ए़ज्रा 3 - लिम्बुले़त्ति तोःम्मा ते़न् याम्मो मे़जोगु 1 नुसि ला थारिक् इस्राइलिहाॽ आबाङे खुन्छिॽ ये़क्यक्हाॽओ मे़युङे़ मे़गरे़॥ खे़न् एगाङ् खे़ङ्हाॽ के़रे़क् यरुसले़ःम्मो थिक्हुप् मे़बोःक्खे़आङ् मे़जुप्से़॥ 2 खे़ब्याङ् निङ्वाॽफुमाङ्ङिल्ले़ कुमनाहाॽ मोसाःल्ले़ पिरुसिबा साम्योथिम् इङ्जाङ्ङो साप्ते़आङ् के़बप्पा इङ्जाङ् कुइसिक् खे़ङ्हाॽरे़ खे़प्मो खुन्छिॽ ले़त्तिहाॽ तोःम्मारे़ लागि योसादाके़ल्ले़ कुस्सा येसुआन्, खुने़ॽ कुन्देङ् कुन्जुम् निङ्वाॽफुसाम्बाहाॽ, सालतिएलरे़ कुस्सा यरुबाबेल नु खुने़ॽ कुगाॽइहाॽरे़ इस्राइलबा निङ्वाॽफुमाङ्ङो ले़त्ति तोःम्मादे़न् मे़जोगु॥ 3 मे़दे़म्सु मे़देॽरुसिबालाम् के़नुःङ्बा के़भे़म्बा मनाहाॽ लाजेॽओ के़युङ्बा के़याःक्पा मनाहाॽनु मे़गिसे़साङ् खे़ङ्हाॽरे़ तगिबा ते़न्नोए ले़त्ति तोःम्मादे़न् मे़जोगु॥ खे़न् एगाङ् याम्मो खे़ङ्हाॽरे़ थिक्याःन्धक् खे़प्मो तानाम् नु युःन्छिक्पा मिधिङ्मनादेमनाबा सिदुङ्जभा तोःम्मा मे़हेःक्तु॥ 4 खे़न् एगाङ् खे़ङ्हाॽरे़ साम्योथिम्मो साप्ते़आङ् के़बप्पा कुइसिक् याक्सा याःक्मा साःङ्गाहिम् तङ्नाम् मे़दोसु॥ थिक्याःन्धक् खे़न् ये़न्नो तोःम्मा के़बोङ्बा मिधिङ्मनादेमनाबा सिदुङ्जभाहाॽ मे़दोन्दु॥ 5 खे़न्नुःल्ले़ वेॽ थिक्याःन्धक् मिधिङ्मनादेमनाबा सिदुङ्जभा, लादुप्पा ये़न्नो तोःम्मनाबा सिदुङ्जभा नु यहवे दाङ्बाल्ले़ पाःत्तुबा कुइसिक् के़रे़क् सेसे तङ्नाम्हाॽओबा सिदुङ्जभा मे़दोन्दु॥ खे़न्नु सोसोरिक् यहवे दाङ्बे़ल्ले़ कुलागि आबाङे खुन्छिॽ निङ्वाःल्ले़ हुक्वा याङ्हाॽआङ् खे़ङ्हाॽरे़ मे़दोन्दु॥ 6 मनाहाॽरे़ खे़न् ये़म्मो थारिक् माङ्हिम्मिन् चोःक्मा मे़न्हेःक्के वये़साङ् खे़ङ्हाॽरे़ नुसि लाओबा थिक्सिगेक्पा ये़न्नो यहवे दाङ्बाओ सिदुङ्जभाहाॽ तोःम्मा मे़हेःक्तुरो॥ माङ्हिम्मिन् याम्मो मे़जोगु 7 लुङ् नु सिङ् याःम्बक् के़जोःक्पाहाॽ नाम्याक् पिमासि फाॽआङ् मनाहाॽरे़ याङ् मे़बिरुसि हे़क्क्याङ् ले़बनानलाम् मे़युरुबा साम्माङ्सिङ्हाॽरे़ कुले़क्वाओ तुरोस नु सिदोनओ हाङ्मा के़बोङ्बा कुजा नु चैतुन निःङ्गेॽआङ् मे़बिरुसि॥ साम्माङ्सिङ्हाॽ वरःङ्ङोलाम् योप्पा थारिक् मे़दारु॥ कन् के़रे़क् याःम्बक्हाॽ फारस लाजेॽबा पयम् हाङ् कोरेसे़ल्ले़ चोःक्मा फाःक्तुसिआङ् वये़॥ 8 माङ्हिम् मे़जोगुबादे़न् यरुसले़ःम्मो खे़ङ्हाॽ मे़गे़रे़ मे़द्ये़बा निसिगेक्पा तङ्बेओबा निसिगेक्पा लाओ खे़ङ्हाॽरे़ याःम्बक् चोःक्मा मे़हेःक्तु॥ यरुबाबेल, येसुआ नु खे़ङ्हाॽरे़ के़रे़क् आबाङे खुन्छिॽ लाजेॽबा तेःङ्जुम्हाॽ, निङ्वाॽफुसाम्बाहाॽ हे़क्क्याङ् ले़बिहाॽ नु से़क्खाःल्ले़ मे़दे़म्सु मे़देॽरुसिबालाम् यरुसले़ःम्मो के़नुःङ्बा के़दाबा के़रे़क् मनाहाॽ खे़न् याःम्बक्को मे़भन्छिङ्॥ निबोङ् तङ्बे इग्र खे़न्नुःल्ले़ यरिक् तङ्बे के़गे़प्पा के़रे़क् ले़बिहाॽ माङ्हिम्मिन् याम्मो चोःक्मा याःम्बक्को लक्पे़न्साबा पोङ्मारे़ लागि मुरा मे़मे़त्तुसि॥ 9 ले़बि येसुआन् नु खुने़ॽ कुस्साहाॽ, कुगाॽइहाॽ, कादमिएल हे़क्क्याङ् खुने़ॽ कुस्साहाॽरे़ (होदबियाःल्ले़ कुहिम्सयङ्) हे़क्क्याङ् हेनादादरे़ कुस्साहाॽ॥ खे़ङ्हाॽरे़ खुन्छिॽ साहाॽ नु फुॽनुसाॽहाॽरे़ निङ्वाॽफुमाङ्ङिल्ले़ कुहिम् चोःक्मा याःम्बक्किन् ओमे़प्मा मे़भाॽरुसि—खे़ङ्हाॽ के़रे़क् ले़बि मे़वये़॥ 10 मनाहाॽरे़ माङ्हिम्मिम्ले़ कुबुङ् युङ्मा मे़हेःक्तुआङ् निङ्वाॽफुसाम्बाहाॽ चाङ् मे़जाक्सिङ् हे़क्क्याङ् हुक्को थुत्तुरिःप्पा मे़याङ्सिङ्ङाङ् खुन्छिॽ आबाङे ते़न्नो मे़ये़म्सिङ्॥ आसाप सयङ्बा ले़बिहाॽ खित्छिङ् खित्छिङ् के़लॽबा ताहिप्पिन् मे़याङ्सिङ्ङाङ् मे़ये़म्सिङ्॥ दाउद हाङ्ङिल्ले़ इङ्जाङ् चोगुबा थिम् कुइसिक् खे़ङ्हाॽरे़ यहवे दाङ्बाल्ले़ कुनारा मे़भोसुरो॥ 11 खे़ङ्हाॽरे़ यहवे दाङ्बान् नोगे़न् मे़बिरु हे़क्क्याङ् से़वासाम्लोन् साम्मे़मे़त्तुर अक्खेलॽरिक् निले़ङ् साम्मे़लोरे़रो— “यहवे दाङ्बान् के़नुॽबा चोक्लो हे़क्क्याङ् इस्राइले़न् खुने़ॽ सदादिङ् लुङ्माॽ तुक्तुरो॥” के़रे़क् मनाहाॽ यम्बा इक्लाओ मे़अःक्ते़ हे़क्क्याङ् यहवे दाङ्बाल्ले़ कुनारा मे़भोसु थेआङ्भे़ल्ले़ माङ्हिम्मिल्ले़ कुबुङ् युङ्मा याःम्बक्किन् मे़हेःक्तुआङ् वये़॥ 12 यरिक् काप्पोबा निङ्वाॽफुसाम्बा, ले़बि नु वेॽ हिम्सयङ्बा तुम्भाक्पाहाॽरे़ तगिबा माङ्हिम्मिन् मे़निसुआङ् वये़॥ कन् माङ्हिम्मिल्ले़ कुबुङ् युङ्सिङ्बा मे़निसुआङ् खे़ङ्हाॽ हाःप्मा मे़हेःक्ते़॥ कर खे़प्मो के़वाॽबा वेॽ मनाहाॽग खुन्छिॽ निङ्वाॽ त्ये़आङ् पसःत् मे़सःत्ते़॥ 13 मनाहाॽ मे़सःत्ते़आङ् मे़अःक्ते़बा नु मे़हाबे़बा इक्लाहाॽ आत्तिन्हाॽरे़आङ् एॽए खे़म्मा मे़न्छुक्तुन् थेआङ्भे़ल्ले़ खे़न् इक्लाःल्ले़ लोःक्खुआङ् माःङ्घा माःङ्घा थारिक्काङ् खे़म्दे़त्ते़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.