होसे 10 - लिम्बु1 इस्राइले़ङ्ग हुम्बे़त् के़दाप्पा चे़ल्ले़क्सेल्ले़ कुबुङ्लो, खे़ल्ले़ आप्फेक् लागि कुजाॽ थोःक्ते़र याःन्दुरो॥ आक्ख्यारिक् यरिक् कुजाॽहाॽ थोःक्ते़ खे़म्म्याक्के यरिक् ले़त्ति तोःम्मादे़न्हाॽ चोगुरो, लाजेन् आक्ख्यारिक् नुबा पोःक्खे़रबे खे़म्भ्यारिक् यरिक् सेसे लुङ्हाॽ के़घे़म्सिङ्बा चोगुरो॥ 2 खे़ङ्हाॽरे़ खुन्छिॽ सिक्लुङ्मान् इङ्ले़क्पा चोक्लो, हे़क्क्याङ् खुन्छिॽ आप्तिक्किल्ले़ कुले़क्वा खुम्दिङ् खोमाए पोङ्लो॥ यहवे दाङ्बे़ल्ले़ खे़ङ्हाॽरे़ खुन्छिॽ ले़त्ति तोःम्मादे़न्हाॽ यन्छु पिरुसिरो, खे़ङ्हाॽरे़ खुन्छिॽ सेसे लुङ्हाॽ वरे़ङ्ले़ङ् यःप्सु पिरुसिरो॥ 3 खे़ब्याङ् खे़ङ्हाॽरे़ मे़बाःत्तुॽ, “आनिगे हाङ् होप्लो, थेआङ्भे़ल्ले़ यहवे दाङ्बे़न् आनिगे मिङ्सो इङ्धाङ् मे़बिरुम्बे़न्लो॥ आनिगे लागि हाङ् वये़साङ् खुने़ॽ आनिगे लागि थे़मा चोःक्मा सुक्तुबा वये़आङ्बे?” 4 खे़ङ्हाॽरे़ थेनाधेबा पाःन्हाॽ मे़बाःत्तुरो, इङ्ले़क्पा माङ्हे़क् मे़जोगुआङ् माङ्हुप्हाॽ मे़जोगुरो॥ कल्ले़चोगुल्ले़ के़क्चु थोङ्मनाबा खाम्बेःक्को कुनिङ् के़याक्पा याःन्सुङ्हाॽ लिङ्बा हे़क्के खासे़न् चोःक्मा तुःन्देॽ पाःन्हाॽ पोरबेःक्लो॥ 5 सामरिया ये़क्यक्को के़युङ्बा मनाहाॽरे़ बेथ-आवनबा पित्सात् नावाइत्लान् थे़गक्कक्ना मे़यङ्ल मे़गिरुरो॥ खे़ल्ले़ कुमनाहाॽ खुने़ॽ कुलागि ने़त्मे़युक्लो, हे़क्क्याङ् खे़ल्ले़ कुहाङ्वा कुमाङ्वाओ के़सःप्पा खे़न् नावाइत्ला से़वा के़मे़प्पा यक्याबाहाॽ मे़रिङ् मे़धक्लो, थेआङ्भे़ल्ले़ खे़न् खुन्छिॽओलाम् वेॽ लाजेॽ मे़देॽरुआङ् वाॽरो॥ 6 पयम् हाङ्ङिल्ले़ लागि खे़न् एःङ्याङ् हे़क्के अस्सुरओ मे़देॽरुरो, एफ्राइम्मिन् कुजाःत्थि पेःक्मो मे़धासुरो, इस्राइले़न् सिङ् कुनावाइत्लालाम् सिरिङ्ममो थारो॥ 7 सामरियान् नु खे़प्मोबा हाङ्ङिङ्ग च्वाःत्तिल्ले़ वदेॽरुबा सिङ्आत् कुइसिक् वदेॽरु तेॽरुसिरो॥ 8 इस्राइलरे़ कुलायो, इग्र कुॽइगे़भे़म्बे़ल्ले़ कुजन्जम्बादे़न्हाॽ मे़क्लो, खुन्छिॽ ले़त्ति तोःम्मादे़न्हाॽओ तिङ्ग्रेक् नु तिङ्हाॽरे़ सुःप्तुरो॥ खे़ब्याङ् खे़ङ्हाॽरे़ कोःक्माहाॽ मे़मे़त्तुसिरो, “आनिगे आदे़प्ते़ॽओ,” हे़क्क्याङ् थे़गुहाॽ मे़मे़त्तुसि, “आनिगे सम्धाङ् मक्थ्ये़म्मो॥” यहवे दाङ्बे़ल्ले़ इस्राइलओ खासे़न् चोगु 9 “इस्राइलए, गिबाबा ये़म्माङ्धो खे़ने़ॽ लायो चोःक्मा के़हेःक्तुरो, हे़क्क्याङ् आल्लसाङ् खे़ने़ॽ हाबा खे़म्मोए के़बत्लो॥ फे़न्याःम्बक् के़जोःक्पाहाॽरे़ खुन्छिॽ तक्ले़ङ्वाओ ते़न्धङ्ङिल्ले़ थे गिबाओ खे़ङ्हाॽ मे़याङ्घुसिन्नाङ्बि? 10 आङ्गाॽ निङ्वाॽ चोगुङ्ङिल्ले़ खे़ङ्हाॽ खुम्दिङ् पिरुङ्सिङ्लो, खे़ङ्हाॽरे़ खुन्छिॽ ने़त्छि लायोहाॽरे़ कुले़क्वा खे़ङ्हाॽ फप्मासिरे़ लागि मे़न्छाम् याप्मिहाॽ मे़जुम्लो॥ 11 “एफ्राइम्मिन् चाधाम्मादे़न्नो के़सःप्मा खुम्मनामा करःङ् पिप्मारो, कल्ले़चोगुल्ले़ खे़ल्ले़ नुबा कुभक्ताङ्ङो खे़ःप्सिङ्ङिन् फत्छुङ्लो॥ आङ्गाॽ एफ्राइम्मिन् कुदुङ्दुङ्ना लोःक्खुङ्लो यहुदाःल्ले़ के़क्चु थोःक्खुर पोङ्लो, हे़क्क्याङ् याकुबरे़ खाम्बुक्नाहाॽ यःप्सुर पोङ्लो॥ 12 खिनिॽ लागि साम्योबा याःम्बक्किन् याॽरिःम्बा हेॽरे़म्मे़ॽओ, हे़क्क्याङ् चक्मे़न्लॽमनाबा मिःम्जिल्ले़ सिङ्सेन् सुप्से़म्मे़ॽओ, हे़क्क्याङ् खिनिॽ याक्चाना इक्ताप्हाॽ थोक्से़म्मे़ॽओ॥ थेआङ्भे़ल्ले़ यहवे दाङ्बे़न् युआङ् खिनिॽओ साम्योनिमे़न् मे़धासुन्ल थारिक् खुने़ॽ कोःप्मा ये़म्मिन् आल्लोएरो॥ 13 “कर खिनिॽग फे़न्याःम्बक्किन् के़लेःत्तुम्माङ् वाॽरो, ताप्फे़ःम्बा पाःन्निन् खिनिॽ के़सुप्सुम्माङ् के़वयिरो॥ इङ्ले़क्किल्ले़ कुजाॽइन् खिनिॽ के़जाम्माङ् के़वयिरो, खिनिॽ आप्फेक् मुक्साम्मो नु खिनिॽ यरिक् थक्सुबाहाॽओ निङ्वाॽ के़युक्खुम्बाल्ले़ चोगुल्ले़, 14 खिनिॽ मनाहाॽरे़ खुन्छिॽ तक्ले़ङ्वाओ थङ् इक्लान् हुःक्लो, खिनिॽ के़रे़क् यक्हाॽ वरे़ङ्ले़ङ् खाप्पुथ्यःङ् मे़मे़क्खुरो हे़क्क्याङ् ते़न्धङ्ङो सल्मनरे़ बेथ-आर्बेले़न् थ्यःङ् चोगुबा हे़क्के— खे़न् ये़म्मो माहाॽ खुन्छिॽ अङे़ःक्वा साहाॽनु सोसोरिक् खाम्बाङ्ङो पिर्धाप् पिर्धाप् मे़धाप्सुसिआङ् वये़रो॥ 15 कम्भलॽरिक् बेथेलबासे, खिनिॽ साॽरिक् ताप्फे़ःम्बा फे़न्याःम्बक्किल्ले़ चोगुल्ले़ खे़न् पोङ्दारो॥ खे़ल्ले़ याःन्दिक् खाओःत्तिल्ले़, इस्राइलबा हाङ्ङिन् वरे़ङ्ले़ङ् खाप्पुथ्यःङ् मे़मे़क्खुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.