यसैया 13 - लिम्बुनिङ्वाॽफुमाङ्ङिल्ले़ बेबिलोन ये़क्यक्किन् खुम्दिङ् पिरुॽ 1 कन् माङ्निङ्वाॽपान्निङ्ग बेबिलोन ये़क्यक्किल्ले़ कुयाःम्बेओ आमोजरे़ कुस्सा यसैयाःल्ले़ सुफोओ निसुबारो— 2 “खल्ले़ःक् थेआङ् के़होप्पा कोःक्माओ लत्छा निसाधिक् हाक्ते़ॽओ॥ हे़क्क्याङ् खे़ङ्हाॽ यम्बा इक्लाःल्ले़ फे़ःक्ते़से़ॽओ हे़क्क्याङ् सुहाङ्युक्पाहाॽ पयम् लाम्धेःप्पो हुक्चाःल्किःल्ले़ ‘लासाम्मे़ॽ’ मे़त्ते़से़ॽओ॥ 3 आङ्गाॽ यहवे दाङ्बे़ल्ले़ कन् याःम्बक्किन् चोःक्मारे़ लागि सुत्थो चोःक्मनासिबा थक्सुबाहाॽ मुरा मे़त्तुङ्सिङ्ङाङ् वाॽरो॥ आङ्गाॽ आसाक्के़न् ओःन्धाक्ताम्सिम्मे़ॽ फाॽआङ् थङ् के़जोःक्पा आधक्सुबाहाॽ इङ्जाङ् पिरुङ्सिङ्ङाङ् वाॽरो॥ हे़क्क्याङ् आङ्गाॽ थङ् चोःक्मा नाःन्दुङ्ङिल्ले़ खे़ङ्हाॽ मे़सःत्लो॥” 4 कोःक्मा फाङ्जङ् थे़गु माङ्वाहाॽओ हयङ् किल्लिङ् के़बोङ्बा, यम्बा मनालुप्लि हे़क्तङ्बा इक्लान् खे़प्से़म्मे़ॽओ! हे़क्क्याङ् हाङ्जुम्हाॽओलाम् के़लःम्बा हयङ् किल्लिङ्हाॽ, इक्सादिङ् खाम्बेःक्मोबा मे़न्छाम् सुवाङ्हाॽ थिक्मे़त् मे़भुङ्सिङ्ङिल्ले़ के़लःम्बा इक्लान् खे़प्से़म्मे़ॽओ! मुक्साम्दाङ्बा यहवे दाङ्बे़ल्ले़ थङ् चोःक्मारे़ लागि आबाङे खुने़ॽ कुधक्सुबाहाॽ फुक्खुसिर याक्लो॥ 5 इक्सादिङ् खाम्बेःक्मे़ल्ले़ नासमा कुया माःङ्घा माःङ्घाबा लाजेॽलाम् खे़ङ्हाॽ मे़दार मे़बत्लो॥ यहवे दाङ्बे़ल्ले़ साॽरिक् कुसाक्के़न् पोगे़बाल्ले़ चोगुल्ले़ के़रे़क् लाजेॽहाॽ खाप्पुथ्यःङ् चोःक्मारे़ लागि खुने़ॽ तार पत्लो॥ 6 उःक्काङ् उःक् हाबाम्मे़ॽ, थेआङ्भे़ल्ले़ यहवे दाङ्बे़ल्ले़ कुमे़ङ्मा ये़न्निन् खा निःत्ताङ् तार पत्लो, मुक्साम्दाङ्बालाम् साॽरिक् किप्मा के़घुबा मे़क्मासिमे़न् तारो॥ 7 खे़ल्ले़चोगुल्ले़ के़रे़क् हुक्हाॽ यङ्लो, के़रे़क् मनाहाॽ किमे़ल्ले़ खुन्छिॽ साम्मिक् मारो॥ 8 हे़क्क्याङ् खे़ङ्हाॽ पगि मे़गि मे़यङ्ङाङ् तुक्खे लाक्खेहाॽ नु निङ्साम्हाॽरे़ खे़ङ्हाॽ ते़म्सुसिरो॥ मे़न्छुमाःन् अङे़ःक्वा कप्मा सावाःन्दुल्ले़ तुक्पा कुइसिक् खे़ङ्हाॽ तुक्मा नु किमा यङ्माओ मे़धारो, खे़ङ्हाॽ आबाङे खुन्छिॽलुम्मो निङ्वाॽ माआङ् वरे़क् वरे़क् ओमे़मे़त्छिङ्लो॥ हे़क्क्याङ् खे़ङ्हाॽरे़ खुन्छिॽ नारान् मि के़दिःप्पा कुइसिक् पोङ्लो॥ खे़न् ये़न्नो लुङ्माॽ तुक्सिङ्मा होप् 9 ओमे़त्ते़म्मे़ॽ, यहवे दाङ्बे़ल्ले़ कुसिक् पोःक्मा नु साॽरिक् किप्मा के़घुबा कुसाक्के़न्निल्ले़ खे़न् ये़न्निन् तार पत्लो॥ इक्सादिङ् खाम्बेःक्के़न् मुरे़क् खारे़ःक् खाप्पुथ्यःङ् पोङ्लो हे़क्क्याङ् लायोबाहाॽ के़रे़क् मे़सिरो॥ 10 ताङ्साङ्ङोबा खेसे खेःम्सिक्पाहाॽ नु मे़न्छ्याबुरुक्माहाॽ ओःप्मा मे़नाॽरो॥ के़लिङ्बाआङ् के़गे़प्पार के़बप्पा नाम्मिन्नाङ् माक्ताङ्बा पोङ्लो हे़क्क्याङ् लाबे़न्नाङ् मे़ओःत्ने़न्लो॥ 11 आङ्गाॽ यहवे दाङ्बे़ल्ले़ कन् इक्सा खाम्बेःक्के़न् कुभे़न् याःम्बक्के़ल्ले़ चोगुल्ले़ खुम्दिङ् पिरुङ्लो, हे़क्क्याङ् ताप्फे़ःम्बा याःम्बक् के़जोःक्पाहाॽ खुन्छिॽ लायोल्ले़ लागि साम्बान् कुःत्तुङ्सिङ्लो॥ खे़ब्याङ् यम्बा के़ले़ङ्सिङ्बाहाॽरे़ खुन्छिॽ आङ्दिङ् लॽमे़न् नुप्सुङ् पिरुङ्सिङ्लो, खे़ब्याङ् साॽरिक् कुॽइगे़भे़म्बाहाॽरे़ खुन्छिॽ हे़न्छिङ्मे़न् मार याःन्दुङ्लो॥ 12 खे़न् के़हिङ्बा के़याःक्पा मनाहाॽ खोमे़न्दे़प्नाबा साम्म्याङ् इस्सेःङ्बा हे़क्के चोगुङ्सिङ्लो, ओपिरबा खोमे़न्दे़प्मना साम्म्याङ् कुइसिक् चोगुङ्सिङ्लो॥ 13 थेआङ्भे़ल्ले़ खे़न् ये़न्नो आङ्गाॽ यहवे दाङ्बे़ल्ले़ आसिक्के़न् ओसेःन्धाङ् चोगुङ्ङिल्ले़ साङ्ग्राम्पेदाङ्हाॽ थे़गक्कक्ना यक्खुङ्लो, हे़क्क्याङ् इक्सादिङ् खाम्बेःक्मान् कुयुक्नादे़न्नो थुरुप्लुप्ना यङ्ल याःन्दुङ्लो॥ 14 बेबिलोन ये़क्यक्को के़युङ्बा वेॽ लाजेॽबा मनाहाॽ आबाङे आबाङे खुन्छिॽ लाजेॽओ मे़घे़त्छिङ् मे़बेःक्लो॥ आप्चाराहाॽरे़ मे़नाःत्तुसिआङ् के़लोःक्पा पे़ःङ्वाहाॽ हे़क्के नु कुन्दाङ्बा मेःन्नेबा मे़ल्लुक्हाॽ कुइसिक् पुबेलाप्सा मे़बोङ्लो॥ 15 मे़याङ्घुसिबा मनाहाॽ लाःक्किल्ले़ मे़धुबुसिरो, हे़क्क्याङ् के़रे़क् मे़दे़म्सुसिबाहाॽ ताभेःल्ले़ मे़जे़प्तु मे़से़रुसिरो॥ 16 खे़ङ्हाॽरे़ खुन्छिॽ तगिए सा-एहाॽ मिक्के़ल्ले़ निसुर मे़बक्खुसिआङ् मे़भक् मे़स्सिर मे़धाप्सुसिरो॥ हे़क्क्याङ् खे़ङ्हाॽरे़ खुन्छिॽ याङ्साकुन्धेहाॽ मे़नाप्तुसिरो खे़ब्याङ् खे़ङ्हाॽरे़ खुन्छिॽ मेःत्हाॽ मेःत् मे़मे़त्तुसिरो॥ 17 यहवे दाङ्बे़ल्ले़ पाःत्तुॽ, “ओमे़त्ते़म्मे़ॽओ, आङ्गाॽ बेबिलोनबा मनाहाॽरे़ खुन्छिॽ तक्ले़ङ्वाओ मादिबा मनाहाॽ मे़बोःक्ल याःन्दुसिङ्लो, खे़ङ्हाॽरे़ साम्म्याङ्हाॽ ओमे़म्मे़त्तुन्लो, खे़ब्याङ् युप्पाहाॽओ निङ्वाॽ मे़म्बिरुन्लो॥ 18 खे़ङ्हाॽरे़ खुन्छिॽ लि नु तोःङ्ङिल्ले़ नालिगे़न् थाङ्बे़न्हाॽ मे़आबुसिआङ् मे़से़रुसिरो॥ हे़क्क्याङ् खे़ङ्हाॽरे़ नुयाम्मोबा अङे़ःक्वाहाॽ लुङ्माॽ मे़न्दुक्तुसिन्लो, खे़ङ्हाॽरे़ हिन्जाॽ पित्छाहाॽ ओमे़मे़त्तुसिआङ् खुन्छिॽ लुङ्माॽ स्याःत्ताङ् मे़लॽने़न्लो॥” 19 बेबिलोन हाङ्जुम्मिन् के़रे़क्नुःल्ले़ नुबा चोक् फाॽआङ् बेबिलोन के़युङ्बा मनाहाॽ आङ्दिङ् मे़लॽरो॥ कर आङ्गाॽ यहवे दाङ्बे़ल्ले़ सदोम नु गमोरा ये़क्यक्किन् फे़त्लाःन्दुङ्बा कुइसिक् कन् हाङ्जुम्मिन् खाप्पुथ्यःङ् चोगुङ्लो॥ 20 खे़प्मो आत्तिन्हाॽआङ् मे़न्युङ्ने़न्लो, थाःक्थाःक् थारिक् ताःन्दिआङ् हाःत्ताङ् मे़न्युङ्ने़न्लो॥ ताक्के़गम्बाआङ् के़वाॽबा अरबिहाॽरे़ खे़ॽयो साःङ्गाहिम् मे़न्जोगुन्लो॥ हे़क्क्याङ् आत्तिन् मे़ल्लुक्कम्बाहाॽरे़आङ् खुन्छिॽ मे़ल्लुःक्हाॽ ने़मा मे़म्भाःक्तुसिन्लो॥ 21 कर मुरे़क् खारे़क् थेआङ् के़होप्पा ते़न्नोबा ताम्भुङ् थक्साहाॽ खे़ॽयो मे़नाःम्सिङ्लो॥ खे़प्मोबा के़लुःम्बा हिम्हाॽ स्यालाहाॽरे़ मे़धिम्सुरो फक्थिःम्बाहाॽ खे़प्मो मे़युङ्लो, हे़क्क्याङ् ताम्भुङ् मे़ःन्दाहाॽ खे़ॽयो पित्चाक् पित्चाक् मे़बिन्ल मे़वाॽरो॥ 22 ताम्भुङ् कोःत्चो हे़क्तङ्बा थक्साहाॽ नु स्यालाहाॽ कन् कब्रिङ् फाक्मनाबा नुःब्नुबा हिम्हाॽओ नु ये़क्यक्हाॽओ मे़अःक्लो॥ बेबिलोन हाङ्जुम्मिल्ले़ कुमे़क्मा ये़म्मिन् निःत्ताङ् त्ये़आङ् वाॽरो, हे़क्क्याङ् कन् हाङ्जुम्मिल्ले़ कुमे़क्मान् हारा तारो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.