होसे 2 - लिम्बु1 “खिनिॽ आप्फेक् इस्राइलबा फुॽनुसाॽहाॽ ‘आङ्गाॽ आमनासे’ मे़त्ते़म्सिम्मे़ॽ हे़क्क्याङ् ने़ॽनुसाॽहाॽ ‘आङ्गाॽ आलुङ्माॽ के़दुक्मासे’ मे़त्ते़म्सिम्मे़ॽओ॥ इस्राइलरे़ कुघुम्दिङ् नु याम्मो युक्सिङ् 2 खिनिॽ माःन् फे़ःक्ते़म्मे़ॽओ, खुने़ॽ फे़ःक्ते़म्मे़ॽओ, थेआङ्भे़ल्ले़ खे़न् आङ्गाॽ आमेत् मेःन्लो, हे़क्क्याङ् आङ्गाॽ खुने़ॽ कुये़म्बाआ मेःन्लो॥ खुने़ॽ कुनाराओलाम् याम्बोःप्मा चित्लि नारान् हे़क्क्याङ् कुनुहाॽओलाम् कुइङ्ले़क्मान् खे़त्तुररो, 3 मेःन्ने़भग्र आङ्गाॽ खुने़ॽ ले़क्चाबे़धिक् चोगुङ्लो, हे़क्क्याङ् खुने़ॽ सावाःन्छिङ्बा ये़न्नो हे़क्के खे़ब्याङ् नाम्मिल्ले़ सेःक्तुबा मुरे़क् खारे़क् थेआङ् के़होप्पा ये़ःङ्घादे़न् कुइसिक् चोगुङ्लो हे़क्क्याङ् वामिःक्मालाम् सिमारे़ लागि ले़रुङ्देसुङ्लो॥ 4 खे़ल्ले़ कुस्साहाॽ आङ्गाॽ लुङ्माॽ मे़दुक्तुङ्सिङ्ङिन्लो, थेआङ्भे़ल्ले़ खे़ङ्हाॽ याम्बोःप्मा याःम्बक् के़जोःक्मे़ल्ले़ कुस्सासिरो॥ 5 खे़ङ्हाॽरे़ खुन्छिॽ माःल्ले़ इङ्ले़क् चोगुआङ् वाॽरो हे़क्क्याङ् सिरिङ्ममो खे़ङ्हाॽ साप्पोःक्को कुयुसिआङ् वाॽरो॥ खुने़ॽ पाःत्तु, ‘आङ्गाॽ लुङ्माॽ हिःप्तुसिङ्बाहाॽ तिम्दुङ्सिङ्लो, खे़ङ्हाॽरे़ आजामा खरे़ःङ् आधुङ्मा च्वाःत्, से़मुरिक्, नैनासुत् चिरिक्, चैतुन निःङ्गेॽ नु चे़ल्ले़क्सेॽ थि मे़बिआरो॥’ 6 “खे़ल्ले़चोगुल्ले़ तिङ्ग्रेक्पा फात्ताप्हाॽरे़ आङ्गाॽ खे़ल्ले़ कुलाम्मिन् थेःक्तुङ्लो, हे़क्क्याङ् लुङ्धाक् सिगाङ् साक्तुङ् युक्खुङ्लो हे़क्केलॽरिक् खे़ल्ले़ लाम् मे़घोसुन्लो॥ 7 खुने़ॽ लुङ्माॽ हिःप्तुसिबाहाॽ एगाङ् एगाङ् तिम्दुसिरो, कर खुने़ॽ खे़ङ्हाॽ मे़सिॽरुसिन्लो खुने़ॽ खे़ङ्हाॽ हक्सुसिरो कर खुने़ॽ खे़ङ्हाॽ मे़घोसुन्सिन्लो॥ खे़ब्याङ् खुने़ॽ अक्खे पाःत्तुरो, ‘आङ्गाॽ तगिबा आये़म्बाओ नुःङ्ङा पेःक्कारो, थेआङ्भे़ल्ले़ आल्लोनुःल्ले़ खे़न् ये़म्मो आङ्गाॽ नुराङ् तासाङ्ङाङ् वयाङ्लो॥’ 8 खुने़ॽ पोगुगे़न् कुजा, कुबोक् चे़ल्ले़क्सेॽ थि हे़क्क्याङ् चैतुन निःङ्गेॽ के़बिबाग आङ्गाॽए वयाङ्लो खे़ब्याङ् आङ्गाॽए खुने़ॽ सम्धाङ् साम्म्याङ् नु युप्पा थासुङ्ङाङ् वये़ के़लॽबा पाःन्निन् खुने़ॽ कुसिङ् मे़निःत्तुन्लो, खे़न् पाःन्हाॽग खे़ङ्हाॽरे़ बाल माङ्ङो मे़न्दोःन्दुरो॥ 9 “खे़ल्ले़चोगुल्ले़ कुजा तुम्मिल्ले़ आङ्गाॽ आजान्, हे़क्क्याङ् कुबोक् चे़ल्ले़क्सेॽ थि यारिप् पोङ्ङिल्ले़ आजे़ल्ले़क्सेॽ थिन् आङ्गाॽ नुःक्तुङ् तेॽरुङ्लो॥ हे़क्क्याङ् खे़ल्ले़ कुले़क्चाबे़धिक् ते़प्मा आसे़मुरिक्किन् नु नैनासुत् चिरिक्किन् आङ्गाॽ नाप्तुङ् तेॽरुङ्लो॥ 10 आल्ल खुने़ॽ लुङ्माॽ हिःप्तुसिबाहाॽरे़ खुन्छिॽ तगिए आङ्गाॽ खे़ल्ले़ कुमे़न्दप्पिन् निधाःप्ल याःन्दुङ्लो, हे़क्क्याङ् आहुक्कोलाम् हाःत्ले़आङ् खे़न् ताङ्मे़से़ःप्तुन्लो॥ 11 आङ्गाॽ खे़ल्ले़ के़रे़क् कुसोसोत् लराङ्हाॽ, खे़ल्ले़ कुलादुप्पोबा तङ्नाम्हाॽ, खे़ल्ले़ के़रे़क् कुनाःम्सिङ्मा ये़न्हाॽ नु निःन्धो के़बोङ्बा खे़ल्ले़ के़रे़क् कुसाभःङ्जाहाॽ साक्तुङ् पिरुङ्लो॥ 12 खे़ल्ले़ कुजे़ल्ले़क्सेॽबुङ्हाॽ नु कुबःत्छेॽबुङ्हाॽरे़ कुयाःम्बेओ अक्खे पाःत्तुआङ् वाॽरो, ‘कन् लुङ्माॽ हिःप्तुङ्सिबाहाॽरे़ मे़बिराङ्बा आनाम्याक्लो॥’ आङ्गाॽ खे़ङ्हाॽ मुरे़क् खारे़क् चोगुङ् पिरुङ्लो, आङ्गाॽ खे़ङ्हाॽ फात्ताप् चोगुङ्लो हे़क्क्याङ् ताम्भुङ् थक्साहाॽरे़ सिङ्सेॽहाॽ मे़जमे़देसुरो॥ 13 खे़न् ये़न्हाॽओ खुने़ॽ बाल माङ्हाॽरे़ लागि सुक्पा हाःन्दुबाल्ले़ चोगुल्ले़ खे़न् खुम्दिङ् पिरुङ्लो, खुने़ॽ कुन्दुल्लोहाॽ नु सामाहाॽ वाःत्छिङ्लो हे़क्क्याङ् लुङ्माॽ हिःप्तुसिबाहाॽ तिम्दुसिरो, खे़ब्याङ् आङ्गाॽ निङ्वाॽ फेःत्छाङ्ङाङ् वये़रो,” यहवे दाङ्बे़ल्ले़ उवा चोगुआङ् वाॽरो॥ यहवे दाङ्बे़ल्ले़ कुमनाहाॽ लुङ्माॽ तुक्तुसि 14 “कल्ले़चोगुल्ले़ आल्ल आङ्गाॽ खे़न् ले़मुङ्ङाङ् मुरे़क् खारे़क् थेआङ् के़होप्पादे़न्नो तेॽरुङ्लो, हे़क्क्याङ् खे़प्मो नःम्नःम्माङ् ताॽजे़क्तुङ्लो॥ 15 खे़प्मो खे़ल्ले़ कुजे़ल्ले़क्सेॽ इक्ताप्हाॽ नुःक्तुङ् पिरुङ्लो, हे़क्क्याङ् आकोरबा ने़ने़बादे़न्निन् आङ्गाॽ निङ्साङ् चोःक्मा लाम्धेःप् चोगुङ् पिरुङ्लो॥ खे़प्मो खुने़ॽ वे़न्दे़आङ् वये़बा कुये़न्हाॽओ हे़क्के हे़क्क्याङ् खुने़ॽ मिस्र लाजेॽलाम् थाङे़बा ये़न्नो हे़क्के साम्लोरो॥” 16 यहवे दाङ्बे़ल्ले़ अक्खेलॽरिक् उवा चोगुरो, “खे़ल्ले़ याःन्दिक् ‘आङ्गाॽ आये़म्बाए’ के़मे़त्तारो, हे़क्क्याङ् ‘आङ्गाॽ आन्दाङ्बाए’ के़म्मे़त्तान्लो॥ 17 बाल माङ्हाॽरे़ कुमिङ्हाॽ खे़ल्ले़ कुम्ब्राओलाम् खे़त्तुङ्लो, हे़क्क्याङ् खे़न् मिङ्हाॽ याम्मो आप्फाल्ले़आङ् मे़इङ्घुन्लो॥ 18 खे़न् ये़न्नो आङ्गाॽ खे़ङ्हाॽरे़ खुन्छिॽ लागि ताम्भुङ्ङोबा थक्साहाॽनु हे़क्क्याङ् ताङ्साङ्बोबा पुसाहाॽनु खे़ब्याङ् खाम्बाङ्ङो के़सःन्छिङ्बा थक्साहाॽनु माङ्हुप् चोगुङ्लो॥ खो, ताभे नु थङ्हाॽ आङ्गाॽ लाजेॽलाम् लाःत्लाःत् चोगुङ्लो, हे़क्केलॽरिक् के़रे़क् थाप्थेःक् याम्धेक् ने़मा मे़घोररो॥ 19 आङ्गाॽ खे़ने़ॽ सदादिङ्ले़ लागि पाःन्भुॽने़रो, आङ्गाॽ साम्योनिमा नु कुदोःप्मा खासे़न्नो लुङ्माॽ तुक्ने़ हे़क्क्याङ् मिःम्जिओ पाःन्भुॽने़रो॥ 20 कुदोःप्माआङ् आङ्गाॽ खे़ने़ॽ आमेत् चोःक्ने़रो हे़क्क्याङ् खे़ने़ॽ यहवे दाङ्बे़न् कुसिङ् के़निःत्तुरो॥” 21 “यहवे दाङ्बे़ल्ले़ अक्खेलॽरिक् उवा चोगुरो, खे़न् ये़न्नो आङ्गाॽ नुगप् पिरुङ्लो, आङ्गाॽ ताङ्साङ्बे़न् नुगप् पिरुङ्लो हे़क्क्याङ् ताङ्साङ्बे़ल्ले़ इक्सादिङ् खाम्बेःक्मान् नुगप् पिरुरो॥ 22 इक्सादिङ् खाम्बेःक्मे़ल्ले़ पोगुगे़न् कुजा, चे़ल्ले़क्सेॽ थिन् नु चैतुन निःङ्गेन् नुगप् पिरुसिरो खम्भ्याङ् खे़ङ्हाॽरे़ यिजरेले़न् नुगप् मे़बिरुरो॥ 23 आप्फेक् आलागि निङ्वाॽफुमाङ्ङिल्ले़ कुमनाहाॽ इक्सादिङ् खाम्बेःक्को युक्खुङ्सिङ्लो, आङ्गाॽ आत्तिन् ‘लुङ्माॽ मे़न्दुक्मनामा’ मे़त्तुङ्ङाङ् वये़, आङ्गाॽ खे़न् लुङ्माॽ तुक्तुङ्लो॥ आत्तिन्हाॽ ‘आङ्गाॽ आमनानिङ् मेःन्’ मे़त्तुङ्सिङ्ङाङ् वये़ खे़ङ्हाॽ ‘आङ्गाॽ आमनानिङ्’ मे़त्तुङ्सिङ्लो॥ हे़क्क्याङ् खे़ङ्हाॽरे़ आङ्गाॽ अक्खे मे़मे़त्तारो, ‘खे़ने़ॽ आनिगे निङ्वाॽफुमाङ्ने़रो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.