होसे 1 - लिम्बु1 यहुदाबा हाङ्हाॽ उज्जियाह, योताम, आहाज, हिजकिया नु येहोआसरे़ कुस्सा इस्राइलबा हाङ् यारोबामरे़ हाङ्युक् चोगुबा ये़म्मो बेरिरे़ कुस्सा होसेओ यहवे दाङ्बे़ल्ले़ कुबाःन्जाक्किन् के़रे़रो॥ होसेरे़ कुमेत् नु कुस्सा कुएहाॽ 2 आल्ल यहवे दाङ्बान् होसेःन्लाम् पाःप्मा हेःक्ते़ल्ले़, यहवे दाङ्बे़ल्ले़ खुने़ॽ अक्खे मे़त्तु, “कन् लाजेःल्ले़ यहवे दाङ्बे़न् नाॽरुआङ् साॽरिक् याम्बोःप्मा आप्तिक्को थ्ये़आङ् वाॽ, खे़ने़ॽ पेगे़ॽआङ् चागे़राम्मा के़त्निमाधिक् ते़न्धाम् मेःक्खिम् मे़त्ते़ॽ, खे़ब्याङ् खे़ल्ले़ चाराम्मा के़त्निमा याःम्बक् चोगुबालाम् कत्तुसिबा साहाॽ सा चोगे़से़ॽ॥” 3 कल्ले़चोगुल्ले़ खुने़ॽ पेआङ् दिब्लैमरे़ कुस्सा मे़न्छुमा गोमेरे़न् मेःक्खिम् मे़त्तु, हे़क्क्याङ् खे़न् मे़न्छुक्मा पोःक्खे़आङ् खुने़ॽलाम् ये़म्बित्छा साधिक् कत्तु॥ 4 खे़ब्याङ् यहवे दाङ्बे़ल्ले़ होसेन् मे़त्तु, “खे़ल्ले़ कुमिङ् यिजरेल वाःत्ते़ॽ, थेआङ्भे़ल्ले़ हाराए आङ्गाॽ येहुरे़ कुहिम्सयङ्हाॽ यिजरेलओ पोःक्खे़बा माक्खिॽ से़रे़बे़ल्ले़ कुले़क्वा खुम्दिङ् पिरुङ्सिङ्ॽ, हे़क्क्याङ् आङ्गाॽ इस्राइलबा हाङ्जुम्मिन् नुप्सुङ्ॽ॥ 5 खे़ल्ले़ याःन्दिक् आङ्गाॽ इस्राइलरे़ कुलिॽइन् यिजरेलबा ने़ने़बादे़न्नो ए़क्खुङ् पिरुङ्ॽ॥” 6 गोमेरे़न् याम्मो मे़न्छुक्मा पोःक्खे़आङ् मे़न्छुमा साधिक् कत्तु॥ खे़ब्याङ् यहवे दाङ्बे़ल्ले़ होसेन् मे़त्तु, “खे़ल्ले़ कुमिङ् लुङ्माॽ मे़न्दुक्मनामा वाःत्ते़ॽ, थेआङ्भे़ल्ले़ आङ्गाॽ इस्राइलबा हिम्सयङ्हाॽ आल्लआङ्धो लुङ्माॽ मे़दुक्कासिङ्ङिन्नाङ् आङ्गाॽ खे़ङ्हाॽ आभे़ल्ले़आङ् ले़प्मि मे़बिरुङ्सिङ्ङिन्ॽ॥ 7 कर आङ्गाॽ यहुदाबा हिम्सयङ्हाॽ लुङ्माॽ तुक्तुङ्सिङ्ॽ॥ लि, ताभे, थङ्, अन् नु अन्गे़लोङ्बाहाॽलाम् आङ्गाॽ खे़ङ्हाॽ मे़से़ःप्तुङ्सिङ्ङिन्ॽ, कर आङ्गाॽए खे़ङ्हाॽ ताङ्से़ःप्तुङ्सिङ्ॽ थेआङ्भे़ल्ले़ आङ्गाॽ यहवे दाङ्बा खे़ङ्हाॽरे़ खुन्छिॽ निङ्वाॽफुमाङ्आ॥” 8 आल्ल गोमेरे़ल्ले़ लुङ्माॽ मे़न्दुक्मना कुस्सा मे़न्छुमान् नुधुक्मालाम् से़न्दु, खे़ब्याङ् याम्मो मे़न्छुक्मा पोःक्खे़आङ् खुने़ॽ वेॽ ये़म्बित्छा साधिक् कत्तु॥ 9 खे़ब्याङ् यहवे दाङ्बे़ल्ले़ होसेन् मे़त्तु, “खे़ल्ले़ कुमिङ् आमना मेःन्निङ् वाःत्ते़ॽ, थेआङ्भे़ल्ले़ खिनिॽ आङ्गाॽ आमना मेःन्निङ्, हे़क्क्याङ् आङ्गाॽ खिनिॽ निङ्वाॽफुमाङ्आ मे़ःन्नारो॥ इस्राइले़न् याम्मो पोक् 10 “हे़क्केसाङ् इस्राइलिहाॽ वरःङ्ङिल्ले़ कुयाओबा ये़ःङ्घा यारिक् यरिक् मे़बोङ्ॽ, खे़ङ्हाॽ सिःक्माआङ् सुक्मे़न्दे़त्ने़न् निःप्माआङ् सुक्मे़न्दे़त्ने़न्॥ खे़ङ्हाॽ आत्ति ‘आङ्गाॽ आमनानिङ् मेःन्,’ मे़मे़त्तुसिआङ् वये़, हाबा खे़प्मोए खे़ङ्हाॽ, ‘कुहिङ्वे़त् निङ्वाॽफुमाङ्ङिल्ले़ कुमुॽइदाङ्सानिङ्’ मे़मे़त्तुसिरो॥ 11 खे़ब्याङ् यहुदाबा मनाहाॽ नु इस्राइलबा मनाहाॽ के़रे़क् याम्मो सोरिक् मे़बोङ्ॽ, हे़क्क्याङ् लत्छा लाम्लोबा मे़सेगुआङ् लाजेॽओलाम् मे़लन्, थेआङ्भे़ल्ले़ यिजरेलबा ये़न्निन् पयम् यम्बा पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.