यसैया 15 - लिम्बुमोआब लाजेःल्ले़ कुदक्ले़ङ्वाओ माङ्निङ्वाॽपान् 1 मोआब लाजेःल्ले़ कुदक्ले़ङ्वाओ माङ्निङ्वाॽपान्— थिक् से़न्दिक्ले़सा आर ये़क्यक्किन् मुरे़क् खारे़क् नु खाप्पुथ्यःङ् पोःक्खे़रो! थिक् से़न्दिक्ले़सा किर पाङ्जुम्मिन् चिजि खक्खक् पोःक्खे़ हे़क्क्याङ् मे़गे़रो॥ 2 दिबोन के़युङ्बा के़मनाहाॽ मे़रिङ् थक्मारे़ लागि केःम्बा कोःक्माहाॽओ के़ने़बा खुन्छिॽ माङ्हिम्मो थो मे़बेरो, नेबो नु मेदबा ये़क्यक् के़युङ्बा मनाहाॽरे़ लागि मोआब के़युङ्बाहाॽ उःक्काङ् उःक् मे़हाःप्लो॥ खे़ङ्हाॽरे़ खुन्छिॽ थे़गेःक्हाॽ के़रे़क् मे़नःक्खुआङ् मे़वाॽरो खे़ब्याङ् खुन्छिॽ मुधोॽहाॽ खक्पे़त् लिगोॽ मे़घक्तु मे़देसुआङ् मे़वाॽरो॥ 3 माराम्हाॽओ खे़ङ्हाॽ ताक्मे़गन्नाङ् मे़वाॽइल्ले़ सागि तेत् मे़जाक्खुरो॥ खे़ङ्हाॽ हिम्हाॽओबा कौसिहाॽओ नु लाम्दोहाॽओ मे़हाःप्ल मे़रिङ् मे़धक्ल ले़म्बे़त् ले़म्बे़त् मे़ने़रो॥ 4 हेस्बोन नु एलाबा मनाहाॽ यम्बा इक्लाओ उःक्काङ् उक् मे़हाःप्लो॥ खे़ङ्हाॽ मे़हाःप्पा इक्लान् यहसा थारिक्के खे़म्दे़त्लो खे़ल्ले़चोगुल्ले़ मोआब के़युङ्बा फे़जुम्भे़या के़हेबाहाॽ यम्बा इक्लाओ मे़हाःप्लो, हे़क्क्याङ् थिक् से़न्दिक्ले़सा खे़ङ्हाॽ खुन्छिॽ साम्मिक्ले़ ले़रुसिरो॥ 5 मोआबरे़ कुलागि आङ्गाॽ आनिङ्वान् हाःप्लो, थेआङ्भे़ल्ले़ कन् मोआब के़युङ्बा अप्मिबाहाॽ सोअर थारिक् नु एग्लत-सलिसिया थारिक्के मे़घे़त्छिङ्ङाङ् मे़बेःक्लो॥ लुहितबा थाम्माङ्बा लाम्मो खे़ङ्हाॽ मे़हाःप्ल मे़धोःक्सिङ्लो हे़क्क्याङ् होरोनैमबा लाम्मो खे़ङ्हाॽरे़ आबाङे खुन्छिॽ मे़क्मा सिमे़न्ले़ कुयाःम्बेॽओ मे़रिङ् मे़धक्लो॥ 6 निम्रिमओबा खरःक्वान् चप्प्रे़क् चप्तुरो, हे़क्क्याङ् याःन्सुङ्हाॽ इरे़मे़रो॥ पोःक्ला-सिङ्बुङ् खाप्पुथ्यःङ् पोःक्खे़रो, लेःत्ताङ्बा मे़प्मनाबा थेआङ् होप्लो॥ 7 खे़ल्ले़चोगुल्ले़ खे़ङ्हाॽरे़ मे़घोसुबा याङ्साकुन्धेःन् नु खे़ङ्हाॽरे़ मे़लुप्सुबा याङ्साकुन्धेःन् मे़याङ्सिङ्ङाङ् पिपोर पोःक्ला के़ने़बा खरःक्वा नाधाःम्बि मे़देॽरुरो॥ 8 हे़क्क्याङ् खे़ङ्हाॽ मे़हाःप्पा इक्लान् मोआब लाजेॽबा इःन्दोओ के़युङ्बाहाॽरे़ मे़घे़प्सुरो॥ खे़ङ्हाॽ मे़रिङ् मे़धक्पा हाःम्लाक्वान् एग्लैम थारिक् नु खे़ङ्हाॽ निङ्साम् मे़जोःक्पा पाःन्निन् बेअर-एलिम थारिक्के के़रे़आङ् वाॽरो॥ 9 दिबोनबा खरःक्वा वहःङ्ङिन् माक्खिल्ले़ तिम्से़आङ् ने़रो, कर आङ्गाॽ खे़न्नुःल्ले़आङ् के़साक्पा तुक्खे लाक्खेहाॽ दिबोन ये़क्यक्को तारुङ्लो॥ मोआबबा वे़प्मिबाहाॽरे़ खुन्छिॽ सम्दाङ् खे़ब्याङ् के़हिङ्बा के़याःक्पाहाॽरे़ मनाहाॽरे़ खुन्छिॽ सम्धाङ् आङ्गाॽ लत्छा केबाधिक् पाङ्घुङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.