तोलिङ्सोमु 42 - लिम्बुमिस्र लाजेॽओ युसुफरे़ कुम्भुॽसि चा इङ्से़ मे़बेःक् 1 मिस्र लाजेॽओ चा वाॽ के़लॽबा निङ्वाॽ खोसुआङ् याकुबरे़ कुस्साहाॽ मे़त्तुसि, “खिनिॽ थेआङ् ओगे़मे़त्तासिआङ् के़युङिबाबे? 2 मिस्र लाजेॽओ चा वाॽमु के़लॽबा खे़प्सुङ्ङाङ् वाॽ॥ आनिॽ हिङ्माए पोङ्ने़ फाॽग्र खे़ॽयो पेगे़म्मे़ॽआङ् आनिॽ लागि चा इङे़म् थाक्ते़म्मे़ॽ॥” 3 कल्ले़चोगुल्ले़ युसुफरे़ थिबोङ् कुम्भुॽहाॽ मिस्रओ चा इङ्से़ मे़बे॥ 4 कर याकुबे़ल्ले़ युसुफरे़ कुन्साॽ बे़न्जामिने़ङ्ग कुम्भुॽसिनु मे़बाङ्घुन्, थेआङ्भे़ल्ले़ खे़न् के़साक्पो थाबि फाॽआङ् याकुबे़न् किसे़॥ 5 अक्खेलॽरिक् वेॽ चा इङ्से़ के़बेःक्पाहाॽनु सोरिक् याकुबरे़ कुस्साहाॽआङ् चा इङ्से़ मे़बे, थेआङ्भे़ल्ले़ कनान लाजेॽओआङ् साक् पोगे़आङ् ने़स्से़॥ 6 खे़न् ये़म्मो युसुफे़न् मिस्र लाजेॽओ सुहाङ्युक्पा वये़॥ लाजेॽओबा के़रे़क् मनाहाॽ चा के़सङ्बा के़बिबाआङ् खुने़ॽए वये़॥ खे़ल्ले़चोगुल्ले़ युसुफे़ल्लो कुम्भुॽसि मे़द्ये़आङ् खाम्बाङ्ङो थारिक् अःक्खुम् मे़भन्छिङ्ङाङ् से़वा मे़मे़त्तु॥ 7 युसुफरे़ कुम्भुॽसि निसुसिआङ् कुसिङ् निःत्तुसि, कर खुने़ॽ खे़ङ्हाॽ कुसिङ् मे़निःत्तुन्छिन्बा हे़क्के ले़ङ्सिङ्ङाङ् माङ्भा चाॽरे़र खे़ङ्हाॽ सेःन्लाप्तुसि, “खिनिॽ आत्तोलाम् के़द्ये़ॽइबाबे?” खे़ङ्हाॽरे़ मे़मे़त्तु, “कनान लाजेलाम् चा इङ्से़ त्ये़ॽइगे़बारो॥” 8 युसुफरे़ आबाङे कुम्भुॽसि कुसिङ् निःत्तुसि, कर खे़ङ्हाॽरे़ खुने़ॽ कुसिङ् मे़न्निःत्तुन्॥ 9 खे़ब्याङ् युसुफरे़ खुन्छिॽ याःम्बेओ से़प्माङ् माक्तुबा से़प्माङ्हाॽ निङ्वाॽ इःत्तु, हे़क्क्याङ् खुने़ॽ खे़ङ्हाॽ मे़त्तुसि, “खिनिॽ थोःम्स्वाबानिङ्॥ कन् लाजेन् आक्खेआङ् नाःम्मा सुक्ते़त्ति फाॽआङ् कुओमे़त्छे़ के़द्ये़ॽइबारो॥” 10 खे़ङ्हाॽरे़ युसुफे़न् मे़मे़त्तु, “आदाङ्बे, हे़क्के मेःन्लो॥ आनिगे आदाङ्बारे़ के़से़वारोबाहाॽ चा इङ्से़ त्ये़ॽइगे़बारो॥ 11 आनिगे लत्छा मनाःल्ले़ कुस्सादिगे़रो॥ आनिगे़ग कुदोःप्मा मनासिगे़, थोःम्स्वाबादिगे़ मेःल्लो॥” 12 खुने़ॽ खे़ङ्हाॽ मे़त्तुसि, “मेःन्, कन् लाजेन् आक्खेआङ् नाःम्मा सुक्ते़त्ति फाॽआङ् कुओमे़त्छे़ के़द्ये़ॽइबारो॥” 13 खे़ब्याङ् खे़ङ्हाॽरे़ मे़मे़त्तु, “आनिगे आदाङ्बारे़ के़से़वारोबाहाॽ थिबोङ्ङाङ् ने़त्छि वाॽमना॥ कनान लाजेॽओबा लत्छा मनाःल्ले़ कुस्सादिगे़रो॥ फोःक्वाबे़न् आल्लो आनिगे पाःन्नु वाॽ, हे़क्क्याङ् लत्छाःङ्ग मासिङ्ङाङ् आल्लो होप्॥” 14 युसुफरे़ खे़ङ्हाॽ मे़त्तुसि, “आङ्गाॽ पाःत्तुङ्बा हे़क्केए खिनिॽ थोःम्स्वाबानिङ्रछ॥ 15 आल्ल अक्खेलॽरिक् खिनिॽ साॽनिङ्लो॥ फारोन् कुहिङ्वे़त् वाॽबा हे़क्के, खिनिॽ फोःक्वाबा नुसाॽइन् मे़न्दाए थारिक् खिनिॽ कन् ते़न्नोलाम् पेःक्मा के़ङ्घोसिल्लो॥ 16 खिनिॽओ थिप्पा खिनिॽ नुसाॽ लासे़ पाङ्घे़म्मे़ॽ॥ खुने़ॽ कुयुयु खिनिॽ पुङ्लाहिम्मो यागाम्मे़ॽ॥ अक्खेलॽरिक् खिनिॽ के़बाःत्तुम्बा पाःन्निन् से़क्खाबि मेःम्बि फाॽआङ् साॽरुङ्॥ मेःन्ने़फाग्र फारोल्ले़ कुहिङ्मन्नो माङ्हे़क्सिङ्आ खिनिॽग थोःम्स्वाबानिङ्ङेरो॥” 17 हे़क्क्याङ् युसुफरे़ खे़ङ्हाॽ पुङ्लाहिम्मो थिक्मे़त् सुम्ये़न् युक्खुसि॥ 18 सुम्ये़न्नो युसुफरे़ खे़ङ्हाॽ मे़त्तुसि, “अक्खे चोगे़म्मे़ॽ, हे़क्क्याङ् खिनिॽ के़हिङिरो, थेआङ्भे़ल्ले़ आङ्गाॽ निङ्वाॽफुमाङ्ङिन्नु किआ॥ 19 खिनिॽ कुदोःप्मानिङ्ने़ फाग्र खिनिॽ फुॽनुसाॽहाॽओ थिप्पा कॽयो पुङ्लाहिम्मो युङे़म्मे़ॽ, हे़क्क्याङ् वेॽहाॽरे़ खिनिॽ हिम्सयङ्हाॽरे़ कुजा चामा मे़घोसुर फाॽआङ् चा कुयाम् तेॽराम्मे़ॽ॥ 20 कर खिनिॽ फोःक्वाबा नुसाॽइन् कॽयो आङ्गाॽओ तारे़म्मे़ॽ॥ अक्खेलॽरिक् खिनिॽ पाःन्निन् से़क्खारो फाॽआङ् निदे़त्लो, हे़क्क्याङ् खिनिॽ के़न्छ्ये़ॽइन्लो॥” खे़ङ्हाॽ हे़क्के चोःक्मा मे़दे़न्दे़॥ 21 खुन्छिॽ लुम्मो अक्खे मे़मे़त्छिङ्, “से़क्खासाङ् आनिॽ नुसाॽइल्ले़ कुयाःम्बेओ आप्तिक् आघोसुम्माङ् आवाॽ, थेआङ्भे़ल्ले़ खे़ल्ले़ पेलि आभाक्ते़ल्ले़ खे़ल्ले़ कुनिङ्वाॽ तुगे़बान् आनिॽ आनिसुम्माङ्साङ् खे़ल्ले़ कुबाःन्निन् आङ्घे़प्सुम्ने़न्॥ खे़ल्ले़चोगुल्ले़ कन् ये़त्तुक्खेन् आनिॽओ त्ये़बारो॥” 22 रुबे़ने़ल्ले़ खे़ङ्हाॽ नोगप् पिरुसि, “खे़न् चुःक्पे़ल्ले़ कुदक्ले़ङ्वाओ लायो मे़जोगे़म्मिन्ने़ॽ फाॽआङ् खिनिॽ मे़त्निङ्बा मेःम्बि? कर खिनिॽ खे़म्माए के़ङ्घे़प्सुम्ने़न्॥ आल्ल खे़ल्ले़ कुमाक्खिॽइल्ले़ कुले़क्वा आनिॽ आदुमुम्ल पोङ्॥” 23 युसुफे़न् नु कुम्भुॽ कुन्साॽसि लुम्मो पान् के़ले़ङ्बा मनाधिक् वये़बाल्ले़ चोगुल्ले़ खुन्छिॽ पाःन्निन् युसुफरे़ कुसिङ्निःत्तु फाॽआङ् मे़न्निसुन्॥ 24 युसुफे़न् खे़ङ्हाॽलाम् थिक्ले़प्माङ् हिसिङ्ङाङ् हाबे़ हे़क्क्याङ् याम्मो खुन्छिॽ ले़प्माङ् हिसिङ्ङाङ् खे़ङ्हाॽनु ताॽजे़क्खे़॥ खुने़ॽ खे़ङ्हाॽरे़ खुन्छिॽ तगिए खे़ङ्हाॽरे़ मे़निसुरए सिमियोने़न् इघेःक्खु॥ युसुफरे़ कुम्भुॽसि कनान लाजेॽ मे़नुःङ्ॽ 25 युसुफरे़ खुन्छिॽ सुक्वाहाॽओ चा केःत्ते़म् पिरे़म्सिम्मे़ॽ हे़क्क्याङ् खे़ङ्हाॽरे़ खुन्छिॽ युप्पा याङ्हाॽ आबाङे खुन्छिॽ चा सुक्वाओए केःत्ते़म् पिरे़म्सिम्मे़ॽ हे़क्क्याङ् खुन्छिॽ लाम्दिःक्को चाहाब् के़जोःक्पा चासाक् कुःत्ते़म्देसे़म्से़ॽ फाॽआङ् मुरा मे़त्तुसि॥ खे़ङ्हाॽरे़ खुन्छिॽ लागि हे़क्केए मे़जोगु॥ 26 खे़ब्याङ् खुन्छिॽ अदङ्हाॽ चागक् मे़गुःत्तुसिआङ् खे़ॽयोलाम् मे़धासिङ् मे़बे॥ 27 याङ्धोःक्मा ते़न्नो खे़ङ्हाॽओ थिक्ले़ कुअदङ्ङिन् चा पिमा फाॽआङ् कुसुक्वान् हन्दुल्ले़ कुयुप्पा याङ्हाॽ कुसुक्वाःल्ले़ कुमुराओ यागे़बा निसु॥ 28 खे़ल्ले़ कुम्भुॽ कुन्साॽसि मे़त्तुसि, “आङ्गाॽ आयुप्पा याङ्ङिङ्ग मे़नुःक्ताङ् मे़बिराङ्निबि? ओमे़त्ते़म्मे़ॽ, आसुक्वाःल्ले़ कुमुराओ याक्लो॥” कन् मे़निसुआङ् खे़ङ्हाॽ किमाल्ले़ खुन्छिॽ साम्मिक् मये़, हे़क्क्याङ् खे़ङ्हाॽ चिरिम्लिम्ना मे़यक्खे़र ओमे़मत्छिङ्ल अक्खे मे़त्छिङ्मा मे़हेःक्ते़, “निङ्वाॽफुमाङ्ङिल्ले़ आनिॽ थे चोःक्मा आइःत्ते़इरो?” 29 खे़ङ्हाॽ कनान लाजेॽओ खुन्छिॽ पानुदिङ् पा याकुबरो मे़गे़रे़, खे़ब्याङ् खुन्छिॽनु पोःक्खे़बा के़रे़क् पाःन्हाॽ मे़मे़त्तु, 30 “खे़न् लाजेःल्ले़ कुन्दाङ्बे़ल्ले़ आनिगे़नु के़साक्पा पान् पाःत्तु॥ आनिगे़ग खे़न् लाजेॽओ खे़ल्ले़ थोःम्स्वाबा लेःत्तिगे़॥ 31 कर आनिगे खे़न् मे़प्मना, ‘आनिगे कुदोःप्मा मनासिगे़॥ आनिगे थोःम्स्वाबा मेःन्छिगे़॥ 32 आनिगे पाःल्ले़ थिबोङ्ङाङ् ने़त्छि कुस्सासिगे़॥ लत्छाग मासिङ्ङाङ् आल्लो होप्, फोःक्वाबे़ङ्ग आल्लो आनिगे पाःन्नु वाॽ॥’ 33 “खे़न् लाजेॽओबा सुहाङ्युक्पाल्ले़ मे़त्तिगे़, ‘कन् पाःन्नोलाम् खिनिॽ कुदोःप्मा मनानिङ् फाॽआङ् आङ्गाॽ निङ्वाॽ खोसुङ्लो, खिनिॽ फुॽनुस्साॽओ थिप्पा कॽयो आङ्गाॽनु युक्खे़म् थ्ये़म्मे़ॽ, हे़क्क्याङ् साक्को खिनिॽ हिम्सयङ्हाॽ खाःप्मासिरे़ लागि चा याङ्ङासिम्मे़ॽआङ् थासिङ्ङाम्मे़ॽ॥ 34 कर खिनिॽ फोःक्वाबा नुसाॽइन् कॽयो ताराम्मे़ॽ॥ खे़ब्याङ्लक् खिनिॽ थोःम्स्वाबा मेःन्निङ्, कर कुदोःप्मा मनानिङ् फाॽआङ् आङ्गाॽ निङ्वाॽ खोसुङ्लो, हे़क्क्याङ् आङ्गाॽ कन् खिनिॽ नुसाॽइन् खिनिॽ हुक्को पिनिङ्, हे़क्क्याङ् खिनिॽ कन् लाजेॽओ ले़ङ्हङ् चोःक्मा के़घोसुम्लो॥’” 35 खे़ङ्हाॽरे़ खुन्छिॽ सुक्वान् मे़लिङ्सुल्ले़ के़रे़क्ले़ खुन्छिॽ युप्पा याङ्ङिल्ले़ कुसुङ्मे़न् आबाङे खुन्छिॽ सुक्वाओ यागे़रछ॥ खे़ङ्हाॽरे़ हे़क्क्याङ् खुन्छिॽ पाःल्ले़ खे़न् युप्पा याङ्ङिल्ले़ कुसुङ्मे़न् निसुआङ् खे़ङ्हाॽ मे़गिसे़॥ 36 खुन्छिॽ पा याकुबरे़ खे़ङ्हाॽ मे़त्तुसि, “खिनिॽग आङ्गाॽ आस्साहाॽ आग्नाप्ते़आङ् आङ्गाॽ साॽरिक् मे़रिङ्ङो याप्मि के़धासे़आङ् वाॽ॥ युसुफे़न् होप्, सिमियोने़न् होप्, आल्ल बे़न्जामिने़न्नाङ् तेॽमा के़जोगुम्॥ कन् के़रे़क् पाःन्हाॽ आङ्गाॽ आसम्धाङ् थ्ये़आङ् वाॽ॥” 37 खे़ब्याङ् रुबे़ने़ल्ले़ कुम्बा मे़त्तु, “आङ्गाॽ बेन्यामिने़न् खे़ने़ॽओ मे़दाःत्तान्ने फाग्र आङ्गाॽ ने़प्फु आस्साहाॽ स्ये़रे़से़ॽ॥ बेन्यामिने़न् आङ्गाॽ आहुक्को पिराङ्ङे़ॽ॥ खे़न् आङ्गाॽ खे़ने़ॽओ नुःक्तुङ्ङाङ् तारुङ्लो॥” 38 कर याकुबरे़ मे़त्तु, “आङ्गाॽ आस्सान् खिनिॽनु मे़बेःक्ने़न्, थेआङ्भे़ल्ले़ कुम्भुॽइन् मासिङ्घे़रे़, हे़क्क्याङ् आल्ल खुने़ॽरक् ताङे़आङ् वाॽ॥ खिनिॽ लाम्दिःक्को खुने़ॽआङ् के़साक्पा पान् तुमुल्ले़ग, खिनिॽ कन् के़भुप्पा आधे़गेःक्के़न् निङ्साङ् पुक्मोए इःप्पुङ्ङो के़गे़त्तुम्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.