यसैया 14 - लिम्बुमे़दे़म्सु मे़देॽरुसिबा इस्राइलिहाॽ मे़नुःङ् 1 कर यहवे दाङ्बे़ल्ले़ याम्मो थिक्ले़ङ् याकुबरे़ कुमुॽइदाङ्साहाॽ लुङ्माॽ तुक्तुसिरो॥ हे़क्क्याङ् इस्राइलि मे़न्छाम् सुवाङ्हाॽ याम्मो थिक्ले़ङ् खुने़ॽ कुमना पोङ्से़ सेगुसिरो॥ यहवे दाङ्बे़ल्ले़ खे़ङ्हाॽ याम्मो आबाङे खुन्छिॽ लाजेॽओ युङ्से़ तारुसिरो॥ हे़क्क्याङ् यरिक् वेॽ वेॽ लाजेॽहाॽलाम् मनाहाॽ मे़दाआङ् खे़ॽयो मे़भुङ्सिङ्लो हे़क्क्याङ् इस्राइलबा मनाहाॽनु खुन्छिॽ थिक्हुप् मे़बोङ्लो॥ 2 इक्सादिङ् खाम्बेःक्कोबा मे़न्छाम् सुवाङ्हाॽरे़ यहवे दाङ्बे़ल्ले़ कुमनाहाॽ नुःङ्मा पेःक्मा मे़भाॽरुसिरो, हे़क्क्याङ् यहवे दाङ्बे़ल्ले़ कुलाजेॽओ युङ्से़ के़दाबा मनाहाॽरे़ इस्राइलिहाॽ से़वा मे़मे़त्तुसिआङ् याःम्बक् मे़जोगु मे़बिरुसिरो॥ खे़न् इस्राइलिहाॽ के़दे़म्बा के़घेःङ्बाहाॽ इस्राइलिहाॽरे़ मे़दे़म्सु मे़घेःक्खुसिरो, खे़ब्याङ् इस्राइलिहाॽरे़ खुन्छिॽ निङ्मिहाॽ सम्धाङ् युक् मे़जोगुरो॥ बेबिलोनबा हाङ्हाॽ मे़स्सिःॽ 3 यहवे दाङ्बे़ल्ले़ इस्राइलबा मनाहाॽ खे़ङ्हाॽरे़ मे़दुमुबा तुक्खे लाक्खे नु के़साक्पा याःम्बक्लाम् से़ःप्तुसिरो॥ 4 कन् ये़न्निन् ताःल्ले़ खे़ङ्हाॽरे़ बेबिलोनबा हाङ्ङिन् अक्खे मे़मे़त्तुर किनाःन्दि मे़बिरुरो, “साॽरिक् कुॽइगे़भे़म्बा हाङ्ङिन् चोःन्दे़रो! खे़ल्ले़ याम्मो आत्तिन्हाॽआङ् तुक्खे मे़जाःत्तुसिन्लो! 5 यहवे दाङ्बे़ल्ले़ खे़न् कुॽइगे़भे़म्बा हाङ्हाॽरे़ खुन्छिॽ हाङ्तक्काःत्तिन् नु युक्साबाहाॽरे़ खुन्छिॽ तक्काःत्तिन् ए़क्खु पिरुसिरो॥ 6 खे़न् हाङ्हाॽरे़ खुन्छिॽ साक्के़न् पोःक्मो मनाहाॽ चक्मे़ल्लॽए मे़हिप्तुसिरो, हे़क्क्याङ् खुन्छिॽ मे़नाःन्दुसिबा लाजेॽहाॽ आभे़ल्ले़साङ् तुक्खे चाःप्मा मे़ल्ले़रुसिन्लो॥ 7 आल्लो कुनुप्मोग इक्सादिङ् खाम्बेःक्कोबा के़रे़क् मनाहाॽरे़ नाःम्सिङ्मा नु सनारुङ् मे़घोसुआङ् मे़वाॽरो, हे़क्क्याङ् खे़ङ्हाॽ साम्मे़लोरो॥ 8 आःङ्हाॽ नु ले़बानान लाजेॽओबा साम्माङ्सिङ्हाॽ खे़ने़ॽनु अक्खे मे़लॽर मे़सःत्लो, ‘खे़ने़ॽ के़म्सोःन्दे़बा ये़न्नाङ्धो आनिगे आःत्छे़ हाःत्ताङ् मे़न्दाए वाॽरो॥’ 9 “बेबिलोनबा हाङ्ङे, खे़मायङ्सङ्ङिल्ले़ के़लाम्दाःक्मा यारिप् चोगुर वाॽरो॥ यरिक् तङ्बे तगि इक्सादिङ् खाम्बेःक्कोबा के़सिबा लाम्लोबाहाॽ खे़ने़ॽ ओमे़प्मारे़ लागि खे़ॽयो मे़वाॽरो, हाङ्हाॽरे़ खुन्छिॽ सिसाम्हाॽ हाङ्युक्नालाम् मे़बोःक्ल मे़बत्लो॥ 10 खे़ङ्हाॽ के़रे़क् थिक्हुप् मे़बोङ्ङाङ् मे़बाःत्तुरो, ‘आल्ल खे़ने़ॽआङ् आनिगे कुइसिक् मे़न्धुम्मनाबा के़बोक्खे़आङ् के़वाॽरो, खे़ने़ॽ आनिगे हे़क्तङ्बाए के़बोःक्खे़रो॥’ 11 तुःङ्गे मे़मुक्खुआङ् खे़ने़ॽ मिङ्सो इङ्धाङ् के़म्बिरे़आङ् वये़रो, कर आल्लो खे़ने़ॽ खे़मा यङ्सङ्ङो के़गे़रे़आङ् के़वाॽरो॥ खाॽवदिःक्पे़न् के़ने़त्ना नु फेॽबाःत्ते़न् के़घाम्देत् पोःक्खे़आङ् वाॽरो॥ 12 “खे़ने़ॽ बेबिलोनबा हाङ् तानाम्बा तान्छोःक्पा हे़क्तङ्बाए, तानाम्बा साए, साङ्ग्राम्पेदाङ् थोलाम् खे़ने़ॽ आक्खेआङ् मक्के़ध्ये़आङ् के़वाॽबे! तगि खे़ने़ॽ इक्सादिङ् खाम्बेःक्कोबा मे़न्छाम् सुवाङ्हाॽ तुक्खे के़जाःप्पे, खे़ने़ॽ आभेलॽरिक् खाम्बाङ्ङो लाप्पुङ् के़ध्ये़बे! 13 थेआङ्भे़ल्ले़ खे़ने़ॽ आबाङे के़निङ्वाॽओ अक्खे के़बाःत्तुआङ् के़वये़रो, ‘आङ्गाॽ साङ्ग्राम्पेदाङ्ङो थो थोःक्सिङ्ङारो निङ्वाॽफुमाङ्ङिल्ले़ कुघेसेॽ कुघेःम्सिक्हाॽनुःल्ले़आङ् थाःङ्धाक् आहाङ् युक्नान् युक्खुङ्लो॥ के़रे़क्नुःल्ले़ चन्जम्बा सेसे नाङ्जङ्लुङ्ङिल्ले़ कुजङ्ङोनु चुम्लुङ् चोःक्मादे़न् कोःक्मा सम्धाङ् आङ्गाॽ हाङ्युक् चोगुङ्लो॥ 14 आङ्गाॽ साङ्ग्राम्पेदाङ्हाॽनुःल्ले़आङ् थोधोक् पेःक्कारो, आङ्गाॽ के़रे़क्नुःल्ले़ यम्बा निङ्वाॽफुमाङ् कुइसिक् पोङ्ङारो॥’ 15 कर खे़ने़ॽग खे़मायङ्सङ् लुम्बाःत्तो थारिक् मक्के़ध्ये़आङ् के़वाॽरो॥ 16 “मनाहाॽरे़ खे़ने़ॽ के़म्निआङ् अदक्तक्ना ओगे़म्मे़त्लो, हे़क्क्याङ् खे़ने़ॽ के़याःम्बेओ मे़इःत्छिङ्ल मे़इःत्छिङ्ल मे़बाःत्तुरो, ‘इक्सादिङ् खाम्बेःक्के़न् थुरुप्लुप्ना के़यङ्बा नु हाङ्हाॽ मे़यङ्ल के़याःम्बा 17 इक्सादिङ् खाम्बेःक्मे़न् मुरे़क् खारे़क्पा ये़ःङ्घादे़न् के़जोःक्पा, हे़क्क्याङ् खे़ॽयो के़ने़बा ये़क्यक्हाॽ के़नाःम्बा खे़ब्याङ् मे़दे़म्सु मे़देॽरुसिबाहाॽ हिम्मो पेःक्मा मे़म्भाःक्मनाबा मनान् हाबा कन् मेःम्बि?’ 18 “इक्सादिङ् खाम्बेःक्कोबा के़रे़क् हाङ्हाॽ आबाङे खुन्छिॽ नुःब्नुबा इःप्पुङ्हाॽओ मे़लासे़आङ् मे़ने़रो॥ 19 कर खे़ने़ॽग के़ने़मादे़न् इःप्पुङ्ङाङ् होप्लो, खे़ने़ॽ के़जे थक्किन् किबेःक्ल फाॽआङ् लाःक्कात् लाप्मे़भुसुआङ् ने़रो॥ कन् के़जे थक्के़न् थङ्ङो मे़से़रुसिबा थक्सुबाहाॽरे़ खुन्छिॽ चे थक्हाॽरे़ लुप्तुआङ् ने़रो॥ के़रे़क् के़सिबा थक्हाॽ लुङ्ङे लुङ् के़ने़बा याक्पेॽफिःप्मो लाप्मे़भुसुसिआङ् मे़ने़बाल्ले़ चोगुल्ले़ मनाहाॽरे़ चिराक् चिराक् मे़लाःक्तुसिरो॥ 20 खे़ने़ॽ वेॽहाॽ हे़क्के नुरिक्काङ् के़मे़न्लुप्ने़न्लो, थेआङ्भे़ल्ले़ खे़ने़ॽ आबाङे के़लाजेन् खाप्पुथ्यःङ् के़जोगुआङ् ने़रो, खे़ने़ॽ आबाङे के़मनाहाॽ के़से़रुसिआङ् मे़वाॽरो॥ कुॽइके़भे़म्बे़ल्ले़ कुमुॽइदाङ्हाॽरे़ खुन्छिॽ मिङ्हाॽ याम्मो आभे़ल्ले़आङ् मे़न्जे़क्खुन् मे़म्बाःत्तुन्लो॥ 21 कन् हाङ्ङिल्ले़ कुस्साहाॽ मे़से़रुसिररो! थेआङ्भे़ल्ले़ कन्हाॽरे़ खुन्छिॽ थाःक्थे़बाहाॽरे़ लायो लासोत् मे़जोगुआङ् वये़रो॥ कन् मनाहाॽओ आत्तिन्नाङ् कन् लाजेॽओ हाङ्युक् के़जोःक्पा मे़बोङ्ने़ल्लरो, हे़क्क्याङ् इक्सादिङ् खाम्बेःक्किन् खे़ङ्हाॽरे़ खुन्छिॽ ये़क्यक्हाॽरे़ मे़दिम्ने़ल्लरो॥” बेबिलोन ये़क्यक्किन् खाप्पु थ्यःङ् पोङ् 22 मुक्साम्दाङ्बा यहवे दाङ्बे़ल्ले़ कन् पाःन्निन् उवा चोगुआङ् वाॽरो, “आङ्गाॽ आबाङे बेबिलोनबा मनाहाॽरे़ खुन्छिॽ तक्ले़ङ्वाओ पोगाङ्ङाङ् वाॽआरो! आङ्गाॽ खे़ङ्हाॽरे़ खुन्छिॽ साहाॽ, मे़न्छाॽहाॽ, हे़क्क्याङ् चक्मे़न्छाॽहाॽ खुने़ॽ कुहाङ्युक्नाओ आफाल्ले़आङ् युङ्मा मे़ङ्घोने़ल्ल फाॽआङ् मे़क्खुङ्सिङ्लो॥” 23 मुक्साम्दाङ्बा यहवे दाङ्बे़ल्ले़ कन् पाःन्निन् पाःत्तुआङ् वाॽरो, “आङ्गाॽ बेबिलोन ये़क्यक्के़न् आहुम्हुम्बा ले़क्वा पोङ्ल चोगुङ्लो, हे़क्क्याङ् खे़ॽयो फक्थिःम्बाहाॽ याङ्मे़धोःक्लो॥ आङ्गाॽ बेबिलोन ये़क्यक्के़न् ताम्दुःक्खेःल्ले़ तुःक्मनाबा कुइसिक् के़रे़क् पाःन्हाॽ तुगुङ्देसुङ्लो॥” अस्सुर लाजेन् मे़क् के़लॽबा माङ्निङ्वाॽपान् 24 मुक्साम्दाङ्बा यहवे दाङ्बे़ल्ले़ अक्खे पाःत्तुआङ् माङ्हे़क्सिङ्लो, “आङ्गाॽ निङ्सेःक् चोगुङ्ङाङ् के़वाॽबा के़रे़क् पाःन्हाॽ के़त्लो, आङ्गाॽ चोःक्मा निङ्वाॽ निःन्धो चोगुङ्बा कुइसिक् पोङ्लो॥ 25 आङ्गाॽ आलाजेॽ इस्राइलओए अस्सुरबा थक्सुबाहाॽ मे़क्खुङ्सिङ्लो, हे़क्क्याङ् आङ्गाॽ आगोःक्मा फाङ्जङ् थे़गु माङ्वाहाॽओ खे़ङ्हाॽ चिराक् चिराक् लाःक्तुङ्सिङ्लो॥ खे़ङ्हाॽरे़ आङ्गाॽ आमनाहाॽ मे़गुःत्तुसिबा पलिःप् के़लिःप्पा कक्हाॽ खे़त्तुङ्ङाङ् चोःक्युम्भो पिरुङ्सिङ्लो॥ 26 इक्सादिङ् खाम्बेःक्किल्ले़ कुलागि आङ्गाॽ कन् चोःक्मा निङ्वाॽ चोगुङ्ङाङ् वाॽरो, हे़क्क्याङ् इक्सादिङ् खाम्बेःक्मोबा मे़न्छाम् सुवाङ्हाॽ खुम्दिङ् पिमासिरे़ लागि आहुक्के़न् सन्छुङ्ङाङ् वाॽरो॥ 27 थेआङ्भे़ल्ले़ आङ्गाॽ मुक्साम्दाङ्बा यहवे दाङ्बे़ल्ले़ अक्खे चोगुङ् फाॽआङ् इःत्तुङ्ङाङ् वाॽरो, हे़क्क्याङ् आङ्गाॽ इक्सादिङ् खाम्बेःक्मोबा मे़न्छाम् सुवाङ्हाॽ खुम्दिङ् पिमासिरे़ लागि आहुक्हाॽ सन्छुङ्ङाङ् वाॽरो, आङ्गाॽ हाःत्ले़ थेःक्मा सुक्काबे?” पलिस्ति लाजेन् मे़क् के़लॽबा माङ्निङ्वाॽपान् 28 आहाज हाङ्ङिन् स्ये़बा तङ्बेओ आङ्गाॽ कन् माङ्निङ्वाॽपान्निन् खे़प्सुङ्लो— 29 “पलिस्ति ये़क्यक्हाॽओ के़युङ्बा मनासे, खे़निॽ के़म्हिप्तिबा खे़न् तक्काःत्तिन् ए़गे़ फाॽआङ् मे़सःत्ताम्मिन्ने़ॽओ॥ थेआङ्भे़ल्ले़ हाबा खे़न् असेःक्पाल्ले़ कुस्साहाॽओलाम् खे़न्नुःल्ले़आङ् साॽरिक् कुनिङ् के़याक्पा वेॽसमा असेःक्पाधिक् लःन्लो॥ हे़क्क्याङ् खे़न् असेःक्पाल्ले़ कुधिःन्नोलाम् के़बे़बा असेःक् थिक् लःन्लो॥ 30 यहवे दाङ्बान् याङ्गे़साॽबा कुमनाहाॽरे़ लागि खुने़ॽ आबाङे खुन्छिॽ मे़ल्लुक्कम्बा पोङ्लो, हे़क्क्याङ् खे़ङ्हाॽ से़ःप्तुसिआङ् कम्ब्राङ् मे़त्तुसिरो॥ कर खुने़ॽ खिनिॽ पलिस्तिहाॽओ तल्लिक् यम्बा साक्वामाधिक् पाङ्घुदासुरो खे़ब्याङ् साक्के़ल्ले़ खिनिॽ आत्तिन्हाॽआङ् के़न्हिङिन्लो॥ 31 “पलिस्तिबा के़रे़क् ये़क्यक्हाॽओ के़युङ्बा मनासे, खे़निॽ कुभाॽरे़ लागि उःक्काङ् उक् हाबे़म्मे़ॽओ! खे़निॽ के़रे़क् किसाम्मे़ॽ यक्खाम्मे़ॽओ! थाङ्गे़त् पिसाङ्लाम् लत्छा किप्मा के़घुबा मिःक्खुधिक् युर पत्लो, थङ् चोःक्मारे़ लागि खे़ङ्हाॽरे़ खे़निॽ के़रे़क् थक्सुबाहाॽओ लत्छाआङ् के़गिबा के़यङ्बा मे़होप्लो॥ 32 “हे़क्केःल्ले़ खे़न् सुवाङ्ङोबा हाङ्लाइङ्बाहाॽ आनिॽ थे नुगप् पिमासिबे? ‘यहवे दाङ्बे़ल्ले़ यरुसले़ःम्मिन् थुम्धुम्बा चोगुआङ् वाॽरो, हे़क्क्याङ् खे़न् याङ्गे़साॽबा खुने़ॽ कुमनाहाॽरे़ खे़ॽयो से़ःप्सिङ्मा मे़घोसुरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.