तोलिङ्सोमु 41 - लिम्बुयुसुफरे़ हाङ्ङिल्ले़ कुसे़प्माङ्ङिल्ले़ कुबे हन्दुॽ 1 तङ्बे ने़त्छि के़रे़आङ् एगाङ् फारोल्ले़ लत्छा से़प्माङ्धिक् माक्तु॥ से़प्माङ्ङो खुने़ॽ निल यङ्घङ्ङिल्ले़ कुयाओ ये़बे़बा माक्तु॥ 2 निल यङ्घङ्ङोलाम् साॽरिक् वरिक्लिक्मा के़मे़ॽमा नुसि पिप्माहाॽ मे़लःन्दे़ मे़धाङे़, हे़क्क्याङ् फङ्दुलाओ चालाम्मा मे़हेःक्ते़॥ 3 खे़न् एगाङ् वेॽ नुसि ये़प् नु होरिक्लक् के़बप्पा ये़ःङ्घिःक्खिःक्मा पिप्माहाॽ मे़लःन्दे़, हे़क्क्याङ् निल यङ्घङ्ङिल्ले़ कुयाओ के़ये़प्मा तगिबा पिप्माहाॽनु मे़ये़म्सिङ्॥ 4 खे़न् नुसि ये़प्पा नु होरिक्लक् के़बप्पा ये़ःङ्घिःक्खिःक्मा पिप्माहाॽरे़ के़मे़ॽमा वरिक्लिक्मा नुसि पिप्माहाॽ मे़जमे़देसुसि॥ खे़ब्याङ् फारोन् सोरे़॥ 5 खे़न् एगाङ् खुने़ॽ याम्मो इप्से़लासे़, हे़क्क्याङ् वेॽ से़प्माङ्धिक् माक्तु॥ पनुॽ के़नुॽबा नु नुसि नुबा चादाप्माहाॽ लत्छा कुबुङ्ङो लिङ्से़आङ् पत्छे़॥ 6 खे़ब्याङ् कुभिॽ इस्सेःङ्बा हे़क्क्याङ् नाम्गे़न् पिसाङ्लाम् के़बोःक्पा साम्मिःत्तिल्ले़ मुःत्तुआङ् इगे़ले़म्बा वेॽ नुसि चादाप्माहाॽ मे़गे़रे़॥ 7 हे़क्क्याङ् खे़न् कुभिॽ इस्सेःङ्बा चादाप्माहाॽरे़ कुजाॽइ नुसि नुबा चादाप्माहाॽ मे़लरु मे़देसुसि॥ खे़ब्याङ् फारोन् सोरे़, खे़ङ्ग से़प्माङ्निरे़छ फाॽआङ् निङ्वाॽ खोसु॥ 8 सोरे़आङ् तानाम् साॽरिक् निङ्साङ्ङो थ्ये़, हे़क्क्याङ् मिस्र लाजेॽबा के़रे़क् कित्चाक्हाॽ नु खे़ॽयोबा सिक्कुम्साबा मनाहाॽ खुने़ॽ उःत्तुसि॥ फारोल्ले़ खे़ङ्हाॽ कुसे़प्माङ्हाॽ चे़क्तुसि, कर खे़ॽयो खुने़ॽ कुसे़प्माङ्ङिल्ले़ कुबे के़हम्बा के़बिबा हाःत्ताङ् मे़होःप्ते़॥ 9 खे़ब्याङ् खे़न् तुम् थि के़दोम्बा के़बिबाल्ले़ फारोन् मे़त्तु, “आङ्गाॽ निङ्वाॽ मुःत्छुङ्बा पाःन्निन् आइन् आनिङ्वाॽ सुम्लॽरे़॥ 10 कुभा ये़म् तगि खे़ने़ॽ के़से़वारोबाहाॽनु के़सिक् पोगे़आङ् आङ्गाॽ नु तुम् तःक् के़धोःक्पे़न् थक्कम्ब्राङ् के़मे़प्पा थक्पे़बे़ल्ले़ कुबुङ्लाहिम्मो याप्मि के़याक्ते़ल्ले़ 11 थिक्से़न्नो खुने़ॽ नु आङ्गाॽ आबाङे कुबे हम्मा के़बोङ्बा से़प्माङ् माक्ते़छुगे़॥ 12 खे़ॽयो थक्कम्ब्राङ् के़मे़प्पा थक्पे़बे़ल्ले़ कुसे़वारोबा लत्छा हिब्रु थाङ्बे़न्धिक् आन्छिगे़नु वये़, हे़क्क्याङ् आन्छिगे ने़प्माङ्ले़ से़प्माङ्ङिन् खे़न् चे़क्ते़छुगे़, हे़क्क्याङ् आन्छिगे ने़प्माङ्ले़न् से़प्माङ्ङिल्ले़ आबाङे वेॽ वेॽ कुबे हन्दु पिरे़त्छिगे़॥ 13 खे़ल्ले़ आक्तङ्बा कुबे हन्दुआङ् वये़, हे़क्तङ्बाए पोःक्खे़रो॥ आङ्गाॽ आबाङे आयाःम्बक्को याम्मो लासाङ्, कर खे़न् तुम् तःक् के़धोःक्पे़न्ग मे़भोःन्दुरो॥” 14 खे़ल्ले़चोगुल्ले़ फारोल्ले़ युसुफे़न् कुउःत्छे़ पाङ्घुसि, हे़क्क्याङ् खे़ङ्हाॽरे़ खिमो पुङ्लाहिम्मोलाम् मे़लःत्तु मे़भे़त्तु॥ खुने़ॽ कुम्धोॽ नु कुधे़गेक् नःक्खु, हे़क्क्याङ् चाङ् ले़क्सिङ्ङाङ् खुने़ॽ फारोःल्लो त्ये़॥ 15 फारोल्ले़ युसुफे़न् मे़त्तु, “आङ्गाॽ लत्छा से़प्माङ्धिक् माक्तुङ्, कर कॽयो आत्तिल्ले़आङ् खे़ल्ले़ कुबे हम्मा मे़न्छुक्तुन्॥ आङ्गाॽ खे़ने़ॽ के़याःम्बेओ खे़प्सुङ्, खे़ने़ॽ से़प्माङ् के़घे़प्सुआङ् खे़ल्ले़ कुबे हम्मा के़सुक्तुमु॥” 16 युसुफरे़ फारोन् मे़त्तु, “अक्तङ्बा साम्जिःक्क आङ्गाॽ मे़गत्तान्॥ कर निङ्वाॽफुमाङ्ङिल्ले़ के़से़प्माङ्ङिल्ले़ कुबे के़हन् के़बिःॽ॥” 17 खे़ब्याङ् फारोल्ले़ युसुफे़न् मे़त्तु, “आङ्गाॽ आसे़प्माङ्ङो निल यङ्घङ्ङिल्ले़ कुयाओ ये़बाङ्ज्याङ्बा माक्तुङ्॥ 18 निल यङ्घङ्ङोलाम् साॽरिक् वरिक्लिक्मा के़मे़ॽमा नुसि पिप्माहाॽ मे़लःन्दे़ मे़धाङे़, हे़क्क्याङ् फङ्दुङ् याःन् के़युङ्बा ते़न्नो चालाम्मा मे़हेःक्ते़॥ 19 खे़न् एगाङ् ये़प्पा नु होरिक्लक् के़बप्पा नुसि ये़ःङ्घिःक्खिःक्मा पिप्माहाॽरे़ तगिबा पिप्माहाॽ मे़दिम्दुसि हे़क्तङ्बा पिप्माहाॽ मिस्र लाजेॽओ आङ्गाॽ मे़न्निसिङ्ङे वयाङ्॥ 20 खे़न् नुसि ये़प्पा नु होरिक्लक् के़बप्मा ये़ःङ्घिःक्खिःक्मा पिप्माहाॽरे़ के़मे़ॽमा वरिक्लिक्मा नुसि पिप्माहाॽ मे़जमे़देसुसि॥ 21 कर खे़ङ्हाॽरे़ खे़न् नुसि पित्माहाॽ मे़जमे़देसुसिसाङ् खे़ङ्हाॽरे़ मे़जसि फाॽआङ् हाःत्ले़आङ् पाःप्मा मे़न्छुक्तुन्, थेआङ्भे़ल्ले़ खे़ङ्हाॽ आल्लसाङ् तगिबा हे़क्के ये़ःङ्घिःक्खिःक्माए मे़जोगे़॥ खे़ब्याङ् आङ्गाॽ निःत्छिङ्ङाङ् लःन्दाङ्॥ 22 “आङ्गाॽ निसिगेक्पा आसे़प्माङ्ङो कन्नाङ् माक्तुङ्—लत्छा कुबुङ्ङो कुजाॽ इस्सेःङ्बा नु पनुॽ के़नुॽबा नुसि चादाप्माहाॽ लिङ्से़॥ 23 याम्मो कुभिॽ इस्सेःङ्बा हे़क्क्याङ् नाम्गे़न् पिसाङ्लाम् के़बोःक्पा साम्मिःत्तिल्ले़ मुःत्तुआङ् इगे़ले़म्बा वेॽ नुसि चादाप्माहाॽ मे़गे़रे़॥ 24 खे़न् कुभिॽ इस्सेःङ्बा चादाप्माहाॽरे़ पनुॽ के़नुॽबा नुसि नुबा कुजाॽइ चादाप्माहाॽ मे़लरु मे़देसुसि॥ आङ्गाॽ कित्चाक्हाॽ कन् से़प्माङ्हाॽ चे़क्तुङ्सिङ् कर कल्ले़ कुबे हाःत्ले़आङ् मे़न्हन्दाङ्ङे़न् मे़म्बिराङ्ङे़न्॥” 25 खे़ब्याङ् युसुफरे़ फारोन् मे़त्तु, “फारोल्ले़ कुसे़प्माङ्हाॽ लत्छासिरो॥ निङ्वाॽफुमाङ्ङिल्ले़ चोःक्मा कोःत्तुआङ् के़वाॽबा याःम्बक्किन् निङ्वाॽफुमाङ्ङिल्ले़ फारोन् ओसेःन्धाक्तुबारो॥ 26 खे़न् वरिक्लिक्मा के़मे़ॽमा नुसि पिप्माहाॽ नुसि तङ्बे हे़क्क्याङ् कुजाॽइ नुसि नुबा चादाप्माहाॽ नुसि तङ्बेसिरो॥ से़प्माङ्ङिन् लत्छारो॥ 27 खे़ङ्हाॽरे़ खुन्छिॽ एगाङ् के़दाबा नुसि ये़प्पा नु होरिक्लक् के़बप्मा ये़ःङ्घिःक्खिःक्मा पिप्माहाॽ साक्वाल्ले़न् नुसि तङ्बेरो॥ हे़क्क्याङ् कुभिॽ इस्सेःङ्बा हे़क्क्याङ् नाम्गे़न् पिसाङ्लाम् के़बोःक्पा साम्मिःत्तिल्ले़ मुःत्तुबा नुसि चादाप्माहाॽआङ् साक्वाल्ले़न् नुसि तङ्बेरो॥ 28 “कङ्ग आङ्गाॽ खे़ने़ॽ मे़त्ने़बा हे़क्दङ्बारो—चोःक्मा कोःत्तुआङ् के़वाॽबा याःम्बक्किन् निङ्वाॽफुमाङ्ङिल्ले़ फारोन् ओसेःन्धाक्तुबारो॥ 29 के़रे़क् मिस्र लाजेॽओ तङ्बे नुसि थारिक् पोगुगे़न् कुजा नुरिक् थोक्, 30 कर खे़न् एगाङ् साक्किल्ले़न् नुसि तङ्बे ताःॽ, हे़क्क्याङ् के़रे़क् मिस्र लाजेॽओ खे़न् पोगुगे़न् कुजा के़नुॽबा तङ्बेःल्ले़ ये़म्मिन् निङ्वाॽ मुःन्लो॥ हे़क्क्याङ् साक् पोःक्काङ् लाजेन् थ्यःङ् पोङ्लो॥ 31 एगाङ् के़दाबा साक्किल्ले़ चोगुल्ले़ लाजेॽओ पोगुगे़न् कुजा पोगे़बान् निङ्वाॽसुम् मे़दाने़ल्लो, थेआङ्भे़ल्ले़ खे़न् साक्किन् साॽरिक् किप्मा के़घुबा पोङ्लो॥ 32 फारोल्ले़ निले़ङ् माक्तुबा कन् से़प्माङ्ङिल्ले़ग निङ्वाॽफुमाङ्ङिल्ले़ चोःक्मा निङ्वाॽ चोगुबान् तगि निङ्सेक् चोगुसुरुआङ् वाॽ के़लॽबा ओसेःन्धाङ् चोगुॽ, हे़क्क्याङ् खुने़ॽ हाराए चोगुरो॥ 33 “खे़ल्ले़चोगुल्ले़ आल्ल फारोल्ले़ लत्छा चाःप्पा नु सिक्कुम्साबा मनाधिक् सेगे़ॽआङ् मिस्र लाजेॽओ के़रे़क् युक् चोगुर फाॽआङ् मुरा मे़त्तुर॥ 34 पोगुगे़न् कुजा के़बप्पा नुसि तङ्बे थारिक् मिस्रओ के़बोःक्पा कुजाःल्ले़ कुलक् ङासिन् फोङ्मारे़ लागि लाजेॽओ याःम्बक् के़जोःक्पाहाॽ मुरा मे़मे़त्तुसिर॥ 35 खे़ङ्हाॽरे़ के़दाबा पोगुगे़न् कुजा के़बप्पा तङ्बेहाॽओ के़रे़क् कुजाहाॽ मे़भोःक्सुर, हे़क्क्याङ् ये़क्यक् थप्मे चामारे़ लागि फारोल्ले़ पाःत्तुबा कुइसिक् चाहाॽ मे़लुप्सुर हे़क्क्याङ् खे़न् मे़गोसुर॥ 36 “साक्किल्ले़ लाजेन् मे़मे़क्ने़ल्ल फाॽआङ् मिस्र लाजेॽओ के़दाबा के़ने़प्पा नुसि तङ्बेबा साक्को चामा फाॽआङ् लाजेःल्ले़ लागि चाहाॽ सुम्मा युङ्मा पोङ् हे़क्केलॽरिक् मिस्र लाजेन् साक्किल्ले़ मे़मे़क्ने़ल्ल॥” युसुफे़न् मिस्रबा सुहाङ्युक्पा पोङ्ॽ 37 कन् सुजान् फारोन् नु कुसुहाङ्गे़म्बा के़रे़क्ले़ खुन्छिॽ सिराॽथाङे़॥ 38 हे़क्क्याङ् फारोल्ले़ खे़ङ्हाॽ मे़त्तुसि, “कन् मनान् हे़क्तङ्बा निङ्वाॽफुमाङ्ङिल्ले़ कुयाम्साम् के़गप्पा वेॽ मना आनिॽ हात् खोमा आसुक्तुम्बे?” 39 खे़ब्याङ् फारोल्ले़ युसुफे़न् मे़त्तु, “थेआङ्भे़ल्ले़ निङ्वाॽफुमाङ्ङिल्ले़ के़रे़क् पाःन्हाॽ ओसेःन्गे़धाक्ते़आङ् वाॽ, खे़ने़ॽ हे़क्तङ्बा चाःप्पा नु सिक्कुम्साबा मना वेॽ हाःत्ताङ् होप्लो॥ 40 आङ्गाॽ आहिम्मो खे़ने़ॽए युक् चोगे़ॽ, हे़क्क्याङ् खे़ने़ॽ के़बाःत्तुबा हे़क्के के़रे़क् आङ्गाॽ आमनाहाॽरे़ मे़जोगुरो॥ हाङ्युक्नाःल्ले़ कुयाःम्बेओरक् आङ्गाॽ खे़ने़ॽनुःल्ले़ थो वाॽआ॥” मिस्रओ योसेफरे़ युक् चोगु 41 हे़क्क्याङ् फारोल्ले़ युसुफे़न् मे़त्तु, “ओमे़त्ते़ॽ, आङ्गाॽ मिस्र लाजेॽबा के़रे़क् युक्किन् खे़ने़ॽ पिने़आङ् वाॽ॥” 42 खे़ब्याङ् फारोल्ले़ कुएःप्साप् स्वागेःप्पिन् कुहुक्चोःत्लोलाम् फिःक्खुआङ् युसुफरे़ कुहुक्चोःत्लो वाःत्तु, हे़क्क्याङ् खे़न् पारान्ला चाङ्ङिन् चाक्तु, हे़क्क्याङ् खे़ल्ले़ कुसित्लाओ साम्म्याङ् सिक्रिःन् वाःत्तु॥ 43 खे़न् फारोल्ले़ आबाङे कुसिःक्तोबा निसिगेक्पा ताक्फाओबा सुहाङ्युक्पा हे़क्के अन्लाधाओ युक्खुआङ् लाङ्घेःक्सु॥ मनाहाॽ खुने़ॽ कुदगि “थुम्बोॽहजॽ युङे़म्मे़ॽआङ् साम्बोन् फन्छिङ्ङे़म्मे़ॽ” मे़बाःत्तुर मे़अःक्ते़र लाङ्मे़घेगे़॥ अक्खेलॽरिक् मिस्र लाजेॽओ के़रे़क् युक्किन् खुने़ॽ पिरु॥ 44 फारोल्ले़ याम्मोआङ् युसुफे़न् मे़त्तु, “आङ्गाॽ फारोआ, कर आङ्गाॽ कन् पाःत्तुङ् खे़ने़ॽ के़निङ्वाॽ इसिःक्काङ्धो वेॽ आत्तिन् मनाःल्ले़आङ् मिस्र लाजेॽओ थेआङ् चोःक्मा मे़घोसुल्लो॥” 45 फारोल्ले़ युसुफरे़ कुमिङ् सापनत-पानेह युक्खु, हे़क्क्याङ् खुने़ॽ खे़न् ओनबा निङ्वाॽफुसाम्बा पोतिपेराःल्ले़ कुस्सा मे़न्छुमा आसनते़न्नु ते़न्धाम् मेःक्खिम् मे़त्तु॥ खे़न् एगाङ् युसुफे़न् मिस्र लाजेॽ खाराक् लाम्दिक् चोःक्मा हेःक्ते़॥ 46 मिस्रबा हाङ् फारोल्ले़ कुहाङ् याःम्बक्को सेगे़ल्ले़ युसुफे़न् तङ्बे सुम्बोङ् के़रे़आङ् वये़॥ हे़क्क्याङ् युसुफे़न् फारोल्ले़ कुदगाङ्लाम् लःन्दे़आङ् मिस्र लाजेॽ खाराक् ताक्कन्दे़॥ 47 कुजा के़बप्पा नुसि तङ्बेहाॽओ आत्तातान्ने चा नुरे़॥ 48 युसुफरे़ कुजा के़बप्पा नुसि तङ्बे थारिक् मिस्रबा के़रे़क् चाहाॽ सुप्सु, हे़क्क्याङ् ये़क्यक् थप्मे चाहाॽ फुक्खुयुक्खु॥ खुने़ॽ के़रे़क् ये़क्यक्को खिरिबा प्याङ्सिओबा चाहाॽ सुप्सुयुक्खु॥ 49 युसुफरे़ वरःङ्ङोबा ये़ःङ्घा यारिक् चा सुप्सुयुक्खु, खे़न् यरिक् पोःक्खे़बाल्ले़ चोगुल्ले़ खुने़ॽ खे़न् खारात् साप्मा युङ्माआङ् ले़रुदेसु॥ 50 साक्के़ल्ले़ तङ्बेहाॽ तामानुःल्ले़ तगि ओनबा निङ्वाॽफुसाम्बाल्ले़ कुस्सा मे़न्छुमा आसनतलाम्बा युसुफरे़ ने़प्फु कुस्सा ये़म्बित्छा वये़सि॥ 51 तुम्बे़ल्ले़ कुमिङ् युसुफरे़ मनस्से वाःत्तु, हे़क्क्याङ् खुने़ॽ पाःत्तु, “निङ्वाॽफुमाङ्ङिल्ले़ आदुक्खेहाॽ नु आम्बारे़ कुहिम्मिल्ले़ निङ्वासुम्मिन् निङ्वाॽ मुःत्छुङ्ल याःन्दाङ्ङाङ् वाॽ॥” 52 वेॽसमाल्ले़ कुमिङ् खुने़ॽ एफ्राइम वाःत्तु हे़क्क्याङ् पाःत्तु, “निङ्वाॽफुमाङ्ङिल्ले़ आङ्गाॽ तुक्खे च्याङ्बा लाजेॽओ नुॽमा तामान् पिराङ्ङाङ् वाॽ॥” 53 मिस्रबा चा नुॽमा नुसि तङ्बेहाॽ ले़क्ते़॥ 54 खे़ब्याङ् युसुफरे़ पाःत्तुबा हे़क्केए साक्के़ल्ले़न् नुसि तङ्बेहाॽ तामा हेःक्ते़॥ के़रे़क् लाजेॽहाॽओ साक्वान् पोगे़, कर मिस्र खाराक् चा वये़॥ 55 के़रे़क् मिस्रओ साक्के़न् त्ये़ःल्ले़, यक्युङ्बाहाॽरे़ फारोन् चारे़ लागि पेलि मे़भाक्तु॥ फारोल्ले़ के़रे़क् मिस्रिहाॽ मे़त्तुसि, “युसुफरे़ओ पेगे़म्मे़ॽ, खुने़ॽ थे चोःक्मा के़बाङ्घिॽ खे़न्ने चोगाम्मे़ॽ॥” 56 के़रे़क् लाजेॽ खाराक् साक्के़न् त्ये़ःल्ले़, युसुफरे़ के़रे़क् चायुङ्मा ते़न्हाॽ हन्दुआङ् मिस्रबा मनाहाॽओ चा सङ्मा हेःक्तु, थेआङ्भे़ल्ले़ मिस्र खाराक् के़साक्पा साक् पोगे़आङ् वये़॥ 57 खे़ल्ले़चोगुल्ले़ के़रे़क् लाजेॽओबा मनाहाॽ मिस्रओ युसुफरो चा इङ्से़ मे़द्ये़॥ थेआङ्भे़ल्ले़ इक्सादिङ् खाम्बेक् खाराक् साॽरिक् यम्बा साक् पोगे़आङ् वये़॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.