ए़ज्रा 8 - लिम्बुके़नुःङ्बा के़भे़म्बा मनाहाॽ 1 अर्तासास्ते़ल्ले़ हाङ्युक् चोगुबा ये़म्मो बेबिलोनलाम्बा आङ्गाॽनु यरुसले़म के़नुःङ्बा के़भे़म्बा हिम्सयङ्बा तुम्भाक्पाहाॽ हे़क्क्याङ् खे़ङ्हाॽनु सोरिक् मिङ् मे़घप्सुबाहाॽरे़ खुन्छिॽ मिङ्स्रान् अक्तङ्बा चोक्— 2 पिनहासरे़ कुहिम्सयङ्लाम्—गेर्सोम॥ इतामारले़ कुहिम्सयङ्लाम्—दानिए़ल॥ दाउदरे़ कुहिम्सयङ्लाम्—सकन्याहःल्ले़ कुस्सा हत्तुस॥ 3 परोसरे़ कुहिम्सयङ्लाम्—जकरिया हे़क्क्याङ् खुने़ॽनु खुन्छिॽ मिङ् के़साप्पा १५० ये़म्बित्छाहाॽ (खे़ङ्हाॽरे़ खुन्छिॽ पाधे़बाहाॽरे़ याःम्बेओ साप्लामुन्दे वये़) 4 पहत-मोआबरे़ कुहिम्सयङ्लाम्—जरयाहरे़ कुस्सा एल्यहोएनै हे़क्क्याङ् खुने़ॽनु २०० ये़म्बित्छा॥ 5 जत्तुरे़ कुहिम्सयङ्लाम्—यहासेलरे़ कुस्सा सकन्याह हे़क्क्याङ् खुने़ॽनु ३०० ये़म्बित्छाहाॽ॥ 6 आदिनरे़ कुहिम्सयङ्लाम्—जोनाथनरे़ कुस्सा एबेद हे़क्क्याङ् खुने़ॽनु ५० ये़म्बित्छाहाॽ॥ 7 एलामरे़ कुहिम्सयङ्लाम्—अतल्याहरे़ कुस्सा यसयाह हे़क्क्याङ् खुने़ॽनु ७० ये़म्बित्छाहाॽ॥ 8 सपत्याहरे़ कुहिम्सयङ्लाम्—मिखाएलरे़ कुस्सा जबदियाह हे़क्क्याङ् खुने़ॽनु ८० ये़म्बित्छाहाॽ॥ 9 योआबरे़ कुहिम्सयङ्लाम्—यहिएलरे़ कुस्सा ओबदिया खे़म्ब्याङ् खुने़ॽनु २१८ ये़म्बित्छाहाॽ॥ 10 बानिरे़ कुहिम्सयङ्लाम्—योसिपियाःल्ले़ कुस्सा सलोमित हे़क्क्याङ् खुने़ॽनु १६० ये़म्बित्छाहाॽ॥ 11 बेबैरे़ कुहिम्सयङ्लाम्—बेबैरे़ कुस्सा जकरिया हे़क्क्याङ् खुने़ॽनु २८ ये़म्बित्छाहाॽ॥ 12 अज्गादरे़ कुहिम्सयङ्लाम्—हक्कातानरे़ कुस्सा योहानान हे़क्क्याङ् खुने़ॽनु ११० ये़म्बित्छाहाॽ॥ 13 अदोनिकामरे़ कुहिम्सयङ्लाम्—एलिपेलेत, यिएल नु समायाह खे़ब्याङ् खे़ङ्हाॽनु ६० ये़म्बित्छाहाॽ (खे़ङ्हाॽ याङ्सि कुभा ये़म् एगाङ् मे़नुःक्खे़ मे़भे़रे़आङ् मे़वये़॥) 14 बिग्वैरे़ कुहिम्सयङ्लाम्—उत्तै नु जक्कुर हे़क्क्याङ् खे़ङ्हाॽनु ७० ये़म्बित्छाहाॽ मे़वये़रो॥ ए़ज्राःल्ले़ माङ्हिम्मिल्ले़ लागि ले़बिहाॽ कोःत्तुसि 15 आङ्गाॽ के़रे़क् मनाहाॽ अहावा ये़क्यक् ले़प्माङ् के़बेःक्पा वालाम्मिल्ले़ कुबेसाङ् सुप्सुङ्सिङ् हे़क्क्याङ् आनिगे खे़प्मो सुम्यान् थारिक् साःङ्गाहिम् चोःक्मनाआङ् युङ्मना॥ खे़न् मनासुम्मो निङ्वाॽफुसाम्बाग मे़वये़ कर ले़बिहाॽ मे़होःप्ते़बा आङ्गाॽ निसुङ्॥ 16 कल्ले़चोगुल्ले़ एलिएजर, अरिएल, समायाह, एल्नातान, यारिब, एल्नातान, नातान, जकरिया नु मसुल्लाम फाङ्सि लाम्लोबाहाॽ हे़क्क्याङ् ने़प्फु सिक्साम्बा योयारिबे़न् नु एल्नातान्ने़न् उःत्तुङ्सिङ्॥ 17 आङ्गाॽ खे़ङ्हाॽ कासिपियाबा सुभा इद्दोरओ पाङ्घुङ्सिङ्॥ खुने़ॽ नु माङ्हिम्मो याःम्बक् के़जोःक्पा खुने़ॽ कुभाॽबाङ् मनाहाॽ माङ्हिम्मो निङ्वाॽफुमाङ्ङिल्ले़ कुसे़वा चोःक्मारे़ लागि मनाहाॽ पाङ्घुसिर फाॽआङ् इङ्घङ् मे़हाक्तुर याःन्दुङ्सिङ्॥ 18 निङ्वाॽफुमाङ्ङिल्ले़ कुलुङ्गुम्मिल्ले़ खे़ङ्हाॽरे़ आनिगे़ओ महलि हिम्सयङ्बा सरेबियाह मिङ् के़वाःप्पा साॽरिक् सुम्बोधासाबा ले़बि मनाधिक् पाङ्घु तासु हे़क्क्याङ् खुने़ॽनु कुस्साहाॽ खे़ब्याङ् कुगाॽइहाॽ के़रे़क्ले़ थिबोङ्ङाङ् ये़त्छि ये़म्बित्छा मे़द्ये़॥ 19 खे़ङ्हाॽरे़ हसब्याहन् हे़क्क्याङ् मरारि हिम्सयङ्बा यसयाहःन्नु सोरिक् खे़ल्ले़ कुम्भुॽ कुन्साॽहाॽ हे़क्क्याङ् कुन्नाक्पाहाॽ के़रे़क्ले़ निबोङ् ये़म्बित्छाहाॽ मे़बाङ्घुसि॥ 20 खे़न्नुःल्ले़ वेॽ माङ्हिम्मो याःम्बक् के़जोःक्पा मनाहाॽ किप् ने़त्छिआङ् निबोङ् मे़वये़, ले़बिहाॽ मे़भाॽरुसिर फाॽआङ् माङ्से़वा के़जोःक्पाहाॽ सेःक्युक् चोःक्मा थिम्मिन् खे़ङ्हाॽरे़ खुन्छिॽ थाःक्थे़बाहाॽ दाउद हाङ् नु खुने़ॽ कुहाङ् याःम्बक् के़जोःक्पाहाॽरे़ मे़युक्खुआङ् वये़॥ खे़ङ्हाॽ के़रे़क्ले़ खुन्छिॽ मिङ्हाॽ मिङ्नाःत्तो साप्ते़आङ् पत्छे़रो॥ ए़ज्राःल्ले़ मनाहाॽ तःक्ने़त् युङ्मा नु पेलिगे़न् तुवा चोःक्मो लाम्लोसुसि 21 खे़प्मो अहावा वालिःल्ले़ कुयाओ के़रे़क् तःक्ने़त् युङ्मारे़ लागि नु आबाङे आनिगे निङ्वाॽफुमाङ्ङिल्ले़ कुदगि चुङ्जिगे़न् नःम्नःम्बा पोङ्मारे़ लागि हे़क्क्याङ् आनिगे लाम्दिःक्को खुने़ॽ लाम्लोसिगे़र हे़क्क्याङ् आनिगे आबाङे लागि, याङ्साकुन्धेरे़ लागि नु साएहाॽ ताङ्से़ःप्मासिरे़ लागि पेलिगे़न् तुवा चोःक्मा पाङ्घुङ्सिङ्॥ 22 लाम्दिःक्को निङ्मिहाॽलाम्बा आनिगे ताङ्से़ःप्सिङ्मारे़ लागि पयम् हाङ्ङिन् अन्गे़युक्पा थक्सुबा तुरा नाःक्मा आङ्गाॽ नुःन्दाङ् थेआङ्भे़ल्ले़ आनिगे निङ्वाॽफुमाङ्ङिल्ले़ खुने़ॽओ निङ्वाॽ के़युङ्बाहाॽ के़रे़क् मुॽइसाम् पिरुसिॽ हे़क्क्याङ् खुने़ॽ के़नाॽबाहाॽनु कुनिङ्वाॽ मे़दाने़न्नाङ् खुम्दिङ् पिरुसिॽ हाङ्ङिन् मे़त्तुङ्ङाङ् वयाङ्॥ 23 खे़ल्ले़चोगुल्ले़ आनिगे तःक्ने़त् युङ्मना हे़क्क्याङ् आनिगे ताङ्से़ःप्सिङ्मारे़ लागि निङ्वाॽफुमाङ्ङिन् पेलि फाक्मना खे़ब्याङ् खुने़ॽ आनिगे पेलिन् खे़प्सुआङ् नोगप् पिरिगे़रो॥ माङ्हिम्मिल्ले़ लागि हुक्वायाङ् 24 तुम् निङ्वाॽफुसाम्बाहाॽलाम् आङ्गाॽ सरेबियाह, हसब्याह नु वेॽ थिबोङ् मनाहाॽ सेगुङ्सिङ्॥ 25 खे़ब्याङ् आङ्गाॽ पयम् हाङ्, कुसुजासाबा हे़क्क्याङ् सुहाङ्गे़म्बाहाॽ नु इस्राइलबा मनाहाॽरे़ माङ्हिम्मो याङ्मा फाॽआङ् मे़बिरिगे़बा साम्म्याङ्, युप्पा नु खप्प्याहाॽ थाङ्घुङ्ङाङ् खे़न् निङ्वाॽफुसाम्बाहाॽ पिरुङ्सिङ्॥ 26 आङ्गाॽ खे़ङ्हाॽ कन् पाःन्हाॽ पिरुङ्सिङ्— २२,००० किलोग्राम युप्पा, ३,४०० किलोग्राम युप्पा खप्प्याहाॽ, ३,४०० किलोग्राम साम्म्याङ्, 27 ८ किलोग्राम साम्म्याङ् छे़ःङ्ग्या, हे़क्क्याङ् कुमे़न् के़घिःक्पा नुबा कासा खप्प्या ने़त्छि पिरुङ्सिङ्॥ 28 आङ्गाॽ खे़ङ्हाॽ मे़त्तुङ्सिङ्, “खिनिॽनु सोसोरिक् कन् सामापुमाहाॽ यहवे दाङ्बा खिनिॽ पाधे़बाहाॽरे़ खुन्छिॽ निङ्वाॽफुमाङ्ङिल्ले़ कुलागि सेसेबा चोक्, हे़क्केलॽरिक्के आबाङे निङ्वाःल्ले़ हुक्वा हे़क्के के़दोःन्दुम्बा साम्म्याङ् नु युप्पा खप्प्याहाॽआङ् सेसेबा चोक्॥ 29 माङ्हिम्मो खिनिॽ मे़न्गे़त्ते थारिक् सिङ्सिङ् ये़क्ये़क्काङ् खे़न् सामाहाॽ ताङ्से़ःप्ते़म्मे़ॽ॥ खे़प्मो के़रे़म्मे़ॽआङ् निङ्वाॽफुसाम्बे़ल्ले़ कुयाक्फाङ्ङो खे़ङ्हाॽ थाङ्घाम्मे़ॽ हे़क्क्याङ् खे़न् निङ्वाॽफुसाम्बा नु ले़बिहाॽरे़ खुनिॽ लाम्लोबा खे़ब्याङ् यरुसले़ःम्मो के़वाॽबा इस्राइलिहाॽरे़ खुनिॽ लाम्लोबाहाॽ पिरे़म्सिम्मे़ॽ॥” 30 अक्खेलॽरिक् खे़न् निङ्वाॽफुसाम्बा नु ले़बिहाॽरे़ खे़न् साम्म्याङ् युप्पा खप्प्याहाॽ यरुसले़ःम्बा माङ्हिम्मो के़प्मारे़ लागि खुन्छिॽ आबाङे लक्पे़न्साबा मे़बोःक्खे़रो॥ यरुसले़म मे़नुःक्खे़बा 31 थिक्सिगेक्पा ला थिबोङ्ङाङ् ने़त्छि के़रे़बा ये़न्नो आनिगे यरुसले़म पेःक्मारे़ लागि अहावाबा वालिन् ले़रुम्बे़॥ आनिगे निङ्वाॽफुमाङ्ङिन् आनिगे़नु वये़ हे़क्क्याङ् आनिगे लाम्दिःक्को निङ्मिहाॽरे़ फप्मा नु लाम्सुक्मालाम् ताङ्से़ःप्तिगे़॥ 32 यरुसले़म के़रिगे़आङ् आनिगे सुम्ये़न् थारिक् नाःम्मासिगे़॥ 33 लियान् के़रे़बा ये़न्नो माङ्हिम्मो आनिगे पेगिगे़, युप्पा, साम्म्याङ् नु सुत्थो खप्प्याहाॽ थाङ्घुम्बे़ हे़क्क्याङ् उरियाहःल्ले़ कुस्सा मरेमोत निङ्वाॽफुसाम्बान् हुक्सुप्तुम्बे़॥ खुने़ॽनु पिनहासरे़ कुस्सा एलाजारे़न् वये़, हे़क्क्याङ् ने़त्छि ले़बि येसुआरे़ कुस्सा योजाबादे़न् नु बिन्नुइरे़ कुस्सा नोअदियान् वये़सि॥ 34 के़रे़क् चिगक्वाहाॽ निरुम्बे़आङ् थाङ्घुम्बे़ हे़क्क्याङ् खे़न्नु सोसोरिक् के़रे़क् साप्लामुधिङ्हाॽ यारिप् चोगुम्बे़॥ 35 खे़न् एगाङ् मे़दे़म्सु मे़देॽरुसिबालाम् के़नुःङ्बा के़भे़म्बा के़रे़क्ले़ इस्राइलबा निङ्वाॽफुमाङ्ङो मिधिङ्मनादेमनाबा सिदुङ्जभा तोःम्मारे़ लागि खुन्छिॽ सिदुङ्भजाहाॽ मे़दारु॥ खे़ङ्हाॽरे़ के़रे़क् इस्राइलरे़ लागि थिबोङ्ङाङ् ने़त्छि से़गम्बा पित्, फाङ्बोङ्ङाङ् तुक्सि यम्बा मे़ल्लुक् नु नुबोङ्ङाङ् नुसि थुःम्बा सिदुङ्जभा मे़जोगु॥ खे़ङ्हाॽरे़ थिबोङ्ङाङ् ने़त्छि मे़ःन्दबकाआङ् आबाङे लायोलाम् सुत्थो मे़जोक्सिङ्ल मिधिङ्मनादेमनाबा सिदुङ्जभा मे़दोन्दु॥ कन् के़रे़क् थक्साहाॽ यहवे दाङ्बाओ मिधिङ्मनादेमनाबा सिदुङ्जभा मे़दोन्दुसि॥ 36 पयम् हाङ्ङिल्ले़ पिरुसिबा साप्लामुन्देहाॽआङ् मे़याङ्सिङ् हे़क्क्याङ् खे़ङ्हाॽरे़ नाम्धा पिसाङ्बा युफ्रेतिस ते़ङ्गप्पोबा तुम् हाङ्युक्पा नु सुहाङ्गे़म्बाहाॽ मे़बिरुसि खे़ब्याङ् खे़न् सुहाङ्युक्पाहाॽरे़ खे़न् एगाङ् इस्राइलिहाॽ नु माङ्हिम्मो से़वा चोःक्मा याःम्बक्को मे़भाॽरुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.