इजकिएल 3 - लिम्बु1 खुने़ॽ मे़त्ताङ्, “नासिगे़न् थक्ला के़गप्पा मनाए, आङ्गाॽ कन् पिने़र पत्ताबा साप्लाथङ्मान् च्ये़ॽ! खे़ब्याङ् खे़ने़ॽ पेगे़ॽआङ् कॽयो के़बप्पा पाःन्जाःक्किन् इस्राइलबा मनाहाॽ मे़त्ते़से़ॽ॥” 2 खे़ल्ले़चोगुल्ले़ आङ्गाॽ आम्ब्रान् हा मे़त्तुङ्, हे़क्क्याङ् खुने़ॽ आङ्गाॽ खे़न् साप्लाथङ्मान् चामा पिराङ्॥ 3 खुने़ॽ मे़त्ताङ्, “कल्ले़ खे़ने़ॽ के़साप्पोःक्के़न् थिम्से़ॽ॥” हे़क्क्याङ् आङ्गाॽ कन् चाङ्ङिल्ले़ आम्ब्राओ सक्वाघु हे़क्के पलिम्लिम्दे़॥ 4 खे़ब्याङ् खुने़ॽ मे़त्ताङ्, “नासिगे़न् थक्ला के़गप्पा मनाए, खे़ने़ॽ इस्राइलबा मनाहाॽओ पेगे़ॽ हे़क्क्याङ् आङ्गाॽ आइङ्घङ्हाॽ खे़ङ्हाॽ मे़त्ते़से़ॽ॥ 5 खुन्छिॽ पाःन्दाङ्ङिन्ने कुसिङ् निःप्मा के़न्छुक्तुन्बा वेॽ लाजेॽबा मनाहाॽओ खे़ने़ॽ पाङ्ने़देने़र मे़बत्ने़न्ॽ, कर खे़ने़ॽ इस्राइलि हिम्सयङ्हाॽओ पाङ्ने़र पत्ता॥ 6 मेःन्, कुसिङ् निःप्मा के़साक्पा नु ले़मे़न्दे़प्मनाबा पाःन्दाङ् के़बाःप्पा मे़न्छाम् सुवाङ्हाॽओ खे़ने़ॽ पाङ्ने़र मे़बत्तान्॥ आङ्गाॽ हे़क्के चोगुङ्बा हे़क्केःल्ले़, खे़ङ्हाॽरे़ मे़घे़प्सुबा वये़मे़न्! 7 कर इस्राइलबा मनाहाॽरे़ आङ्गाॽ आबाःन्निन्ने मे़ङ्घे़प्सुन्निल्ले़ खे़ने़ॽ के़बाःन्निन् खे़ङ्हाॽरे़ मे़ङ्घे़प्सुन्ॽ! थेआङ्भे़ल्ले़ खे़ङ्हाॽ के़रे़क् कुनिङ्वाॽ के़जिःप्पा नु पान् मे़ङ्घे़म्मनाबा मे़वाॽ॥ 8 कर ओमे़त्ते़ॽ, आङ्गाॽ खे़ने़ॽ खे़ङ्हाॽ हे़क्केए हादिङ् के़धक्पा नु कुनारा सिरेःप् मे़ल्लॽमनाबा चोःक्ने़आङ् वाॽ॥ 9 आङ्गाॽ खे़ने़ॽ के़द्वाबे़न् याक्पेॽनुःल्ले़आङ् पसाक्के़साक्पा चोगुङ् पिने़आङ् पत्! खे़ल्ले़चोगुल्ले़ खे़ङ्हाॽ पिफ्युङ्बासिसाङ् के़निसुसिल्ले़ खे़ङ्हाॽनु मे़गिसे़न्ने़ॽ॥” 10 खे़ब्याङ् खुने़ॽ याम्मो योॽरु, “नासिगे़न् थक्ला के़गप्पा मनाए, आङ्गाॽ मे़त्ने़बा के़रे़क् पाःन्हाॽ सिङ्सिङ् ये़क्ये़क्काङ् खे़प्से़ॽ हे़क्क्याङ् निङ्वाॽओ युक्खे़ॽ॥ 11 खे़ब्याङ् लाजेॽलाम्बा मे़लःत्तु मे़देसुसिबा के़लाजेॽसाबाहाॽओ पेगे़ॽ हे़क्क्याङ् अक्खे मे़त्ते़से़ॽ, ‘मुक्साम्दाङ्बा यहवे दाङ्बे़ल्ले़ अक्खे पाःत्तुॽ!’ खे़ङ्हाॽरे़ खे़ने़ॽ के़बाःन्निन् मे़घे़प्सुसाङ् मे़ङ्घे़प्सुन्छाङ् खे़न् खे़ङ्हाॽ मे़त्ते़से़ॽ॥” 12 खे़न् एगाङ् निङ्वाॽफुमाङ्ङिल्ले़ कुयाम्साम्मिल्ले़ आङ्गाॽ थाःङ् ले़प्माङ् पक्खाङ्, हे़क्क्याङ् आएगाङ् लाम्बा कुदुङ्दुङ् के़लॽबा यम्बा इक्लाधिक् खे़प्सुङ्॥ (खुने़ॽ कुयुक्नादे़न्नो यहवे दाङ्बे़ल्ले़ कुमिमिदिङ्ल्ले़ कुनारा फोसे़म्मे़ॽओ!) 13 कङ्ग खे़न् कुहिङ्वे़त् नावागे़न् चइःत्हाॽरे़ खुन्छिॽ लाप्हाॽ थिक्नु वेॽइन् इॽसिङ्बा नु खे़ङ्हाॽरे़ खुन्छिॽ सिःक्तो काप्लोःक्हाॽ थुरुप्लुप् लॽरिक् लाइक्ते़बा इक्ला वये़॥ 14 निङ्वाॽफुमाङ्ङिल्ले़ कुयाम्साम्मिल्ले़ आङ्गाॽ थाःङ् पक्खाङ्ङाङ् माःङ्घा तेॽराङ्॥ आङ्गाॽ आनिङ्वाॽ मे़न्दाए नु के़साक्पा तुमुङ्ल पेगाङ्, कर यहवे दाङ्बे़ल्ले़ कुहुक्किन् आङ्गाॽ आसम्धाङ् पत्छे़॥ 15 खे़ब्याङ् कबार वहःङ्ङिल्ले़ कुबेसाङ्, लाजेॽलाम्बा मे़लःत्तु मे़देसुसिबा यहुदाबा मनाहाॽ मे़युङे़बादे़न् तेल-अबिबओ त्याङ्॥ आङ्गाॽ आनिङ्वाॽ पङे़आङ् वयाङ् हे़क्क्याङ् आङ्गाॽ खे़ङ्हाॽनु नुसि ये़न् थारिक् युङाङ्लो॥ इस्राइलिहाॽ साम्दिङ् ( इज ३३:१-९ ) 16 नुसि ये़न् एगाङ् यहवे दाङ्बे़ल्ले़ कुइङ्घङ्ङिन् आङ्गाॽओ के़रे़॥ खुने़ॽ मे़त्ताङ्, 17 “नासिगे़न् थक्ला के़गप्पा मनाए, आङ्गाॽ खे़ने़ॽ इस्राइलि सुवाङ्हाॽ ओगे़मे़प्पा चोःक्ने़आङ् वाॽ॥ आप्फाल्ले़साङ् आङ्गाॽलाम् खे़ने़ॽओ इङ्घङ् के़त्तिल्ले़ खे़ने़ॽ खिमो मनाहाॽ साम्दिङ् पिरे़से़ॽ॥ 18 आङ्गाॽ ताक्के़भे़ॽबा मनान् अक्खे मे़त्तुङ्ॽ, ‘खे़ने़ॽ सिमे़ल्ले़ खुम्दिङ्ङो के़ध्ये़आङ् के़वाॽ’ कर खे़ने़ॽ खे़न् साम्दिङ् के़म्बिरुन्ॽ, खे़ङ्हाॽ खुन्छिॽ लायोओए मे़सिरो॥ हे़क्क्याङ् आङ्गाॽ खे़ङ्हाॽरे़ खुन्छिॽ सिमाओ खे़ने़ॽ के़धार याःन्ने़रो॥ 19 कर खे़ने़ॽ खे़ङ्हाॽ साम्दिङ् के़बिरुसिसाङ् लायोलाम् हिम्मा मे़न्दे़न्ने़न् हे़क्क्याङ् चक्मे़ल्लॽए लायो मे़जोगुआङ् मे़बत्ने़भग्र, खे़ङ्हाॽ खुन्छिॽ लायोओ मे़सिरो॥ कर खे़ने़ॽग आप्फेक् के़से़ःप्सिङ्ॽ थेआङ्भे़ल्ले़ खे़ने़ॽ आङ्गाॽ आइङ्जाङ्ङिन् के़घे़प्सु॥ 20 “साम्योबा मनाहाॽ खुन्छिॽ साम्योबा याःम्बक्हाॽलाम् मे़नुःङ् मे़बेःक् हे़क्क्याङ् आङ्गाॽ खे़ङ्हाॽरे़ खुन्छिॽ लाम्मो ने़स्सुङ्बा आघघबा पाःन्हाॽ निनि मे़ल्लाप्तुन्ने़भग्र, खे़ङ्हाॽ मे़सिरो॥ खे़ब्याङ् खे़ने़ॽ खे़ङ्हाॽ साम्दिङ् के़म्बिरुसिन्ने़भग्र, खे़ङ्हाॽ खुन्छिॽ लायोओ मे़सिरो॥ खे़ङ्हाॽरे़ खुन्छिॽ आत्तिन् साम्योबा याःम्बक्हाॽआङ् निङ्वाॽसुम् मे़बोङ्ने़न्, हे़क्क्याङ् आङ्गाॽ खे़ङ्हाॽरे़ खुन्छिॽ सिमाओ खे़ने़ॽ के़धार याःन्ने़रो॥ 21 कर खे़ने़ॽ साम्योबा मनाहाॽ लायो मे़न्जोःक्मा साम्दिङ् के़बिरुसिॽ खे़ब्याङ् खे़ङ्हाॽरे़ के़बाःन्निन् मे़घे़प्सुआङ् लायो चोःक्मा मे़ले़रुने़भग्र, खे़ङ्हाॽ मे़हिङ्ॽ, हे़क्क्याङ् खे़ने़ॽ आप्फेक्काङ् ताङ्केसे़ःप्सिङ्लो॥” 22 खे़ब्याङ् यहवे दाङ्बे़ल्ले़ कुहुक्किन् आङ्गाॽ आसम्धाङ् पत्छे़ हे़क्क्याङ् खुने़ॽ मे़त्ताङ्, “पोगे़ॽ हे़क्क्याङ् ने़ने़बादे़न्नो पेगे़ॽ, आङ्गाॽ खे़प्मो खे़ने़ॽनु ताॽजे़ङ्ङा॥” 23 खे़ल्ले़चोगुल्ले़ आङ्गाॽ पोगाङ्ङाङ् पेगाङ्, खम्भ्याङ् कबार वहःङ्ङिल्ले़ कुबेसाङ् तगि निसुङ्बा सुफो हे़क्के आङ्गाॽ खे़प्मो यहवे दाङ्बे़ल्ले़ कुमिमिदिङ्ङिन् निसुङ्॥ हे़क्क्याङ् आङ्गाॽ खाम्बाङ्ङो साम्बोन् हबत् फन्छिङ्ङाङ्॥ 24 खे़ब्याङ् निङ्वाॽफुमाङ्ङिल्ले़ कुयाम्साम्मिन् आङ्गाॽओ ये़ हे़क्क्याङ् आङ्गाॽ तक्पे़त् ये़प्साङ्॥ खुने़ॽ आङ्गाॽनु पारे़आङ् मे़त्ताङ्, “के़हिम्मो पेगे़ॽ, हे़क्क्याङ् आप्फेक् साक्सिङ्ङे़ॽआङ् युङे़ॽ॥ 25 नासिगे़न् थक्ला के़गप्पा मनाए, खे़ने़ॽ खे़प्मो इदाःक्हाॽरे़ के़म्घेःङ्ॽ खे़ल्ले़चोगुल्ले़ खे़ने़ॽ मनाहाॽओ पेःक्मा के़न्छुक्ने़न्॥ 26 हे़क्क्याङ् आङ्गाॽ खे़ने़ॽ के़ल्सोःप्पान् के़घाःम्दाःक्मो खिप्तुआङ् पत्ल चोगुङ्ॽ हे़क्केलॽरिक् खे़ने़ॽ मे़म्बाःप्मनाबा नु खे़ङ्हाॽ फे़ःक्मासि मे़न्छुक्मनाबा के़बोङ्ॽ, थेआङ्भे़ल्ले़ खे़ङ्हाॽ पिफ्युङ्बा मे़जोक्॥ 27 कर आङ्गाॽ आइङ्घङ्ङिन् खे़ने़ॽओ के़त्तिल्ले़, आङ्गाॽ खे़ने़ॽ के़ल्सोःप्पान् फाःक्खुङ्ॽ, हे़क्क्याङ् आङ्गाॽ खे़ने़ॽ के़बाःत्ल याःन्ने़॥ खे़ब्याङ् खे़ने़ॽ खे़ङ्हाॽ अक्खे के़मे़त्तुसिॽ, ‘मुक्साम्दाङ्बा यहवे दाङ्बे़ल्ले़ अक्खे पाःत्तुॽ!’ आत्तिन्हाॽरे़ खे़म्मा निङ्वाॽ मे़जोगुॽ खे़ङ्हाॽरे़ मे़घे़प्सुॽ, कर आत्तिन्हाॽ खे़म्मा मे़न्दे़न्ने़न् खे़ङ्हाॽरे़ मे़ङ्घे़प्सुन्ॽ, थेआङ्भे़ल्ले़ खे़ङ्हाॽग पिफ्युङ्बासिरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.