होसे 12 - लिम्बुइस्राइलरे़ लायो चोगु 1 इफ्राइम्मिन् चक्मे़ल्लॽए सुरित् केजङ् चाःत्छिङ्ल, खे़ल्ले़ के़रे़क् ये़न् नाङ्गे़न् पिसाङ्बा सुरित्ते़न् नाःत्तुरो, हे़क्क्याङ् खे़ल्ले़ इङ्ले़क् नु मनासे़प्मा याःम्बक्हाॽ फोसुरो॥ खे़ल्ले़ अस्सुरे़न्नु नादङ् चोगुरो, खे़ब्याङ् मिस्रओ चैतुन निःङ्गेॽइन् हाङुरो॥ 2 याकुबरे़ कुदक्ले़ङ्वाओ यहवे दाङ्बे़ल्ले़ लत्छा कुआप्तिक् वाॽरो, हे़क्क्याङ् खुने़ॽ याकुबे़न् खे़ल्ले़ कुये़प्ले़क् कुइसिक् खुम्दिङ् पिरुरो॥ खे़ल्ले़ कुयाःम्बक् कुइसिक् खुने़ॽओ कुले़क्वा हुङुरो॥ 3 साप्पोःक्को खुने़ॽ कुम्भुॽरे़ कुलाङ्गाक्थिःम्बे़न् ते़म्सुरो, हे़क्क्याङ् यम्बा पोःक्खे़आङ् यहुदान् निङ्वाॽफुमाङ्ङिन्नु थक्ते़रो॥ 4 खुने़ॽ माङ्लाइङ्बे़न्नु थक्ते़आङ् खे़न् नाःन्दुरो, खुने़ॽ हाबे़आङ् मुॽइसाम्ले़ लागि खे़न् पेलि फाक्तुरो, खुने़ॽ बेथेलओ निङ्वाॽफुमाङ्ङिन् तुमुरो, हे़क्क्याङ् खे़प्मो निङ्वाॽफुमाङ्ङिन् आनिॽनु ताॽजे़क्खे़रो— 5 खे़न् मुक्साम्दाङ्बा यहवे निङ्वाॽफुमाङ्लो, खुने़ॽ कुमिङ्ङिन् यहवेरो॥ 6 खे़ल्ले़चोगुल्ले़ खिनिॽ आप्फेक् निङ्वाॽफुमाङ्ङो के़नुःक्खिरए पोङ्लो, मिःम्जिन् नु खासे़न्निन् हाबा तक्ते़म् कत्ते़म्मे़ॽओ, हे़क्क्याङ् चक्मे़ल्लॽए खिनिॽ निङ्वाॽफुमाङ्ङिन् हाङ्घे़म्मे़ॽओ॥ वेॽ खुम्दिङ्ङिल्ले़न् इङ्जाङ् 7 “ले़ङ्हङ् के़जोःक्पाहाॽरे़ मे़ङ्गे़प्मनाबा कुधाङ्माहाॽ मे़याङुरो, इङ्ले़क् चोःक्मा खे़ङ्हाॽ खुन्छिॽ सिराॽथाङ्लो॥ 8 एफ्राइम्मिल्ले़ पाःत्तुॽ, ‘आङ्गाॽ साॽरिक् याङ्साकुन्धेसाबा चोःक्कारो, आङ्गाॽ के़गप्पा पोःक्खाङ्ङाङ् वाॽआरो॥ आङ्गाॽ के़रे़क् आयाङ्सा कुन्धेहाॽरे़ चोगुल्ले़ खे़ङ्हाॽरे़ आङ्गाॽओ थे़माआङ् फे़न्याःम्बक् नु लायो मे़ङ्घोसुन्लो॥’ 9 “आङ्गाॽ यहवे खे़ने़ॽ के़निङ्वाॽफुमाङ्आरो, आङ्गाॽ खे़ने़ॽ मिस्र लाजेॽलाम् थाक्ने़आङ् वाॽरो॥ निःन्धो के़बोङ्बा खे़ने़ॽ के़दङ्नाम्बा ये़न्नो कुइसिक् आङ्गाॽ खे़ने़ॽ याम्मो साःङ्गाहिम्मो वाॽमा पाङ्ने़रो॥ 10 आङ्गाॽ माङ्निङ्वाॽपान् के़बाःप्पाहाॽनु ताॽजे़क्खाङ्लो, आङ्गाॽ खे़ङ्हाॽ यरिक् सुफोहाॽ पिरुङ्सिङ्लो हे़क्क्याङ् माङ्निङ्वाॽपान् के़बाःप्पाहाॽलाम् खे़दाॽ पाःन्हाॽ पिनिङ्लो॥ 11 “थे गिलादे़न् कुॽइगे़भे़म्बा चोःक्पि? खे़ल्ले़ कुमनाहाॽ कुसुम् मे़न्दम्मनाबा मे़जोक्लो! थे खे़ङ्हाॽरे़ गिलगालओ से़गम्बा पित्हाॽ सिदुङ्जभा मे़जोगुसिबि? खे़ङ्हाॽरे़ खुन्छिॽ ले़त्ति तोःम्मादे़न्हाॽ के़क्चु थोङ्मनाबा इक्ताप्पो के़लुम्सिङ्बाआङ् के़ने़बा लुङ्हाॽ हे़क्तङ्बा पोङ्लो॥ 12 याकुबे़न् खे़त्छिङ्ङाङ् आरामबा लाजेॽओ पेरो, इस्राइलरे़ लत्छा मेःत्ले़ लागि से़वारोबा याःम्बक् चोगुआङ् वये़रो, हे़क्क्याङ् खुने़ॽ मेःत्ले़ लागि मे़ल्लुक्हाॽ चाराम्सुसिरो॥ 13 यहवे दाङ्बे़ल्ले़ माङ्निङ्वाॽपान् के़बाःप्पा थिक् याङुआङ् इस्राइले़न् मिस्र लाजेॽलाम् लःत्तु थाक्तुरो, हे़क्क्याङ् माङ्निङ्वाॽपान् के़बाःप्पा थिक् याङुआङ् खुने़ॽ इस्राइले़न् कम्ब्राङ् मे़त्तुरो॥ 14 कर एफ्राइम्मिल्ले़ खुने़ॽ साॽरिक् कुसिक् फोःक्खुआङ् वाॽरो, खे़ल्ले़ माक्खिॽसिवा से़सुबाल्ले़ आप्तिक्किन् कुन्दाङ्बाल्ले़ खे़ल्ले़ए कुसम्धाङ् वाॽर याःन्दुरो, खम्भ्याङ् खे़ल्ले़ पाःन्धिक्मा कुआप्तिक्के़ल्ले़ कुले़क्वा नुःक्तुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.