तोलिङ्सोमु 5 - लिम्बुआदम्मे़ल्ले़ कुमुॽइदाङ्साहाॽ 1 कङ्ग आदम्मिल्ले़ कुमुॽइदाङ्साहाॽरे़ खुनिॽ मिङ्स्रा साप्पन्लो॥ निङ्वाॽफुमाङ्ङिल्ले़ मे़न्छाम् याप्मिन् नावागे़न् चइःत् चोगुल्ले़ खे़न् आबाङे कुनारुम्भुङ् कुजइःत्तो चोगुरो॥ 2 खुने़ॽ खे़ङ्हाॽ ये़म्बित्छा नु मे़न्छुमा नावागे़न् चइःत् चोगुसिआङ् हाङ्वागे़न् मुॽइसाम् थासु पिरुसि॥ हे़क्क्याङ् चोगुसिबा ये़न्नो खे़ङ्हाॽ खुने़ॽ “मे़न्छाम् याप्मि” मिङ् वाःत्तुसि॥ 3 आदम्मे़न् किप् थिक्काङ् सुम्बोङ् तङ्बे के़रे़ल्ले़, खे़ल्ले़ आबाङे कुनारुम्भुङ् कुजइःत्तो ये़म्बित्छा साधिक् कत्तु, हे़क्क्याङ् खे़न् सेत मिङ् वाःत्तु॥ 4 सेःत्ते़न् सावाःन्छिङ् हे़क्क्याङ् खे़न् एगाङ् आदम्मे़न् किप् ये़त्छि तङ्बे थारिक् हिङे़, हे़क्क्याङ् खे़ल्ले़ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥ 5 आदम्मे़न् किप् फाङ्सिआङ् सुम्बोङ् तङ्बे थारिक् हिङे़, हे़क्क्याङ् खे़न् मासिङ्॥ 6 सेःत्ते़न् किप् थिक्काङ् ङासि तङ्बे के़रे़ल्ले़ कुस्सा एनोसे़न् वये़॥ 7 कुस्सा एनोसे़न् वये़आङ् सेःत्ते़न् किप् ये़त्छिआङ् नुसि तङ्बे थारिक् हिङे़, हे़क्क्याङ् खे़ल्ले़ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥ 8 सेःत्ते़न् किप् फाङ्सिआङ् थिबोङ्ङाङ् ने़त्छि तङ्बे हिङे़, हे़क्क्याङ् खुने़ॽ मासिङ्॥ 9 एनोसे़न् फाङ्बोङ् तङ्बे के़रे़ल्ले़ खे़ल्ले़ कनाने़न् कत्तु॥ 10 केनाने़न् वये़आङ् एनोसे़न् किप् ये़त्छिआङ् थिबोङ्ङाङ् ङासि तङ्बे थारिक् हिङे़, हे़क्क्याङ् खे़ल्ले़ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥ 11 एनोसे़न् किप् फाङ्सिआङ् ङासि तङ्बे हिङे़, हे़क्क्याङ् खुने़ॽ मासिङ्॥ 12 केनाने़न् नुबोङ् तङ्बे के़रे़ल्ले़ खे़ल्ले़ महलाले़न् कत्तु॥ 13 महलाले़न् वये़आङ् केनाने़न् किप् ये़त्छिआङ् थिबोङ् तङ्बे थारिक् हिङे़, हे़क्क्याङ् खे़ल्ले़ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥ 14 केनाने़न् किप् फाङ्सिआङ् थिबोङ् तङ्बे हिङे़, हे़क्क्याङ् खुने़ॽ मासिङ्॥ 15 महलाले़न् तुक्पोङ्ङाङ् ङासि तङ्बे के़रे़ल्ले़ खे़ल्ले़ ये़रेदे़न् कत्तु॥ 16 ये़रेदे़न् वये़आङ् महलाले़न् किप् ये़त्छिआङ् सुम्बोङ् तङ्बे थारिक् हिङे़, हे़क्क्याङ् खे़ल्ले़ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥ 17 महलाले़न् किप् ये़त्छिआङ् फाङ्बोङ्ङाङ् ङासि तङ्बे हिङे़, हे़क्क्याङ् खे़न् मासिङ्॥ 18 ये़रेदे़न् किप् थिक्काङ् तुक्पोङ्ङाङ् ने़त्छि तङ्बे के़रे़ल्ले़ खे़ल्ले़ कुस्सा हनोक्के़न् वये़॥ 19 हनोक्के़न् वये़आङ् ये़रेदे़न् किप् ये़त्छि तङ्बे हिङे़॥ खे़ल्ले़ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥ 20 ये़रेदे़न् किप् फाङ्सिआङ् तुक्पोङ्ङाङ् ने़त्छि तङ्बे हिङे़, हे़क्क्याङ् खे़न् मासिङ्॥ 21 हनोक्के़न् तुक्पोङ्ङाङ् ङासि तङ्बे के़रे़ल्ले़ खे़ल्ले़ कुस्सा मतुसेलहन् वये़॥ 22 मतुसेलहन् वये़आङ् हनोक्के़न् किप् सुम्सि तङ्बे थारिक् निङ्वाॽफुमाङ्ङिन्नु सोसोरिक् लाङ्घेगे़र वये़॥ खे़ल्ले़ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥ 23 हनोक्के़न् किप् सुम्सिआङ् तुक्पोङ्ङाङ् ङासि तङ्बे के़रे़आङ् वये़॥ 24 हनोक्के़न् निङ्वाॽफुमाङ्ङिन्नु सोसोरिक् वये़ हे़क्क्याङ् खुने़ॽ मये़बे, थेआङ्भे़ल्ले़ निङ्वाॽफुमाङ्ङिल्ले़ खुने़ॽ फोःक्सुदेॽरु॥ 25 मतुसेलहन् किप् थिक्काङ् ये़प्पोङ्ङाङ् नुसि तङ्बे के़रे़ल्ले़ खे़ल्ले़ कुस्सा ले़मे़क्के़न् वये़॥ 26 ले़मे़क्के़न् वये़आङ् मतुसेलन् किप् नुसिआङ् ये़प्पोङ्ङाङ् ने़त्छि तङ्बे थारिक् हिङे़, खे़ल्ले़ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥ 27 मतुसेलन् किप् फाङ्सिआङ् तुक्पोङ्ङाङ् फाङ्सि तङ्बे हिङे़, हे़क्क्याङ् खुने़ॽ मासिङ्॥ 28 ले़मे़क्के़न् किप् थिक्काङ् ये़प्पोङ्ङाङ् ने़त्छि तङ्बे के़रे़ल्ले़ खुने़ॽ ये़म्बित्छा साधिक् कत्तु॥ 29 ले़मे़क्के़ल्ले़ अक्खे पाःत्तुआङ् नुह मिङ् वाःत्तु, “यहवे दाङ्बे़ल्ले़ साङ्ग्रा मे़त्तुबा खाम्बेःक्मो आनिॽ आजोगुम्बा तुक्खेलाक्खेबा याःम्बक्को कन् अङे़ःक्वाःल्ले़ आनिॽ हाङ्हाङ् आमे़त्लो॥” 30 नुहन् वये़आङ् ले़मे़क्के़न् किप् ङासिआङ् फाङ्बोङ्ङाङ् ङासि तङ्बे हिङे़॥ खे़ल्ले़ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥ 31 ले़मे़क्के़न् किप् नुसिआङ् नुबोङ्ङाङ् नुसि तङ्बे थारिक् हिङे़, हे़क्क्याङ् खुने़ॽ मासिङ्॥ 32 नुहन् किप् ङासि तङ्बे के़रे़ल्ले़ खुने़ॽ सेम, हाम नु ये़पे़द सुम्सि कुस्सा मे़वये़॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.