होसे 5 - लिम्बु1 “निङ्वाॽफुसाम्बासे, कन् पाःन्निन् खे़प्से़म्मे़ॽओ! इस्राइलि हिम्सयङ्से, सिङ्सिङ् ये़क्ये़क्काङ् खे़प्से़म्मे़ॽओ! हाङ् हिम्सयङ्से, निङ्वाॽ पिरे़म्मे़ॽआङ् खे़प्से़म्मे़ॽओ! कन् निःन्धो के़बोङ्बा खासे़न्निन् खिनिॽ तङ्ले़ङ्वाओ वाॽरो— मिस्पाओ खिनिॽ चे़न् नु तबोरओ के़मनाबा इदाक् के़बोःक्खिआङ् वाॽरो॥ 2 पिफ्युङ्बाहाॽ मना चे़प्मा से़प्मा याःम्बक्को मे़ध्ये़आङ् मे़याक्लो॥ आङ्गाॽ खे़ङ्हाॽ के़रे़क् हे़न्थिम्मो तारुङ्सिङ्लो॥ 3 आङ्गाॽ इफ्राइमरे़ कुदक्ले़ङ्वाओ के़रे़क् पाःन्हाॽ निसुङ्लो, हे़क्क्याङ् इस्राइले़न् आङ्गाॽलाम् चिङ्सिङ्बा होप्लो॥ इफ्राइमए, खे़ने़ॽ याम्बोःप्मा याःम्बक् के़जोगुआङ् वाॽरो, इस्राइले़न् साॽरिक् याम्गे़सिङ्बा वाॽरो॥” होसेःल्ले़ नावाइत्ला माङ्गे़घबाहाॽ साम्दिङ् पिरुसि 4 “खे़ङ्हाॽरे़ खुन्छिॽ याःम्बक्हाॽरे़ चोगुल्ले़ खुन्छिॽ निङ्वाॽफुमाङ् ले़प्माङ् नुःङ्मा मे़भाःक्तुसिन्लो॥ याम्बोःप्मा निङ्वान् खे़ङ्हाॽरे़ खुन्छिॽ सिक्लुम्मो वाॽरो, हे़क्क्याङ् खे़ङ्हाॽरे़ यहवे दाङ्बे़न् कुसिङ् निःप्मा निङ्वाॽ मे़न्जोगुन्लो॥ 5 इस्राइलबा मनाहाॽरे़ खुन्छिॽ आङ्दिङ् लॽमे़ल्ले़ खुन्छिॽ आप्फेक् तक्ले़ङ्वाओ तोःन्दि पिरुसिरो॥ इस्राइल नु एफ्राइम्मिन्नाङ् खुन्छिॽ आप्फेक् लायोओ खुन्छिॽ चोःन्छिरो, यहुदाःन्नाङ् खे़ङ्हाॽनुए चोःन्लो॥ 6 खे़ङ्हाॽरे़ खुन्छिॽ मे़ल्लुक् मे़ःन्दाहाॽ नु पिप्मा पित् लुप्हाॽ मे़देॽरुसिआङ् सिदुङ्जभा तोःम्मासिरे़ लागि यहवे दाङ्बे़ल्ले़ कुगोःत्छे़ मे़बेःक्किल्ले़ खे़ङ्हाॽरे़ खुने़ॽ मे़न्दुमुन्लो, खुने़ॽ खे़ङ्हाॽलाम् लाःत्लाःत् खे़त्छिङ्घे़रे़आङ् वाॽरो॥ 7 यहवे दाङ्बाओ खे़ङ्हाॽ इङ्ले़क्स्वाबा मे़बोःक्खे़आङ् मे़वाॽरो, खे़ङ्हाॽरे़ खोॽसा साहाॽ सामे़गत्तुसिआङ् मे़वाॽरो॥ आल्ल लादुप्पोबा तङ्नाम्मिल्ले़ खे़ङ्हाॽ नु खुन्छिॽ इक्ताप्हाॽआङ् सोसोरिक् खाप्पुथ्यःङ् मे़क्खुसिरो॥” यहुदा नु इस्राइल लुम्मो ते़न्धङ् 8 “गिबाओ थुत्तुरिःप्पा मुःत्ते़म्मे़ॽओ, हे़क्क्याङ् रामाओ सादाङ्ङिन् लाइक्खाम्मे़ॽओ॥ बेथ-आवनओ थङ् इक्लान् लःत्ते़म्मे़ॽओ, बे़न्यामिनए, लाम्लोमा याःम्बक् चोगे़ॽओ॥ 9 खासे़न् ये़न्नो इफ्राइम्मिन् मुरे़क् खारे़क् मे़जोगुरो, आत्तिन् पाःन्निन् से़क्खाए पोङ्ॽ, खे़न् इस्राइलबा थाःक्हाॽरे़ खुन्छिॽ लुम्मो आङ्गाॽ उवा चोगुङ्लो॥ 10 “यहुदाबा लाम्लोबाहाॽग इःन्दोहाॽओ के़युङ्बा लुङ्हाॽ के़जप्पा के़देबा हे़क्तङ्बा मे़जोक्लो॥ आङ्गाॽ आसाक्के़न्निन् खे़ङ्हाॽरे़ खुन्छिॽ सम्धाङ् के़गुङ्बा च्वाःत् कुइसिक् थासुङ्लो॥ 11 एफ्राइम्मिन् तुक्खे लाक्खे मे़जाःत्तुआङ् वाॽरो, खासे़न्नो खे़न् चिदोॽ चिदोॽ तोॽमो थ्ये़आङ् वाॽरो, थेआङ्भे़ल्ले़ नावाइत्लाहाॽ तिम्मासि खे़ल्ले़ निःन्धो चोगुआङ् वाॽरो॥ 12 कल्ले़चोगुल्ले़ एफ्राइमरे़ कुलागि थक्पा हे़क्के लॽआरो हे़क्क्याङ् यहुदाबा हिम्सयङ्हाॽरे़ लागि के़यःप्पा हे़क्के लॽआरो॥ 13 “आल्ल एफ्राइम्मिल्ले़ खुने़ॽ कुदुक्मे़न् निसुरो हे़क्क्याङ् यहुदाःल्ले़ खुने़ॽ कुयाङ्घेःक्किन् निसुरो, खे़ब्याङ् एफ्राइम्मिल्ले़ अस्सुरबा पयम् हाङ्ङे़ओ कुभाॽरे़ लागि मनाहाॽ पाङ्घुदेसुसिरो॥ कर खे़ल्ले़ खे़ने़ॽ के़नुॽर चोःक्मा खे़ल्ले़ खे़ने़ॽ के़याङ्घेःक्किन् वेःम्मा मे़सुक्तुन्लो॥ 14 थेआङ्भे़ल्ले़ आङ्गाॽ एफ्राइमरे़ कुलागि खिरिङ्बा नु यहुदाःल्ले़ कुहिम्सयङ्ङिल्ले़ लागि यम्बा खिरिङ्बा हे़क्तङ्बा पोङ्ङारो॥ आङ्गाॽए खे़ङ्हाॽ ताराक् ताराक् साःक्सुङ्सिङ्लो खम्भ्याङ् आङ्गाॽ आलाम्मो थासिङ्ङारो, आङ्गाॽ खे़ङ्हाॽ पक्खुङ् तेॽरुङ्सिङ्लो हे़क्क्याङ् खे़ङ्हाॽ के़से़ःप्पा हाःत्ताङ् मे़होप्लो॥ 15 खे़ङ्हाॽ खुन्छिॽ आप्तिक् पाःन्नो मे़न्दे़न्ने़ल्ल थारिक्, आङ्गाॽ आप्फेक् आवाॽमादे़न्नो नुःङ्ङा ताआरो॥ खे़ङ्हाॽरे़ आङ्गाॽ आनारान् ओमे़प्मा मे़गोःत्तुरो, खे़ङ्हाॽरे़ खुन्छिॽ तुक्खेलाक्खेओ आङ्गाॽ निङ्वाॽ इगेःक्काङ् मे़गोःत्तारो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.