तोलिङ्सोमु 15 - लिम्बुनिङ्वाॽफुमाङ्ङिल्ले़ अब्राम्मिन्नु चोगुबा माङ्हुप् 1 खे़न् एगाङ्, सुफोओ यहवे दाङ्बाल्ले़ कुबाःन्जाःक्के़न् अब्राम्मिल्लो त्ये़, “अब्राम्मे, खे़ने़ॽ मे़गिसे़न्ने़ॽओ, खे़ने़ॽ के़घो आङ्गाॽआरो, हे़क्क्याङ् आङ्गाॽ चाॽरिक् यम्बा हाङ्से़म्मिन् पिने़रो॥” 2 कर अब्राम्मिल्ले़ मे़त्तु, “यहवे दाङ्बा निङ्वाॽफुमाङ्ङे, खे़ने़ॽ थे के़बिआयाङ्ग? थेआङ्भे़ल्ले़ आङ्गाॽग आल्ल थारिक् सा मेःन्ने वाॽआ, आहिम् आधाङ् के़दक्पा के़जाबाग दमस्कसबा एलिएजरे़न् पोङ्लो॥” 3 अब्राम्मिल्ले़ याम्मो मे़त्तु, “खे़ने़ॽ सा मे़म्बिए के़गत्ता, खे़ल्ले़चोगुल्ले़ आहिम्मो के़वाॽबा आसेवारोबान्ने आहिम् आधाःङ् के़दक्पा के़जाबा पोङ्लो॥” 4 खे़ब्याङ् यहवे दाङ्बे़ल्ले़ कुबाःन्जाःक्के़न् खुने़ॽओ त्ये़, “कन् मनान् के़हिम् के़धाःङ् के़दक्पा के़जाबा मे़बोङ्ने़न्, कर खे़ने़ॽ आबाङेलाम्बा के़वाॽबा के़स्साःन्ने के़हिम् के़धाःङ् के़दक्पा के़जाबा पोङ्लो॥” 5 हे़क्क्याङ् यहवे दाङ्बाल्ले़ खुने़ॽ लाःक्कात् लःत्तुआङ् मे़त्तु, “ताङ्साक्पो ओमे़त्ते़ॽ, खेःम्सिक्पाहाॽ निरे़साॽरे़से़, निःप्मा के़सुक्तुसुबि? खे़ने़ॽ के़मुॽइदाङ्साहाॽआङ् खे़म्याःक्के यरिक् मे़बोङ्लो॥” 6 हे़क्क्याङ् अब्राम्मिल्ले़ यहवे दाङ्बान् नसाःन् चोगु हे़क्क्याङ् यहवे दाङ्बाल्ले़ खुने़ॽ साम्योबा लेःत्तु॥ 7 यहवे दाङ्बाल्ले़ खुने़ॽ मे़त्तु, “कन् लाजेन् खे़ने़ॽ हुक्सुप्मामारे़ लागि कल्दिहाॽरे़ खुन्छिॽ लाजेॽ उर लाम्बा के़लःप्पा के़भे़प्पा यहवे दाङ्बान् आङ्गाॽएरो॥” 8 कर अब्राम्मिल्ले़ मे़त्तु, “यहवे दाङ्बा निङ्वाॽफुमाङ्ङे, कन् आङ्गाॽइन् पोङ् फाॽआङ् आक्खेआङ् निङ्वाॽ खोसुङ्बाबे?” 9 यहवे दाङ्बाल्ले़ खुने़ॽ मे़त्तु, “आङ्गाॽ आलागि तङ्बे सुम्सि के़गे़प्मा करःङ् पिप्माधिक्, तङ्बे सुम्सि के़गे़प्मा मे़ःन्दमा थिक्, तङ्बे सुम्सि के़गे़प्पा थुःम्बाधिक्, पुत्तुःक्के थिक् हे़क्क्याङ् पे़रवासाःत् थिक् तारे़ॽ॥” 10 खुने़ॽ खे़न् थक्साहाॽ के़रे़क् यहवे दाङ्बाल्लो तारुसि, हे़क्क्याङ् से़रुसिआङ् कुलुम्मो कुघे़ल्ले़क् कुघे़ल्ले़क् जोगुसिआङ् तक् मे़मे़त्छिङ्ल ने़स्सुसि॥ कर पुहाॽग हे़क्केलॽरिक् कुघे़ल्ले़क् कुघे़ल्ले़क् मे़जोगुन्छिन्॥ 11 हे़क्क्याङ् मुयाहाॽ नु किथहाॽरे़ खे़न् कुसिवे़त् थक्सापुसाहाॽ मे़भत्तुल्ले़ अब्राम्मिल्ले़ खे़ङ्हाॽ नाःत्तुसि॥ 12 नाम् थ्ये़बेःल्ले़ अब्राम्मिन् मुरुक्खुरुक् इप्से़लासे़, हे़क्क्याङ् माक्सिदिङ्क्याःपा नु किप्मा के़घुबा खादाम्माल्ले़ खुने़ॽ सुःप्तु॥ 13 हे़क्क्याङ् यहवे दाङ्बाल्ले़ अब्राम्मिन् मे़त्तु, “खे़ने़ॽ के़मुॽइदाङ्साहाॽ आबाङे खुन्छिॽ लाजेॽ मेःम्बा माःङ्घाबा लाजेॽओ मे़बेःक्काङ् मे़युङ् के़लॽबान् निङ्वाॽ खोसे़ युक्से़ॽओ, हे़क्क्याङ् खे़ङ्हाॽ खे़न् लाजेॽबा मनाहाॽरे़ खुन्छिॽ योग्बा मे़बोङ्, हे़क्क्याङ् किप् लिसि तङ्बे थारिक् साॽरिक् ताप्फे़ःल्लिक् मे़मे़त्तुसिरो॥ 14 कर खे़ङ्हाॽ योःक्पा के़जोःक्पा सुवाङ्हाॽ आङ्गाॽ खुम्दिङ् पिरुङ्सिङ्, हे़क्क्याङ् याङ्सि खे़ङ्हाॽ साॽरिक् यरिक् याङ्साकुन्धेनु मे़लन् मे़भे़न्लो॥ 15 खे़ने़ॽग काप्पोबा के़दुम्ल थारिक् के़हिङ्॥ हे़क्क्याङ् सनारुङ्ङो के़सिआङ् के़म्जिङ्लो॥ 16 खे़ङ्हाॽरे़ खुन्छिॽ लिसिगेक्पा थाःक्को याम्मो कप्मो मे़नुःङ् मे़भे़न्लो, थेआङ्भे़ल्ले़ एमोरिहाॽ साॽरिक् कुॽइमे़भे़न्नाङ् खुम्दिङ् पिमासि ये़म् मे़ङ्गे़त्ते थारिक् आङ्गाॽ खे़ङ्हाॽ मे़नाःत्तासिङ्ङिन्॥” 17 नाम् थ्ये़आङ् खाधामे़ल्ले़ मिःक्खुॽ के़लःम्बार के़बप्पा मिघाःङ् याङ्मा थिक् नु मि के़दिःप्पार के़बप्पा त्याःल्लोत् थिक् साजिॽ लुम्मोलाम् लःन्दे़बे॥ 18 हाबा खे़न् ये़न्नो यहवे दाङ्बाल्ले़ अब्राम्मिन्नु अक्खे पाःत्तुर माङ्हुप् चोगु, “खे़ने़ॽ के़मुॽइदाङ्साहाॽ मिस्र लाजेॽलाम् युफ्रेतिस यङ्घङ् थारिक्पा— 19 केनि, के़नज्जि, कद्मोनि, 20 हित्ति, परिज्जि, रपाइ, 21 एमोरि, कनानि, गिर्गासि हे़क्क्याङ् यबुसिहाॽ के़रे़क्ले़ खुन्छिॽ लाजेॽहाॽ पिरुङ्सिङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.