होसे 11 - लिम्बुइस्राइले़न् निङ्वाॽफुमाङ्ङिल्ले़ लुङ्माॽ तुक्तु 1 “आल्ल इस्राइले़न् लत्छा अङे़ःक्वा वये़रो खे़ब्याङ् आङ्गाॽ खे़न् लुङ्माॽ तुक्तुङ्लो, हे़क्क्याङ् आप्फेक् आस्सान् मिस्र लाजेॽलाम् उःत्तुङ्लो॥ 2 कर आक्खे़न् आक्खे़न्ले़ङ् आङ्गाॽ खे़ङ्हाॽ उःत्तुङ्सिङ्, खे़म्म्याक् खे़म्म्याक्के खे़ङ्हाॽ आङ्गाॽलाम् माःङ्घा मे़बोःक्खे़रो॥ खे़ङ्हाॽरे़ बाल माङ्हाॽओ सिदुङ्जभा मे़दोन्दुरो, हे़क्क्याङ् खे़ङ्हाॽरे़ नावा चइःत्हाॽओ सुक्पा मे़हाःन्दुरो॥ 3 एफ्राइम्मिन् हुक्को के़दे़म्बाआङ् लाङ्घेःक्मा के़हुॽबाग आङ्गाॽए वयाङ्लो, कर आङ्गाॽ खे़ङ्हाॽ वेःन्दुङ्सिङ् फाॽआङ् कुसिङ् मे़न्निःत्तुन्लो॥ 4 आङ्गाॽ खे़ङ्हाॽ मे़न्छाम्गे़न् याप्मि मिःम्जिबा थाक्पाःल्ले़, लुङ्माॽ तुक्मा इघेःङ्ङिल्ले़ खेःक्खुङ्सिङ्ङाङ् तिःक्तुङ्सिङ्लो॥ खे़ङ्हाॽरे़ खुन्छिॽ सित्लाओलाम् खे़ःप्सिङ्ङिन् खे़त्तुङ्लो हे़क्क्याङ् कुजा चाःप्मासिरे़ लागि आङ्गाॽ अःक्खुम् फन्छिङ्ङारो॥ 5 “खे़ङ्हाॽ आङ्गाॽ ले़प्माङ् नुःङ्मा मे़न्दे़न्ने़न्लो, हे़क्क्याङ् मिस्र ले़प्माङ् मे़नुङ् मे़बेःक्लो, हे़क्क्याङ् खे़ङ्हाॽ अस्सुरिहाॽरे़ मे़युक्तुसिरो॥ 6 खे़ङ्हाॽरे़ खुन्छिॽ ये़क्यक्हाॽओ ताभेहाॽ मे़हिक्खुरो, हे़क्क्याङ् खे़ङ्हाॽरे़ खुन्छिॽ लाम्धेःत्हाॽरे़ कुधेःक्माहाॽ मे़यन्छुरो, खे़ङ्हाॽरे़ खुन्छिॽ चोःक्मा मे़गोःत्तुबा पाःन्हाॽ मे़नुप्सु मे़बिरुसिरो॥ 7 आमनाहाॽरे़ आङ्गाॽलाम् नुङ्मा पेःक्मा निःन्धो मे़जोगुआङ् वाॽरो॥ खे़ङ्हाॽरे़ के़रे़क्नुःल्ले़ यम्बा निङ्वाॽफुमाङ्ङिन्ने पेलि मे़भाक्तुसाङ् खुने़ॽ खे़ङ्हाॽ थो मे़भोःक्खुसिन्लो॥ 8 “एफ्राइमए, आङ्गाॽ खे़ने़ॽ आक्खेलॽरिक् ले़प्मा सुक्ने़ग! इस्राइलए, आक्खेलॽरिक् निङ्मिहाॽरे़ खुन्छिॽ हुक्को थामा सुक्ने़बे? खे़ने़ॽ आभेलॽरिक् अदमान् हे़क्के ले़प्मा सुक्ने़बे? आङ्गाॽ आभेलॽरिक् सबोयिमे़न् हे़क्तङ्बा चोःक्मा सुक्ने़बे! आङ्गाॽ आसिक्लुक्मे़न् आङ्गाॽ आसिगाङ्ङे नुःक्तुङ्ङाङ् वाॽरो॥ आङ्गाॽ साॽरिक् आलुङ्माॽ स्याःत् के़लॽबा पोःक्खाङ्ङाङ् वाॽआरो॥ 9 आङ्गाॽ साॽरिक् के़बोःक्पा आसाक्के़न्निन् मे़धाआन्लो, आङ्गाॽ एफ्राइम्मिन् याम्मो मे़म्भै मे़जोगुङ्ङिन्लो॥ थेआङ्भे़ल्ले़ आङ्गाॽ मनाआ मे़ःन्नारो, कर निङ्वाॽफुमाङ्आरो, खिनिॽ लुम्मो के़वाॽबा के़रे़क्नुःल्ले़ सेसेबा— आङ्गाॽ आसिक् पोःक्मो खिनिॽओ मे़दाआन्लो॥ 10 खे़ङ्हाॽरे़ यहवे दाङ्बे़न् मे़दिम्दु मे़नाःत्तुरो, खुने़ॽ खिरिङ्बा कुइसिक् हुःक् हुःक् लॽरिक् हुःक्लो, आल्ल खुने़ॽ हुःक्किल्ले़ खुने़ॽ कुस्सा अङे़ःक्वाहाॽ मे़यङ्ल नाम्धा पिसाङ्लाम् मे़भे़न्लो॥ 11 खे़ङ्हाॽ मिस्र लाजेॽलाम् पुसाहाॽ कुइसिक् हे़क्क्याङ् अस्सुरलाम् साप्पे़त्त्रुःक्मा कुइसिक् खे़ङ्हाॽ थे़गक्कक्ना मे़यङ्ल मे़भे़न्लो॥ आङ्गाॽ खे़ङ्हाॽ खुन्छिॽ आप्फेक् हिम्मो युक्खुङ्सिङ्लो,” यहवे दाङ्बे़ल्ले़ उवा चोगुआङ् वाॽरो॥ इस्राइल नु यहुदाओ खुम्दिङ् 12 एफ्राइमरे़ कुइङ्ले़क् नु इस्राइलबा हिम्सयङ्हाॽरे़ खुन्छिॽ मे़न्वाॽमनाबा पाःन्हाॽरे़ आङ्गाॽ कबाङ्ङाङ् वाॽरो॥ हे़क्क्याङ् यहुदान् निङ्वाॽफुमाङ्ङिल्ले़ नु नसाःन्साबा सेसेबाल्ले़ कुदक्ले़ङ्वाओ पोगे़आङ् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.