तोलिङ्सोमु 19 - लिम्बुसदोम नु गमोरा ये़क्यक्हाॽ खाप्पुथ्यःङ् पोङ् 1 खे़न् ने़प्फु माङ्लाइङ्बाहाॽ युःन्छिक् सदोम ये़क्यक्को के़रे़त्छि॥ खे़न् ये़म्मो लुते़न् सदोम ये़क्यक्को लाःप्मा यम्बा लाम्धेःप्पो युङे़ज्ये़॥ खे़ङ्हाॽ निसुसिआङ् लुते़न् खुन्छिॽ तुम्से़ पोगे़, हे़क्क्याङ् खाम्मो थारिक् साम्बोन् फन्छिङ्, हे़क्क्याङ् से़वा मे़त्तुसिर अक्खे मे़त्तुसि, 2 “आदाङ्बासे, खिन्छिॽ चुङ्जिगे़न् से़वारोबाल्ले़ कुहिम्मो फे़रे़छे़ॽआङ् आइन् से़न्दिक् खे़प्मोए याःक्ते़छे़ॽ॥ खिन्छिॽ लाङ्हुक् वाहप्ते़छे़ॽ हे़क्क्याङ् तानाम्सा पोगे़त्छे़आङ् पेगे़त्छे़॥” खे़ङ्हाॽरे़ मे़त्ते़छु, “मेःन्, आन्छिगे से़न्दिक् लाःक्कात् लक्खुम्मोए इम्सिगे़॥” 3 कर खे़ल्ले़ साॽरिक् पेलि फाक्तुसि॥ खे़ल्ले़चोगुल्ले़ खे़ङ्हाॽ खुने़ॽनु कुहिम्मो पेसि॥ खे़ल्ले़ खे़ङ्हाॽ चामा थुङ्मा पिरुसि, हे़क्क्याङ् खरे़ःङ् के़भःङ्बा सिदाॽ मे़न्याक्केबा खरे़ःङ् ले़ःक्सु पिरुसि, हे़क्क्याङ् खे़ङ्हाॽरे़ चे़त्छु॥ 4 खे़ङ्हाॽ इम्मानुःल्ले़ तगि सदोम ये़क्यक्कोबा काक् पिसाङ्बा थाङ्बे़न् कुत्छिङ् काप्पोबा के़रे़क् मे़द्ये़आङ् लुतरे़ कुहिम्मिन् कब्रिङ् मे़गबु॥ 5 खे़ङ्हाॽरे़ लुते़न् मे़उःत्तुआङ् मे़मे़त्तु, “युःन्छिक् खे़ने़ॽओ के़दाबा मनाहाॽ आत्ति वाॽसि? खे़ङ्हाॽ लाःक्कात् आनिगे तगि लःत्ते़से़ॽ, हे़क्क्याङ् आनिगे खे़ङ्हाॽनु इप्सिगे़॥” 6 लुते़न् खे़ङ्हाॽरे़ खुन्छिॽ तुम्से़ लाम्धेःत् लाःक्कात् लःन्दे़, हे़क्क्याङ् लाम्धेःत्तिन् कुएगाङ्लाम् सुबु, 7 हे़क्क्याङ् खे़ङ्हाॽ मे़त्तुसि, “तेःङ्जुम्से, आङ्गाॽ पेलि फाक्निङ्, अक्तङ्बा ताप्फे़ःम्बा याःम्बक् मे़जोगे़म्मिन्ने़ॽ॥ 8 आत्तिन् ये़म्बित्छाःन्नुआङ् सोरिक् मे़न्इम्मे के़वाॽमा आस्सा मे़न्छुमा ने़त्छि वासिॽ॥ आङ्गाॽ खे़ङ्हाॽ खिनिॽलुम्मो लाःक्कात् लःत्तुङ् फे़त्तुङ्सिङ्॥ खिनिॽ खे़ङ्हाॽ थे मे़प्मासि निङ्वाॽ वाॽ, हे़क्केए चोगे़म्सिम्मे़ॽ॥ कर कन् मनाहाॽ थेआङ् मे़मे़त्ते़म्सिम्मे़न्ने़ॽ, थेआङ्भे़ल्ले़ खे़ङ्हाॽ आङ्गाॽ आहिम्मो के़दाबा तरेबासि, आल्लो खे़ङ्हाॽ आगम्ब्राङ्ङो वाॽसिरो॥” 9 कर खे़ङ्हाॽरे़ मे़मे़त्तु, “एगाङ् पेगे़ॽ॥” खे़ङ्हाॽरे़ याम्मो मे़मे़त्तु, “आनिॽनु युङ्से़ के़दाबा कन् मनान् आल्ल आनिॽ खासे़न् के़लोःम्बा पोङ्मा निङ्वाॽ चोगुॽ॥ आल्ल आनिगे खे़ङ्हाॽनुःल्ले़ खे़ने़ॽ ताप्फे़ःल्लिक् मे़त्तासिगे़॥” खे़ब्याङ् खे़ङ्हाॽरे़ लुते़न् चिजन् चिजन् मे़जन्दु हे़क्क्याङ् लाम्धेःत्तिन् यन्छे़ लाम्मे़लोसिङ्॥ 10 कर खे़न् ने़प्फु मनाहाॽरे़ खुन्छिॽ हुक्किन् सन्छे़छुआङ् लुते़न् खुन्छिॽओ हिम्सिगाङ् केःत्ते़छु हे़क्क्याङ् लाम्धेःत्तिन् चिए़त् ए़त्ते़सु॥ 11 हे़क्क्याङ् खे़ङ्हाॽरे़ हिम् लाःक्कात् के़वाॽबा थाङ्बे़न् नु काप्पोबा के़रे़क् मिक्फःम्बा मे़बोःक्खे़र चोगे़छुसि॥ खे़ल्ले़चोगुल्ले़ खे़ङ्हाॽरे़ लाम्धेःत्तिन् खोमा मे़न्छुक्तुन्॥ लुतरे़ सदोम ये़क्यक्किन् ले़रुधआङ् पेबा 12 खे़ङ् ने़त्छि मनाहाॽरे़ लुते़न् मे़त्ते़छु, “खे़ने़ॽनु कप्मो वेॽ मना मे़वाॽबि? के़म्बाङ्लुमिहाॽ, के़स्सा ये़म्बित्छाहाॽ, मे़न्छुमाहाॽ इग्र ये़क्यक्को के़मना मे़वाॽने़ फाग्र खे़ङ्हाॽ कन् ते़न्नोलाम् लःत्ते़ तेॽरे़से़ॽआङ् लःन्दे़म् पेगे़म्मे़ॽ॥ 13 थेआङ्भे़ल्ले़ कन् ते़न्निन् आन्छिगे खाप्पुथ्यःङ् चोःक्मा चोःक्सुगे़, कङ् मनाहाॽरे़ मे़जोगुबा ताप्फे़ःम्बा याःम्बक्किल्ले़ इक्लान् यहवे दाङ्बाल्ले़ कुदगि साॽरिक् पोरे़थाङे़आङ् वाॽ, हे़क्क्याङ् कङ् ये़क्यक्किन् खाप्पुथ्यःङ् चोःक्से़ यहवे दाङ्बाल्ले़ आन्छिगे पाङ्घे़छिगे़आङ् वाॽसिगे़॥” 14 खे़ल्ले़चोगुल्ले़ लुतरे़ कुस्सा मे़न्छ्याहाॽनु मेःक्खिम् चोःक्मा फाॽआङ् खुन्छिॽ नाःक्से़ के़दाबा कुम्बाङ्लुमिहाॽओ पेआङ् खुने़ॽ मे़त्तुसि, “खिन्छिॽ कन् ते़न्नोलाम् हारा पोगे़त्छे़ॽ, थेआङ्भे़ल्ले़ यहवे दाङ्बाल्ले़ कन् ये़क्यक्किन् खा मे़ङ्मा इःत्तु॥” कर कुम्बाङ्लुमिॽहाॽरे़ग खुने़ॽ हने़ वरे़ॽ पाःत् फाॽआङ् इःत्ते़छु॥ 15 हे़क्क्याङ् खाओःत्ते़र पत्छे़ल्ले़ खे़न् माङ्लाइङ्बाहाॽरे़ लुते़न् अक्खे मे़त्ते़छु, “हारा, के़मेःत्तिन् नु कप्मो के़वाॽमा ने़प्फु के़स्सा मे़न्छुमाहाॽ याङ्सिङे़ॽआङ् लःन्दे़ पेगे़ॽ, मेःन्ने़फाग्र कन् ये़क्यक्किल्ले़ तुमुबा खासे़न्नो के़धाआङ् खे़ने़ॽआङ् के़मे़क्लो॥” 16 हे़क्केलॽरिक् लुते़न् ए़ल्ले़ङ्भे़ल्ले़ङ् नाम्देसिङ्ङाङ् यागे़ल्ले़, खे़न् ने़त्छि मनाहाॽरे़ खे़ल्ले़ कुहुक्किन् हे़क्क्याङ् खे़ल्ले़ कुमेःत्तिल्ले़ कुहुक्किन् हे़क्क्याङ् ने़प्मजाङ् कुस्साहाॽरे़ खुन्छिॽ हुक्हाॽ ते़म्से़छुआङ् ये़क्यक् लाःक्कात् लःत्ते़छुसि॥ यहवे दाङ्बाल्ले़ खे़ङ्हाॽ कुलुङ्माॽ स्याःत् मे़लॽरे़बाल्ले़ चोगुल्ले़ खुने़ॽ अक्खे चोगुबारो॥ 17 खे़ङ्हाॽ लाःक्कात् लःत्ते़छुसिनुमेःन्ने खे़ङ्हाॽ थिक्पारे़ मे़त्तुसि, “आबाङे थक् से़ःप्मारे़ लागि खे़त्छिङे़म्मे़ॽ, एगाङ् ओमे़मये़म्मिन्ने़ॽ, हे़क्क्याङ् ने़ने़बा ते़म्बेॽओ मे़याःक्ते़म्मिन्ने़ॽ, कर कोःक्मा फाङ्जङ् थे़गु माङ्वा ले़प्माङ् खे़त्छिङे़म्मे़ॽ, मेःन्ने़फाग्र खिनिॽ थाप्पु थ्यःङ् के़बोःक्सिरो!” 18 कर लुते़ल्ले़ खे़ङ्हाॽ मे़त्तुसि, “आदाङ्बासे, हे़क्के मेःन्लो॥ 19 ओमे़त्ते़छे़ॽओ, आङ्गाॽ खे़न्छिॽ से़वारोबान् याप्मि सिराॽगे़धाङे़आङ् वाॽ, हे़क्क्याङ् आङ्गाॽ आहिङ्मन्निन् के़से़ःप्ते़छु॥ आङ्गाॽ कोःक्माहाॽ ले़क्खाङ् खे़त्छिङ्मा मे़सुक्कान्, आङ्गाॽ खे़त्थो के़प्मानुःल्ले़ तगिए कन् के़साक्पा ये़त्तुक्खेओ थाएआङ् आङ्गाॽ हदॽ सिआरो॥ 20 खा, कॽयो पाङ्भेॽधिक् ने़ःॽ खे़प्मो खे़त्छिङ्मा पेःक्मा निःत्ताङ् चोक्, हे़क्क्याङ् खे़न् चुःक्पाआङ् चोक् मेःम्बि? आङ्गाॽ खे़प्मो खे़त्छिङ्मा पेःक्मा खोआर॥ से़क्खासाङ् खे़प्मो पेःक्काल्ले़ आङ्गाॽ आहिङ्मन्निन् ताङ्से़ःप्पिला॥” 21 माङ्लाइङ्बाल्ले़ खुने़ॽ मे़त्तु, “ओमे़त्ते़ॽ, कन् पाःन्नो आङ्गाॽ के़बेलिन् खे़प्सुङ्॥ खे़ने़ॽ के़बाःत्तुबा पाङ्भेःन् आङ्गाॽ खाप्पुथ्यःङ् मे़जोःक्कान्लो॥ 22 चात्ते़ॽर हाबा खे़प्मोए खे़त्छिङ् पेगे़ॽ, थेआङ्भे़ल्ले़ खे़ने़ॽ खे़प्मो मे़ङ्गे़त्ते थारिक् आङ्गाॽ थेआङ् चोःक्मा मे़सुक्कान्॥” (खे़ल्ले़चोगुल्ले़ खे़न् ये़क्यक्किल्ले़ कुमिङ् सोअर मे़मे़त्तु॥) सदोम नु गमोरा ये़क्यक्किन् खाप्पुथ्यःङ् पोःक्खे़बा 23 लुते़न् सोअर ये़क्यक्को के़रे़ल्ले़ खे़प्मो नाम् के़रे़ चुरे़आङ् वये़॥ 24 खे़ब्याङ् वहवे दाङ्बाल्ले़ ताङ्साक्पोलाम् सदोम नु गमोरा ये़क्यक्को के़दिःप्पा कान्धाक् नु मिधुङ्दिङ् मिराःक् मक्थासु॥ 25 अक्खेलॽरिक् खुने़ॽ खे़न् ये़क्यक्हाॽ हे़क्क्याङ् के़रे़क् ने़ने़बा ते़म्बेॽहाॽ नु ये़क्यक्को के़युङ्बा के़रे़क् मनाहाॽ खे़ब्याङ् खाम्मो के़लिङ्बा के़रे़क् थाबु सिङ्लाहाॽ खाप्पुथ्यःङ् मे़क्खुरो॥ 26 कर लुते़ल्ले़ कुमेःत्ते़न् एगाङ् हिसिङ्ङाङ् ओमये़, हे़क्क्याङ् खे़न् युम् सित्लाङ् पोःक्खे़घे़रे़॥ 27 कुदाःन्दिक्समा तानाम् खाओःत्ते़नुमे़ःन्ने अब्राहाम्मिन् पोगे़आङ् यहवे दाङ्बाल्ले़ कुदगि खुने़ॽ तगि ये़बे़बा ते़न्नो नुःक्से़ पेगे़॥ 28 खुने़ॽ यो सदोम नु गमोराबा ने़ने़बा ते़म्बेॽहाॽ के़रे़क् अक्खे ओमे़त्तु॥ हे़क्क्याङ् खे़न् ते़न्नोबा मिःक्खुॽइन् यम्बा मि हाःम्नाबा ते़न्नोलाम् के़लःम्बा मिःक्खुॽ कुइसिक् हाःङ्गु हाःङ्गु पोगे़र पत्छे़बा निसु॥ 29 कर निङ्वाॽफुमाङ्ङिल्ले़ ने़ने़बा ते़म्बेॽओबा ये़क्यक्हाॽ मे़क्खुल्ले़ खुने़ॽ अब्राहाम्मिन् निङ्वाॽ इःत्तु॥ लुते़न् युङे़बा ये़क्यक्किन् खुने़ॽ खाप्पुथ्यःङ् चोगुल्ले़ मे़क्मा सिमालाम् लुते़न् से़ःप्तु लःत्तु॥ मोआबिहाॽ नु अम्मोनिहाॽरे़ खुन्छिॽ थाःक्थे़बाहाॽ 30 लुते़न् सोअरलाम् लःन्दे़ हे़क्क्याङ् कोःक्माओ पेआङ् खुने़ॽ नु ने़प्माङ् कुस्सा मे़न्छुमाहाॽ लत्छा फुक्कुओ युङ्मा मे़हेःक्ते़, थेआङ्भे़ल्ले़ सोअर पाङ्जुम्मो खुने़ॽ युङ्मा किसे़॥ 31 खुने़ॽ कुस्सा ने़त्छिओ थिक्ये़न् तुम्माल्ले़ कुन्साॽइन् मे़त्तु, “आन्छिॽ पाप्पाॽआङ् काप्पोबा तुम्से़, कन् इक्सादिङ् खाम्बेःक्मो आन्छिॽनु मेःक्खिम् के़जोःक्पा ये़म्बित्छा हाःत्ताङ् होप्॥ 32 खे़ल्ले़चोगुल्ले़ आल्ल पाप्पाॽ थि थुङ्सुआङ् मसु हे़क्क्याङ् खुने़ॽनु इम्सि हे़क्क्याङ् आन्छिॽ पा लाम् सा कत्छु॥” 33 बा खे़न् से़न्दिक् खे़ङ्हाॽरे़ खुन्छिॽ पान् थि थुङ्से़त्छु, हे़क्क्याङ् तुम्मे़न् कुम्बारो पेआङ् इप्से़॥ खे़न् इम्से़ फे़रे़बा नु पोगे़आङ् पेबा लुते़ल्ले़ थेआङ् निङ्वाॽ मे़घोसुन्॥ 34 हे़क्क्याङ् कुदाःन्दिक् तुम्मे़ल्ले़ कुन्साॽइन् मे़त्तु, “मिःप्मा से़न्दिक् आङ्गाॽ पाप्पाॽनु इप्साङ्॥ आइन् से़न्दिक्काङ् पाप्पाॽ थि थुङ्सुआङ् मसु हे़क्क्याङ् खे़ने़ॽ खुने़ॽनु इप्से़ॽ, हे़क्क्याङ् आन्छिॽ पाप्पाॽरे़ कुलागि सा कत्छुरो॥” 35 हे़क्केलॽरिक् खे़ङ्हाॽरे़ खे़न् से़न्दिक्काङ् खुन्छि पान् थि थुङ्से़त्छु हे़क्क्याङ् फोॽमान् पेआङ् खुने़ॽनु इप्से़॥ याम्मो खे़न् इम्से़ फे़रे़बा नु पोगे़आङ् पेबान् लुतरे़ थेआङ् मे़निसुन्॥ 36 अक्खेलॽरिक् लुते़ल्ले़ ने़प्माङ् कुस्साहाॽ खुन्छिॽ आबाङे पालाम्बा मे़न्छुक्मा पोःक्खे़छि॥ 37 खम्ब्याङ् तुम्मे़ल्ले़ ये़म्बित्छा साधिक् कत्तु, हे़क्क्याङ् खे़ल्ले़ खे़न् मोआब मिङ् वाःत्तु, अक्खेःल्ले़बा मोआबिहाॽरे़ खुन्छिॽ थाःक्थे़बा खुने़ॽएरो॥ 38 फोॽमे़ल्ले़आङ् ये़म्बित्छा साधिक् कत्तु, हे़क्क्याङ् खुने़ॽ खे़न् अङे़ःक्वाःल्ले़ कुमिङ् बेन-अमि वाःत्तु॥ अक्खेःल्ले़बा अम्मोनिहाॽरे़ खुन्छिॽ थाःक्थे़बा खुने़ॽएरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.