तोलिङ्सोमु 39 - लिम्बुयुसुफे़न् नु पोतिफरे़ल्ले़ कुमेःत्तिन् 1 आल्ल युसुफे़न् मिस्र लाजेॽओ मे़देॽरु, फारो हाङ्ङिल्ले़ कुसुहाङ्युक्पा, थक्कम्ब्राङ् के़मे़प्पा थक्पेबा पोतिफर मे़प्मनाबा लत्छा मिस्रिधिक्ले़ खे़न् खे़ॽयो के़दाःप्पा इस्माइलिहाॽरे़ खुन्छिॽ हुक्कोलाम् इङु॥ 2 यहवे दाङ्बान् युसुफे़न्नु वये़, खे़ॽयो खुने़ॽ नुरे़दासे़॥ हे़क्क्याङ् खुने़ॽ मिस्रि कुन्दाङ्बाल्ले़ कुहिम्मो वये़॥ 3 खुने़ॽ कुन्दाङ्बाल्ले़ यहवे दाङ्बान् युसुफे़न्नु वाॽ के़लॽबान् निसु हे़क्क्याङ् यहवे दाङ्बे़ल्ले़ खुने़ॽ चोगुबा के़रे़क् याःम्बक्हाॽ कुलिङ्दो के़त्तु पिरु के़लॽबान् निङ्वाॽ खोसु॥ 4 खे़ल्ले़चोगुल्ले़ पोतिफरे़न् युसुफे़न्नु कुनिङ्वाॽ त्ये़आङ् के़रे़क् पाःन्हाॽ हुक्सुप्तुआङ् याःम्बक्हाॽ के़हिबा के़दङ्बा चोगु॥ 5 खुने़ॽ कुहिम्मोबा हे़क्क्याङ् कत्तुबा के़रे़क् पाःन्हाॽओ के़हिबा के़दङ्बा चोगुबा ये़म्माङ्धो यहवे दाङ्बाल्ले़ युसुफरे़ चोगुल्ले़ खे़न् मिस्रिःल्ले़ कुहिम्मो नु कुइक्ताप्पो हाङ्वामुॽइ थासु॥ यहवे दाङ्बे़ल्ले़ कुहाङ्वा मुॽइःन् कुहिम् कुधाःङ्ङो, इक्ताप्पोबा कुजा कुधिओ हे़क्क्याङ् के़रे़क् पाःन्हाॽओ थ्ये़आङ् वये़॥ 6 खे़ल्ले़चोगुल्ले़ खुने़ॽ कत्तुबा के़रे़क् पाःन्हाॽ युसुफरे़ कुहुक्को युक्खु पिरु॥ खुने़ॽ कुजामा कुधुङ्माआङ्धो खुने़ॽ कत्तुबा आत्तिन् पाःन्निन्नाङ् यार मे़जोगुन्॥ युसुफे़न् कुइत् के़दाबा नु नुबासुक्पा चोगे़॥ 7 कुभा ये़म् एगाङ् खुने़ॽ कुन्दाङ्बाल्ले़ कुहिम्सामाल्ले़ युसुफे़न् कुसिराॽ थाङे़आङ् अक्खे मे़त्तु, “आङ्गाॽनु इप्से़ॽ॥” 8 कर खुने़ॽ मे़दे़न्दे़न्नाङ् कुन्दाङ्बाल्ले़ कुहिम्सामे़न् मे़त्तु, “ओमे़त्ते़ॽ, आङ्गाॽ कन् हिम्मो वाॽआबाल्ले़ चोगुल्ले़ आन्दाङ्बान् आत्तिन् पाःन्नोआङ् निङ्साङ् मे़जोक्ने़न्, हे़क्क्याङ् खुने़ॽ कत्तुबा के़रे़क् पाःन्हाॽ आहुक्को पिराङ्ङाङ् वाॽ॥ 9 कन् हिम्मो आङ्गाॽनुःल्ले़ यम्बा हाःत्ताङ् होप्॥ खुने़ॽ के़रे़क् पाःन्हाॽ आङ्गाॽ पिराङ्ङाङ् वा, कर खे़ने़ॽग मेःन्, थेआङ्भे़ल्ले़ खे़ने़ॽग आन्दाङ्बाल्ले़ कुमेःत्ने़रो॥ खे़बे़ल्ले़ आक्खेलॽरिक् निङ्वाॽफुमाङ्ङिल्ले़ कुदक्ले़ङ्वाओ अक्तङ्बा ताप्फे़ःम्बा लायो चोगुङ्बाबे?” 10 हे़क्केसाङ् खे़न् मे़न्छुमाःल्ले़ थिक्याःन्धक् आन्छिॽ इम्सि मे़त्तुसाङ् युसुफे़न् इम्मा इग्र वाॽमा मे़दे़न्दे़न्॥ 11 थिक्यान् युसुफे़न् हिम्सिगाङ् कुयाःम्बक् चोःक्से़ लासे़आङ् यागे़॥ हिम्मो याःम्बक् के़जोःक्पा वेॽ से़वारोबाहाॽ हाःत्ताङ् मे़होःप्ते़॥ 12 खे़ल्ले़ युसुफरे़ कुलगेःत्तिन् ते़म्सुआङ् मे़त्तु, “फे़रे़ॽ आङ्गाॽनु इप्से़ॽ॥” कर युसुफे़न् हिम्मोलाम् लाःक्कात् खे़त्छिङ् लःन्दे़ खुने़ॽ कुलगेःत्तिन् खे़ल्ले़ कुहुक्कोए ले़रुध॥ 13 युसुफरे़ कुलगेःत्तिन् खे़ल्ले़ कुहुक्कोए ले़रुधआङ् हिम्मोलाम् खे़त्छिङ् लःन्दे़बा निसुआङ्, 14 खे़ल्ले़ कुहिम्मोबा से़वारोबाहाॽ उःत्तुसिआङ् मे़त्तुसि, “ओमे़त्ते़म्मे़ॽ, आङ्गाॽ आहिम्दाङ्बे़ल्ले़ तारुबा हिब्रुःङ्ग आनिॽ साम्मिक् थासे़ने त्ये़बारछ॥ खे़न् आङ्गाॽनु इम्से़ सिगाङ् लासे़भे़रे़, हे़क्क्याङ् आङ्गाॽ अःक्ताङ् फिःक्ताङ्॥ 15 आङ्गाॽ अःक्ताङ् फिःक्ताङ्बा खे़प्सुआङ् खे़ल्ले़ कुलगेःत्तिन् आङ्गाॽओए ले़रुधआङ् खे़त्छिङ्, हे़क्क्याङ् हिम्मोलाम् लाःक्कात् ह्याप् लःन्दे़बे॥” 16 खे़ल्ले़ कुये़म्बाःन् हिम्मो मे़न्दाए थारिक् खुने़ॽ खे़न् लगेःत्तिन् हाबा कत्तुआङ् युङे़॥ 17 हे़क्क्याङ् कुये़म्बाःन् त्ये़आङ् खे़ल्ले़ अक्खे मे़त्तुर आम्भा खे़न् पाःन्निन् चे़क्तु, “आनिॽओ के़दारुबा हिब्रु से़वारोबान् आङ्गाॽ आउःङ्से़ कॽयो सिगाङ् लासे़॥ 18 कर आङ्गाॽ अःक्ताङ् फिःक्ताङ्नुमे़ःन्ने खे़ल्ले़ कुलगेःत्तिन् आङ्गाॽओ ले़रुधआङ् हिम्मोलाम् खे़त्छिङ्ङाङ् पेगे़॥” 19 “खे़ने़ॽ के़से़वारोबाल्ले़ आङ्गाॽ अक्खेलॽरिक् मे़त्ताङ्” के़लॽबा पाःन्निन् युसुफरे़ कुन्दाङ्बे़ल्ले़ आबाङे कुमेःत्लाम्बा खे़प्सु खे़ब्याङ् कुसाक्के़न्निल्ले़ खुने़ॽ मि पोःक्खे़॥ 20 खे़ल्ले़ युसुफे़न् हाङ्ङिल्ले़ कुमना मे़साक्तुसिबा पुङ्लाहिम्मो तेॽरुआङ् यो चिसाक् साक्तु॥ हे़क्केलॽरिक् युसुफे़न् पुङ्लाहिम्मो साक्पा थ्ये़॥ 21 कर यहवे दाङ्बान् युसुफे़न्नु वये़, हे़क्क्याङ् खुने़ॽ खे़न् कुलुङ्माॽ स्याःत् लॽरे़, हे़क्क्याङ् खे़न् पुङ्लाहिम् ओगे़मप्पा सुहाङ्गे़म्बाल्ले़ खुने़ॽ नुरिक् मे़त्तुर याःन्दु॥ 22 खे़ल्ले़चोगुल्ले़ पुङ्लाहिम्मोबा सुहाङ्गे़म्बाल्ले़ खे़न् पुङ्लाहिम्मो के़याक्पा के़रे़क् पुङ्लाथाबाहाॽ युसुफे़न् ओमे़प्मा पाङ्घु॥ खे़प्मो च्याज्या पोःक्खे़साङ् खे़ङ्हाॽ के़रे़क् युसुफरे़ पाःत्तुबा हे़क्केए पोङ्मा के़बोङ्बा वये़॥ 23 युसुफरे़ ओमे़प्मा के़बोङ्बा आत्तिन् पाःन्नोआङ् पुङ्लाहिम् ओगे़मप्पा सुहाङ्गे़म्बाल्ले़ ओमे़प्माए चाहाब् मे़जोगे़न्, थेआङ्भे़ल्ले़ यहवे दाङ्बान् युसुफे़न्नु वये़॥ युसुफे़ल्ले़ थे चोगुसाङ् यहवे दाङ्बाल्ले़ खुने़ॽ कुलिङ्दो के़त्तुबिरुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.