यसैया 11 - लिम्बुकुनुप्मा ये़न्नो सनारुङ् हाङ्जुम् तारो 1 दाउद हाङ्ङिल्ले़ कुहिम्सयङ्ङिन् सिङ्बुङ् हे़क्के लॽरो कर खे़न् सिङ्मुःत्तोलाम् कुजाॽ के़धोःक्पा कुबोराक् लिङ्धाङ्बा कुइसिक् थिक्ये़न् दाउदरे़ कुहिम्सयङ्ङोलाम्बा लत्छा मनाधिक् हाङ् पोङ्लो॥ 2 यहवे दाङ्बे़ल्ले़ कुयाम्साम्मिन् खुने़ॽनु वाॽरो— सिक्कुम् निङ्वाॽ नु खासिङ्निःप्मा याम्साम्, सुजा नु मुक्साम्ले़ याम्साम्, खे़ब्याङ् निङ्वाॽ ने़हि नु यहवे दाङ्बान् मिङ्सो इङ्धाङ् पिमा याम्साम्मिन् खुने़ॽओ युरो॥ 3 हे़क्क्याङ् यहवे दाङ्बे़ल्ले़ कुइङ्जाङ् खे़म्मा नु किप्मा खोसुबाओ खुने़ॽ सःत्लो॥ मिक्किल्ले़ निसुआङ् खुने़ॽ खासे़न् मे़लोःन्दुन्लो, हे़क्क्याङ् ने़क्खोॽबाल्ले़ खे़प्सुआङ्लक् निःन्धो मे़जोगुन्लो॥ 4 कर कुहोःप्मा कुसाक्माओ के़धाबाआङ् के़वाॽबा मे़न्छाम् याप्मिहाॽरे़ लागि खुने़ॽ कुदोःप्मा खासे़न् लोःन्दु पिरुसिरो, हे़क्क्याङ् इक्सादिङ् खाम्बेःक्कोबा याङ्गे़साॽबा मनाहाॽरे़ खुन्छिॽ लागि खुने़ॽ नुरिक्काङ् खासे़न् लोःन्दु पिरुसिरो॥ हे़क्क्याङ् कुबाःन्जाक् मुक्साम्मिल्ले़ योॽबा लाजेन् यङ्लो, कुम्ब्राओबा कुसक्माःल्ले़ कुॽइगे़भे़म्बा मनाहाॽ मे़क्खुसिरो॥ 5 खुने़ॽ युप्सुबा युप्पे़न् साम्योबा पोङ्लो, हे़क्क्याङ् खुने़ॽ युप्सुबा फॽइःन् से़क्खाबा पोङ्लो॥ 6 खे़न् ये़न्नो पराबे़न् नु मे़ल्लुक् च्याःक्के़न् सोसोरिक् वाॽसिरो, हे़क्क्याङ् थे़रिङ्बान् नु मे़ःन्दाक् साःप्मे़न् सोरिक् ने़सिरो॥ हे़क्क्याङ् पित्सात्ते़न् नु खिरिङ्बान् थिक्मे़त्थिक् पोङ्सिआङ् ने़सिरो, खे़ब्याङ् चुक्सा हिन्जाॽ थिक्ले़ खे़ङ्हाॽ तिःक्तुसिरो॥ 7 पित्हाॽ नु माःॽयुहाॽ लत्छा चाराम्मादे़न्नो चामे़राम्लो, हे़क्क्याङ् खे़न् थक्सा साहाॽ थिक्ते़न्नो मे़ने़सिङ्ङाङ् मे़ने़रो॥ खे़ब्याङ् पित्ते़ल्ले़ चबा हे़क्के थे़रिङ्बे़ल्ले़ कुहेद्याॽ याॽलाङ्ङिन् चरो॥ 8 नुगे़धुङ्बा अङे़ःक्वान् याङ्हःक् असेःक्किल्ले़ कुघाःल्ले़ कुबेसाङ् केःक्वा चोक्लो, हे़क्क्याङ् साॽरिक् के़आःप्पा कुनिङ् के़याक्पा असेःक्के़ल्ले़ कुहङ्ङो खारक् नुधुङ्मा के़ले़प्पा हिन्जाॽइल्ले़ कुहुक्किन् केःत्तुरो॥ 9 खे़ङ्हाॽरे़ आङ्गाॽ के़रे़क् आसेसे कोःक्माओ ताप्फे़ःम्बा इग्र हान्ति थेआङ् चोःक्मा मे़न्छुक्तुन्लो, थेआङ्भे़ल्ले़ वहःङ्ङिन् च्वाःत्तिल्ले़ तिम्बा कुइसिक् यहवे दाङ्बे़ल्ले़ कुसिक्कुम् निङ्वाःल्ले़ इक्सादिङ् खाम्बेःक्मान् सधे़क् तिम्लो॥ के़से़बा के़बेःक्पाबाहाॽ मे़नुःङ्ॽ 10 खे़ल्ले़ याःन्दिक् यिसैरे़ कुधाःक्लाम् लत्छा कुसङ् हाङ्धिक् पोङ्॥ खुने़ॽ इक्सादिङ् खाम्बेःक्मोबा के़रे़क् मे़न्छाम् सुवाङ्हाॽरे़ लागि निसा हे़क्के मिक्सेन् पोङ् हे़क्क्याङ् खुने़ॽओ मे़जुम्, हे़क्क्याङ् खुने़ॽ कुनाःम्सिङ्मा ते़न्निन् मिमिदिङ्गे़न् पोङ्॥ 11 खे़न् ये़न्निन् ताआङ् दाङ्बे़ल्ले़ याम्मो थिक्ले़ङ् खुने़ॽ कुमुक्साम्मिन् ओःन्धाक्तुसि हे़क्क्याङ् अस्सुरलाम्, योसमा मिस्रलाम् नु थोसमा मिस्रलाम्, कुसलाम्, एलामलाम्, बेबिलोनियालाम् नु हमात लाजेॽहाॽलाम् हे़क्क्याङ् के़रे़क् माःङ्घा माःङ्घाबा वरःङ्ङिल्ले़ कुयाओ के़ने़बा वागप्खाम् लाजेॽहाॽओलाम् खुने़ॽ कुमनाहाॽ याम्मो इस्राइल लाजेॽओ नुःक्तुॽ तारुसिरो॥ 12 यहवे दाङ्बे़ल्ले़ के़रे़क् मे़न्छाम् सुवाङ्हाॽरे़ खुन्छिॽ लागि लत्छा निसाधिक् हाक्तुरो, हे़क्क्याङ् इस्राइल लाजेॽलाम् लाःक्कात् मे़लःत्तुसिबा मनाहाॽ नु फुत्छिङ्छाःङ् के़से़बा यहुदाबा मनाहाॽ इक्सादिङ् खाम्बेःक्मोबा के़रे़क् पिसाङ्लाम् फुक्खु तारुसिरो॥ 13 इस्राइल हाङ्जुम्मिन् आल्लआङ्धो यहुदा हाङ्जुम्मिन्नु कुनामे़हे़न्ने़न्लो, हे़क्क्याङ् यहुदान् इस्राइलरे़ कुनिङ्मि मे़बोङ्ने़न्लो॥ 14 खे़ङ्हाॽ मे़भुङ्सिङ्ङाङ् नाम्धा पिसाङ्बा फिलिस्ति लाजेॽओ के़ने़बा याक्केःक्केःक्पादे़न्नो मे़सःक् मे़बेःक्लो॥ खे़ङ्हाॽ मे़दङ्सिङ्ङाङ् नाङ्गे़न् पिसाङ्बा मनाहाॽ मे़नाप्तुसिरो, खे़ङ्हाॽरे़ ए़दोम नु मोआब लाजेॽहाॽ मे़लिसुरो, खे़ब्याङ् अम्मोनबा मनाहाॽ खे़ङ्हाॽरे़ युक्को मे़दारुसिरो॥ 15 यहवे दाङ्बे़ल्ले़ हे़ःत्ताङ्बा वरःङ्ङिन् चप्प्रे़क् चप्ल याःन्दुरो हे़क्क्याङ् सुरित् केजङ् हुर याःन्दुआङ् युफ्रेतिस वहःङ्ङिन्नाङ् हेर चोगुरो॥ खे़ब्याङ् खे़ॽयो चुजुक्सा नुसि वहःङ् मे़बोङ्लो, खे़न् वहःङ्हाॽ आत्तिन्हाॽरे़साङ् उसुरु चाःक्मा मे़सुक्तुरो॥ 16 मिस्र लाजेॽलाम् इस्राइलिहाॽ मे़नुःक्से़ल्ले़ पोःक्खे़बा कुइसिक् के़हिङ्बा के़याःक्पा खुने़ॽ कुमनाहाॽ अस्सुरलाम् लःम्माभे़म्मारे़ लागि माराम्धिक् पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.