ए़ज्रा 5 - लिम्बु1 खे़न् ये़म्मो माङ्निङ्वाॽपान् के़बाःप्पा हाग्गै नु इद्दोरे़ कुस्सा जकरियाःल्ले़ खे़ङ्हाॽनु के़वाॽबा इस्राइलबा निङ्वाॽफुमाङ्ङिल्ले़ कुमिङ्ङो यहुदा नु यरुसले़ःम्मो के़युङ्बा यहुदिहाॽ माङ्निङ्वाॽपान् मे़प्मा हेःक्ते़त्छुसि॥ 2 हे़क्क्याङ् सालतिएलरे़ कुस्सा यरुबाबेल नु योसादाक्के़ल्ले़ कुस्सा येसुआःल्ले़ यरुसले़ःम्मो याम्मो माङ्हिम्मिन् चोःक्मा हेःक्ते़सु, हे़क्क्याङ् खे़न् ने़त्छि माङ्निङ्वाॽपान् के़बाःप्पाहाॽरे़ खे़ङ्हाॽ मे़भाॽरुसि॥ 3 आम्भा खे़न् ये़म्मोए युफ्रेतिस नाम्धा पिसाङ्बा तुम् हाङ्युक्पा तत्तनै, सत्तर-बोज्नैन् नु खे़ल्ले़ कुजुम् कुदेःङ्हाॽ यरुसले़ःम्मो मे़द्ये़आङ् सेःन्मे़दोसुसि, “हाःत्ले़ खिनिॽ कन् माङ्हिम्मिन् याम्मो चोःक्मा नु कॽयो चाहा के़जोःक्पा चिगक्वाहाॽ सुम्मा के़बाङ्घि?” 4 माङ्हिम् चोःक्मा के़भाॽबा के़रे़क् मनाहाॽरे़ खुनिॽ मिङ्हाॽआङ् खे़ङ्हाॽरे़ मे़नाःक्तुसि॥ 5 कर निङ्वाॽफुमाङ्ङिल्ले़ यहुदि लाम्लोबाहाॽ ओमे़त्तुसिआङ् वये़ हे़क्क्याङ् फारसबा हाङ्याःम्बक् के़जोःक्पाहाॽरे़ दारा हाङ्ङिन् पेलिसक् मे़साप्तुआङ् मे़हाङु हे़क्क्याङ् खुने़ॽ कुनोगप् मे़ङ्घोए थारिक् याःम्बक् चोःक्मालाम् आत्तिन्हाॽरे़आङ् थेःक्मा मे़न्छुक्तुसिन्॥ 6 दारा हाङ्ङिन् युफ्रेतिस नाधाःम्बि ते़ङ्गप्पोबा हाङ्युक्पा तत्तनै, सत्तर-बोज्नै नु खुन्छिॽ सुहाङ्युक्पाहाॽ, इग्र युफ्रेतिस नाहाङ्दाङ्बा युक्साबाहाॽरे़ मे़हाक्तुबा सक्इङ्घङ्ङिन् अक्तङ्बा चोक्लो— 7 “पयम् दारा हाङ्ङे से़वारो, आदाङ्बारे़ के़हाङ्युक्किन् सनारुङ् नुॽमा तामा पोङ्लरो! 8 “यहुदा ते़ङ्गप्पो आनिगे पेगिगे़ हे़क्क्याङ् पयम् यम्बा निङ्वाॽफुमाङ्ङिल्ले़ कुहिम्मिन् मे़जोगुर मे़यागे़बा निसुम्बे़॥ कन् पाःन्निन् आदाङ्बा पयम् यम्बा हाङ्ङिल्ले़ कुसिङ् के़निःत्तुर के़लॽबा निङ्वाॽ इःत्तुम्बे़॥ यम्बयम्बा लुङ्हाॽ मे़से़त्तुर लुङ्धाक्को पे़रे़म्सिङ्हाॽ मे़याक्तुर मे़यागे़॥ साॽरिक् सिङ्सिङ् ये़क्ये़क्काङ् याःम्बक्किन् पोङ्ल पत् खे़ब्याङ् चक्मे़ल्लॽए तगि पोर पत्॥ 9 “‘हाःत्ले़ माङ्हिम्मिन् याम्मो चोःक्मा नु खे़प्मो चाहा के़जोःक्पा चिगक्वाहाॽ सुम्मा के़बाङ्घि?’ फाॽआङ् मनाहाॽरे़ खुनिॽ लाम्लोबाहाॽ आनिगे से़ःन्लाप्तुम्सिम्बे़॥ 10 आनिगे आदाङ्बान् मे़प्माने़ फाॽआङ् खे़ङ्हाॽरे़ खुनिॽ लाम्लोबाहाॽरे़ खुनिॽ मिङ्हाॽआङ् से़ःन्लाप्तुम्सिम्बे़॥ 11 “खे़ङ्हाॽरे़ आनिगे अक्खे मे़मे़त्तिगे़, ‘आनिगे़ग साङ्ग्राम्पेदाङ् नु इक्सादिङ् खाम्बेःक्मोबा निङ्वाॽफुमाङ्ङिल्ले़ कुसे़वारोबासिगे़॥ खे़न् माङ्हिम्मिन् इस्राइलबा लत्छा मुक्साम्साबा हाङ्ङिल्ले़ यरिक् तङ्बे तगि चोगु वये़ हे़क्क्याङ् आनिगे हाबा खे़न् माङ्हिम्मिन् याम्मो चोगुम्बे़र पत्छिगे़॥ 12 कर आनिगे थाःक्थे़बाहाॽरे़ साङ्ग्राम्पेदाङ्बा निङ्वाॽफुमाङ्ङिन् कुसिक् मे़भोःक्खुबाल्ले़ चोगुल्ले़ खुने़ॽ खे़ङ्हाॽ कल्दि हाङ्थाःक्कोबा हाङ् बेबिलोन्नो नबुकदनेसररे़ कुयुक्को थासुसि॥ माङ्हिम्मिन् थ्यःङ् मे़यसु मे़देसु हे़क्क्याङ् मनाहाॽ बेबिलोनओ मे़दे़म्सु मे़देॽरुसि॥ 13 “‘खे़ब्याङ् बेबिलोनबा हाङ् कोरेसे़ल्ले़ हाङ् चोगुबा थिक्सिगेक्पा तङ्बेओ खुने़ॽ माङ्हिम्मिन् याम्मो चोगे़म्मे़ॽ फाॽआङ् इङ्जाङ् पिरुसि॥ 14 नबुकदनेसरे़ल्ले़ यरुसले़म माङ्हिम्मोलाम् तेॽरुआङ् बेबिलोनबा खुने़ॽ कुमाङ्हिम्मो युक्खुसिबा साम्म्याङ् नु युप्पा खप्प्याहाॽ कोरेस हाङ्ङिल्ले़ नुःक्तु॥ कोरेस हाङ्ङिल्ले़ यहुदाओ तुम् हाङ्युक्पा मे़जोगुबा, सेसबस्सर मिङ् के़वाःप्पा मनान्, खे़न् खप्प्याहाॽ हुक्सुप्तु फे़न्छु॥ 15 हाङ्ङिल्ले़ खुने़ॽ मे़त्तु, “यरुसले़मबा माङ्हिम्मो खे़न् सामाहाॽ नुःक्ते़म्तेॽरे़म्मे़ॽ हे़क्क्याङ् तगि आत्तान् माङ्हिम्मिन् युङे़, हाबा खे़न् ते़न्नो याम्मो माङ्हिम्मिन् चोगे़म्मे़ॽ॥” 16 “‘खे़ल्ले़चोगुल्ले़ सेसबस्सरे़न् फे़रे़आङ् माङ्हिम्मिल्ले़ कुबुङ् युक्खु॥ खे़न् ये़म्माङ्धो आइन् थारिक् माङ्हिम् चोःक्मा याःम्बक्किन् पोङ्ल पत्, कर माङ्हिम्मिन् आल्लसाङ् चोःक्मा मे़न्जुःत्ते वाॽ॥’” 17 कल्ले़चोगुल्ले़ आल्ल आदाङ्बा हाङ्ङे! आदाङ्बारे़ याप्मि लुङ्माॽ के़दुक्ने़भग्र, बेबिलोनओ के़ने़बा हाङ् साप्लामुधिङ्हाॽ ओमे़प्मा पोङ्ॽ हे़क्क्याङ् कोरेस हाङ्ङिल्ले़ कन् यरुसले़मबा माङ्हिम्मिन् याम्मो चोःक्मा इङ्जाङ् पिरुसिबाबि मेःम्बि, खे़न् कुसिङ् निःप्मा पोङ्ॽ॥ खे़न् एगाङ् खे़ल्ले़ कुयाःम्बेओ आदाङ्बारे़ आक्तङ्बा के़निङ्वाॽ पोङ्ॽ, खे़न् आनिगे याप्मि आमे़त्ते़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.