हाग्गै 2 - लिम्बुकुसङ् माङ्हिम्मिल्ले़ कुहाङ्वा कुमाङ्वा 1 नुसिगेक्पा ला के़रे़बा निबोङ्ङाङ् थिक्सिगेक्पा ये़न्नो यहवे दाङ्बे़ल्ले़ कन् कुइङ्घङ्ङिन् माङ्निङ्वाॽपान् के़बाःप्पा हाग्गैओ के़रे़रो— 2 “सालतिएलरे़ कुस्सा यहुदाबा हाङ्युक्पा यरुबाबेले़न् नु यहोसादाकरे़ कुस्सा तुम् निङ्वाॽफुसाम्बा यहोसुन् हे़क्क्याङ् के़वाॽबा के़याःक्पा मनाहाॽ खे़ने़ॽ अक्खे मे़त्ते़से़ॽ॥ 3 खे़ङ्हाॽ सेःन्दोसे़से़ॽ, ‘खे़न् हिम्मे़ल्ले़न् तगिबा मिमिदिङ्ङिन् के़निबाआङ् के़वाॽबा कुभा खिनिॽ लुम्मोलाम् आल्ल के़याःक्तिआङ् के़वयिबि? खिनिॽ आल्लो कन् आक्तङ्बा के़निसुम्बे? थे खिनिॽ मिक्साओ कङ्ग थे़माआङ् मेःन् हे़क्के लॽबि?’ 4 कर आल्ल यहवे दाङ्बे़ल्ले़ पाःत्तुॽ, ‘यरुबाबेलए, आःन्छिङ्ङे़ॽ, हे़क्क्याङ् यहोसादाकरे़ कुस्सा तुम् निङ्वाॽफुसाम्बा यहोसुए, हाङ्हाङ् मे़त्छिङ्ङे़ॽ॥ लाजेॽओबा के़रे़क् मनासे, हाङ्हाङ् लॽरे़म्मे़ॽ, याःम्बक् चोःक्मा हेःक्ते़म्मे़ॽ॥ थेआङ्भे़ल्ले़ आङ्गाॽ खिनिॽनु वाॽआ’ मुक्साम्दाङ्बा यहवे दाङ्बे़ल्ले़ पाःत्तुॽ॥ 5 ‘मिस्र लाजेॽलाम् खिनिॽ के़लःन्दि के़धाङ्ङिल्ले़ आङ्गाॽ खिनिॽनु चोगुङ्बा माङ्हुप्पिन् हाबा कन्लो, आङ्गाॽ आयाम्साम्मिन् खिनिॽनु सोरिक् वाॽरो॥ खिनिॽ मे़गिसे़म्मिन्ने़ॽओ॥’ 6 “मुक्साम्दाङ्बा यहवे दाङ्बे़ल्ले़ अक्खे पाःत्तुॽ—‘आल्ल सप्मा एगाङ्ङाङ् आङ्गाॽ ताङ्साङ्बान्, इक्सादिङ् खाम्बेःक्मान्, वरःङ्ङिन् नु कुसे़ङ्ग्रा खाम्मिन् यक्खुङ्ॽ॥ 7 आङ्गाॽ के़रे़क् मे़न्छाम् सुवाङ्हाॽ यक्खुङ्सिङ्ॽ, हे़क्क्याङ् निङ्वाॽ मे़जोगुबा पाःन्हाॽ नु के़रे़क् मे़न्छाम् सुवाङ्बा मनाहाॽ मे़दारो, हे़क्क्याङ् आङ्गाॽ कन् हिम्मिन् मिमिदिङ्ङिल्ले़ सधे़क् थिम्सुङ्ॽ’ मुक्साम्दाङ्बा यहवे दाङ्बे़ल्ले़ पाःत्तुॽ॥ 8 ‘युप्पान् आङ्गाॽइन्नेरो, हे़क्क्याङ् साम्म्याङ्ङिन्नाङ् आङ्गाॽइन्नेरो,’ मुक्साम्दाङ्बा यहवे दाङ्बे़ल्ले़ पाःत्तुॽ॥ 9 ‘कन् हिम्मिल्ले़न् एगाङ्बा मिमिदिङ्ङिन् तगिबान्नुःल्ले़ आल्लसाङ् यरिक् पोङ्ॽ,’ मुक्साम्दाङ्बा यहवे दाङ्बे़ल्ले़ पाःत्तुॽ॥ ‘हे़क्क्याङ् कन् ते़न्नो आङ्गाॽ नुॽमादामा सनारुङ् पोङ्ल चोगुङ्ॽ,’ मुक्साम्दाङ्बा यहवे दाङ्बे़ल्ले़ उवा चोगुरो॥” आसुत्थो के़बोङ्बा मनाहाॽरे़ लागि मुॽइसाम् 10 दारा हाङ्ङिल्ले़ हाङ्युक् चोगुबा निसिगेक्पा तङ्बे, फाङ्सिगेक्पा ला के़रे़बा निबोङ्ङाङ् लिसिगेक्पा ये़न्नो यहवे दाङ्बे़ल्ले़ कन् कुइङ्घङ्ङिन् माङ्निङ्वाॽपान् के़बाःप्पा हाग्गैओ के़रे़रो— 11 “मुक्साम्दाङ्बा यहवे दाङ्बे़ल्ले़ अक्खे पाःत्तुॽ, ‘साम्योथिम् इङ्जाङ्ङिल्ले़ थे पाःत्तुॽ निङ्वाॽफुसाम्बाहाॽ सेःन्दोसे़से़ॽ॥ 12 कुभा लत्छा मनारे़ तोःम्मनाबा सान् कुजाङ्ङो इभुत्तुआङ् कत्तुॽ हे़क्क्याङ् खे़ल्ले़ कुयाःल्ले़ कुभा खरे़ःङ्, सामे़क्वा, चे़ल्ले़क्सेॽ थि, निःङ्गेॽ इग्र वेॽ कुभा कुजाहाॽ सुसुने़भग्र थे खे़न् सेसे पोङ्बि?’” निङ्वाॽफुसाम्बाहाॽरे़ नुगप् मे़बिरुआङ् मे़मे़त्तु, “मे़बोङ्ने़न्लो॥” 13 खे़ब्याङ् हाग्गैःल्ले़ खे़ङ्हाॽ सेःन्दोसुसि, “चे के़सुबाआङ् आसुत्थो के़बोङ्बा मनाःल्ले़ अक्तङ्बा कुभा कुजाहाॽ सुसुने़भग्र थे खे़न् आसुत्थो पोङ्बि?” खे़न् निङ्वाॽफुसाम्बाहाॽरे़ नुगप् मे़बिरुआङ् मे़मे़त्तु, “खे़ङ्ग आसुत्थो पोङ्लो॥” 14 खे़ब्याङ् हाग्गैःल्ले़ खे़ङ्हाॽ मे़त्तुसि, “‘आङ्गाॽ आनिमो कन् मे़न्छाम् सुवाङ्बा मनाहाॽआङ् आसुत्थोए मे़जोक्लो,’ फाॽआङ् यहवे दाङ्बे़ल्ले़ पाःत्तुरो॥ ‘कन्हाॽरे़ थे़मा मे़जोगुॽ हे़क्क्याङ् थे़मा मे़दोन्दुॽ, खे़न् आसुत्थो पोङ्ॽ॥ 15 निङ्वाॽ हे़त्तासिम्मे़ॽ, आइन्नाङ्धो कन् पाःन्निन् नुरिक्काङ् निङ्वाॽ इःत्ते़म्मे़ॽ॥ यहवे दाङ्बे़ल्ले़ कुहिम् के़जोगुम्मिल्ले़ लुङ्ङिल्ले़ कुसम्धाङ् लुङ् ने़मानुःल्ले़ तगि आक्तङ्बा ये़म् वये़ निङ्वाॽ इःत्ते़म्मे़ॽ॥ 16 खे़न् ये़न्नो निबोङ् पक्वा कुजा लासे़ के़दाबे़ल्ले़ थिबोङ् पक्वारक् खोसुआङ् वये़॥ चे़ल्ले़क्सेॽ एःम्मादे़न्लाम् ङाबोङ् कुःन्दा चे़ल्ले़क्सेॽ थि लःत्छे़ के़दाबे़ल्ले़ निबोङ् कुःन्दारक् खोसुआङ् वये़॥ 17 आङ्गाॽ खिनिॽ हुक्किल्ले़ के़जोगुम्बा के़रे़क् याःम्बक्हाॽ मे़न्नुॽमनाबा के़जोःक्पा, सुक्नाःम्बा के़धॽबा नु फःन्निल्ले़ हिप्तुर याःन्दुङ्, हे़क्केसाङ् खिनिॽ आङ्गाॽ ले़प्माङ् के़न्नुःक्खिन्’ फाआङ् यहवे दाङ्बे़ल्ले़ पाःत्तुॽ॥ 18 “आइन्बा ये़न्नाङ्धो, यहवे दाङ्बे़ल्ले़ कुहिम्मिल्ले़ कुबुङ् मे़युक्खुआङ् वये़बा ये़न्, फाङ्सिगेक्पा लाओबा निबोङ्ङाङ् लिसिगेक्पा ये़न्निन् नुरिक्काङ् निङ्वाॽ इःत्ते़म्मे़ॽ॥ 19 थे चाधाःङ्ङो कुलिःम्बा आल्लसाङ् याःक्ते़आङ् याक्पि? चे़ल्ले़क्सेॽइल्ले़ कुइवाःत्, पःत्छेल्ले़ कुबुङ्, फुॽले़सेॽ नु चैतुने़ल्ले़ कुबुङ्हाॽ आल्लसाङ् कुजाॽ मे़न्धोःक्के युङ्॥ कर आइन्बा ये़न्नाङ्धो आङ्गाॽ खिनिॽ हाङ्वागे़न् मुॽइसाम् पिनिङ्लो॥” यरुबाबेलनु यहवे दाङ्बे़ल्ले़ कुमाङ्हुप् 20 हे़क्क्याङ् हाबा खे़न् फाङ्सिगेक्पा ला निबोङ्ङाङ् लिसिगेक्पा ये़न्नो निसिगेक्पाले़ङ् यहवे दाङ्बे़ल्ले़ कुइङ्घङ्ङिन् हाग्गैओ के़रे़रो— 21 “‘आङ्गाॽ तरःङ्गे़न् ताङ्साङ् नु इक्सादिङ् खाम्बेःक्मान् यक्खुङ् फाॽआङ् यहुदाबा हाङ्युक्पा यरुबाबेले़न् मे़त्ते़ॽ॥ 22 आङ्गाॽ हाङ्युक्नान् चिल्ले़क् ले़क्खुङ्ॽ हे़क्क्याङ् वेॽ लाजेॽ हाङ्जुम्हाॽओबा मुक्साम्मिन् मे़क्खुङ्॥ आङ्गाॽ अन्लाधाहाॽ नु खे़प्मो लाङ्गे़घेःक्पाहाॽ खत्त्रे़क् ले़क्खुङ्सिङ्ॽ॥ अन्हाॽ नु अन्गे़लोङ्बाहाॽ ताभेःल्ले़ आबाङे मे़ज्ये़प्सिङ् मे़से़त्छिङ्ॽ॥’ 23 मुक्साम्दाङ्बा यहवे दाङ्बे़ल्ले़ पाःत्तुॽ, ‘खे़ल्ले़ याःन्दिक्, सालतिएलरे़ कुस्सा आङ्गाॽ आसे़वारोबा यरुबाबेलए, आङ्गाॽ खे़ने़ॽ एःप्साप् युक्मनाबा स्वागेप् हे़क्तङ्बा चोःक्ने़रो, थेआङ्भे़ल्ले़ आङ्गाॽ खे़ने़ॽ सेःक्ने़आङ् वाॽरो॥’ मुक्साम्दाङ्बा यहवे दाङ्बे़ल्ले़ उवा चोगुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.