ए़ज्रा 1 - लिम्बुकोरेसरे़ यहुदिहाॽ नुःङ्मा फाःक्तुसि 1 कोरेसे़न् फारस लाजेॽओ पयम् हाङ् पोःक्खे़बा थिक्सिगेक्पा तङ्बेओ यहवे दाङ्बाल्ले़ माङ्निङ्वाॽपान् के़बाःप्पा यर्मियान् मे़त्तुबा कुबाःन्जाक्किन् के़त्तु॥ कन् यो साप्ते़आङ् के़बप्पा कुइङ्जाङ्ङिन् खुने़ॽ कुहाङ्जुम्मोबा के़रे़क् ते़न्हाॽओ इङ्घङ् से़मारे़ लागि खुने़ॽ साप्तुआङ् हाङुरो— 2 “फारस लाजेॽबा पयम् हाङ् कोरेसे़ल्ले़ कुइङ्जाङ् कन् वाॽरो॥ यहवे दाङ्बा साङ्ग्राम्पेदाङ्बा निङ्वाॽफुमाङ्ङिल्ले़ आङ्गाॽ के़रे़क् इक्सादिङ् खाम्बेःक्मोबा हाङ् चोगाङ्ङाङ् वाॽ हे़क्क्याङ् खुने़ॽ कुलागि यहुदा लाजेॽबा यरुसले़म ये़क्यक्को लत्छा माङ्हिम् चोःक्मा याःम्बक् पिराङ्ङाङ् वाॽ॥ 3 निङ्वाॽफुमाङ्ङिन् खिनिॽ के़रे़क् इस्राइलि खुने़ॽ कुमनाहाॽनु वाॽर॥ खिनिॽ यहुदाबा यरुसले़ःम्मो पेगे़म्मे़ॽ हे़क्क्याङ् माङ्से़वा के़मे़त्तुम्बा यरुसले़ःम्मो के़वाॽबा यहवे दाङ्बा इस्राइलबा निङ्वाॽफुमाङ्ङिल्ले़ कुलागि खे़प्मो याम्मो माङ्हिम् चोगे़म्मे़ॽ॥ 4 वेॽ लाजेॽओ मे़दे़म्सु मे़देॽरुसिबा खुने़ॽ कुभा कुमनाहाॽ नुःङ्मा फे़म्मारे़लागि फाॽमासि चाहाब् मे़जोक्ने़भग्र खुन्छिॽ पाङ्भेॽसाबाहाॽरे़ खे़ङ्हाॽ मे़भाॽरुसिर॥ खुन्छिॽ पाङ्भेॽसाबाहाॽरे़ खे़ङ्हाॽ साम्म्याङ्, युप्पा, चिगक्वाहाॽ हे़क्क्याङ् हिम्मो हिम्थक्साहाॽ नु यरुसले़ःम्मो निङ्वाॽफुमाङ्ङिल्ले़ कुहिम्मो तोःम्मारे़ लागि हुक्वा मे़बिरुसिर॥” 5 खे़ब्याङ् यहुदा नु बेन्यामिन सुवाङ्समा तुम्भाक्पाहाॽ, निङ्वाॽभुसाम्बाहाॽ नु ले़बिहाॽ हे़क्क्याङ् निङ्वाॽफुमाङ्ङिल्ले़ खुन्छिॽ सिक्लुङ्मो सिक्सम्मा निङ्वाॽ पिरुसिआङ् के़वाॽबाहाॽ के़रे़क् यरुसले़ःम्मो पेःक्माआङ् यहवे दाङ्बाल्ले़ कुहिम्मिन् याम्मो चोःक्मा यारिप् मे़बोःक्खे़॥ 6 खे़ङ्हाॽरे़ खुन्छिॽ के़रे़क् पाङ्भेॽसाबाहाॽरे़ यरिक् चिगक्वा सामाहाॽ, युप्पा खप्प्याहाॽ, साम्म्याङ्, चिगक्वाहाॽ, हिम्थक्साहाॽ, वेॽ इमे़ल्लुङ्बा पाःन्हाॽ नु माङ्हिम्मो तोःम्मा के़बोङ्बा हुक्वाहाॽ मे़बिरुसिआङ् खे़ङ्हाॽ मे़भाॽरुसि॥ 7 नबुकदनेसर हाङ्ङिल्ले़ यरुसले़म माङ्हिम्मोलाम् तेॽरुआङ् खुने़ॽ कुमाङ्ङिल्ले़ माङ्हिम्मो युक्खुसिआङ् युङे़बा खप्प्या सामाहाॽ कोरेस हाङ्ङिल्ले़ खे़ङ्हाॽ नुःक्तु पिरुसि॥ 8 खुने़ॽ हाङ्हिम् याङ्युङ्मोबा तुम् सुहाङ्युक्पा मित्रेदाते़न् खे़न् खप्प्याहाॽ पिरुआङ् खुने़ॽ यहुदाबा हाङ्युक्पा सेसबस्सरे़ल्ले़ कुलागि खे़न् चिगक्वा सामाहाॽ लत्छा थामिङ्ङो फोःन्दु॥ 9-10 खे़न् सामाहाॽरे़ कुमिङ् के़बप्पा थामिङ्ङिन् अक्तङ्बा चोगे़रो— हुक्वा तोःम्मा साम्म्याङ् खर्बा—३० हुक्वा तोःम्मा युप्पा खर्बा—१,००० सुक्पा हाःम्मा खर्बाहाॽ—२९ चुजुक्सा साम्म्याङ् खोर्याहाॽ—३० चुजुक्सा युप्पा खोर्याहाॽ—४१० वेॽ खप्प्या सामाहाॽ—१,००० 11 के़रे़क् ५,४०० साम्म्याङ् नु युप्पा खप्प्याहाॽ वये़॥ मे़दे़म्सु मे़देॽरुसिबाहाॽ बेबिलोनलाम् यरुसले़ःम्मो मे़नुःक्खे़ मे़भे़रे़ल्ले़ सेसबस्सरे़ल्ले़ खे़न् के़रे़क् चिगक्वाहाॽ फे़त्तुआङ् यरुसले़ःम्मो फे़रे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.