होसे 8 - लिम्बुइस्राइलरे़ कुआप्तिक् 1 दाङ्बे़ल्ले़ अक्खे पाःत्तुरो, “थुत्तुरिःप्पे़न् खिनिॽ मुराओ फत्छे़म्मे़ॽआङ् मुःत्ते़म्मे़ॽओ! कक्कफिःक्मा थिक् यहवे दाङ्बे़ल्ले़ कुहिम् सम्धाङ् सुःक् युरो! थेआङ्भे़ल्ले़ मनाहाॽरे़ आङ्गाॽ आमाङ्हुप्पिन् मे़भेःन्दुआङ् वाॽरो, खे़ब्याङ् आसाम्यो थिम्मिल्ले़ कुदक्ले़ङ्वाओ पिफ्युङ्बा मे़बोःक्खे़आङ् मे़वाॽरो॥ 2 इस्राइलरे़ आङ्गाॽ अक्खेलॽरिक् पेलि फाक्कारो, ‘आनिगे निङ्वाॽफुमाङ्ङे, आनिगे इस्राइलिहाॽरे़ खे़ने़ॽ कुसिङ् निःत्तासिगे़रो॥’ 3 कर आत्तिन् पाःन्निन् नुबा चोक्, इस्राइलरे़ खे़न् अत्तुआङ् वाॽरो, खे़ल्ले़चोगुल्ले़ निङ्मिःल्ले़ खुने़ॽ नाःत्तुरो॥ 4 खे़ङ्हाॽरे़ आङ्गाॽ मे़न्दे़न्ने हाङ्हाॽ युक्तिङ् मे़जोगुसिरो, खे़ङ्हाॽरे़ आङ्गाॽ मे़न्दे़न्ने लाम्लोबाहाॽ मे़सेगुसिरो॥ खे़ङ्हाॽ आप्फेक् मे़क्मारे़ लागि खुन्छिॽ साम्म्याङ् नु युप्पान् खे़ङ्हाॽरे़ खुन्छिॽ आप्फेक् लागि नावाइत्ला मे़धगुसिरो॥ 5 “सामरियाए, खे़ने़ॽ के़बित्सात् नावाइत्लान् लाप्फेसे़ॽओ, खे़ङ्हाॽरे़ खुन्छिॽ तक्ले़ङ्वाओ साॽरिक् आसिक् पोगे़आङ् वाॽरो॥ खे़ङ्हाॽ आप्फाल्ले़ थारिक् सुत्थो पोङ्मारे़ लागि सुत्थो पोङ्मा मे़न्छुक्मनाबा मे़बोङ्बाबे? 6 कन् सामरिबा पित्सात् नावाइत्लाःङ्ग इस्राइलबारो! कङ्ग चोबेगुःल्ले़ चोगुबारो, निङ्वाॽफुमाङ् मेःन्लो कन् कुम्जिक्मा पोङ्लो॥ 7 “खे़ङ्हाॽरे़ साम्मित् केजङ्ङिन् मे़हेॽरुरो, हे़क्क्याङ् के़इक्सिङ्बा सुरित् केजङ्ङिन् मे़सुप्सुसिरो॥ इक्ताप्पोबा चालाङ्ङो कुदाप्मा मे़धोःक्ने़न्लो, खे़ल्ले़ थेआङ् कुजाॽआङ् मे़धोःक्ने़न्लो थोःक्साङ् वेॽ लाजेॽबाहाॽरे़ खे़न् मे़लरु मे़देसुरो॥ 8 इस्राइले़न् मे़लरु मे़देसुआङ् ने़रो, आल्ल खे़न् मे़न्छाम् सुवाङ्हाॽरे़ खुन्छिॽ लुम्मो हने़बा खप्प्या हे़क्तङ्बा पोःक्खे़आङ् ने़रो॥ 9 ताम्भुङ् अदङ्ङिन् एःक्से़त्छा ना नु कत्ना लाङ्घेःक्काङ् वाॽबा हे़क्के खे़ङ्हाॽ अस्सुर मे़बेआङ् मे़वाॽरो॥ एफ्राइम्मिल्ले़ कुमे़न् हुङुआङ् खुने़ॽ लुङ्माॽ हिःप्तुसिबाहाॽ इङुसिआङ् वाॽरो॥ 10 खे़ङ्हाॽ मे़न्छाम् सुवाङ्हाॽओ मे़सङ्सिङ्ङाङ् मे़वाॽसाङ् आल्ल आङ्गाॽ खे़ङ्हाॽ सोरिक् सुप्सुङ्सिङ्लो, मुक्साम्साबा हाङ्ङिल्ले़ आयुक्युक्पा कुयुक्को खे़ङ्हाॽ ये़ःङ्घिःक्खिःक्पा मे़बोङ् मे़बेःक्लो॥ 11 “एफ्राइमरे़ लायोलाम् ले़प्मि खोमा सिदुङ्जभाहाॽरे़ लागि यरिक् ले़त्ति तोःम्मादे़न्हाॽ चोगुसिआङ् मे़ने़साङ् खे़ङ्हाॽग खुने़ॽ कुलागि लायो चोःक्मा ले़त्ति तोःम्मादे़न् पोःक्खे़आङ् ने़रो॥ 12 आङ्गाॽ खे़ङ्हाॽरे़ खुन्छिॽ लागि यरिक् थिम्हाॽ आङ्गाॽ आसाम्योथिम् इङ्जाङ्ङो साप्तुङ्लो, कर खे़ङ्हाॽरे़ खे़न् कुभा वेॽ लाजेॽबा थिम् हे़क्तङ्बा मे़लेःत्तुरो॥ 13 आङ्गाॽ मे़बिराङ्बा सिदुङ्जभाहाॽ खे़ङ्हाॽरे़ मे़दोन्दुरो हे़क्क्याङ् सिदुङ्जभा सान् खे़ङ्हाॽरे़ मे़जरो, कर यहवे दाङ्बे़न् खे़ङ्हाॽनु कुनिङ्वाॽ मे़दाने़न्लो॥ आल्ल खुने़ॽ खे़ङ्हाॽरे़ खुन्छिॽ फे़न्याःम्बक्किन् निङ्वाॽ इःत्तुरो हे़क्क्याङ् खुन्छिॽ लायोल्ले़ कुले़क्वा खुम्दिङ् पिरुसिरो, खम्भ्याङ् खे़ङ्हाॽ मिस्र लाजेॽ मे़नुःङ्ङाङ् मे़बेःक्लो॥ 14 इस्राइलरे़ कुनावा चइःत्दाङ्बे़न् निङ्वाॽ फेःत्छुआङ् वाॽरो हे़क्क्याङ् पयम् यम्बा हिम्हाॽ चोगुसिआङ् युङ्लो, यहुदाःल्ले़ यरिक् ये़क्यक्हाॽओ हाङ्यक्हाॽ चोगुसिआङ् ने़रो॥ कर खे़ङ्हाॽरे़ खुन्छिॽ ये़क्यक्हाॽओ मि केःत्तुङ्लो, हे़क्क्याङ् खे़ल्ले़ खुन्छिॽ हाङ्यक्हाॽ खाप्पुथ्यःङ् चोगुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.