यसैया 1 - लिम्बु1 यहुदाबा हाङ् उज्जियाह, योताम, आहाज हे़क्क्याङ् हिजकियारे़ युक् मे़जोगुबा ये़म्मो यहुदा नु यरुसले़मरे़ कुयाःम्बेओ आमोजरे़ कुस्सा ये़म्बित्छा यसैयाःल्ले़ निसुबा सुफोरो॥ निङ्वाॽफुमाङ्ङिल्ले़ कुमनाहाॽ फे़ःक्तुसि 2 ताङ्साङ्बे, खे़प्से़ॽ! इक्सादिङ् खाम्बेःक्के, के़न्भाक्किल्ले़ खे़म्से़ॽओ! यहवे दाङ्बे़ल्ले़ अक्खे पाःत्तुआङ् वाॽरो, “आङ्गाॽ आस्साहाॽ हिङ्सुङ्सिङ्ङाङ् यम्बा यम्मा चोगुङ्सिङ्लो, कर खे़ङ्हाॽ आदक्ले़ङ्वाओ पिफ्युङ्बा मे़बोःक्खे़आङ् मे़वाॽरो॥ 3 पित्ते़ल्ले़ आबाङे कुन्दाङ्बे़न् कुसिङ् निःत्तुरो, हे़क्क्याङ् अदङ्ङिल्ले़आङ् आबाङे कुन्दाङ्बे़न् नु कुजाजामा ते़न्निन् कुसिङ् निःत्तुरो कर इस्राइलबा आमनाहाॽरे़ आङ्गाॽ कुसिङ् मे़न्निःत्नान्लो हे़क्क्याङ् आङ्गाॽ यार चोगुङ्सिङ्बा पाःन्निन् कुसिङ् मे़न्निःत्तुल्लो॥” 4 नाॽराङ्स्याङ्, लायोबा सुवाङ्, आप्तिक्साबा मनाहाॽ, ताप्फे़ःम्बा याःम्बक् के़जोःक्पाहाॽरे़ खुन्छिॽ साहाॽ, हे़क्क्याङ् स्वाःत्ताङ् सुरुत्याङ् के़जाबाहाॽरे़ खुन्छिॽ थिन्दाङ् सायोबोराहाॽ! खे़ङ्हाॽरे़ यहवे दाङ्बे़न् मे़नाॽरुआङ् वाॽरो, खे़ङ्हाॽरे़ इस्राइलबा सेसेबे़न् कुनामे़न्छाॽ मे़मे़त्तुरो हे़क्क्याङ् एःक्मे़मे़त्तुआङ् मे़वाॽरो॥ 5 थेआङ् खिनिॽ आल्लसाङ् ते़ःम्भुक् के़गोःत्तुम्बाबे? हे़क्क्याङ् थेआङ् आल्लसाङ् खिनिॽ आदक्ले़ङ्वाओ पिफ्युङ्बा के़बोःक्खिबाबे? खे़निॽ थे़गेःक्को के़रे़क् काःन्दे़आङ् पत्लो, हे़क्क्याङ् के़रे़क् खे़निॽ निङ्वाॽ तुगे़आङ् वाॽरो॥ 6 मु नु थाःङ् थे़गेःक्पोनु लाङ्दाप्पेओ थारिक् याङ्घेःक् मे़म्बप्मनाबादे़न् आत्तिआङ् होप्लो॥ के़गाःम्बै के़गाःम्बा, ते़ःम्भुक्किल्ले़ हिप्मनाबा कबहाॽ हे़क्क्याङ् के़गिबा याङ्घेःक्हाॽरक् पत्लो॥ खे़न् याङ्घेःक्हाॽ मे़न्यॽए इमे़ङ्घेःङ्ङे पत्लो, खे़ब्याङ् निःङ्गेःल्ले़आङ् चुन्जुम्बा पोङ्ल फाॽआङ् मे़न्आम्मे वाॽरो॥ 7 खिनिॽ लाजेन् चिजि खक्खक् पोःक्खे़आङ् ने़रो, खिनिॽ पाङ्जुम्हाॽग आम्भा खे़निॽ तगिए वेॽ लाजेॽबा मनाहाॽरे़ मिमे़धिक्खुआङ् ने़रो॥ वेॽ लाजेॽबा मनाहाॽरे़ मे़मे़क्सुबा कुइसिक् खे़न् ते़न्निन् चिजि खक्खक् पोःक्खे़आङ् ने़रो॥ 8 नुमासुक्मा यरुसले़ःम्मिन् इक्ताप्पोबा याक्माहिम् हे़क्तङ्बा पोःक्खे़आङ् ने़रो, हे़क्क्याङ् पइत् इक्ताप्पोबा ताराम्हिम् नु निङ्मिहाॽरे़ कब्रिङ् मे़गबुबा ये़क्यक् कुइसिक् पोःक्खे़आङ् ने़रो॥ 9 मुक्साम्दाङ्बा यहवे दाङ्बे़ल्ले़ आनिॽ कुभा कुहिङ्वे़त् आन्ले़रे़न्निल्ले़ग सदोम नु गमोरा कुइसिःक्के खाप्पुथ्यःङ् आबोःक्खे़बारो॥ 10 सदोम पाङ्जुम्मोबा युक्साबासे, यहवे दाङ्बे़ल्ले़ कुबाःन्जाःक्किन् खे़प्से़म्मे़ॽओ! गमोरा पाङ्जुम्मोबा मे़न्छाम् याप्मिसे, आनिगे निङ्वाॽफुमाङ्ङिल्ले़ कुभाङ्ङिन् सिङ्सिङ् ये़क्ये़क्काङ् खे़म्से़म्मे़ॽओ! 11 यहवे दाङ्बे़ल्ले़ पाःत्तुॽ, “खे़निॽ के़दारुम्बा यरिक् वयागे़न् सिदुङ्जभाहाॽरे़ थे़मा याःम्बक् पिआबे?” मे़ल्लुक्हाॽ नु हिम्मो के़हिङ्घुम्सिम्बा अरुप्लुप्पा थक्सा सोःत् मिधिङ्मनादेमनाबा सिदुङ्जभाहाॽ आसिराॽ मे़धाङ्ने़न्लो॥ पित्, थुःम्बा नु कुम्बाबा मे़ःन्दा माक्खिल्ले़ आङ्गाॽ आनिङ्वाॽ मे़दाने़न्लो॥ 12 खे़निॽ आबेसाङ् के़द्ये़ॽइआङ् के़दोःन्दुम्बा कन् कुसुम् मे़न्दम्मनाबा सिदुङ्जभाहाॽ ताःक्तुङ् फाॽआङ् निङ्वाॽ के़इःत्तुम्बि? खे़निॽ थेनाधे आलक्खुम्हाॽ चिराक् चिराक् लाःक्ताम्मे़ॽ फाॽआङ् मे़त्निङ्ङाङ् वये़बि? 13 आल्लआङ्धो कुसुम् मे़न्दम्मनाबा सिदुङ्जभाहाॽ मे़दाराम्मिन्ने़ॽओ॥ सुक्पे़ङ्ग आङ्गाॽ आलागि आसिक्के़ले़ःङ्बा चोक्लो॥ ताप्फे़ःम्बा याःम्बक्ले़ के़दिम्बा लादुप्, नाःम्सिङ्मा ये़न्, हे़क्क्याङ् सोरिक् के़जुप्सिबा साम्यो साक्थिम्बा चुम्लुङ्ङिन् आङ्गाॽ ओमे़प्मा मे़सुक्कान्लो॥ 14 खे़निॽ लादुप् ये़न्हाॽ नु तङ्बे लावाबा तङ्नाम्हाॽ आङ्गाॽ आयाम्ले़ मे़दाःक्तुन्लो॥ खे़ङ्हाॽग आलागि के़लिःप्पा कक् पोःक्खे़आङ् वाॽरो॥ खे़ङ्हाॽ कुमारे़ कुमारे़ पना नासाङ्ङाङ् वाॽआरो॥ 15 खे़निॽ पेलिगे़न् तुवा के़जोगिबा ये़म्मो खे़निॽ हुक्हाॽ के़भोःक्सुम्साङ् आमिक्हाॽ ते़प्तुङ्लो॥ खे़निॽ साॽरिक् तुवा के़जोगिसाङ् मे़घे़म्मान्लो॥ थेआङ्भे़ल्ले़ खे़निॽ फोत्या मेःन्नेबा मनाहाॽ के़से़रुम्सिम्माङ् खे़निॽ हुक्हाॽ माक्खिल्ले़ ने़ःक्तुआङ् पत्लो॥ 16 वारुःम्मासिम्मे़ॽआङ् सेसेसाङ्साङ् पोःक्खे़म्मे़ॽओ, आङ्गाॽ आदगिलाम् आइन्नाङ्धो खे़निॽ ताप्फे़ःम्बा याःम्बक्हाॽ चोःक्मा ले़राम्मे़ॽओ! फे़न्याःम्बक् चोःक्मा नाॽराम्मे़ॽओ॥ 17 नुबा याःम्बक् चोःक्मा हुॽआसिम्मे़ॽओ! खे़निॽ ले़प्माङ् खासे़न् कोःत्ताम्मे़ॽओ, तुक्खे मे़जाःत्तुसि ताप्फे़ःल्लिक् मे़मे़त्तुसिबाहाॽ आःन्छिङ्मा पिराम्सिम्मे़ॽओ, ये़त्छाबा ये़त्छामाहाॽ से़ःप्ताम्सिम्मे़ॽओ, ये़म्बा के़सिमा मेमेदुमाहाॽरे़ खुन्छिॽ लागि पाराम्मे़ॽओ॥ 18 यहवे दाङ्बे़ल्ले़ पाःत्तु, “आल्ल त्ये़म्मे़ॽओ, आनिॽ सोरिक् युङिआङ् पाःन्धक्तिरो॥ खिनिॽ लायोहाॽ हे़ःत्ताङ्बा चोःक्साङ्, खे़ङ्हाॽ नाःङ् कुइसिक् फदाङ्बा पोङ्लो॥ हे़क्क्याङ् खे़निॽ लायोन् हे़ःक्कङ्गङ्बा चोःक्साङ् खे़न् फ के़लॽबा खि कुइसिक् पोङ्लो॥ 19 खिनिॽ के़दे़न्दिआङ् आइङ्जाङ् के़इःप्पा के़नाःप्पा के़बोक्खिने़भग्र कन् लाजेॽओबा नुःब्नुबा सिङ्सेॽ नु चाहाॽ चामा के़घोसुम्लो॥ 20 कर के़न्दे़न्दिन्नाङ् पिफ्युङ्बा के़बोक्खिने़भग्र खिनिॽ निङ्मिहाॽरे़ ताभेःल्ले़ के़म्ज्ये़प्ति के़म्स्ये़रिरो॥” थेआङ्भे़ल्ले़ यहवे दाङ्बे़ल्ले़ए कन् पाःन्निन् पाःत्तुआङ् वाॽरो॥ नसान् के़होप्पा यरुसले़म ये़क्यक् 21 ओमे़त्ते़म्मे़ॽ, नसाःन्सामा के़वाॽमा यरुसले़म ये़क्यक्किन् आक्खेलॽरिक् के़त्निमा हे़क्तङ्बा पोःक्खे़बे! आसेःङ्ग खे़न् खासे़न्ले़ कुधिम् वये़रो॥ हे़क्क्याङ् खे़न् ये़क्यक्को साम्योबाहाॽ मे़वये़रो, कर आल्लोग खे़न् मना के़से़प्पाहाॽरे़ खुन्छिॽ वाॽमादे़न् पोःक्खे़आङ् वाॽरो! 22 खे़ने़ॽ थिक्ले़ङ् इसेःङ्बा युप्पा के़वये़रो कर आल्ल हिङ्धोःक् हे़क्तङ्बा के़बोःक्खे़रो॥ हे़क्क्याङ् नुबा के़जे़ल्ले़क्सेःल्ले़ कुवाओ च्वाःत् पःन्दे़आङ् याक्लो॥ 23 खे़ने़ॽ के़युक्साबाहाॽ पिफ्युङ्बा नु खुःन्द्रिक्पाहाॽरे़ खुन्छिॽ चुम्देङ् मे़बोःक्खे़आङ् मे़वाॽरो॥ खे़ङ्हाॽ के़रे़क्ले़ स्वाःत् सुरुत्याङ् चामा खुन्छिॽ सिराॽथाङ्लो, हे़क्क्याङ् खे़ङ्हाॽ चे़सुङ् मिक्तोक् खोमा खिःम्यक् मे़जोक्लो॥ खे़ङ्हाॽरे़ ये़त्छाबा ये़त्छामाहाॽ खासे़न् मे़ल्लोःन्दुन् मे़म्बिरुसिन्लो॥ हे़क्क्याङ् कुये़म्बा के़सिमा मेमेदुमाहाॽरे़ खुन्छिॽ ये़क्पेलिन् खे़ङ्हाॽरे़ मे़ङ्घे़प्सुन् मे़म्बिरुसिन्लो॥ 24 खे़ल्ले़चोगुल्ले़ आदाङ्बा, मुक्साम्दाङ्बा यहवे दाङ्बा, इस्राइलबा के़रे़क्नुःल्ले़ मुक्साम्साबाल्ले़ अक्खे पाःत्तुरो, “आनिङ्मिहाॽ कुले़क्वा नुःक्तुङ् पिरुङ्सिङ्लो हे़क्क्याङ् आदक्ले़ङ्वाओ के़बोःक्पाहाॽलाम् आङ्गाॽ चोःक्युम्भो खोआरो॥ 25 आङ्गाॽ आहुक्हाॽ खे़ने़ॽ के़दक्ले़ङ्वाओ फोःक्खुङ्लो, युप्पान् साङ्मनाबा कुइसिक् सेसे चोःक्ने़रो, हे़क्क्याङ् काक् के़आसुत्थो पाःन्हाॽ खे़त्तुङ्देसुङ् पिने़रो॥ 26 खे़ने़ॽ के़घासे़न्लोःम्बाहाॽ तगि हे़क्केए, हे़क्क्याङ् खे़ने़ॽ के़सुजादाङ्बाहाॽ आन्छोःम्बा कुइसिक् याम्मो युक्तिङ् चोगुङ्सिङ्लो॥ हे़क्के पोङ्ङाङ् एगाङ् कन् ये़क्यक्किन् साम्योबा ये़क्यक् नु नसानिबा ये़क्यक् मे़मे़त्तुरो॥” 27 सियोने़न् साम्योबा खासे़न्ले़ याःम्बक्लाम् याम्मो ताङ्से़ःप्लो, लायोलाम् के़नुःङ्बा मनाहाॽरे़ खुन्छिॽ से़न्लप्पिन् साम्योनिमालाम् पोङ्लो॥ 28 कर पिफ्युङ्बाहाॽ नु लायोबाहाॽ थिक्ले़ङ्ले़ मे़मे़क्लो, हे़क्क्याङ् यहवे दाङ्बान् के़ले़प्पाहाॽ फुत्लुम् थ्यःङ् मे़बोङ्लो॥ 29 “यहिबा सिङ्बुङ्लाओ नावाइत्ला से़वा के़मे़त्तुम्बाल्ले़ चोगुल्ले़ खे़निॽ नाधामो के़ध्ये़ॽइरो, हे़क्क्याङ् खे़निॽ के़सेगुम्बा सिङ्सेॽइक्हाॽरे़ चोगुल्ले़ खे़निॽ के़नुःन्दिरो॥ 30 कुभे़क्वा इगे़ले़म्बा यहिबा सिङ्बुङ् नु च्वाःत् के़होप्पा फुङ्इक् सिङ्सेॽइक् हे़क्तङ्बा के़बोक्खिरो॥ 31 मुक्के़गुबा मनाहाॽग मिदुप्मा छुल्ला हे़क्तङ्बा नु खे़ङ्हाॽरे़ खुन्छिॽ याःम्बक्किन् मिसेक् के़भे़क्पा कुइसिक् पोङ्लो॥ खे़न् ने़प्माङ् थिक्ले़ङ्ले़ मिदिक्लो, हे़क्क्याङ् हाःत्ले़आङ् खे़न् मिन् से़प्मा मे़सुक्तुन्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.