गलाति 3 - लिम्बुये़सुन् नसान् चोःक्माल्ले़ साम्योबा आबोङ् 1 गलाति के़युङ्बा नसानिबासे, थेआङ् खिनिॽ अदङ् कुइसिक् के़जोगिबाबे? हाःत्ले़ के़ले़मिआङ् खिनिॽ निङ्वाॽइन् फे़त्लाःन्दु के़बिरिबे? खिनिॽ तगिए ये़सु ख्रिस्ते़न् सिलाम्साक्मा सिङ्सम्दाङ् स्ये़बा पाःन्निन् नुरिक्काङ् चे़क्कासिगे़आङ् वये़॥ 2 खिनिॽनु पाःन्धिक् कुसिङ् निःप्मा आनिङ्वाॽ वाॽ—साम्योथिम्मिन् के़इःत्तुम् के़नाःत्तुम्माङ् सेसेमाङ्ङिन् के़घोसुम्बाबि इ सुनाइङ् के़घे़प्सुम्माङ् नसान् के़जोगुम्बालाम् के़घोसुम्बाबि? 3 थेआङ् कम्म्याक् साॽरिक् खिनिॽ अदङ् के़जोगिबाबे? खिनिॽ ख्रिस्तानि हिङ्मन्निन् निङ्वाॽफुमाङ्ङिल्ले़ कुसेसेमाङ्लाम् के़हेःक्तुम्माङ् आल्ल आबाङे याःम्बक्लाम् कुलिङ्दो के़प्मा के़गोःत्तिबाबि? 4 सुनाइङ्ले़ लागि खिनिॽ कम्म्याक् यरिक् तुक्खे हने़ के़ज्ये़ॽइबि? से़क्खाःल्ले़ग तुक्खे हने़ के़न्ज्ये़ॽइन्लो॥ 5 खिनिॽ साम्योथिम्मिन् के़इःत्तुम् के़नाःत्तुम्माङ् मेःन्, कर के़घे़प्सुम्बा सुनाइङ्ङिन् नसान् के़जोगुम्बाल्ले़ए निङ्वाॽफुमाङ्ङिल्ले़ खिनिॽ सेसेमाङ्ङिन् के़बिरि हे़क्क्याङ् खिनिॽ लुम्मो निङ्वाॽ के़माबा याःम्बक् चोगुबारो॥ 6 हे़क्केलॽरिक्के अब्राहामरे़ कुयाःम्बेओ अक्खे साप्ते़आङ् पत्, “खुने़ॽ निङ्वाॽफुमाङ्ङिन् नसान् चोगु, हे़क्केःल्ले़ निङ्वाॽफुमाङ्ङिल्ले़ खुने़ॽ साम्योबा लेःत्तुरो॥” 7 खे़ल्ले़चोगुल्ले़ निङ्वाॽफुमाङ्ङिन् नसान् के़जोःक्पाहाॽए अब्राहामरे़ कुस्सा कुम्मे़न्छाॽसि के़लॽबा पाःन्निन् कुसिङ् निःत्ते़म्मे़ॽओ॥ 8 निङ्वाॽफुमाङ्ङिल्ले़ थिम्मे़न्दङ् सुवाङ्हाॽ खुनिॽ नसाःन्लाम् आप्तिक् मेःन्नेबा चोगुसिॽ के़लॽबा ताःन्दिबा पाःन्निन् साम्योसाप्लाओ साप्ते़आङ् पत्, हे़क्क्याङ् अब्राहाम्मिन् तगिसा अक्खेलॽरिक् सुनाइङ्ङिन् इङ्भन् चोगु, “काक् मे़न्छाम् सुवाङ्हाॽरे़ खे़ने़ॽ लाम्बाए हाङ्वागे़न् मुॽइसाम् मे़घोसुॽरो॥” 9 खे़ल्ले़चोगुल्ले़ अब्राहामरे़ नसान् चोगुआङ् मुॽइसाम् खोसुबा कुइसिक् ख्रिस्ते़न् नसान् के़जोःक्पा के़रे़क्ले़ हाङ्वागे़न् मुॽइसाम् मे़घोसुॽरो॥ 10 कर साम्योथिम् के़इःप्पा के़नाःप्पाहाॽ के़रे़क् साङ्ग्रारे़ ते़त्तुसिआङ् मे़वाॽरो, थेआङ्भे़ल्ले़ अक्खेलॽरिक् साप्ते़आङ् पत्, “साम्योथिम् साप्लाओ साप्ते़आङ् के़बप्पा काक् पाःन्हाॽ चक्मे़ल्लॽए मे़न्इःप्मना मे़न्नाःप्मनाहाॽ निङ्वाॽफुमाङ्ङिल्ले़ कुघुम्दिङ् खोमा लाॽरुसिआङ् वाॽरो॥” 11 साम्योथिम्लाम् निङ्वाॽफुमाङ्ङिल्ले़ कुनिमाओ आत्तिन्हाॽआङ् आप्तिक् मेःन्नेबा मे़म्बोङ्ने़न् के़लॽबा पाःन्निन् से़क्खाए निदे़त्लो, थेआङ्भे़ल्ले़ साम्योसाप्लाओ अक्खे साप्ते़आङ् पत्, “साम्योबाङ्ग नसाःन्लाम्बाए हिङ्लो॥” 12 साम्योथिम्मिन् नु नसाःन्निन् मे़दङ्सिन्लो॥ खे़ल्ले़ कुले़क्वा साम्योसाप्लाओ अक्खे साप्ते़आङ् पत्, “साम्योथिम्मो के़बप्पा काक् इङ्जाङ्हाॽ के़इःप्पा के़नाःप्पे़न् खे़न्लाम्मे हिङ्लो॥” 13 कर साम्योथिम्मिल्ले़ तारुबा खुम्दिङ्ङिल्ले़ कुमे़ल्लुङ्ङिन् ख्रिस्तरे़ हुङुआङ् आनिॽ आधे़ॽरे़रो॥ खुने़ॽ सिलाम्साक्मा सिङ्सम्दाङ् फोःन्छिङ्ङिल्ले़ खुने़ॽ आबाङे आनिॽ खुम्दिङ्ङिन् कुयुदेॽरुरो॥ थेआङ्भे़ल्ले़ साम्योसाप्लाओ साप्ते़आङ् पत्, “सिङ्सम्दाङ् के़भोःन्छिङ्बा के़सिबाङ्ग निङ्वाॽफुमाङ्ङिल्ले़ खुम्दिङ् पिरुबारो॥” 14 ख्रिस्तरे़ आनिॽ आधे़ॽरे़, हे़क्केःल्ले़ निङ्वाॽफुमाङ्ङिल्ले़ अब्राहाम्मिन् पिरुबा मुॽइसाम्मिन् ख्रिस्त ये़सुलाम् थिम्मे़न्दङ् सुवाङ्हाॽ पिरुसिआङ् वाॽ, हे़क्क्याङ् निङ्वाॽफुमाङ्ङिल्ले़ माङ्हे़क् चोगुबा सेसेमाङ्ङिन् नसाःन्लाम् आघोसुम्लो॥ साम्योथिम् नु माङ्हे़क् 15 आमिःम् फुॽनुसाॽ नु ने़ॽनुसाॽसे, इङ्गाॽ कप्मो मे़न्छाम् याप्मि थिम्लाम् कुबिधिक् पिनिङ्लो॥ ने़प्फुरे़ माङ्हे़क् चोःक्सुआङ् पान् तङ्सुबा साप्लाओ आत्तिल्ले़आङ् ले़ङ्मा नु योॽमा मे़सुक्तुन्लो॥ 16 हे़क्केलॽरिक्के निङ्वाॽफुमाङ्ङिल्ले़ अब्राहाम्मिन् नु कुमुॽइदाङ्साहाॽ माङ्हे़क्हाॽ पिरुसिरो॥ हे़क्क्याङ् साम्योसाप्लाःल्ले़ “कुमुॽइदाङ्साहाॽ” फाॽइङ्ग यरिक् मनाहाॽ मेःन्, कर “कुमुॽइदाङ्साःन्” लॽरिक् पाःत्तुआङ् पत्॥ खे़न् फाॽइङ्ग लत्छा मनाःल्ले़न् मिक्सेन् पोङ्, खे़ङ्ग ख्रिस्तरो॥ 17 कप्मो इङ्गाॽ थे पाःप्मा निङ्वाॽ चोगुङ्बा फाॽले़ निङ्वाॽफुमाङ्ङिल्ले़ अब्राहाम्मिन् माङ्हुप् चोगुबान् कुगिप् लिसिआङ् सुम्बोङ् (४३०) तङ्बे एगाङ् निङ्वाॽफुमाङ्ङिल्ले़ मोसान् साम्योथिम् पिरुल्ले़ खे़न् माङ्हुप्पिन् मे़घक्तुन्लो, मेःन्ने फाॽग्र निङ्वाॽफुमाङ्ङिल्ले़ खे़न् चोगुबा माङ्हे़क्किन् खक्तुमे़न्॥ 18 थेआङ्भे़ल्ले़ निङ्वाॽफुमाङ्ङिल्ले़ पिनिङ् लॽरिक् चोगुबा मुॽइसाम्मिन् साम्योथिम् इःप्मा नाःप्मालाम् खोदे़त्ने़ फाॽग्र खे़न् माङ्हे़क्के मे़बोङ्ने़न्॥ कर निङ्वाॽफुमाङ्ङिल्ले़ माङ्हे़क्लाम्बाए अब्राहाम्मिन् लुङ्माॽ तुक्तुआङ् कन् मुॽइसाम्मिन् पिरुरो॥ 19 हे़क्केःल्ले़ साम्योथिम्मिन् थेआङ् पिरे़बाबे? माङ्हे़क् चोगुबा मुॽइदाङ्साःन् मे़न्दाए थारिक् लायोल्ले़ चोगुल्ले़ साम्योथिम्मिन् योॽसिङ्लो॥ निङ्वाॽफुमाङ्ङिल्ले़ माङ्लाइङ्बालाम् साम्योथिम्मिन् पाःन्दङ्साबा मोसान् पिरुरो॥ 20 आल्ल पाःन्दङ्ले़ लागि ने़प्फु मना चाहाबा चोक्, कर निङ्वाॽफुमाङ्ङिङ्ग लत्थिक्लक् वाॽरो॥ साम्योथिम्मिल्ले़ कुयाःम्बक् 21 हे़क्केने़ फाॽग्र कुसाम्योथिम्मिल्ले़ निङ्वाॽफुमाङ्ङिल्ले़ कुमाङ्हे़क्हाॽ अत्तुबि? से़क्खाःल्ले़ग हे़क्के मेःन्लो! साम्योथिम्मिल्ले़ कुसङ् हिङ्मन्निन् पिमा आसुक्ते़ल्ले़ग खे़न् साम्योथिम्मिन् आइःत्तुम् आनाःत्तुम्माङ् निङ्वाॽफुमाङ्ङिल्ले़ कुनिमाओ आप्तिक् मेःन्नेबा पोङ्मा आसुक्ते़बारो॥ 22 कर लायोल्ले़ काक् मनाहाॽ साक्पा के़धाःबा कुइसिक् चोगुसिआङ् वाॽ फाॽआङ् साम्योसाप्लाःल्ले़ इङ्भन् चोगुआङ् वाॽ॥ खे़ल्ले़चोगुल्ले़ निङ्वाॽफुमाङ्ङिल्ले़ कुमाङ्हुप्पिङ्ग ये़सु ख्रिस्ते़न् नसान् चोःक्माआङ्लक् खोमा आसुक्तुम्लो॥ 23 ख्रिस्ते़न् तामानुःल्ले़ तगि, निङ्वाॽफुमाङ्ङिल्ले़ कन् नसाःन्निन् आनिॽ ओसेःन्मे़न्धाक्के थारिक् साम्योथिम्मिल्ले़ कुयुक्को आवये़आङ् आनिॽ के़रे़क् साक्पा के़धाबा हे़क्के आजोगे़आङ् आवये़॥ 24 खे़ल्ले़चोगुल्ले़ साम्योथिम्मिन् आनिॽ नसाःन्लाम् निङ्वाॽफुमाङ्ङिल्ले़ कुनिमाओ आप्तिक् मेःन्नेबा आबोङ्ल फाॽआङ् ख्रिस्तओ थारिक् लाम्लोसे़ आनिॽ ओगे़मे़प्पा पोःक्खे़आङ् वये़रो॥ 25 आल्ल खे़न् नसाःन्निन् त्ये़आङ् वाॽबाल्ले़ चोगुल्ले़ साम्योथिम्मिल्ले़ आनिॽ ओमे़प्मा चाहाबा मे़जोक्ने़न्लो॥ 26 ख्रिस्त ये़सुओबा खिनिॽ नसाःन्लाम् के़रे़क् निङ्वाॽफुसा के़बोःक्खिआङ् के़वयिॽरो॥ 27 थेआङ्भे़ल्ले़ ख्रिस्तओ बप्तिस्मा के़बोङ्बा के़रे़क्ले़ ख्रिस्तरे़ नुबा कुनोस्रङ्ङिन् कुसङ् तेत् के़जाक्खुम्बा कुइसिक् के़जाक्खुम्माङ् के़वयिॽरो॥ 28 आल्ल यहुदि, थिम्मे़न्दङ् सुवाङ्, योक् नु चोःक्युम्भोबा, ये़म्बित्छाॽ नु मे़न्छुमाॽ कुदङ्बारो, थेआङ्भे़ल्ले़ खिनिॽग ख्रिस्त ये़सुओ लत्छा के़बोःक्खिआङ् के़वयिॽरो॥ 29 खिनिॽ ख्रिस्तरे़ कुमना के़बोःक्खिआङ् के़वयिॽने़ फाॽग्र खिनिॽग अब्राहामरे़ से़क्खा कुमुॽइदाङ्सानिङ्लो, हे़क्क्याङ् निङ्वाॽफुमाङ्ङिल्ले़ अब्राहाम्मिन् पिरुबा माङ्हे़क्किल्ले़न् लक् के़घोबानिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.