यसैया 10 - लिम्बु1 मे़न्वाॽमनाबा खासे़न् लोःम्मा थिम् के़जोःक्पाहाॽग, मे़जिःत्ते़ मे़स्ये़रो, खे़ङ्हाॽरे़ग तुक्खे चाःप्मा चोःक्थिम्हाॽ मे़जोगुरो॥ 2 याङ्गे़साॽबाहाॽरे़ खुन्छिॽ युक्किन् नाप्मासि नु निङ्घुम्मो के़धाबा आमनाहाॽरे़ खुन्छिॽ खासे़न् मे़न्जोःक्मारे़ लागि, हे़क्क्याङ् मेमेदुमाहाॽरे़ मे़गत्तुबा पाःन्हाॽ नाप्मासिरे़ लागि खे़ब्याङ् ये़त्छाबा ये़त्छामाहाॽरे़ मे़गत्तुबा पाःन्हाॽ नाप्मासिरे़ लागि खे़ङ्हाॽरे़ अक्खे मे़जोगुरो॥ 3 निङ्वाॽफुमाङ्ङिल्ले़ खिनिॽ खुम्दिङ् के़बिरिल्ले़ हे़क्क्याङ् माःङ्घा लाजेॽलाम्बा तुक्खे लाक्खेहाॽ खिनिॽ सम्धाङ् पाङ्घु तासुल्ले़ खे़निॽ आक्खे के़जोगुम्बे? हे़क्क्याङ् नाङ्सिङ्से़ हाःत्ले़ॽओ के़बेगिबे? खे़निॽ याङ्साकुन्धेहाॽ आत्ति के़जिक्खुम्मिल्ले़ ताङ्बाबे? 4 मे़दे़म्सु मे़देॽरुसिबाहाॽनु सोसोरिक् सॽसिङ्मा हे़क्क्याङ् मे़से़रुसिबाहाॽरे़ खुनिॽ लुम्मो तोःक्माआङ् चोःम्मानुःल्ले़ वेॽ नुबा थेआङ् होप्लो॥ हे़क्केसाङ् यहवे दाङ्बे़ल्ले़ कुसिक्के़न् मे़जिःक्तुन्लो खे़ब्याङ् खुम्दिङ् पिमासिरे़ लागि खुने़ॽ कुहुक्किन् आल्लसाङ् फोःक्खुआङ्ङे पत्लो॥ अस्सुरबा हाङ्ङिन् निङ्वाॽफुमाङ्ङिल्ले़ खुम्दिङ् पिरु 5 यहवे दाङ्बे़ल्ले़ पाःत्तु, “चिःत्ते़स्ये़रो! चिःत्ते़स्ये़रो!! अस्सुर लाजेॽए, आत्तिन्नु आङ्गाॽ तल्लिक् आसिक् पोगे़आङ् वाॽरो, खे़न् खुम्दिङ् पिमारे़ लागि खे़ने़ॽ आङ्गाॽ आहुक्को मरःङ्ग्या चोःक्ने़आङ् वाॽरो॥ 6 मे़नाप्तुसिबा चिगक्वाहाॽ नाप्मासि नु हिप्मासि थक्मासिआङ् मे़ङ्मासि फाॽआङ् माराम्मोबा ले़क्वान् कुइसिक् चिदोॽ चिदोॽ तोॽमासिरे़ लागि निङ्वाॽफुमाङ्ङिन् कुसिङ् मे़न्निःप्नाबा सुवाङ्ङिन् हे़क्क्याङ् आङ्गाॽ आसिक् के़भोङ्बाहाॽरे़ खुन्छिॽ तक्ले़ङ्वाओ खे़ङ्हाॽ हाराहारा पाङ्घुङ्सिङ्ङाङ् वाॽरो॥ 7 कर खे़ल्ले़ अक्तङ्बा कुनिङ्वाॽ होप्लो हे़क्क्याङ् खे़ल्ले़ अक्खे चोःक्माआङ् मे़इःत्तुन्लो॥ कर खे़ल्ले़ कुनिङ्वाॽग अक्तङ्बानि वाॽरो, यरिक् मनाहाॽ मे़ङ्मासि नु यरिक् मे़न्छाम् सुवाङ्हाॽरे़ खुन्छिॽ मिङ् मामा पिमासि के़लॽबानि इःत्तुआङ् वाॽरो॥ 8 खे़न् अस्सुरबा हाङ्ङिन् यम्बा हे़न्छिङ्बा पाःत्तुरो, ‘आङ्गाॽ आधक्सुबा आधक्मोबाहाॽ हाङ्सिरो॥ 9 आङ्गाॽ कल्नो, कर्कमिस, हमात नु अर्पाद ये़क्यक्हाॽ नाःन्दुङ्सिङ्लो॥ हे़क्क्याङ् आङ्गाॽ सामरिया नु दमस्कस ये़क्यक्हाॽआङ् नाःन्दुङ्सिङ्लो॥ 10 नावाइत्ला से़वा के़मे़प्पा लाजेॽहाॽ आङ्गाॽ हुक्काप् मे़त्छिङारो, खे़ॽयो मे़घोःन्दु मे़लक्तुसिआङ् मे़जोगुसिबा नावाइत्लाहाॽग यरुसले़म नु सामरियाबा नावाइत्लाहाॽनुःल्ले़आङ् यरिक् मे़वये़रो॥ 11 आङ्गाॽ सामरियान् खाप्पुथ्यःङ् चोगुङ्ङाङ् ने़रो हे़क्क्याङ् खे़प्मोबा के़रे़क् नावाइत्लाहाॽ मे़क्खुङ्सिङ्लो, हे़क्केलॽरिक्के यरुसले़म नु खे़न् ये़क्यक्को माङ्से़वा मे़मे़त्तुसिबा नावाइत्लाहाॽ हर्गुप् मे़क्खुङ्सिङ्लो॥’” 12 दाङ्बे़ल्ले़ सियोन कोःक्मान् नु यरुसले़म ये़क्यक्को के़युङ्बा मनाहाॽरे़ खुन्छिॽ तक्ले़ङ्वाओ याःम्बक् चोःक्मा सुरुॽ, खे़ब्याङ् खुने़ॽ पाःत्तुॽ, “आङ्गाॽ खे़न् यम्बा के़ले़ङ्सिङ्बा नु आङ्दिङ् के़लॽबा अस्सुरबा हाङ्ङिन् खुम्दिङ् पिरुङ्ॽ॥ 13 थेआङ्भे़ल्ले़ खुने़ॽ आबाङे पाःत्तुरो, “‘आङ्गाॽ आमुक्साम् नु आबाङे आङ्गाॽ आसिक्कुम् निङ्वाःल्ले़ कन् चोगुङ्बारो, थेआङ्भे़ल्ले़ आङ्गाॽ खासिङ्निःप्मा निङ्वाॽ कत्तुङ्लो॥ हे़क्क्याङ् मे़न्छाम् सुवाङ्हाॽरे़ खुन्छिॽ इःन्दोहाॽ चत्तुङ्देसुङ्लो, हे़क्क्याङ् खे़ङ्हाॽरे़ खुन्छिॽ चायाङ्मा नु याङ्साकुन्धे याङ्माहाॽआङ् नाप्तुङ् तेॽरुङ् पिरुङ्सिङ्लो॥ खे़ब्याङ् लत्छा कुहाङ्वा कुमाङ्वा के़याक्पा मना कुसिङ् खे़ङ्हाॽरे़ खुन्छिॽ हाङ्हाॽ युक्तुङ्सिङ्ङाङ् मे़वाॽरो॥ 14 कुभारे़ खुन्छिॽ हुक्किन् पुःल्ले़ कुहाप्पो मे़गे़त्तुबा कुसिङ् आङ्गाॽ आहुक्के़न् इक्सादिङ् खाम्बेःक्मोबा के़रे़क् मे़न्छाम् सुवाङ्हाॽरे़ खुन्छिॽ याङ्साकुन्धेओ के़रे़आङ् वाॽरो॥ हे़क्क्याङ् पुःल्ले़ ले़रुधबा कुधिःन्ने़न् कुभा मनाधिक्ले़ फुक्खुबा हे़क्के आङ्गाॽ के़रे़क् लाजेॽहाॽ फुक्खुङ्सिङ्लो॥ कर पुहाॽरे़ खुन्छिॽ लाप्हाॽ फे़दे़त्ताङ् मे़म्मे़त्तुन्लो हे़क्क्याङ् मे़म्बारे़न्नाङ्लो॥’” 15 ओगाप् के़जोःक्पा मनामे़ःन्ने तःन्दिन् थे आबाङे यम्बा ले़ङ्सिङ्बि? इग्र थे सिङ्गे़हे़क्पा मनाःन्नुःल्ले़आङ् चे़न्दिरिन् यम्बा निधाःम्सिङ्बि? थे हुक्के़न् मे़न्मुन्ने आबाङे ते़ःम्भुक्किल्ले़रक् हिप्मा सुक्तुबि? थे कुआःत् थिक् सोःत्लाङ्ङे़न् आबाङे लाङ्घेःक्मा सुक्पि? 16 कल्ले़चोगुल्ले़ मुक्साम्दाङ्बा दाङ्बे़ल्ले़ अस्सुरबा हाङ्ङिल्ले़ कुधक्सुबाहाॽरे़ खुन्छिॽलुम्मो आसिसिबा तुक्मा यॽमाहाॽ पाङ्घु तासुरो, हे़क्क्याङ् खे़ल्ले़ कुमिमिदिङ् सिगाङ् हुरुरुना के़दिःप्पा मि तिःत्लो॥ 17 इस्राइलबा ओःत्तिःन् मि पोङ्लो, इस्राइलबा सेसेबा माङ्ङिन् मिधुङ्दिङ् मिराःक् पोङ्लो, हे़क्क्याङ् खे़न् मिःल्ले़ थिक्याःन्धिक्ले़ खे़ॽयोबा तिङ्लान् नु सेर्दाःक्माहाॽ मिदिक्काङ् खाप्पुथ्यःङ् चोगुरो॥ 18 खे़ल्ले़ कुदाम्भुङ्हाॽ नु चा के़नुॽबा नुबा प्याङ्सिहाॽ सुधाःम् मे़क्लो खे़ङ्ग के़दुक्पाआङ् के़जप्पार के़बेःक्पा मना हे़क्तङ्बा पोङ्लो॥ 19 खे़न् सिङ्बुङ्हाॽओ चबे़ःत्छिक्लक् मे़युङ् मे़याःक्लो खे़न् चबे़ःत्छिक् सिङ्बुङ्हाॽ हिन्जाॽ थिक्ले़आङ् उसुरु निःप्मा सुक्तुसिरो॥ इस्राइलबा के़दाङ्बा के़याःक्पाहाॽ 20 खे़न् ये़न्नो इस्राइललाम् के़दाङ्बा के़याःक्पाहाॽ, के़हिङ्बा के़याःक्पा याकुबरे़ कुमुॽइदाङ्साहाॽरे़ आबाङे खुन्छिॽओ मे़क्मासिमा के़दाःप्पा सुवाङ्हाॽओ खुन्छिॽ निङ्वाॽ मे़न्युक्खुन्लो, कर इस्राइलबा सेसे निङ्वाॽफुमाङ्, यहवे दाङ्बाओ खुन्छिॽ निङ्वाॽ मे़युक्खुरो॥ 21 खे़ङ्हाॽलाम् के़हिङ्बा के़याःक्पाहाॽ, याकुबरे़ कुहिम्सयङ्ङोलाम् के़दाङ्बाहाॽ मुक्साम्दाङ्बा निङ्वाॽफुमाङ् ले़प्माङ् मे़नुःङ् मे़दारो॥ 22 इस्राइलबा मनासे, खिनिॽ मनाहाॽ यारिक् खाम्हिःक् यल्लिक् मे़योसाङ् खे़न् ये़म्मो चबे़ःत्छिक्लक् मे़नुःङ् मे़दारो॥ खे़ङ्हाॽरे़ खुन्छिॽ त्वाबो मे़क्मा सिमाए साप्ते़आङ् पत्लो, हे़क्क्याङ् खे़ङ्हारे़ खुम्दिङ् खोमाए के़बोङ्बा वाॽरो॥ 23 मुक्साम्दाङ्बा यहवे दाङ्बे़ल्ले़ के़रे़क् लाजेॽहाॽ खाप्पुथ्यःङ् चोगुरो॥ अस्सुरबा मनाहाॽ यहवे दाङ्बे़ल्ले़ खुम्सुसि 24 खे़ल्ले़चोगुल्ले़ मुक्साम्दाङ्बा यहवे दाङ्बे़ल्ले़ अक्खे पाःत्तुरो, “यरुसले़म के़युङ्बा आमनासे, मिस्रबा मनाहाॽरे़ कुइसिक् तक्कात् नु मरःङ्ग्याःल्ले़ खे़निॽ के़म्हिप्तिल्ले़ अस्सुरबा मनाहाॽनु खे़निॽ मे़गिसे़म्मे़न्ने़ॽओ॥ 25 खे़निॽ तक्ले़ङ्वाओ के़बोःक्पा आङ्गाॽ आसाक्के़न् हाराए चिःक्तुरो, कर आङ्गाॽ आयाःक्ले़ॽमे़न् खे़ङ्हाॽ मे़ङ्मासिरे़ लागि खुन्छिॽ ले़प्माङ् हिसिङ्लो॥” 26 मुक्साम्दाङ्बा यहवे दाङ्बे़ल्ले़ ओरेब याक्पेॽओ मिध्यानबा मनाहाॽ हिप्तुसिआङ् सोःन्दुसिबा हे़क्के अस्सुरिहाॽ ते़ःम्भुक्किल्ले़ हिप्तुसिरो॥ हे़क्क्याङ् खुने़ॽ मिस्र लाजेॽओ कुदक्काःत्ते़न् फोःक्खुबा कुइसिक् च्वाःत् सम्धाङ् खुने़ॽ कुदक्काःत्ते़न् फोःक्खुरो॥ 27 खे़न् ये़म्मिन् ताःल्ले़ खुने़ॽ अस्सुरिहाॽरे़ खुन्छिॽ हुक्को थामालाम् से़ःप्तुसिरो हे़क्क्याङ् के़लिःप्पा कक्के़न् खे़निॽ फक्ताङ्हाॽओलाम् खे़त्तुदेसुरो, हे़क्क्याङ् खे़निॽ के़मे़ॽरिआङ् खे़ःप्सिङ्ङे़न् ए़क्खुरो॥ 28 ओमे़त्ताम्मे़ॽ, निङ्मिहाॽरे़ अय्यात ये़क्यक्किन् हुक्काप् मे़मे़त्छिङ्ङाङ् वाॽरो, हे़क्क्याङ् याम्मो आल्लोग खे़ङ्हाॽ मिग्रोनलाम् मे़बोङ्ङाङ् मे़बेःक्लो॥ मिकमास मे़प्मनाबा ते़न्नो खे़ङ्हाॽरे़ खुन्छिॽ सामा पुमाहाॽ मे़लुप्सुआङ् युङ्लो॥ 29 खे़ङ्हाॽ ने़ने़बा ते़न्निन् मे़गाःक्तुआङ् मे़बेःक्लो हे़क्क्याङ् खे़ङ्हाॽरे़ मे़बाःत्तुरो, “से़न्दिक् गेबा मे़प्मनाबा ते़न्नो याङ्धोःक्तिगे़रो॥” रामा ये़क्यक्को के़युङ्बा मनाहाॽ किमे़ल्ले़ थे़गक्कक्ना मे़यङ्लो, हे़क्क्याङ् सावल हाङ्ङिल्ले़ कुये़क्यक् गिबा के़युङ्बा के़रे़क् मनाहाॽ मे़घे़त्छिङ् मे़बेःक्लो॥ 30 गाल्लिमबा मनासे, आबाङे खे़निॽ यम्बा इक्लाओ अःक्ताम्मे़ॽओ! लैसा के़युङ्बा मे़न्छाम् याप्मिसे, खिनिॽ नुरिक्काङ् खे़प्से़म्मे़ॽओ॥ हे़क्क्याङ् अनातोत के़युङ्बासे, पप्प्राॽमा! खे़निॽग के़जिःत्ति के़स्ये़ॽइरो! 31 मदमेना के़युङ्बा मनाहाॽ मे़घे़त्छिङ् मे़बेआङ् मे़वाॽरो, गेबिम के़युङ्बा मनाहाॽ मे़जिङ्सिङ्लो॥ 32 आइन्छा खे़ङ्हाॽ नोब मे़प्मनाबा ये़क्यक्को मे़नाःम्सिङ्लो, हे़क्क्याङ् खे़ङ्हाॽरे़ यरुसले़ःम्बा कोःक्मा, नुमासुक्मा सियोन कोःक्मान् इङ्धाङ् मे़बिरुम्बे़न् लॽरिक् खुन्छिॽ हुक्हाॽ मे़हिक्सु मे़बिरुरो॥ 33 कर ओमे़त्ते़म्मे़ॽ, मुक्साम्दाङ्बा यहवे दाङ्बे़ल्ले़ पयम् यम्बा कुमुक्साम्मिल्ले़ यम्बा सिङ्बोराःक्हाॽ ले़न्दुबा कुइसिक् अस्सुरबा थक्तुम्बाहाॽ थेःक्तुसिरो, खे़ब्याङ् केःम्बाहाॽ ताङ्बा चोगुसिॽरो॥ 34 ताम्भुङ्ङो के़युङ्बा सिङ्बुङ्हाॽ तःन्दिःल्ले़ ताङ्मनाबा इसिःक् ले़बनाने़न् मुक्साम्दाङ्बे़ल्ले़ कुदगि चोःन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.