हाग्गै 1 - लिम्बुमाङ्हिम्मिन् याम्मो चोःक्मा 1 दारा हाङ्ङिल्ले़ हाङ्युक् चोगुबा निसिगेक्पा तङ्बे, तुक्सिगेक्पा ला थिक्सिगेक्पा ये़न्नो, यहवे दाङ्बे़ल्ले़ कन् कुइङ्घङ्ङिन् माङ्निङ्वाॽपान् के़बाःप्पा हाग्गैलाम् सालतिएलरे़ कुस्सा यहुदाबा हाङ्युक्पा यरुबाबेलओ नु यहोसादाकरे़ कुस्सा तुम् निङ्वाॽफुसाम्बा यहोसुओ के़रे़रो॥ 2 मुक्साम्दाङ्बा यहवे दाङ्बे़ल्ले़ अक्खे पाःत्तुॽ—“कन् मनाहाॽरे़ मे़बाःत्तुॽ, ‘यहवे दाङ्बे़ल्ले़ कुहिम् चोःक्मा ये़म्मिन् आल्लसाङ् मे़न्दाए वाॽरो॥’” 3 खे़ब्याङ् यहवे दाङ्बे़ल्ले़ कन् इङ्घङ्ङिन् माङ्निङ्वाॽपान् के़बाःप्पा हाग्गैलाम्बा के़रे़— 4 “कन् माङ्हिम्मिन् लुःम्माघे़प्मा चोःक्पा के़निसुम्साङ् थे खिनिॽ कुभुङ् लक्मनाबा सिङ्हाॽरे़ के़घे़म्सिङ्बा चोःक्मनाबा हिम्हाॽओ युङ्मा कन् खिनिॽ ये़म्बि?” 5 आल्ल मुक्साम्दाङ्बा यहवे दाङ्बे़ल्ले़ अक्खे पाःत्तुॽ—“खिनिॽ आप्फेक् आप्फेक् ये़प्ले़क्हाॽओ सिङ्सिङ्ङाङ् निङ्वाॽ हे़त्तासिम्मे़ॽ॥ 6 खिनिॽ लेःप्माग यरिक् के़लेःत्तुम्माङ् ने़रो, कर चबे़ःत्छिक्लक् के़सुप्सुम्माङ् युङ्ॽ॥ खिनिॽ चामाग के़जाम्, कर आभे़ल्ले़आङ् के़ङ्घासिन्ॽ॥ खिनिॽ थुङ्माग के़धुङुम्ॽ, कर आभे़ल्ले़आङ् खिनिॽ वामिःक्मा मे़जिप्तुन्ॽ॥ खिनिॽ चाङ्ग के़जाक्खुम्ॽ, कर के़ङ्गोसिन्ॽ॥ खिनिॽ याःम्बक् के़जोगुम्माङ् निम्याक् के़धगुम्ॽ, कर के़हङ्बा सुक्वाहाॽओ के़याक्तुम्ॽ॥” 7 मुक्साम्दाङ्बा यहवे दाङ्बे़ल्ले़ अक्खे पाःत्तुॽ—“खिनिॽ आप्फेक् आप्फेक् ये़प्ले़क्हाॽओ सिङ्सिङ्ङाङ् निङ्वाॽ हे़त्तासिम्मे़ॽ॥ 8 कोःक्मा फाङ्जङ् थे़गु माङ्वाहाॽओ पेगे़म्मे़ॽ हे़क्क्याङ् सिङ्हाॽ युरे़म्मे़ॽआङ् हिम् चोगे़म्मे़ॽ, हे़क्केलॽरिक् आङ्गाॽ खे़प्मो युङ्मा सुक्कार हे़क्क्याङ् आमिङ्सो आधाङ्सो पोङ्ल,” यहवे दाङ्बे़ल्ले़ पाःत्तुॽ॥ 9 “खिनिॽ यरिक् कुजा सुम्मा निङ्वाॽ के़जोगुम्, कर ओमे़त्ते़म्मे़ॽ, चबे़ःत्छिक्लक् पोःक्खे़॥ हिम्मो खिनिॽ के़दारुम्बान् आङ्गाॽ मुःत्तुङ्ङाङ् सुरिःत्तो फे़सुङ्दे़सुङ्॥ थेआङ्बे?” मुक्साम्दाङ्बा यहवे दाङ्बे़ल्ले़ पाःत्तुॽ॥ “थेआङ्भे़ल्ले़ आङ्गाॽ आहिम्मिन् लुःन्दे़बेआङ् ने़रो, कर खिनिॽग के़रे़क् आप्फेक् आप्फेक् हिम्मो सिॽमे़न्छिॽ के़यागिॽ॥ 10 कल्ले़चोगुल्ले़ ताङ्साङ्बे़ल्ले़ सेःक्वा थामा थेःक्तु हे़क्क्याङ् इक्सादिङ् खाम्बेःक्मे़ल्ले़ पोगुगे़न् कुजा थोःक्मा साक्तुआङ् ने़रो॥ 11 आङ्गाॽ इक्ताप्हाॽओ नु कोःक्मा फाङ्जङ् थे़गु माङ्वाहाॽओ, पोगुगे़न् कुजा नु कुबोक् चे़ल्ले़क्सेॽ थिओ, निःङ्गेॽओ हे़क्क्याङ् खाम्बेःक्मो के़धोःक्पा के़रे़क्को, मनाहाॽओ, हिङ्मनाबा थक्साहाॽओ नु खिनिॽ हुक्किल्ले़ स्याङ्मे़न्दाङ् के़जोगुम्बा के़रे़क् याःम्बक्हाॽओ साक्वान् पोगे़र चोगुङ्ङाङ् वाॽरो॥” 12 खे़ब्याङ् यहवे दाङ्बा खे़ङ्हाॽरे़ खुन्छिॽ निङ्वाॽफुमाङ्ङिल्ले़ हाग्गैन् पाङ्घुबाल्ले़ चोगुल्ले़, सालतिएलरे़ कुस्सा यरुबाबेल, यहोसादाकरे़ कुस्सा तुम् निङ्वाॽफुसाम्बा यहोसुन् नु के़वाॽबा के़याःक्पा के़रे़क् मनाहाॽरे़आङ् यहवे दाङ्बा खुन्छिॽ निङ्वाॽफुमाङ्ङिल्ले़ कुइक्लान् हे़क्क्याङ् माङ्निङ्वाॽपान् के़बाःप्पा हाग्गैःल्ले़ कुइङ्घङ्ङिन् मे़इःत्तु मे़नाःत्तु॥ खम्भ्याङ् मनाहाॽ यहवे दाङ्बे़न्नु मे़गिसे़रो॥ 13 खे़ब्याङ् यहवे दाङ्बे़ल्ले़ कुइङ्घङ्साबा हाग्गैःल्ले़ यहवे दाङ्बे़ल्ले़ कन् कुइङ्घङ्ङिन् मनाहाॽ मे़त्तुसि—“आङ्गाॽ खिनिॽनु सोरिक् वाॽआ,” यहवे दाङ्बे़ल्ले़ पाःत्तुॽ॥ 14 कल्ले़चोगुल्ले़ यहवे दाङ्बे़ल्ले़ सालतिएलरे़ कुस्सा यहुदाबा हाङ्युक्पा यरुबाबेले़न् नु यहोसादाकरे़ कुस्सा तुम् निङ्वाॽफुसाम्बा यहोसुन् हे़क्क्याङ् के़वाॽबा के़याःक्पा मनाहाॽ खुन्छिॽ सिक्समे़र याःन्दुसि॥ खे़ङ्हाॽ मे़भे़रे़आङ् मुक्साम्दाङ्बा यहवे दाङ्बा खुन्छिॽ निङ्वाॽफुमाङ्ङिल्ले़ कुहिम्मो याःम्बक् चोःक्मा मे़हेःक्ते़॥ 15 दारा हाङ्ङिल्ले़ हाङ्युक् चोगुबा निसिगेक्पा तङ्बे, तुक्सिगेक्पा ला निबोङ्ङाङ् लिसिगेक्पा ये़न्नो खे़ङ्हाॽरे़ याःम्बक् चोःक्मा मे़हेःक्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.