ए़ज्रा 4 - लिम्बुयाःम्बक् चोःक्मा मे़म्बिरुन्छिन् 1 यहुदा नु बेन्यामिन मनाहाॽरे़ खुनिॽ निङ्मिहाॽरे़ बेबिलोन मे़दे़म्सु मे़देॽरुसिबालाम् के़नुःङ्बा के़भे़म्बा मनाहाॽरे़ यहवे दाङ्बा इस्राइलबा निङ्वाॽफुमाङ्ङिल्ले़ कुहिम्मिन् याम्मो चोःक्मा मे़हेःक्तुआङ् वाॽ के़लॽबा मे़घे़प्सु॥ 2 खे़ल्ले़चोगुल्ले़ खे़ङ्हाॽ यरुबाबेले़न् नु हिम्सयङ्हाॽओबा तुम्भाक्पाहाॽरे़ खुन्छिॽ तुम्से़ मे़बे हे़क्क्याङ् अक्खे मे़मे़त्तुसि, “माङ्हिम् चोःक्मा याःम्बक्को खिनिॽ तेःङ् मे़प्मानिङ् आनिगे आभाःक्ते़ॽ॥ खिनिॽ माङ्से़वा के़मे़त्तुम्बा सेसे निङ्वाॽफुमाङ्ङिन्ने आनिगे़आङ् से़वा मे़त्तुम्बे़॥ अस्सुरबा पयम् हाङ् एसरहदोने़ल्ले़ आनिगे कॽयो वाॽमा याप्मि पाङ्घे़बा ये़म्माङ्धोए आनिगे खुने़ॽओ सिदुङ्जभा तोःन्दुम्बे़र वयिगे़॥” 3 यरुबाबेल, येसुआ नु हिम्सयङ्हाॽओबा तुम्भाक्पाहाॽरे़ खे़ङ्हाॽ मे़मे़त्तुसि, “यहवे दाङ्बा आनिगे निङ्वाॽफुमाङ्ङिल्ले़ कुहिम्मिन् चोःक्मारे़ लागि आनिगे खिनिॽ फाॽमा चाहा मे़जोगिगे़न्॥ खे़न् आनिगे आबाङे चोगुम्बे़॥ फारस लाजेॽबा पयम् हाङ् कोरेसे़ल्ले़ मुरा मे़त्तिगे़बा हे़क्के आनिगे खे़न् याःम्बक्किन् चोगुम्बे़॥” 4 हाबा खे़न् लाजेॽओ के़युङ्बार के़वाॽबा मनाहाॽरे़ यहुदिहाॽ खुन्छिॽ सक्मा पुॽर याःम्मासि, यङ्मा से़प्मासि नु माङ्हिम् चोःक्मा याःम्बक्किन् चोक् मे़म्भाःक्मासि तम्सिङ् मे़जोगु॥ 5 खे़ङ्हाॽरे़ फारस लाजेॽबा सुहाङ्युक्पाहाॽ यहुदिहाॽरे़ खुनिॽ तक्ले़ङ्वाओ ताप्फे़ःम्बा याःम्बक् मे़जोगुर फाॽआङ् स्वाःत्ताङ् सुरुत्याङ् मे़बिरुसि॥ कोरेसे़ल्ले़ कुहाङ्युक् चोःक्चोःक् नु दारा हाङ्ङिल्ले़ कुहाङ्युक् ये़म् थारिक् खे़ङ्हाॽरे़ हे़क्के मे़जोगुर मे़वये़रो॥ यरुसले़म ये़क्यक् चोःक्मा याःम्बक्किन् मे़अत्तु 6 अहासुरस पयम् हाङ्ङिल्ले़ कुहाङ्युक्किल्ले़ कुहेःक्सिङ्मो यहुदा नु यरुसले़ःम्मो के़युङ्बा मनाहाॽरे़ खुनिॽ तक्ले़ङ्वाओ खुन्छिॽ निङ्मिहाॽरे़ लत्छा आप्तिक् सक् थिक् मे़साप्तुआङ् मे़दारु॥ 7 याम्मो अर्तासास्त, फारस लाजेॽबा पयम् हाङ्ङिल्ले़ कुहाङ्युक् चोःक्मा ये़म्मो विस्लाम, मित्रेता, ताबेल नु खे़ल्ले़ कुन्जुम्हाॽरे़ पयम् हाङ्ङिन् लत्छा सक्इङ्घङ् मे़हाक्तु॥ खे़न् सक्इङ्घङ्ङिन् अरामि पाःन्दाङ्ङो मे़साप्तुआङ् वये़ हे़क्क्याङ् मे़निरुल्ले़ पाःन्ले़ङ्मा के़बोङ्बा पोःक्खे़आङ् वये़॥ 8 तुम् हाङ्युक्पा रेहुम नु ते़ङ्गप्पोबा सुहाङ्मिबा सिम्सैरे़ यरुसले़ःम्मिल्ले़ कुयाःम्बेओ अक्तङ्बा सक्इङ्घङ् अर्तासास्ते़न् हाक्ते़छु— 9 “तुम् हाङ्युक्पा रेहुम, ते़ङ्गप्पोबा सुहाङ्मिबा सिम्सै, खे़ङ्हाॽनु सोरिक् याःम्बक् के़जोःक्पाहाॽ, खासे़न्लोःम्बाहाॽ नु वेॽ के़रे़क् सुहाङ्युक्पाहाॽ, खे़ङ्हाॽग एरेक, बेबिलोन नु सुसनबा एलामि मना मे़वये़रो, 10 खे़न्नु सोसोरिक् वेॽ सुवाङ्बा मनाहाॽ, खे़न् मुक्के़गुबा असुरवनिपलरे़ खे़ङ्हाॽ खुन्छिॽ हिम्मोलाम् खे़त्तुसिआङ् सामरिया ये़क्यक् नु नाम्धा पिसाङ्बा युफ्रेतिस ते़ङ्गप्पोबा वेॽ ते़न्हाॽओ युक्खुसिआङ् वये़॥” 11 सक्इङ्घङ्ङो कन् पाःन्निन् मे़साप्तुआङ् पत्छे़— “नाम्धा पिसाङ् युफ्रेतिसबा मनाहाॽ, आदाङ्बारे़ के़से़वारोबाहाॽलाम् पयम् हाङ् अर्तासास्ते़ से़वारो— 12 “आनिगे पयम् हाङ्ङिल्ले़ कन् पाःन्निन् कुसिङ् के़निःत्तुर के़लॽबा आनिगे इःत्तुम्बे़, आदाङ्बारे़ के़हाङ्जुम्मोबा वेॽ ते़ङ्गप्हाॽओलाम् के़दाबा यहुदिहाॽ यरुसले़ःम्मो मे़युङ्ॽ हे़क्क्याङ् खे़न् ताक्के़भे़ॽबा नु पिफ्युङ्बा ये़क्यक्किन् याम्मो मे़जोगुर मे़याक्॥ खे़ङ्हाॽरे़ लुङ्धाक्किन् से़प्मा मे़हेःक्तुआङ् सुःप्मा मे़जोगुॽ॥ 13 आदाङ्बा हाङ्ङे, कन् ये़क्यक्किन् याम्मो चुक्काङ् कॽयोबा लुङ्धाक्हाॽ चोःक्मा मे़सुरुने़भग्र कन् मनाहाॽरे़ एःङ्याङ् हुङ्मा मे़ले़रुॽ हे़क्क्याङ् पयम् हाङ्ङिल्ले़ के़याङ् याङ्मो याङ्साहाॽ सुःल्लिक् पोङ्ॽ॥ 14 खे़ब्याङ् आनिगे पयम् हाङ्ङिल्ले़ कुयुक्को के़वाॽबा पोःक्खिगे़बाल्ले़ चोगुल्ले़ अक्खे पोङ्बा आनिगे ओमे़प्मा मे़सुक्तुम्बे़न् हे़क्क्याङ् हाङ्ङिन् आनिगे कन् सुजा पिआसिगे़ 15 आदाङ्बारे़ के़म्बा के़न्धे़बासिरे़ मे़साप्तु मे़ने़स्सुबा हाङ्जुम्मोबा साप्लामुन्देहाॽओ कोःप्मा पाङ्घे़से़ॽ॥ कन् यरुसले़म ये़क्यक्किन् आभे़ल्ले़साङ् पिफ्युङ् के़जोःक्पा ये़क्यक् नु उन्छेःन्बा ये़म्माङ्धोए हाङ् नु ते़ङ्गप्पोबा युक्साबाहाॽ ये़त्तुक्खे के़जाःप्पा वये़बा पाःन्निन् आदाङ्बारे़ निङ्वाॽ के़घोसुॽ॥ कन् ये़क्यक्कोबा मनाहाॽ युक्को कप्मासि आभे़ल्ले़साङ् के़साक्पा पोःक्खे़आङ् वाॽ॥ खे़ल्ले़चोगुल्ले़ ये़क्यक्किन् खाप्पुथ्यःङ् मे़जोगुआङ् वये़॥ 16 कन् ये़क्यक्किन् याम्मो मे़जोगु मे़सुरु हे़क्क्याङ् कॽयोबा लुङ्धाक्हाॽ मे़से़त्तु मे़सुरुने़भग्र आदाङ्बारे़ युफ्रेतिस वहःङ्ङिल्ले़ नाम्धा पिसाङ्बा ते़ङ्गप्पो युक् चोःक्मा के़न्छुक्तुन् के़लॽबा पाःन्निन् हाङ्ङिल्ले़ निङ्वाॽ के़घोसुर के़लॽबा आनिगे निङ्वाॽ चोगुम्बे़॥” 17 हाङ्ङिल्ले़ अक्तङ्बा नोगप् हाक्तुसि— “तुम् हाङ्युक्पा रेहुम, ते़ङ्गप्पोबा सुहाङ्मिबा सिम्सै हे़क्क्याङ् सामरिया नु युफ्रेतिस नाम्धा पिसाङ्बा ते़ङ्गप्पो के़युङ्बा वेॽ के़रे़क् फाॽबाङ् तेःङ्जुम्हाॽ से़वारो— 18 “खिनिॽ याप्मि के़हाक्तिबा सक्इङ्घङ्ङिन् पान् मे़ले़क्खुआङ् आङ्गाॽ खे़प्सुङ्ल मे़निरु मे़बिराङ्॥ 19 लत्छा साॽमारे़ लागि इङ्जाङ् पिरुङ्सिङ् हे़क्क्याङ् कन् पाःन्निन् आङ्गाॽ निङ्वाॽ खोसुङ् उन्छेःन्बा ये़म्माङ्धोए यरुसले़ःम्मिल्ले़ हाङ् युक्किल्ले़ कुदक्ले़ङ्वाओ पिफ्युङ् चोगुआङ् वाॽ हे़क्क्याङ् पिफ्युङ्बा नु हयङ्किल्लिङ् के़जोःक्पाहाॽरे़ मे़धिम्सुआङ् वाॽ॥ 20 के़धुम्बा हाङ्हाॽरे़ यरुसले़ःम्मो के़रे़क् युफ्रेतिस नाम्धा पिसाङ्बा ते़ङ्गप्पो हाङ्युक् मे़जोगुआङ् मे़वाॽ, हे़क्क्याङ् मनाहाॽरे़ हाङ्जुम्बा एःङ्याङ् नु लाजेॽबा एःङ्याङ् मे़भोक्खुआङ् खे़ङ्हाॽ मे़बिरुसिआङ् वाॽ॥ 21 खे़ल्ले़चोगुल्ले़ आङ्गाॽ याम्मो वेॽ इङ्जाङ् मे़न्जोःक्के थारिक् खे़न् मनाहाॽरे़ ये़क्यक् चोःक्मा याःम्बक्किन् मे़न्जोगुन्ल फाॽआङ् इङ्जाङ् पिरे़म्सिम्मे़ॽ॥ 22 कन् पाःन्नो खिनिॽ चोःक्मा के़बोङ्बा याःम्बक्किन् कुनामे़न्छाॽ मे़मे़त्ते़म्मिन्ने़ॽ॥ कन् खिमो चोगे़म्देसे़म्मे़ॽ हे़क्क्याङ् हाङ्जुम्मिल्ले़ कुनुॽमा कुदामारे़ लागि थे़माआङ् हान्ति मे़बोङ्ने़ल्ल॥” 23 पयम् हाङ् अर्तासास्तरे़ खे़न् कुसक्इङ्घङ्ङिन् रेहुम, सिम्सै नु खुन्छिॽ तेःङ्जुम्हाॽ मे़निरुआङ् खे़म्मा मे़बाङ्घुसिनुमे़ःन्ने खे़ङ्हाॽ पजात् मे़जात्ते़र यरुसले़ःम्मो मे़बे हे़क्क्याङ् याम्मो ये़क्यक् चोःक्मा याःम्बक्किन् यहुदिहाॽ चोक् मे़म्भाःक्तुसिन्लो॥ 24 कम्भलॽरिक् यरुसले़ःम्मो यहवे दाङ्बाल्ले़ कुहिम् चोःक्मा याःम्बक्किन् चक् लॽरे़॥ फारस लाजेॽबा पयम् हाङ् दाराःल्ले़ हाङ्युक् चोगुबा तङ्बे ने़न्छि थारिक् के़रे़क् परिक्ले़ माङ्हिम् चोःक्मा याःम्बक्किन् मे़ले़रुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.