होसे 14 - लिम्बुहोसेःल्ले़ इस्राइलले़न् निङ्वाॽफुमाङ्ङो नुःक्खे़ॽ मे़त्तु 1 इस्राइलए, यहवे के़निङ्वाॽफुमाङ्ङो नुःक्खे़ त्ये़ॽओ, खे़ने़ॽ के़लायोहाॽरे़ए खे़ने़ॽ के़सोःन्दे़आङ् वाॽरो॥ 2 पाःन्जाःक्हाॽ याङ्ङासिम्मे़ॽआङ् यहवे दाङ्बाओ नुःक्खे़म्मे़ॽओ, खुने़ॽ मे़त्ते़म्मे़ॽ, “आनिगे के़रे़क् लायोन् ले़प्मि चोगे़ आबिरे़ॽओ खे़म्ब्याङ् आनिगे लुङ्माॽ आदुक्ते़ॽआङ् आदाःक्ते़ॽओ, खे़म्ब्याङ् आनिगे मुरालाम् के़लःम्बा सिदुङ्जभान् तोःम्मा सुक्तुम्बे़रो॥ 3 अस्सुरे़ल्ले़ आनिगे ताङ्से़ःप्मा मे़सुक्तिगे़न्लो, थङ्ङोबा अन्हाॽ आनिगे मे़युक्तुम्सिम्बे़न्लो॥ आनिगे आप्फेक् हुक्किल्ले़ चोगुम्सिम्बे़बा पाःन्हाॽ याम्मो आभे़ल्ले़आङ् ‘आनिगे माङ्से’ मे़मे़त्तुसिम्बे़न्लो, थेआङ्भे़ल्ले़ ये़त्छा होॽदोक्हाॽरे़ खे़ने़ॽलाम् लुङ्माॽ तुक्मा मे़घोसुरो॥” इस्राइलरे़ कुलागि कुसङ् हिङ्मा माङ्हुप् 4 “खे़ङ्हाॽ आङ्गाॽलाम् ताप्मे़बे़ॽरे़बालाम् वेःन्दुङ्सिङ्लो, आङ्गाॽ खे़ङ्हाॽ आम्भाए लुङ्माॽ तुक्तुङ्सिङ्लो, थेआङ्भे़ल्ले़ आसाक्के़न्निन् खे़ङ्हाॽलाम् नुःक्खे़आङ् वाॽरो॥ 5 आङ्गाॽ इस्राइलिहाॽरे़ लागि सेःक्वा हे़क्तङ्बा पोङ्ङारो, आङ्गाॽ ले़क्वा फुङ् कुइसिक् फे़क्कारो ले़बनानबा साम्माङ्सिङ् हे़क्के खे़ल्ले़ कुसाःप् लेःत्छिङ्लो॥ 6 खे़ल्ले़ खारक् के़लःम्बा कुजङ्हाॽ पोधाङ्लो, खे़ल्ले़ कुहाङ्वा कुमाङ्वान् चैतुन सिङ्बुङ् हे़क्तङ्बा पोङ्लो, खे़ल्ले़ कुनाम्से़मे़न् ले़बनानबा साम्माङ्सिङ्हाॽ हे़क्के लॽरो॥ 7 मनाहाॽ याम्मो खे़ल्ले़ इःप्तुबादे़न्नो मे़युङ्लो, माःक्कि कुइसिक् खे़न् हुरुम् हुरुम् लॽरिक् पोधाङ्लो हे़क्क्याङ् चे़ल्ले़क्सेःल्ले़ कुबुङ् हे़क्के खे़न् फे़क्लो, खम्भ्याङ् कुमिङ्ङिन् ले़बनानबा चे़ल्ले़क्सेॽ थि हे़क्के से़रो॥ 8 “एफ्राइमए, नावाइत्लाहाॽनु आङ्गाॽ थे़मा चोगुङ्बे? आङ्गाॽ खे़न् नुगप् पिरुङ्ङाङ् आङ्गाॽ कम्ब्राङ् मे़त्तुङ्लो॥ आङ्गाॽग सरेःक्याःप्पा आःङ्ङिल्ले़ कुबुङ् हे़क्के लॽआरो, इङ्गाॽलाम्मे खे़ने़ॽ कुजाॽ के़बप्पा के़बोङ्लो॥ कुनुप्मा पाःन्हाॽ 9 सिक्कुम्साबा हात् वाॽबे? खे़ल्ले़ कन् पाःन्हाॽ निङ्वाॽ इःत्तुरो, खासिङ् के़निःप्पा हात् वाॽबे? खे़ल्ले़ कन् पाःन्हाॽ कुसिङ् निःत्तुरो॥ यहवे दाङ्बे़ल्ले़ कुलाम्हाॽ तोॽतोःम्बा चोक्लो, साम्योबा मनाहाॽ खे़प्मोए लाङ्मे़घेःक्लो, कर पिफ्युङ्बाहाॽ खे़प्मो मे़दोःक्काङ् मे़जोन्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.