़लॽआङ् लाङ्मे़घेःक्लो, करसाङ् खे़ङ्हाॽ थेनाधेरक् यम्बा मे़ले़ङ्सिङ्ङाङ् मे़वाॽरो॥” 7 खे़ल्ले़चोगुल्ले़ मोआबिहाॽ मे़रिङ् मे़धक्लो, खे़ङ्हाॽ सोसोरिक् लत्छा मे़बोङ्ङाङ् मोआबबा मनाहाॽरे़ खुन्छिॽ लागि मे़हाःप् मे़जिःङ्लो॥ किर-हरेसेतओ मे़जबा कुजा के़नुॽबा कुहेद्याॽ चे़ल्ले़क्सेन् नु वेॽ कुजाहाॽ निङ्वाॽ मे़इःत्तुआङ् मे़हाःप्लो॥ 8 हेस्बोनबा प्याङ्सिगे़न् इक्ताप्हाॽ नु सिब्माबा चे़ल्ले़क्सेॽइल्ले़ कुबुङ्हाॽआङ् इले़म्लो॥ इक्सादिङ् खाम्बेःक्मोबा मे़न्छाम् सुवाङ्समा युक्साबाहाॽरे़ खे़न् नुःब्नुबा चे़ल्ले़क्सेल्ले़ कुबुङ्हाॽ लाङ्ङिल्ले़ चिराक् चिराक् मे़लाःक्तुआङ् ने़स्से़रो॥ खे़न् चे़ल्ले़क्सेल्ले़ कुदाप्हाॽ तगिग याजेर थारिक् के़रे़आङ् ने़स्से़रो, हे़क्क्याङ् मुरे़क् खारे़क्पा ये़ःङ्घादे़न्नो थारिक्के ताबे़आङ् ने़स्से़रो॥ खे़ल्ले़ कुजःक्किन् के़रे़क् पिसाङ् से़रे़आङ् युम्लाःङ् वरःङ् नाधाःम्बि थारिक् के़रे़आङ् ने़स्से़रो॥ 9 कल्ले़चोगुल्ले़ आल्ल सिब्माबा चे़ल्ले़क्सेॽ इक्के़ल्ले़ कुलागि याजेरे़न् हाःप्पा कुइसिक् आङ्गाॽ हाःप्ए़रो॥ हेस्बोन नु एलाले़ लागि आङ्गाॽ आमिक्वा ते़रे़रे़ थाप्लो! थेआङ्भे़ल्ले़ मनाहाॽ मे़सःत्ल के़याःम्बा चासुम्मा ये़म् होप्लो॥ 10 आल्ल मनाहाॽरे़ खुन्छिॽ सःप्मा नु एःप्मे़न् पेरो, चे़ल्ले़क्सेॽ इक्ताप्पो हाःत्ताङ् साम्मे़लोने़न्लो, हाःत्ताङ् मे़अःक्ने़न्लो॥ चे़ल्ले़क्सेॽ एःम्मादे़न्नो हाःत्ले़आङ् चे़ल्ले़क्सेन् मे़एःप्सुन्लो॥ थेआङ्भे़ल्ले़ खे़ङ्हाॽरे़ खुन्छिॽ सःप्मा इक्लान् आङ्गाॽ साक्तुङ् पिरुङ्सिङ्ङाङ् वाॽरो॥ 11 आङ्गाॽ आनिङ्वान् मोआबरे़ कुलागि हे़क्क्याङ् आङ्गाॽ आसिक्लुङ्मे़न् किर-हरेसेतरे़ कुलागि अन्मे खिङ्मनाबा तुङ्नाःन् हे़क्के हाःप्ल हाःप्ल मे़रिङ् थक्लो॥ 12 मोआब के़युङ्बा मनाहाॽ पना मे़नार केःम्बा कोःक्माल्ले़ कुजङ्हाॽओ नावाइत्ला से़वा मे़त्छे़ मे़बेःक्लो॥ नावाइत्ला युक्नादे़न्नो पेलि फाक्से़ के़बेःक्पाहाॽरे़ थेआङ् कुभाॽ मे़ङ्घोसुन्लो॥ 13 के़बेःक्पा ये़म्मो तगिसा यहवे दाङ्बे़ल्ले़ कन् पाःन्निन् मोआबरे़ कुयाःम्बेओ पाःत्तुआङ् वये़॥ 14 कर आल्ल यहवे दाङ्बे़ल्ले़ पाःत्तुॽ, “तङ्बेॽ सुम्सि ले़प् के़त्तिल्ले़सा मोआब लाजेॽओ के़युङ्बाहाॽरे़ खुन्छिॽ याङ्साकुन्धेन् हदॽ मे़क्, हे़क्क्याङ् कॽयो के़युङ्बा मनाहाॽ मे़न्धुम्मनाबा मे़बोङ्ङाङ् चबे़ःत्छिक्लक् मे़हिङ् मे़याःक्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.