होसे 6 - लिम्बुमनाहाॽ लायोलाम् के़हिम्बा मे़ले़ङ्सिङ् 1 “त्ये़म्मे़ॽओ, यहवे दाङ्बाओ आनिॽ नुःक्खिरो॥ खुने़ॽ आनिॽ कुम्जिक्मा आयःप्से़आङ् वाॽरो, कर आल्ल खुने़ॽ आनिॽ आवेःन्लो॥ खुने़ॽ आनिॽ आधगे़आङ् आवाॽरो, कर खुने़ॽ आनिॽ याङ्घेःक्हाॽओ सिदाॽ हुःत्तु आबिरो॥ 2 नियान् एगाङ् खुने़ॽ आनिॽ कुहिङ्वे़त् आजोःक्लो, सुम्सिगेक्पा ये़न्नो खुने़ॽ आनिॽ आभोङ्लो, हे़क्क्याङ् आनिॽ खुने़ॽ कुदगि आहिङ्लो॥ 3 यहवे दाङ्बे़न् आनिॽ कुसिङ् निःत्तुम्लो, यहवे दाङ्बे़न् कुसिङ् निःप्मारे़ लागि चक्मे़ल्लॽए तम्सिङ् चोगुम्लो॥ तानाम् नाम् लिङ्बा हे़क्के खुने़ॽ से़क्खा तारो, खुने़ॽग आनिॽओ हाङ्वामा ये़म्मोबा वहित् हे़क्के, खाम्बेक् वागे़रङ्बा कुनुप्मोबा वहित् कुइसिक् तारो॥” 4 एफ्राइमए, आङ्गाॽ खे़ने़ॽ थे मे़त्ने़बाबे? यहुदाए, आङ्गाॽ खे़ने़ॽ हे़न् मे़त्ने़बाबे? खिनिॽ मिःम्जिन् तानाम्बा तुङ्हिःक् हे़क्के लॽरो खे़ब्याङ् आन्देन् तानाम्बा के़माबा के़बेःक्पा सेःक्वा हे़क्के लॽरो॥ 5 कल्ले़चोगुल्ले़ आमाङ्निङ्वाॽपान् के़बाःप्पाहाॽलाम् आङ्गाॽ खिनिॽ कुम्जिक्मा चोःक्निङ्ङाङ् वाॽरो, आङ्गाॽ खिनिॽ आम्ब्राओबा पाःन्जाःक्किल्ले़ से़त्निङ्ङाङ् वाॽरो आङ्गाॽ आघासे़न्निन् खिनिॽओ साःम्भे हे़क्के ले़क्ते़आङ् वाॽरो॥ 6 थेआङ्भे़ल्ले़ आङ्गाॽग वयागे़न् सिदुङ्जभाहाॽ मेःन्लो चक्मे़न्लॽए याप्मि मिःम् के़मे़त्तिबा निङ्वाॽ चोगुङ्लो, हे़क्क्याङ् मिधिङ्मनादेमनाबा सिदुङ्जभानुःल्ले़ आल्लसाङ् यरिक् निङ्वाॽफुमाङ्ङिन् कुसिङ् के़निःत्तुम्बा निङ्वाॽ चोगुङ्लो॥ 7 कर खे़ङ्हाॽरे़ग आदम्मिन् कुइसिक् माङ्हुप्पिन् मे़भेःन्दुआङ् वाॽरो, खे़प्मो खे़ङ्हाॽ आङ्गाॽ ले़प्माङ् नसाःन्साबा मे़म्बोःक्खे़न्लो॥ 8 गिलादे़न् कुॽइके़भे़म्बा मनाहाॽरे़ खुन्छिॽ ये़क्यक्लो माक्खिॽ लाङ्योःक्हाॽरे़ खे़न् तिम्से़आङ् ने़रो॥ 9 आक्खेलॽरिक् के़नाप्पाहाॽरे़ लाम्मो मनान् मे़सुगुआङ् मे़युङ्ॽ, हे़क्केलॽरिक्के निङ्वाॽफुसाम्बाहाॽ मे़धुक्सिङ्ङाङ् मे़वाॽरो॥ खे़ङ्हाॽरे़ सेकेम के़बेःक्पा लाम्मो मना मे़से़रुसिरो, कम्भलॽरिक् खे़ङ्हाॽरे़ ताप्फे़ःम्बा याःम्बक् मे़जोगुरो॥ 10 इस्राइलबा हिम्सयङ्ङो किप्मागे़घुबा पान् निसुङ्ङाङ् वाॽरो, एफ्राइम्मिन् याम्बोःप्मा याःम्बक् चोगुआङ् वाॽरो हे़क्क्याङ् इस्राइले़न् चिःन्जिःन्गे़घुबा पोःक्खे़आङ् वाॽरो॥ 11 यहुदाए, खे़ने़ॽ के़लागिआङ् चासुम्मा ये़म् पोःक्खे़आङ् ने़रो॥ आङ्गाॽ आमनाहाॽरे़ खुन्छिॽ नुॽमा तामाहाॽ नुःक्तुङ्ङिल्ले़, |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.