तोलिङ्सोमु 43 - लिम्बुयुसुफरे़ कुम्भुॽसि बे़न्जामिने़न्नु सोरिक् मिस्रओ मे़बेःक् 1 कनान लाजेॽओ के़साक्पा साॽरिक् यम्बा साक् पोगे़आङ् वये़॥ 2 मिस्रलाम् मे़दारुबा चाःन् खे़ङ्हाॽरे़ मे़जमे़माःन्दु, खे़ब्याङ् खुन्छिॽ पाःल्ले़ खे़ङ्हाॽ मे़त्तुसि, “आनिॽ लागि चा इङ्से़ याम्मो पेगे़म्मे़ॽ॥” 3 कर यहुदाःल्ले़ खुने़ॽ मे़त्तु, “खे़न् मनाःल्ले़ ‘खिनिॽ नुसाॽइन् खिनिॽनु मे़न्दाःत्ते थारिक् आङ्गाॽओ तामा के़ङ्घोसिन्’ मे़त्तिगे़आङ् के़साक्पा साम्दिङ् पिरिगे़आङ् वाॽ॥ 4 खे़ने़ॽ आनिगे नुसाॽइन् आनिगे़नु के़बाङ्सुग्ररक् आनिगे पेगिगे़आङ् के़लागि चा इङुम् थाक्तुम्बे़॥ 5 कर खे़न् के़म्बाङ्सुन्ने़ फाग्र आनिगे मे़बेगिगे़न्लो, थेआङ्भे़ल्ले़ खे़न् मनाःल्ले़ ‘खिनिॽ नुसाॽइन् खिनिॽनु होःप्ने़ फाग्र आङ्गाॽ आदगाङ् तामा के़ङ्घोसिल्लो’ फाआङ् आनिगे मे़त्तिगे़आङ् वाॽ॥” 6 याकुबरे़ मे़त्तु, “खिनिॽ खे़न् मनान् आनिगे वेॽ नुसाॽधिक् वाॽ के़मे़त्तुम्माङ् खिनिॽ थेआङ् आङ्गाॽओ तुक्खे के़दारुम्बाबे?” 7 खे़ङ्हाॽरे़ नोगप् मे़बिरु, “खे़न् मनाःल्ले़ अक्खे मे़त्तिगे़र आनिगे काॽइ नु हिम्सयङ्रे़ कुयाःम्बेओ सेःन्दोसिगे़, ‘खिनिॽ पानुदिङ् पान् आल्लसाङ् वाॽबि? खिनिॽ वेॽ नुसाॽआङ् वाॽबि?’ आनिगे़ग हाबा कन् सेःन्दोःल्ले़ कुनोगप्लक् पिमना॥ खे़ल्ले़ ‘खिनिॽ नुसाॽइन् कॽयो ताराम्मे़ॽ’ आनिगे मे़त्तिगे़ फाॽआङ् आत्तिलाम् निसुम्बे़ग?” 8 खे़ब्याङ् यहुदाःल्ले़ कुम्बा मे़त्तु, “कन् चुःक्पे़न् आङ्गाॽनु पाङ्से़ॽ, हे़क्क्याङ् आनिगे खिमो थाने़छिगे़, खे़ल्ले़चोगुल्ले़ आनिगे नु खे़ने़ॽ हे़क्क्याङ् आनिॽ साहाॽनु स्ये़ॽइ मेःन् कर हिङिरो॥ 9 कल्ले़ लागि आङ्गाॽए पोःक्साङ्, खे़न् योधो पोङ्ने़ फाग्र आङ्गाॽ ते़म्साङ्ङे़ॽ॥ आङ्गाॽ कन् नुःक्तुङ्ङाङ् मे़न्दाःप्पान्ने फाग्र हे़क्क्याङ् खे़ने़ॽ के़दगाङ् मे़न्युङ्बान्ने़ फाग्र, आङ्गाॽ सदादिङ्ले़ लागि आप्तिक् कुयुङ्लो॥ 10 आनिॽ आन्छुसे़न्निल्ले़ग निले़ङ्ङाङ् आगे़रे़ आधाङे़बारो॥” 11 खे़ब्याङ् खुन्छिॽ पा याकुबरे़ खे़ङ्हाॽ मे़त्तुसि, “अक्खे पोङ्मै पोङ्ग्र अक्खे चोगे़म्मे़ॽ, कन् लाजेॽओ के़बोःक्पा नुःब्नुबा पाःन्हाॽ, कुभा कुनाम् के़नुॽबा हुःत्छिङ्मनाबा, कुभा सक्वा खु, कुभा कुनाम् के़नुॽबा मारुक्, मुर्र, पेस्ता हे़क्क्याङ् खङ्जङ्सेॽहाॽ खे़न् मनाःल्ले़ कुलागि खिनिॽ सुक्वाओ आक्ते़म्मे़ॽआङ् चे़सुङ् हे़क्के तेॽराम् पिरे़म्मे़ॽ॥ 12 खिनिॽनु युप्पा याङ्ङिन् ने़त्छिले़ङ्बा यारिक् याङ्ङाङ् तेॽरे़म्मे़ॽ, थेआङ्भे़ल्ले़ खे़न् खिनिॽ सुक्वाःल्ले़ कुसम्धाङ् के़याक्पा युप्पा याङ्ङिन् नुःक्मा पोङ्॥ खे़न् मे़भेःन्दुआङ् मे़गेःत्तुबिला॥ 13 खिनिॽ नुसाॽइन् तेॽरे़म्मे़ॽआङ् हारा खे़न् मनाःल्लो याम्मो पेगे़म्मे़ॽ॥ 14 खिनिॽ वेॽ नुसाॽइन् नु बेन्यामिने़न् खिनिॽनु नुःङ्मा फे़म्मारे़लागि खे़न् मनाल्ले़ कुदगि मुक्साम्दाङ्बा निङ्वाॽफुमाङ्ङिल्ले़ लुङ्माॽ के़दुक्तिर॥ आङ्गाॽ आस्साहाॽ मामै पोङ्साङ्, हे़क्केए पोङ्लरो॥” 15 खे़ब्याङ् खे़न् मनाहाॽ चे़सुङ्, ने़त्छिले़ङ् यारिक् युप्पायाङ् हे़क्क्याङ् बेन्यामिने़न् मे़याङ्सिङ्ङाङ् मिस्र ले़प्माङ् मे़धासिङ्, हे़क्क्याङ् युसुफरे़ कुदगि मे़दोःन्छिङ्॥ 16 युसुफरे़ खे़ङ्हाॽनु बेन्जामिने़न् निसु खे़ब्याङ् खुने़ॽ कुहिम्मोबा के़हिबा के़दङ्बा से़वारोबान् मे़त्तु, “कन् मनाहाॽ आहिम्मो तेॽरे़से़ॽ, हे़क्क्याङ् लत्छा थक्साधिक् से़रे़ॽआङ् साभःङ्जा यारिप् चोगे़ॽ॥ थेआङ्भे़ल्ले़ कन् मनाहाॽ आइन् आङ्गाॽनुए तःक् मे़जारो॥” 17 युसुफरे़ इङ्जाङ् पिरुबा हे़क्के खे़न् मनाःल्ले़ चोगु, हे़क्क्याङ् खे़न् मनाहाॽ युसुफरे़ कुहिम्मो तारुसि॥ 18 कर युसुफरे़ कुहिम्मो मे़दारुसिबाल्ले़ युसुफरे़ कुम्भुॽहाॽ मे़गिसे़आङ् अक्खे मे़मे़त्छिङ्, “तगिस्मो आनिॽ सुक्वाओ मे़नुःक्तुबा युप्पाःल्ले़ चोगुल्ले़ आनिॽ कॽयो आम्दारे़बाबिला॥ आल्ल खे़ल्ले़ आनिॽ आदे़म्माङ् आनिॽ योक् आजोक् हे़क्क्याङ् आनिॽ अदङ्हाॽ आनाप्पिला॥” 19 कल्ले़चोगुल्ले़ युसुफरे़ कुहिम्मो के़हिबा के़दङ्बा से़वारोबाल्ले़ कुलाम्धेःप्पुङ्ङो मे़बेआङ् खे़ङ्हाॽरे़ मे़मे़त्तु, 20 “आदाङ्बे, तगिसमा ये़म्मो आनिगे चा इङ्से़ तामनाआङ् वये़॥ 21 आनिगे नुःक्खिगे़र पत्छिगे़ल्ले़ याङ्धोःक्मा ते़न्नो के़रिगे़ हे़क्क्याङ् आनिगे सुक्वाहाॽ फाःक्खुम्बे़ल्ले़ आनिगे के़रे़क्ले़ सुक्वाओ आबाङे आनिगे कत्तुम्बे़बा के़रे़क् युप्पा याङ्ङिन् खोःम्ना॥ खे़ल्ले़चोगुल्ले़ खे़न् आनिगे़नुए युरुम्बे़आङ् वाॽ॥ 22 चा इङ्मारे़ लागि वेॽ च्यल्लिक् युप्पाआङ् तारुम्बे़आङ् वाॽ॥ आनिगे सुक्वाहाॽओ आनिगे युप्पान् हाःत्ले़ केःत्तु पिरिगे़ खे़न् आनिगे मे़निसुम्बे़ल्लो॥” 23 खे़ल्ले़ नोगप् पिरुसि, “नुॽ, मे़गिसे़म्मिन्ने़ॽ॥ से़क्खासाङ् खिनिॽ निङ्वाॽफुमाङ्, खिनिॽ पाःल्ले़ कुनिङ्वाॽफुमाङ्ङिल्ले़ खिनिॽ सुक्वाहाॽओ याङ् केःत्तु के़बिरिबाबिला॥ खिनिॽ युप्पाःङ्ग आङ्गाॽ खोसुङ्ङाङ्ङे वये़॥” खे़ब्याङ् खे़ल्ले़ सिमियोने़न् लःत्तुआङ् खे़ङ्हाॽरो तारु॥ 24 खे़न् मनाःल्ले़ खे़ङ्हाॽ युसुफरे़ कुहिम्सिगाङ् तेॽरुसि, हे़क्क्याङ् खुन्छिॽ लाङ् वाहप्मारे़ लागि च्वाःत् पिरुसि, हे़क्क्याङ् खुन्छिॽ अदङ्हाॽआङ् कुजा पिरुसि॥ 25 ले़न्दिक् युसुफे़न् कुदुम्मा ये़म्ले़ लागि खे़ङ्हाॽरे़ चे़सुङ् यारिप् मे़जोगु, थेआङ्भे़ल्ले़ खे़प्मोए तःक् चामा पोङ् फाॽआङ् मे़मे़त्तुसिआङ् वये़॥ 26 युसुफे़न् हिम्मो त्ये़ःल्ले़ खे़ङ्हाॽरे़ खुन्छिॽ मे़दारुबा चे़सुङ्ङिन् खुने़ॽ पिमा फाॽआङ् कुहिम्मो मे़दारु, हे़क्क्याङ् खुने़ॽ साम्बोन् हबत्ताङ् से़वा मे़मे़त्तु॥ 27 खुने़ॽ खे़ङ्हाॽनु हे़ना मये़र से़ःन्लाप्तुसिआङ् मे़त्तुसि, “खिनिॽ पा खदाक्मिन् नुॽआङ् वाबि? खुने़ॽ आल्लसाङ् वाॽबि?” 28 खे़ङ्हाॽरे़ मे़मे़त्तु, “के़से़वारोबा आनिगे पानुदिङ् पान् नुॽदारो, हे़क्क्याङ् आल्ल थारिक् वाॽरो॥” खे़ब्याङ् खाम्बाङ्ङो थारिक् साम्बोन् मे़भन्छिङ्ङाङ् खे़ङ्हाॽरे़ खुने़ॽ से़वा मे़मे़त्तु॥ 29 युसुफरे़ अक्खे ओमये़र आबाङे कुन्साॽ, आबाङे कुम्मारे़ कुस्सा, बेन्यामिने़न् निसुआङ् मे़त्तुसि, “खिनिॽ आङ्गाॽ याप्मि के़मे़त्ते़बा खिनिॽ फोःक्वाबा नुसाॽइन् हाबा कन्बि?” खे़ब्याङ् युसुफरे़ मे़त्तु, “पाबु, निङ्वाॽफुमाङ्ङिल्ले़ कुलुङ्गुम्मिन् खे़ने़ॽनु वाॽर॥” 30 खुने़ॽ कुन्साॽरे़ लागि कुयोम् पुॽरे़ थाङे़आङ् कुहाःप्मा युसे़आङ् चात्ते़र हाःप्मा ते़न् कोःत्तुर कुयाक्फाओ लासे़आङ् हाबे़॥ 31 खे़ब्याङ् कुनाःन् हप्तुआङ् लाःक्कात् लःन्दे़, हे़क्क्याङ् आबाङे ते़म्सिङ्ल खुने़ॽ मे़त्तुसि, “आल्ल तःक् फे़त्ताम्मे़ॽ॥” 32 खे़ब्याङ् युसुफरे़ कुलागि वेॽ हे़क्क्याङ् खुने़ॽ कुम्भुॽ कुन्साॽसिरे़ लागि वेॽ हे़क्क्याङ् खुने़ॽनु के़जाबा मिस्रिहाॽरे़ लागि वेॽ तःक् मे़युक्खु, थेआङ्भे़ल्ले़ मिस्रिहाॽरे़ हिब्रुहाॽनु सोसोरिक् युङ्माआङ् चामा मे़न्नुॽमनाबा वये़॥ हे़क्के चोःक्मा मिस्रिहाॽरे़ लागि सिक्के़ले़ःङ्बा पान् वये़॥ 33 तुम्बाआङ्धो फोःक्वाबा थारिक् खुन्छिॽ तङ्बे इसिःक् युसुफरे़ युक्खुसिआङ् युङे़॥ खे़न् मनाहाॽ खुन्छिॽ निङ्वाॽ मये़आङ् ओमे़मे़त्छिङ्ल मे़युङे़॥ 34 खे़ङ्हाॽरे़ खुन्छिॽ लक्किन् युसुफरे़ कुजामाने़त्तो लाम्बा मे़धाबु मे़बिरुसिआङ् वये़॥ कर बे़न्जामिने़ल्ले़ कुलक्किन् खुन्छिॽ के़रे़क्ले़ लक्किन्नुःल्ले़ ङासिले़ङ् यारिक् यल्लिक् योरे़॥ अक्खेलॽरिक् खे़ङ्हाॽरे़ युसुफे़न्नु सोरिक् मे़ज मे़धुङुआङ् ये़ये़ मे़लॽरे़॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.