तोलिङ्सोमु 44 - लिम्बुके़माबा चःङ्गे खोर्यान् 1 खे़ब्याङ् युसुफरे़ कुहिम्मो के़हिबा के़दङ्बा से़वारोबे़न् अक्खे मे़त्तुर इङ्जाङ् पिरु, “खे़ङ्हाॽरे़ आक्ख्यारिक् कुमा मे़सुक्तुॽ खे़म्भ्यारिक् खे़न् मनाहाॽरे़ खुन्छिॽ सुक्वाओ चा सिःक्ते़ पिरे़से़ॽ, हे़क्क्याङ् के़रे़क् मनाहाॽरे़ खुन्छिॽ याङ्इत्छेन् आबाङे सुक्वाःल्ले़ कुम्ब्राओ केःत्ते़ पिरे़स्से़ॽ॥ 2 हे़क्क्याङ् आङ्गाॽ युप्पा आघोर्यान् खे़न् फोःक्वाबे़ल्ले़ चायाङ्मा कुसुक्वाओ याङ्इत्छेन्नु सोरिक् केःत्ते़बिरे़ॽ॥” हे़क्क्याङ् खे़ल्ले़ युसुफरे़ मे़त्तुबा इसिःक् चोगु॥ 3 तानाम् खाओःत्ते़नु मेःन्ने खुन्छि अदङ्हाॽनु सोरिक् खे़ल्ले़ खे़न् मनाहाॽ पाङ्घुदेसुसि॥ 4 खे़ङ्हाॽ ये़क्यक्कोलाम् मिसाक् नानाक् मे़गे़रे़आङ् युसुफरे़ हिम्मो के़हिबा के़दङ्बा से़वारोबे़न् मे़त्तु, “हारा खे़न् मनाहाॽरे़ खुन्छि एगाङ् एगाङ् पेगे़ॽ, हे़क्क्याङ् खे़ङ्हाॽ सिॽरे़से़ॽआङ् मे़त्ते़से़ॽ, ‘खे़निॽनु नुबा चोगुङ्ङिल्ले़ थेआङ् खे़निॽ ताप्फे़ःम्बा के़जोगुम्बाबे? 5 हाबा कन् चःङ्गे खोर्यालाम् आन्दाङ्बे़ल्ले़ थुङु मेःम्बि हे़क्क्याङ् खे़न् लाम्बाए नुबा नु ताप्फे़ःम्बा ओमे़मे़त्तुन्बि? कङ्ग खिनिॽ मे़न्नुबा याःम्बक् के़जोगुम्लो!’” 6 खे़ल्ले़ खे़ङ्हाॽ सिॽरुसिआङ् हाबाहे़क्के खे़ङ्हाॽ मे़त्तुसि॥ 7 खे़ङ्हाॽरे़ खे़न् मे़मे़त्तु, “आदाङ्बे, थेआङ् अक्खेदङ्बा पान् के़बाःत्तुबाबे? अक्खेदङ्बा याःम्बक् आदाङ्बारे़ के़सेवारोबाहाॽरोलाम् मे़बोङ्ने़ल्लरो॥ 8 ओमत्ते़ॽ, आनिगे सुक्वाःल्ले़ कुमुराओबा युप्पाःन्ने कनान लाजेॽलाम् नुःक्तुम्बे़ल्ले़ थेआङ् के़न्दाङ्बाल्ले़ कुहिम्मोलाम् युप्पा इग्र साम्म्याङ् खुःत्तुम्बे़ग? 9 आदाङ्बारे़ के़सेवारोबाहाॽरो आत्तिल्लो खे़न् के़घोसुॽ, खे़न् से़प्मा पोङ्॥ हे़क्क्याङ् आनिगे वेॽहाॽ आदाङ्बारे़ के़योःग्बा पोःक्खिगे़रो॥” 10 खे़ल्ले़ मे़त्तुसि, “खे़निॽ के़बाःतुम्बा हे़क्केए पोङ्लरो॥ कर आत्तिल्लो खे़न् खोदे़त् खे़न्लक् आयोःग्बा पोङ्॥ वेॽग पेःक्मा के़सुक्तिॽ॥” 11 खे़ब्याङ् आल्लोघ्रो मे़जात्ते़र आबाङे सुक्वाहाॽ खाम्बाङ्ङो मे़धासुआङ् मे़भाःक्खु॥ 12 हे़क्क्याङ् तङ्हिबाल्ले़ तुम्बे़ल्लोलाम् फोःक्वाबे़ल्लो थारिक् साॽरु, हे़क्क्याङ् खे़न् युप्पा खोर्यान् बे़न्जामिने़ल्ले़ कुसुक्वाओ खोसु॥ 13 खे़ब्याङ् खुन्छिॽ चाङ्हाॽ मे़धे़ःक्खु, अदङ्हाॽ कक् मे़गुःत्तुसिआङ् ये़क्यक्को मे़नुःक्खे़॥ 14 यहुदा नु खुने़ॽ कुम्भुॽ कुन्साॽहाॽ युसुफरे़ कुहिम्मो मे़गे़रे़ल्ले़ खुने़ॽ खे़ॽयोए वये़, हे़क्क्याङ् खे़ङ्हाॽरे़ खुने़ॽ कुदगि खाम्बाङ्ङो साम्बोन् मे़भन्छिङ्ङाङ् से़वा मे़मे़त्तु॥ 15 युसुफरे़ खे़ङ्हाॽ मे़त्तुसि, “खिनिॽ अक्खेदङ्बा थे याःम्बक् के़जोगुम्बाबे? आङ्गाॽ हे़क्तङ्बा मनाःन्नु तादिगे़न् पान् निमा सुक्तुङ् फाॽआङ् के़न्निसुम्ने़न्बि?” 16 यहुदाःल्ले़ मे़त्तु, “आनिगे थे मे़त्तासिगे़बाबे आदाङ्बे, आक्खेआङ् चोगुम्बे़बा मेःन् फाॽआङ् पाःप्मा सुक्तुम्बे़ग? आदाङ्बारे़ के़से़वारोबाहाॽरे़ लायोन् निङ्वाॽफुमाङ्ङिल्ले़ थाबे़र चोगुआङ् वाॽ॥ ओमत्ते़ॽ, आल्ल आनिगे आदाङ्बारे़ के़योःग्बा पोःक्खिगे़रो॥ आनिगे हे़क्क्याङ् आत्तिल्लो खे़न् युप्पा खोर्यान् खोदे़त्ते़ खे़न्नाङ् के़योःग्बा पोःक्खे़रो॥” 17 कर युसुफरे़ मे़त्तु, “आङ्गाॽलाम्बा अक्खेदङ्बा आभे़ल्ले़आङ् मे़बोङ्ने़ल्लो॥ आत्तिल्ले़ कुहुक्को खे़न् युप्पा खोर्यान् याङ्दे़त्ते़ खे़ल्लक् आङ्गाॽ आयोःग्बा पोङ्लो॥ कर खिनिॽग खिनिॽ पाःल्लो सनारुङ्नु पेगे़म्मे़ॽओ॥” यहुदाःल्ले़ बे़न्जामिने़ल्ले़ कुलागि पेलि फाक्तुॽ 18 खे़ब्याङ् यहुदान् युसुफरे़ कुबेसाङ् पेआङ् मे़त्तु, “आदाङ्बे, पेलि फाक्ने़रो, के़से़वारोबान् लत्छा पाःन्धिक् पाःप्मा पिराङ्ङो॥ आदाङ्बे़न् हाङ् इसिःक् के़जोःक्साङ् के़से़वारोबे़न्नु के़याःक् मे़ले़ॽरे़न्ने़ॽओ॥ 19 आदाङ्बारे़ के़सेवाराबाहाॽ अक्खेलॽरिक् सेःन्के़दोसुसिआङ् वये़, ‘खे़निॽ पा इग्र नुसाॽ वाबि?’ 20 हे़क्क्याङ् आनिगे आदाङ्बा मे़त्ने़छिगे़, ‘आनिगे पा खदाक्मि धिक् वाॽ, हे़क्क्याङ् खुने़ॽ कुगाप्पो तुम्मो कत्तुबा आनिगे चुःक्पा नुसाॽधिक् वाॽ॥ खे़ल्ले़ कुम्भुॽइन् मासिङ्घे़रे़, हे़क्क्याङ् आबाङे कुम्मा ले़प्माङ्बा आल्ल खे़न्लक् वाॽ, हे़क्क्याङ् खे़न् खुने़ॽ कुम्बारे़ साॽरिक्के लुङ्माॽ तुक्तुॽ॥’ 21 “खे़ब्याङ् आदाङ्बारे़ याप्मि के़मे़त्ते़, ‘खे़न् कॽयो आङ्गाॽओ तारे़म्मे़ॽ, आङ्गाॽ खे़न् ओमे़त्तुङ्ॽ॥’ 22 आनिगे आदाङ्बा मे़त्तासिगे़, ‘खे़न् चुःक्पे़ल्ले़ कुम्बा ले़प्मा मे़सुक्तुन्ॽ॥ थेआङ्भे़ल्ले़ खे़न् चुःक्पे़ल्ले़ कुम्बा ले़रुने़फाग्र कुम्बाःङ्ग सिबेःक्लो॥’ 23 कर आदाङ्बारे़ के़से़वारोबाहाॽ के़मे़त्तुसि, ‘खिनिॽ फोःक्वाबा नुसाॽइन् खिनिॽनु मे़दाने़न्ने फाग्र आङ्गाॽ आदगि तामा खिनिॽ के़ङ्घोसिल्लो॥’ 24 खे़ब्याङ् आनिगे पा, आदाङ्बारे़ के़से़वारोबाल्लो पेःक्मना॥ हे़क्क्याङ् आदाङ्बारे़ के़बाःन्निन् खुने़ॽ चे़क्मना॥ 25 “आनिगे पाःल्ले़ मे़त्तिगे़, ‘याम्मो पेगे़म्मे़ॽआङ् मिसाक् चा इङे़म्मे़ॽ’ 26 खे़ब्याङ् आनिगे खुने़ॽ मे़त्तुम्बे़, ‘आनिगे पेःक्मा मे़सुक्तिगे़ल्लो॥ आनिगे फोःक्वाबा नुसाॽइन् आनिगे़नु पेःक्किल्ले़रक् आनिगे पेगिगे़॥ थेआङ्भे़ल्ले़ आनिगे फोःक्वाबा नुसाॽइन् आनिगे़नु मे़बेःक्ने़न्नि फाग्र खे़न् मनाःल्ले़ कुदगि आनिगे पेःक्मा मे़घोसिगे़ल्लो॥’ 27 “खे़ब्याङ् आदाङ्बारे़ के़से़वारोबा आनिगे पाःल्ले़ मे़त्तिगे़, ‘आङ्गाॽ आमेत् ले़प्माङ्बा ने़त्छि आस्साहाॽ वये़त्छिबा खिनिॽ के़निसुम्लो॥ 28 लत्छाःल्ले़ आङ्गाॽ लाप्फुसाङ्देसाङ्॥ से़क्खासाङ् खे़न् कुजक्ता कुले़म्दाए चोगु लॽरिक् पाःत्तुङ्॥’ खे़न्नाङ्धो आङ्गाॽ खे़न् मे़न्निए वाॽआरो॥ 29 कन्नाङ् आङ्गाॽओलाम् के़देॽरुम्माङ् कुभा के़साक्पा खुने़ॽ तुमुल्ले़ग, खिनिॽ आङ्गाॽ के़भुप्पा आधेगेःक्किन् निङ्साङ् पुक्मोए इःप्पुङ्ङो याप्मि के़गे़त्लो॥ 30 “खे़ल्ले़चोगुल्ले़ आदाङ्बारे़ के़से़वारोबान् आनिगे पाःल्लो के़त्तिल्ले़ खे़न् चुःक्पे़न् आनिगे़नु होःप्पिल्ले़ग खुने़ॽ कुसक्मान् हाबा खे़न् चुःक्पे़ल्ले़ कुसक्माःन्नु चक्ते़आङ् वाॽबाल्ले़ चोगुल्ले़, 31 आनिगे़नु खे़न् होःप्पा निसुने मेःन्ने खुने़ॽ कुसक्मा पेःक्लो॥ आनिगे आदाङ्बारे़ के़से़वारोबाहाॽरे़ आनिगे पानुदिङ् पान् के़भुप्पा कुधेगेःक्नु निङ्साम् चोःक्मोए इःप्पुङ्ङो के़त्तुम्बे़रो॥ 32 आदाङ्बारे़ के़से़वारोबा, आङ्गाॽ आबाङे कन् चुःक्पे़ल्ले़ कुले़क्वा आङ्गाॽ चमानि पोःक्साङ्॥ हे़क्क्याङ् आनिगे पान् आङ्गाॽ अक्खे मे़त्तुङ्, ‘आङ्गाॽ कन् चुःक्पे़न् नुःक्तुङ्ङाङ् खे़ने़ॽओ मे़न्दाःप्पाङ्ने फाग्र आङ्गाॽ आहिङ्हिङ् खे़ने़ॽ के़दगि आप्तिक्साबा थाःप्पारो॥’ 33 खे़ल्ले़चोगुल्ले़ पेलि फाक्ने़रो, कन् चुःक्पे़ल्ले़ कुले़क्वा आङ्गाॽ आदाङ्बारे़ के़सेवारोबान्ने आदाङ्बारे़ के़योःग्बा चोगाङ्ङे़ॽ, हे़क्क्याङ् कन् चुक्पे़ङ्ग कुम्भुॽहाॽनु हिम्मो नुःङ्मा पेःक्मा फाःक्ते़ॽओ॥ 34 थेआङ्भे़ल्ले़ कन् चुःक्पे़न् आङ्गाॽनु होःप्ने़ फाग्र आङ्गाॽ आक्खेआङ् आम्बारे़ॽओ पेःक्काबाबे? आम्बारे़ खा तुम्मा इःत्तुबा कुदुक्खेःन् आङ्गाॽ ओमे़प्मा मे़सुक्काल्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.