हबकुक 1 - लिम्बु1 माङ्निङ्वाॽपान् के़बाःप्पा हबकुकरे़ निसुबा माङ्निङ्वाॽपान्निन् हाबा कन्लो॥ हबकुकरे़ कुलुङ्हान् 2 यहवे दाङ्बाए! आप्फाल्ले़ थारिक् कुभाॽरे़ लागि आङ्गाॽ पेलि फाक्ने़बाबे? कर खे़ने़ॽ खे़म्माए के़ङ्घे़प्सुन्निङ् ग? इग्र आभे़ल्ले़ थे़म्बा अक्खेलॽरिक् पेलि फाक्ने़बाबे? “खेमा थक्मा आत्तिसाङ् पोःक्खे़आङ् ने़रो” कर खे़ने़ॽ आनिगे याप्मि ताङ्के़न्छे़ःप्ने़न्लो॥ 3 खे़ने़ॽ थेआङ् मे़न्वाॽमना खासे़न्निन् ओमे़प्मा के़बाङ्ङाबे? खे़ने़ॽ थेआङ् ताप्फे़ःम्बा पाःन्निन् नासिगे़धःत्तुबाबे? मे़क्मे़न् नु से़त्छिङ्मे़न् आङ्गाॽ आदगिए पोङ्ल पत्लो, खेमा थक्मा नु ये़मे़न्दङ् के़रे़क् पिसाङ् वाॽरो॥ 4 कल्ले़चोगुल्ले़ साम्योथिम् इङ्जाङ्ङिन् हने़ कुसुम् मे़न्दम्मनाबा पोङ्बेःक्ल पत्लो, हे़क्क्याङ् कुदोःप्मा खासे़न् आभे़ल्ले़आङ् मे़बोङ्ने़न्लो॥ ताक्के़भे़ॽबाहाॽरे़ कुदोःप्माहाॽ मे़गबुसिआङ् वाॽरो, हे़क्केलॽरिक् कुदोःप्मा खासे़न्निन् हने़बा पोङ्लो॥ यहवे दाङ्बे़ल्ले़ कुनुगप् पान् 5 यहवे दाङ्बे़ल्ले़ खुने़ॽ कुमनाहाॽ अक्खे मे़त्तुसिरो, “मे़न्छाम् सुवाङ्हाॽ ओमे़त्ते़म् फत्छे़म्सिम्मे़ॽओ, खे़ङ्हाॽ ओमे़त्ते़म्सिम्मे़ॽआङ् खिनिॽ निङ्वाॽ मये़म्मे़ॽओ॥ थेआङ्भे़ल्ले़ खिनिॽ ये़न्हाॽओ कुभा याःम्बक् चोगुङ्लो खे़न् आङ्गाॽ मे़त्निङ्साङ् नसान् के़न्जोगुम्मिन्लो॥ 6 आङ्गाॽए बेबिलोनिहाॽ फोःक्खुङ्सिङ्ल पत्तारो, खे़ङ्हाॽग कुॽइगे़भे़म्बा नु कुलुङ्माॽ स्याःत् मे़ल्लॽमना मनासिरो, वेॽहाॽरे़ खुन्छिॽ युक्नादे़न्हाॽ नाप्मासिरे़ लागि खे़ङ्हाॽ इक्सादिङ् खाम्बेःक्मो से़न्धोॽ मे़बेःक्लो॥ 7 खे़ङ्हाॽग किप्मा के़घुबा नु कुॽइगे़भे़म्बा मनासिरो, खे़ङ्हाॽरे़ खुन्छिॽ आप्फेक्के मे़जोगुबा इङ्जाङ्हाॽ नु थिम्हाॽरक् खे़ङ्हाॽरे़ मे़इःत्तु मे़नाःत्तुरो॥ 8 खुन्छिॽ अन्हाॽ थे़रिङ्बाहाॽनुःल्ले़ हारा मे़लोःक्लो हे़क्क्याङ् युःन्छिक् के़लःम्बा पराबाहाॽनुःल्ले़ के़आःप्पा मे़जोक्लो॥ खे़ङ्हाॽरे़ खुन्छिॽ अन्गे़युक्पाहाॽ माःङ्घाबा लाजेॽलाम् मे़दारो, खे़ङ्हाॽरे़ खुन्छिॽ अन्हाॽरे़ खाम्बाङ्ङिन् मे़बागुरो मयाःल्ले़ सानाःत्तिन् लप्मारे़ लागि पेबा कुइसिक् खे़ङ्हाॽ सुबुबुना तगि मे़सुःक् मे़बेःक्लो॥ 9 खे़ङ्हाॽ के़रे़क् मना से़प्मासिरे़ लागिए मे़दारो खे़ङ्हाॽरे़ खुन्छिॽ थक्सुबा सुम्हाॽ तगि मे़बो मे़बेःक्लो॥ मुरे़क् खारे़क् थेआङ् के़होःप्पादे़न्नोबा साम्मिःत्तिल्ले़ ये़ःङ्घान् सुप्सुबा हे़क्के खे़ङ्हाॽरे़ मे़दे़म्सु मे़देॽरुसिबाहाॽ मे़सुप्सुसिरो॥ 10 खे़ङ्हाॽरे़ हाङ्हाॽ कुनामे़न्छाॽ मे़मे़त्तुसिरो हे़क्क्याङ् युक्साबाहाॽ एःत्लाबा मे़जोगुसिरो॥ हाङ्यक् के़ने़बा के़रे़क् ये़क्यक्हाॽ मे़निसुआङ् मे़एःत्लो, हे़क्क्याङ् खाम्मिन् थुप्थाॽ मे़जोगुआङ् मे़लिङुरो हे़क्क्याङ् खे़ङ्हाॽरे़ खे़न् ये़क्यक्हाॽ हुक्काप् मे़जोगुरो॥ 11 खे़ब्याङ् सुरित् कुइसिक् मे़दाआङ् मे़बेःक्लो, कर खे़ङ्हाॽग आप्तिक्साबा मनासिरो, खुन्छिॽ मुक्किङ्ग खुन्छिॽ आप्फेक् माङ्ङिन्लो॥” हबकुकरे़ निसिगेक्पा कुलुङ्हाःप्मा पान् 12 यहवे दाङ्बाए, खे़ने़ॽ उनाहुरिआङ्धोए के़न्वाॽने़न्बि? आनिङ्वाॽफुमाङ्ङे, आसेसेबाए, आनिगे आग्से़प्पाबि? यहवे दाङ्बाए, खासे़न् चोःक्मा याःम्बक्ले़ लागि खे़ने़ॽ खे़ङ्हाॽ युक्तिङ् के़जोगुसिआङ् मे़वाॽरो, आसे़ःप्सिङ्मा याक्पेॽए, आनिगे खुम्दिङ् पिमारे़ लागि खे़ने़ॽ खे़ङ्हाॽ माङ्थोःक्ना के़बिरुसिआङ् मे़वाॽरो॥ 13 खे़ने़ॽ के़मिक्सान् साॽरिक् सुत्थो चोक्लो, खे़ने़ॽ ताप्फे़ःम्बा पाःन्निन् ओमे़प्मा के़न्छुक्तुन्लो॥ मे़न्वाॽमना पाःन्निन् खे़ने़ॽ नासिथःप्मा के़न्छुक्तुन्लो कर इङ्ले़क्पा मनाहाॽ थेआङ् नासिथःप्मा के़सुक्तुसिबाबे? कुॽइगे़भे़म्बा मनाहाॽरे़ खुन्छिॽनुःल्ले़ कुदोःप्मा मनाहाॽ मे़मे़क्खुसिल्ले़ खे़ने़ॽ थेआङ् स्वाःत् के़वाॽ के़गम्बाबे? 14 खे़ने़ॽ मनाहाॽ वरःङ्ङोबा ङाहाॽ कुइसिक् हे़क्क्याङ् के़उःङ्सिङ्बा फेॽबाःत्हाॽ कुइसिक् खे़ङ्हाॽ युक्साबा मेःन्नेबा के़जोगुसिआङ् मे़वाॽरो॥ 15 निङ्मिःल्ले़ खे़ङ्हाॽ के़रे़क् खेःङ्ङिल्ले़ वेॽरुसिरो, हे़क्क्याङ् खे़ङ्हाॽ खुने़ॽ योःङ्ङो थासुसिरो, खुने़ॽ खे़ङ्हाॽ पयम् यम्बा योःङ्ङो फुक्खुसिरो, कल्ले़चोगुल्ले़ खुने़ॽ सःत्ताङ् कुनिङ्वाॽ तारो॥ 16 खे़ब्याङ् खुने़ॽ कुयोःङ्ङो सिदुङ्जभा तोःन्दुरो, हे़क्क्याङ् पयम् यम्बा योःङ्ङिल्ले़ कुलागि सुक्पा हाःन्दुरो, थेआङ्भे़ल्ले़ खे़न् योःङ्ङिन् लाम्बाए नुॽदाआङ् युङ्लो हे़क्क्याङ् कुजा के़नुॽबा कुजाहाॽ च थुङुरो॥ 17 थे खे़ल्ले़ कुयोःङ्ङिन् कुघाले़म् चोगुर पेःक्लबि? हे़क्क्याङ् मे़न्छाम् याप्मिहाॽ लुङ्माॽ मे़न्दुक्सिङ्ङे सदादिङ् आभे़ल्ले़साङ् मे़क्खुसिआङ् याक्लबि? |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.