होसे 13 - लिम्बुइस्राइले़न् कुनुप्मा खुम्दिङ् पिमा इङ्जाङ् 1 एफ्राइम्मिन् पारे़ल्ले़ मनाहाॽ मे़यक्खे़रो, इस्राइलओ खे़न् थाःङ्धाःङ् मे़भोःक्खुरो॥ कर खे़ल्ले़ बाल माङ्ङिन् माङ्से़वा मे़त्तुरो हे़क्क्याङ् आप्तिक्साबा पोःक्खे़आङ् खे़न् स्ये़रो॥ 2 आल्ल खे़ङ्हाॽरे़ आल्लसाङ् यरिक् लायो मे़जोगुरो, खुन्छिॽ आप्फेक् लागि खुन्छिॽ युप्पाहाॽलाम् खे़ङ्हाॽरे़ योःम्मनाबा नावाइत्लाहाॽ मे़धगुसिरो, इग्र मिक्ले़ङ्मालाम् कुइत् लःप्मनाबा नावाइत्लाहाॽ खे़ङ्हाॽ के़रे़क् चोबेगुहाॽरे़ मे़जोगुबा याःम्बक्लो॥ कन् मनाहाॽरे़ खुन्छिॽ याःम्बेओ मे़बाःत्तुआङ् वाॽरो, “कन्हाॽ सिदुङ्जभा तोःन्दे़म्सिम्मे़ॽओ पित्सात् नावाइत्लाहाॽ चुप् मे़त्ते़म्सिम्मे़ॽओ!” 3 कल्ले़चोगुल्ले़ खे़ङ्हाॽ तानाम्बा खाॽमित्, आन्देन् हारा के़योःम्बा के़बेःक्पा सेःक्वा, सुरित् केजङ्ङिल्ले़ चाधाम्मादे़न्नोलाम् फे़सुदेॽरुबा चासिप् नु पेधाःप्पोलाम् के़लःम्बा मिःक्खुॽ कुइसिक् मे़बोङ्लो॥ 4 “कर आङ्गाॽग यहवे खिनिॽ निङ्वाॽफुमाङ्आरो, आङ्गाॽ मिस्र लाजेॽलाम् खिनिॽ लःत्निङ्ङाङ् थाक्निङ्ङाङ् वाॽरो॥ आङ्गाॽनुःल्ले़ वेॽ आत्तिन् माङ्ङिन्नाङ्, वेॽ आत्तिन् से़न्लप्दाङ्बे़न्नाङ् खिनिॽ के़न्दाःक्तुम्मिन्लो॥ 5 मुरे़क् खारे़क् थेआङ् के़होप्पा ये़ःङ्घादे़न्नो, इग्र साॽरिक् नाम्गे़से़ःक्पा लाजेॽओ आङ्गाॽए खिनिॽ कम्ब्राङ् मे़त्निङ्ङाङ् वये़रो॥ 6 आङ्गाॽ खे़ङ्हाॽ कुजा चाःत्तुङ्सिङ्ङिल्ले़, खे़ङ्हाॽ मे़घासे़आङ् खुन्छिॽ सिक्एःप्तुरो॥ खे़ङ्हाॽ मे़घासे़आङ् खुन्छिॽ सिक्एःप्तुल्ले़, खे़ङ्हाॽ आङ्दिङ् के़लॽबा मे़बोःक्खे़रो खे़न् एगाङ् खे़ङ्हाॽरे़ आङ्गाॽ निङ्वाॽ मे़भेःत्छाङ्लो॥ 7 कल्ले़चोगुल्ले़ आङ्गाॽ खे़ङ्हाॽओ खिरिङ्बा हे़क्के ताआरो, थे़रिङ्बा हे़क्के आङ्गाॽ खुन्छिॽ लाम्मो सुगुङ्सिङ्ङाङ् युङ्ङारो॥ 8 कुस्साहाॽ मे़नाप्तुमा कुम्मामा माःॽयुःल्ले़ थे़ःक्खुसिबा हे़क्के खे़ङ्हाॽरे़ खुन्छिॽ ने़रे़त्ते़न् थिःक्तुङ्लो॥ खिरिङ्बा हे़क्के आङ्गाॽ खे़ङ्हाॽ खामुङ्सिङ्लो, ताम्भुङ् थक्साःल्ले़ खे़ङ्हाॽ थे़ःक्खुसिरो॥ 9 “इस्राइलए, आङ्गाॽ खिनिॽ मे़म्भै चोःक्निङ्लो, थेआङ्भे़ल्ले़ खिनिॽ आङ्गाॽ आदक्ले़ङ्वाओ, कुभाॽबाङ्ङिल्ले़ कुदक्ले़ङ्वाओ के़वयिरो॥ 10 खिनिॽ के़बाःत्तुम्माङ् वाॽरो, ‘आनिगे लत्छा हाङ् नु हाङ्साहाॽ आबिरे़ॽओ॥’ खिनिॽ ताङ्से़ःप्मा के़सुक्पा, खिनिॽ हाङ्ङिन् आत्ति वाॽबे? खिनिॽ के़रे़क् पाङ्जुहाॽओबा युक्साबाहाॽ आत्तो मे़वाॽबे? 11 कल्ले़चोगुल्ले़ आङ्गाॽ आयाःक्ले़ॽमो खिनिॽ लत्छा हाङ् पिनिङ्लो, हे़क्क्याङ् साॽरिक् आसिक् पोःक्मो खे़न् फोःक्खुङ्ङाङ् तेॽरुङ्लो॥ 12 “एफ्राइमरे़ कुआप्तिक्किन् लुम्मनाआङ् वाॽरो, खे़ल्ले़ कुलायोहाॽ साप्नाआङ् ने़रो॥ 13 मे़न्छुमान् सागप्मा तुङ्ङिल्ले़ तरुबा हे़क्के खे़न् तुक्खे़ःन् एफ्राइमओ तारो, कर खे़न् कुने़हि मे़न्दुम्मनाबा अङे़ःक्वा हे़क्के लॽरो, सावाःन्छिङ्मा ये़म्मो खे़न् कुलःम्मा लाम्मो मे़दोःन्छिङ्ङिल्लो॥ 14 “आङ्गाॽ खे़ङ्हाॽ इपुङ्ङिल्ले़ कुमुक्कोलाम् आङ्गाॽ कुमे़ल्लुङ् हुङुङ्ङाङ् थे़ॽरुङ्सिङ्लो, आङ्गाॽ खे़ङ्हाॽ सिमालाम् से़न्लप् पिरुङ्सिङ्लो॥ सिमाए, खे़ने़ॽ के़माङ्दुक्मे़ल्ले़ कुमिन्देहाॽ आत्ति वाॽबे? इपुङ्ङे, खे़ने़ॽ के़मे़ङ्मान् आत्तो वाॽग? 15 आप्फेक् कुम्भुॽ कुन्साॽहाॽरे़ खुन्छिॽ लुम्मो एफ्राइमे़न् नुॽदासाङ् आङ्गाॽ खे़न् लुङ्माॽ मे़दुक्कान्लो॥ यहवे दाङ्बालाम् नाङ्गे़न् पिसाङ्बा सुरिःत्तिन् मुरे़क् खारे़क् थेआङ् के़होःप्पादे़न् ले़प्माङ्लाम् हुभे़न्लो॥ खे़ल्ले़ कुज्वाःत् वबुन्दाक्वान् चप्प्रे़क् चप्लो, हे़क्क्याङ् खे़ल्ले़ कुवाबाक्किन् सर्गे़ङ् हेबेःक्लो॥ खे़ल्ले़ के़रे़क् इमे़ल्लुङ्बा कुजिगक्वा युङ्मादे़न्निन् मे़नाप्तुरो॥ 16 सामरियाबा मनाहाॽरे़ खुन्छिॽ आप्तिक्किल्ले़ खुम्दिङ् खोमाए पोङ्लो, थेआङ्भे़ल्ले़ खुन्छिॽ निङ्वाॽफुमाङ्ङिल्ले़ कुदक्ले़ङ्वाओ खे़ङ्हाॽ पिफ्युङ्बा मे़बोःक्खे़आङ् मे़वाॽरो॥ खे़ङ्हाॽ ताभेःल्ले़ लरे़ःङ्भरे़ःङ् मे़सोन्दुसिरो खे़ङ्हाॽरे़ खुन्छिॽ अङे़ःक्वा साहाॽ खाम्बाङ्ङो मे़धाप्सुसिरो, हे़क्क्याङ् मे़न्छुक्मा के़वाॽमा खे़ङ्हाॽरे़ खुन्छिॽ मे़न्छुमाहाॽरे़ खुन्छि साप्पोक्के़न् मे़जिरुसिरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.