होसे 9 - लिम्बुइस्राइलरे़ खुम्दिङ् कुघोमा इङ्घङ् 1 इस्राइलए, वेॽ मे़न्छाम् सुवाङ्हाॽ हे़क्के मे़सःत्ते़म्मिन्ने़ॽओ, थेआङ्भे़ल्ले़ खिनिॽ आप्फेक् निङ्वाॽफुमाङ्ङिन् के़ले़रुम्माङ् खिनिॽ याम्बोःप्मा याःम्बक् के़जोगुम्लो! के़रे़क् पोगुगे़न् कुजा थाम्मादे़न्नो याम्बोःप्मा याःम्बक्किल्ले़ नालिगे़न् कुजे़न् ताःक्मा खिनिॽ सिराॽथाङ्लो॥ 2 पोगुगे़न् कुजा थाम्मादे़न्निन् नु चे़ल्ले़क्सेॽ एःम्मादे़न्निल्ले़ कुजा के़न्जाःत्तिन्लो, कुबोक् चे़ल्ले़क्सेॽ थिन् खिनिॽ लागि सुःन्लो॥ 3 यहवे दाङ्बे़ल्ले़ कुलाजेॽओ खिनिॽ के़न्युङिन्लो, एफ्राइम्मिन् मिस्र नुःङ्ङाङ् पेःक्लो, हे़क्क्याङ् अस्सुरओ आसुत्थो कुजा चरो॥ 4 यहवे दाङ्बे़ल्ले़ कुदगि खिनिॽ चे़ल्ले़क्सेॽ थि सिदुङ्जभा कुसिङ्बा चे़ल्ले़क्सेॽ थिन् मे़न्हुक्खुन्लो, खिनिॽ सिदुङ्जभाहाॽरे़ खुने़ॽ कुनिङ्वाॽआङ् मे़दाने़न्लो॥ अक्तङ्बा सिदुङ्जभाहाॽग के़सिबाहाॽरे़ लागि ने़त्के़युक्पाहाॽरे़ खुन्छिॽ खरे़ःङ् हे़क्के पोङ्लो खे़न् के़जाबाहाॽ के़रे़क् आसुत्थो मे़बोङ्लो॥ अक्तङ्बा कुजाःङ्ग खे़ङ्हाॽरे़ खुन्छिॽ लागिरक् पोङ्लो, यहवे दाङ्बे़ल्ले़ कुहिम्मो खे़न् मे़न्दारुन्लो॥ 5 निःन्धो के़बोङ्बा खिनिॽ तङ्नाम्हाॽओबा ये़न्नो, हे़क्क्याङ् यहवे दाङ्बे़ल्ले़ कुदङ्नाम्हाॽओबा ये़न्नो आक्खे के़जोगुम्बे? 6 खे़ङ्हाॽ मे़क्मालाम् मे़घे़त्छिङ्साङ् मिस्र लाजेःल्ले़ खे़ङ्हाॽ फुक्खुसिरो, हे़क्क्याङ् मोपबा मनाहाॽरे़ खे़ङ्हाॽ मे़लुप्तुसिरो॥ खे़ङ्हाॽरे़ खुन्छिॽ युप्पा याङ्साकुन्धेहाॽ तिङ्ग्रेक् लाःल्ले़ सुःप्तुरो खे़ङ्हाॽरे़ खुन्छिॽ साःङ्गाहिम्हाॽ तिङ्ङिल्ले़ कुबुङ्हाॽरे़ थिम्सुरो॥ 7 खुम्दिङ् पिमा ये़न्हाॽ निःत्ताङ् त्ये़आङ् वाॽरो, कुले़क्वा नुःक्मा ये़न्हाॽ चिदुप् वाॽरो॥ कन् पाःन्हाॽ इस्राइलरे़ निङ्वाॽ खोसुररो॥ खिनिॽ लायोहाॽ यरिक् वाॽबा नु सिक्चोःक्मान् यम्बा चोःक्पे़ल्ले़ माङ्निङ्वाॽपान् के़बाःप्पे़न् अदङ् नु याम्साम्मिल्ले़ थुक्तुबा मनाःङ्ग के़नाङ्बा के़लेःत्तुम्लो॥ 8 माङ्निङ्वाॽपान् के़बाःप्पे़ङ्ग एफ्राइम्मिन् कम्ब्राङ् के़मे़प्पारो खुने़ॽ आङ्गाॽ आनिङ्वाॽफुमाङ्ङिन्नु सोसोरिक् वाॽरो॥ कर खुने़ॽ के़रे़क् कुलाम्मो चे़न्हाॽ मे़गे़सुआङ् ने़रो, हे़क्क्याङ् कुनिङ्वाॽफुमाङ्ङिल्ले़ कुहिम्मोआङ् खुने़ॽ मे़जिःत्तुरो॥ 9 गिबाओबा ये़न्हाॽ कुइसिक् खे़ङ्हाॽ खुन्छिॽ आप्फेक् साॽरिक् ताप्फे़ःल्लिक् फे़त्मे़लाःन्छिङ्ङाङ् मे़वाॽरो॥ निङ्वाॽफुमाङ्ङिल्ले़ खुन्छिॽ फे़न्याःम्बक्किन् निङ्वाॽ इःत्तुरो, खुने़ॽ खे़ङ्हाॽरे़ खुन्छिॽ लायोल्ले़ कुले़क्वा खुम्दिङ् पिरुसिरो॥ इस्राइलरे़ कुलायोल्ले़ कुले़क्वा तुमु 10 यहवे दाङ्बे़ल्ले़ अक्खे पाःत्तुरो, “आङ्गाॽ इस्राइले़न् खोमाग मुरे़क् खारे़क्पा ये़ःङ्घादे़न्नो चे़ल्ले़क्सेॽहाॽ खोमानु कुदङ्बा वये़रो, आङ्गाॽ खिनिॽ पाधे़बाहाॽ निमासि पःत्छेॽ पुङ्ङोबा तगि के़दुम्बा कुजाॽ हे़क्तङ्बा चोगे़रो॥ कर आल्ल खे़ङ्हाॽ बाल-पोरओ मे़बेःल्ले़ खे़ङ्हाॽ खे़न् सिरिङ् आममबा पाःन्नो मे़दोःन्छिङ्लो, हे़क्क्याङ् खे़ङ्हाॽरे़ खुन्छिॽ सिराॽ के़धाङ्बा नावाइत्लान् हे़क्के खे़ङ्हाॽ याम्गे़सिङ्बा मे़बोःक्खे़रो॥ 11 एफ्राइमरे़ कुमिमिदिङ्ङिन् पु हे़क्के पे़बेःक्लो, खे़ङ्हाॽ साआङ् मे़ङ्गत्ने़न्, साआङ् मे़याक्ने़न्लो, खे़ङ्हाॽ मे़छुक्माआङ् मे़म्बोङ्ने़न्लो॥ 12 खे़ङ्हाॽरे़ साएहाॽ यम्बा मे़जोगुसिसाङ् आङ्गाॽ लत्थिक् अङे़ःक्वाआङ् मे़न्याःक्के थारिक् खे़ङ्हाॽ मे़मासिङ्ल याःन्दुङ्सिङ्लो॥ आल्ल आङ्गाॽ खे़ङ्हाॽलाम् नुःङ्ङा पेःक्काल्ले़, ए खे़ङ्हाॽग मे़जिःत्ते़ मे़स्ये़रो! 13 आङ्गाॽ एफ्राइम्मिन् सिराॽ पधाङ्गेधाङ्बादे़न्नो खे़बक्सिङ् हे़क्के तुरोसे़न् कुइसिक् मे़लेःत्तुबा निसुङ्लो, कर एफ्राइमरे़ कुस्साहाॽ के़से़प्पाओ तिःक्तु तारुसिरो॥” 14 यहवे दाङ्बाए, खे़ने़ॽ खे़ङ्हाॽ पिरे़से़ॽओ— खे़ने़ॽ खे़ङ्हाॽ थे़मा के़बिरुसिबे? सागे़ले़म्बा के़देबा साराभेःत् पिरे़से़ॽओ हे़क्क्याङ् के़जप्पा के़बेःक्पा नुबक् पिरे़से़ॽओ॥ 15 दाङ्बे़ल्ले़ पाःत्तुरो, “गिलगालओ खे़ङ्हाॽरे़ मे़जोगुबा खुन्छिॽ के़रे़क् फे़न्याःम्बक्किल्ले़ चोगुल्ले़ आङ्गाॽ खे़ङ्हाॽ चिःत्तुङ्सिङ्लो॥ खे़ङ्हाॽरे़ खुन्छिॽ लायोबा याःम्बक्किल्ले़ चोगुल्ले़ आङ्गाॽ खे़ङ्हाॽ आहिम्मोलाम् नाःत्तुङ्देसुङ्सिङ्लो॥ खे़ङ्हाॽ याम्मो आभे़ल्ले़आङ् लुङ्माॽ मे़दुक्तुङ्सिङ्ङिन्लो, खे़ङ्हाॽरे़ खुन्छिॽ के़रे़क् लाम्लोबाहाॽ पिफ्युङ्बासिरो॥ 16 एफ्राइमिन् मे़धगुआङ् वाॽरो! खे़ङ्हाॽरे़ खुन्छिॽ साःप्पिन् हेरे़बेरो, खे़ङ्हाॽरे़ कुजाॽ फम्मा मे़न्छुक्तुन्लो॥ खे़ङ्हाॽरे़ अङे़ःक्वा साहाॽ मे़गत्तुसिसाङ् लुङ्माॽ मे़दुक्तुसिबा खुन्छिॽ साहाॽ से़रुङ्सिङ्लो॥” इस्राइलरे़ कुयाःम्बेओ माङ्निङ्वाॽपान् 17 आङ्गाॽ आनिङ्वाॽफुमाङ्ङिल्ले़ खे़ङ्हाॽ नाॽरुसिरो, थेआङ्भे़ल्ले़ कुबाःन्जाक्किन् खे़ङ्हाॽरे़ मे़न्इःत्ते मे़न्नाःत्ते मे़वाॽरो॥ मे़न्छाम् सुवाङ्हाॽरे़ खुन्छिॽ लुम्मो खे़ङ्हाॽ ताक्कन्जारि मे़बोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.