तोलिङ्सोमु 23 - लिम्बुसारान् मासिङ्ॽ 1 सारान् किप् थिक्काङ् निबोङ् नुसि तङ्बे थारिक् हिङे़॥ 2 सारान् कनान लाजेॽबा किर्यत-अर्बाओ स्ये़ (खे़न् ते़न्निन् हे़ब्रोःन्नाङ् मे़मे़त्तुॽ)॥ हे़क्क्याङ् अब्राहाम्मे़ल्ले़ सारान् मे़रिङ् थक्तु हे़क्क्याङ् हाःप्तु॥ 3 खे़ब्याङ् अब्राहाम्मे़न् के़सिमा मे़ल्लिङ्गे़न् कुमेःत्तिल्ले़ कुबेसाङ्लाम् पोगे़आङ् ये़म्सिङ्, हे़क्क्याङ् हित्तिहाॽ मे़त्तुसि, 4 “खिनिॽ लुम्मो आङ्गाॽ लत्छा वे़प्मिबाआ हे़क्क्याङ् वेॽ लाजेॽओबाआ॥ के़सिमा मे़ल्लिङ्गे़न् आमेःत्तिल्ले़ कुजेन् लुप्मारे़ लागि कॽयो लाजेॽधिक् इङ्मा आङ्गाॽ याप्मि आबिरे़ॽ, हे़क्केलॽरिक् के़सिमा आहिम्सामे़न् आङ्गाॽ खे़प्मो नुरिक्काङ् लुप्मा सुक्तुङ्ल॥” 5 हित्तिहाॽरे़ अब्राहाम्मिन् नोगप् मे़बिरु, 6 “आदाङ्बे, आघे़प्से़ॽओ॥ खे़ने़ॽग आनिगे लुम्मो मुक्के़गुबा हाङ्साने़रो, आनिगे इःप्पुङ्हाॽओ के़सेःक्सेःक्पा सेगे़ॽआङ् के़सिमा मे़ल्लिङ्गे़न् के़मेःत्तिन् खे़प्मो लुप्ते़ॽओ॥ आनिगे आत्तिल्ले़आङ् खुन्छिॽ इपुङ्ङो खे़ने़ॽ के़मेःत्तिल्ले़ कुसिवे़त् कुधक्किन् मे़ल्लुप्पे़ॽ मे़मे़त्तासिगे़ल्लो॥” 7 खे़ब्याङ् अब्राहाम्मे़न् पोगे़आङ् खे़ङ् लाजेॽबा मना हित्तिहाॽ से़वा मे़त्तुसि॥ 8 खुने़ॽ खे़ङ्हाॽ अक्खे मे़त्तुसि, “आमेःत्तिल्ले़ कुसिवे़त् कुधक्किन् कप्मो लुप्मा याप्मि फाःक्मा खिनिॽ निङ्वाॽ वाॽने़ फाग्र, आङ्गाॽ याप्मि आघे़प्से़ॽओ, हे़क्क्याङ् सोहोरले़ कुस्सा एप्रोःन्ने़न् आङ्गाॽ आलागि पेलि आभाक्ते़ आबिरे़ॽओ॥ 9 खुने़ॽ आबाङे कुलाजेॽ मक्पेलाबा फुक्कुन् आङ्गाॽ इङ्मा पिआर, खे़न् कुब्याङ्सिःल्ले़ कुयाओ ने़ःॽ॥ के़रे़क्ले़ खिनिॽ तगाङ् खे़न् ते़न्निन् के़बुॽबा कुमे़न्नो लत्छा इःप्पुङ्ले़ लागि आङ्गाॽ पिआर॥” 10 खे़न् ये़म्मो एप्रोःन्ने़न् हित्तिहाॽरे़ खुनिॽ लुम्मोए युङे़गरे़॥ हे़क्क्याङ् कुये़क्यक्किल्ले़ लाम्धेःप्पो तगाङ् के़जुम्बा के़रे़क् हित्तिहाॽरे़ मे़घे़प्सुर एप्रोःन्ने़ल्ले़ अब्राहाम्मे़न् नोगप् पिरु, 11 “मेःन्लो आदाङ्बे, आबाःन्निन् खे़प्से़ॽओ॥ आङ्गाॽ खे़न् प्याङ्सिन् नु खे़प्मो के़ने़बा फुक्कुन्नाङ् पिने़॥ आमनाहाॽरे़ खुन्छिॽ तगाङ्ङे आङ्गाॽ खे़न् पिने़॥ खे़ने़ॽ खे़प्मोए के़सिमा के़हिम्सामे़न् लुप्ते़ॽओ॥” 12 खे़ब्याङ् अब्राहाम्मिल्ले़ याम्मो खे़न् लाजेॽओबा मनाहाॽ अःक्खुम् फन्छिङ्ङाङ् से़वा मे़त्तुसि॥ 13 हे़क्क्याङ् खे़प्मोबा के़रे़क् मनाहाॽरे़ मे़घे़प्सुर खुने़ॽ एप्रोःन्ने़न् मे़त्तु, “खे़प्से़ॽ, आङ्गाॽ खे़न् प्याङ्सिःल्ले़ के़बुॽबा कुमे़न् पिने़रो॥ खे़न् खे़ने़ॽ ताःक्ते़ॽओ हे़क्क्याङ् खे़प्मो के़सिमा आहिम्सामे़न् लुप्मा खोसुङ्लरो॥” 14 एप्रोने़ल्ले़ अब्राहाम्मे़न् मे़त्तु, 15 “आदाङ्बे, आबाःन्निन् खे़प्से़ॽओ॥ प्याङ्सिःल्ले़ कुमे़न्ने़ङ्ग किप् लिसि युप्पायाङ्लो, कर आन्छिॽ लुम्मो खे़न् याङ्ङिन् थेसिक्काङ्निबे? के़सिमाल्ले़ कुधक्किन् खे़ॽयो लुप्ते़ॽओ॥” 16 एप्रोने़ल्ले़ पाःत्तुबा पाःन्नो हित्तिहाॽरे़ खुन्छिॽ तगि अब्राहाम्मे़न् ते़न्दे़आङ् खे़न् ये़म्मो सामापुमा के़इङ्बा के़सङ्बा ले़ङ्हङ्बाहाॽरे़ मे़याङुबा इसिःक् पासाङ्गाओ किप् लिसि युप्पायाङ् थाङ्सुआङ् खुने़ॽ पिरु॥ 17 अक्खेलॽरिक् मक्पेलाओ के़ने़बा मम्रे कुबेसाङ्बा एप्रोने़ल्ले़ कुब्याङ्सिन् नु खे़प्मो के़ने़बा फुक्कुन् हे़क्क्याङ् सिङ्बुङ्हाॽआङ् हाॽयाक् 18 ये़क्यक्कोबा लाम्धेःप्पो के़जुम्बा के़रे़क् हित्तिहाॽरे़ खुन्छिॽ तगाङ् एप्रोने़ल्ले़ अब्राहाम्मिन् कुयुक्को पिरु॥ 19 खे़न् एगाङ् अब्राहाम्मिल्ले़ कुमेत् सारान् कनान लाजेॽओ के़ने़बा मम्रे (हेब्रोन) कुबेसाङ्बा मक्पेला प्याङ्सिओबा फुक्कुओ लुप्तु॥ 20 अक्खेलॽरिक् खे़न् प्याङ्सिन् नु खे़प्मोबा फुक्कुन् हित्तिहाॽरोलाम् इःप्पुङ्दे़न्ले़ लागि अब्राहाम्मिल्ले़ कुलाजेॽ सिङ्बुङ् पोःक्खे़र मे़जोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.