इजकिएल 1 - लिम्बुइजकिएलरे़ के़रे़क्नुःल्ले़ तगि निसुबा निङ्वाॽफुमाङ्ङिल्ले़ कुसुफो (इजकिएल १:१–७:२७) निङ्वाॽफुमाङ्ङिल्ले़ कुहाङ्युक्ना 1 आङ्गाॽ तङ्बे सुम्बोङ् के़राङ्बा लिसिगेक्पा ला ङासिगेक्पा ये़न्नो, लाजेॽलाम् मे़लःत्तु मे़देसुसिबा यहुदाबा सङ्जुम्भोहाॽनु सोरिक् बेबिलोन लाजेॽओबा कबार वहःङ्ङिल्ले़ कुयाओ आङ्गाॽ इजकिएःल्ले़न् वयाङ्ङिल्ले़ ताङ्साङ्बे़न् हरे़ हे़क्क्याङ् आङ्गाॽ निङ्वाॽफुमाङ्ङिल्ले़ कुसुफोहाॽ निसुङ्॥ 2 यहोयाकिन हाङ्ङिन् लाजेॽलाम्बा मे़दे़म्सु मे़देॽरुबा ङासिगेक्पा तङ्बेओ कन् अक्खे पोःक्खे़आङ् वये़॥ 3 (बेबिलोनिहाॽरे़ खुन्छिॽ लाजेॽबा कबार वहःङ्ङिल्ले़ कुयाओ यहवे दाङ्बे़ल्ले़ कुइङ्घङ्ङिन् बुजिरे़ कुस्सा निङ्वाॽफुसाम्बा इजकिएलरो के़रे़, हे़क्क्याङ् यहवे दाङ्बे़ल्ले़ कुहुक्किन् खुने़ॽ कुसम्धाङ् पत्छे़बा निङ्वाॽ खोसु॥) 4 आङ्गाॽ थाःङ् ओमे़त्तुङ्ङिल्ले़ थाङ्गे़त् थोलाम्बा खइक् खइक् के़इक्सिङ्बा सुरित् केजङ् हुःक्ते़ ये़र पत्छे़बा, माक्स्दिःङ्ग्याःप्पा खाॽम्मिःप्पा लुम्मो से़न्दाङ्गे़न् ओःत्ति साःम्भे ले़क्ते़र पत्छे़बा निसुङ्॥ खे़प्मो खाॽमिःत्तिल्ले़ कुलुम्मो मि यागे़, हे़क्क्याङ् मिःल्ले़ कुलुम्मो कासान् योःन्दे़बा कुइसिक् तिल्ले़क् तिल्ले़क् ले़क्ते़र पत्छे़॥ 5 खाॽमिःत्तिल्ले़ कुलुम्मोलाम् मना हे़क्तङ्बा निगे़दे़प्पा लिसि कुहिङ्वे़त् थक्साहाॽ मे़लःन्दे़॥ 6 कर के़रे़क्ले़ खुन्छिॽ लिसि लिसि नारा नु लिसि लिसि लाप् पत्छे़॥ 7 खे़ङ्हाॽरे़ खुन्छिॽ लाङ्हाॽ तोॽदोःम्बा चोगे़ हे़क्क्याङ् खुन्छिॽ लाङ्दाप्पेॽहाॽ करःङ् पित्ते़ल्ले़ कुलाङ् तोॽभेःत् हे़क्तङ्बा चोगे़ खे़म्ब्याङ् इःङ्मनाबा कासा कुइसिक् तिल्ले़क् तिल्ले़क् ले़क्ते़॥ 8 खे़ङ्हाॽरे़ खुन्छिॽ लिसि लाप्हाॽ सिगाङ् मना हुक्हाॽ निमा सुक्तुङ्॥ हे़क्केलॽरिक् के़रे़क् थक्साहाॽरे़ खुन्छिॽ लिसि नारा नु लिसि लाप्हाॽ पत्छे़॥ 9 के़रे़क् कुहिङ्वे़त् थक्साहाॽरे़ खुन्छिॽ लाप्पिल्ले़ कुसम्मिल्ले़ वेॽसमा लाप्पिल्ले़ वेॽ थक्साःल्ले़ कुलाप्पिल्ले़ कुयान् सुसुआङ् कब्रिङ्बा पोःक्खे़आङ् पत्छे़॥ खे़ङ्हाॽ के़रे़क् तगि मे़बेःल्ले़ खुन्छिॽ थक्किन् ना नु कत्ना मे़न्हिए सोसोरिक् लाङ्मे़घेगे़॥ 10 के़रे़क्ले़ खुन्छिॽ तगाङ् मे़न्छाम् याप्मि नारा, चुप्साङ् ले़प्माङ् खिरिङ्बा नारा, फे़न्छाङ् ले़प्माङ् पित् नारा नु एगाङ् ले़प्माङ् कक्कफिःक्मा नारा पत्छे़॥ 11 के़रे़क्ले़ कुगाप्थिक् लाप्हाॽ हप्फे़ मे़मे़त्तुआङ् पत्छे़, कुगाप्थिक् हप्फे़ के़भे़बा लाप्हाॽरे़ वेॽसमाल्ले़ कुलाप्हाॽ सुसुआङ् पत्छे़, खे़ब्याङ् ने़त्छि लाप्हाॽरे़ आबाङे खुन्छिॽ थक्किन् ते़प्तुआङ् पत्छे़॥ 12 याम्साम्मिल्ले़ सेगुबा आत्ति पिसाङ्साङ् खिरि मे़न्हिसिङ्ङे खे़ङ्हाॽ कुदोःप्मा मे़बे॥ 13 कुहिङ्वे़त् थक्साहाॽ के़दिःप्पार के़बप्पा मिघाःङ् इग्र के़ओःप्पा त्याःल्लोत् हे़क्तङ्बा निमे़धाबे़, हे़क्क्याङ् खे़ङ्हाॽरे़ खुन्छिॽ लुम्मो ना नु कत्ना साःम्भे ले़क्ते़बा हे़क्के लॽरे़॥ 14 हे़क्क्याङ् कुहिङ्वे़त् थक्साहाॽ साःम्भे ले़क्ते़बा कुइसिक् ना नु कत्ना मे़सुःक्ते़आङ् मे़वये़॥ 15 कन् लिसि कुहिङ्वे़त् थक्साहाॽ आङ्गाॽ ओमे़त्तुङ्सिङ्ल पत्छाङ्ङिल्ले़सा, के़रे़क्ले़ खुन्छिॽ पेसाङ् खाम्बाङ् के़सुबा लिसि काप्लोःक्हाॽ निसुङ्सिङ्, खे़न् के़रे़क्ले़न् लत्छा लत्छा काप्लोक् पत्छे़॥ 16 काप्लोःक्हाॽ मुधिङ्लुङ्लाम् चोःक्मनाबा हे़क्के तिल्ले़क् तिल्ले़क् के़लॽबा चोगे़॥ के़रे़क् लिसि काप्लोःक्हाॽ लत्थिक् परिक्पा निमे़दे़त्ते़ हे़क्क्याङ् लत्थिक् परिक्ले़ मे़जोगुबा चोगे़, के़रे़क् काप्लोःक्हाॽ लुम्मो लत्छा लत्छा वेॽ काप्लोक् पत्छे़॥ 17 खे़न् कुहिङ्वे़त् नावागे़न् चइःत्हाॽ तगि मे़धासिङ्ङिल्ले़, तक् मे़मे़त्तुबा आत्ति पिसाङ् मे़बेसाङ् खिरि मे़न्हिसिङ्ङे आत्तिसाङ् पेःक्मा मे़सुक्ते़॥ 18 खे़न् काप्लोःक्हाॽरे़ कुगःङ्ग्याहाॽ चाङ्जाङ्बा नु किप्मागे़घुबा चोगे़, खे़ब्याङ् लाकात्पा कुया कब्रिङ् मिक्के मिक् के़बप्पा चोगे़॥ 19 कुहिङ्वे़त् नावागे़न् चइःत्हाॽ मे़बेःल्ले़ काप्लोःक्हाॽआङ् सोसोरिक् मे़लोःक्ते़॥ खे़ङ्हाॽ थो मे़बेःल्ले़, काप्लोःक्हाॽआङ् थो मे़बे॥ 20 कुहिङ्वे़त् नावागे़न् चइःत्हाॽरे़ खुन्छिॽ याम्साम्मिन् खे़न् काप्लोःक्हाॽओ यागे़॥ खे़ल्ले़चोगुल्ले़ निङ्वाॽफुमाङ्ङिल्ले़ कुयाम्साम्मिन् आत्तान् आत्तान् पे, काप्लोःक्हाॽ नु कुहिङ्वे़त् थक्साहाॽआङ् खे़प्मोए मे़बे॥ 21 खे़न् कुहिङ्वे़त् थक्साहाॽ मे़मुन्दे़ल्ले़, खे़न् काप्लोःक्हाॽआङ् मे़मुन्दे़॥ कुहिङ्वे़त् थक्साहाॽ मुम्मा मे़नाॽरे़ल्ले़ काप्लोःक्हाॽआङ् मुम्मा मे़नाॽरे़॥ कुहिङ्वे़त् थक्साहाॽ थो मे़बेःल्ले़ काप्लोःक्हाॽआङ् थो मे़बोगे़, थेआङ्भे़ल्ले़ खे़न् कुहिङ्वे़त् थक्साहाॽरे़ खुन्छिॽ याम्साम्मिन् खे़न् काप्लोःक्हाॽओ यागे़॥ 22 खे़ङ्हाॽरे़ खुन्छिॽ सम्धाङ्बादे़न्निन् ताङ्साङ्बा हे़क्के ताम्दाम्बा के़भे़सिङ्बा नाङ् हे़क्के फदाङ्बा के़ओःप्पा चोगे़॥ 23 कन् के़भे़सिङ्बादे़न्निल्ले़ कुसिःक्तो खे़न् कुहिङ्वे़त् थक्सा लाप्हाॽ हप्फे़ मे़भे़सुआङ् वेॽ लाप्हाॽनु मे़दुम्सुआङ् पत्छे़, के़रे़क्ले़ खुन्छिॽ ने़त्छि लाप्हाॽरे़ खुन्छिॽ थक्किन् मे़दे़प्तुआङ् पत्छे़॥ 24 खे़ङ्हाॽ मे़मुन्दे़ल्ले़, खे़ङ्हाॽरे़ खुन्छिॽ लाप् लाइःक्ते़बे़न् वरःङ् कुइसिक् सःक्ते़बा इग्र मुक्साम्दाङ्बे़ल्ले़ कुइक्ला हे़क्के लॽरे़बा इग्र यरिक् थक्सुबा तुरा लाङ्मे़घेगे़बा कुइसिक् खे़प्सुङ्॥ खे़ङ्हाॽ मे़नाःम्सिङ्ङे़ल्ले़ खुन्छिॽ लाप्हाॽ यो सोरो मे़धासु॥ 25 खे़ङ्हाॽ थःप्पे़त् मे़ये़म्सिङ्ङाङ् खुन्छिॽ लाप्पिन् यो मे़धासुल्ले़, खे़ङ्हाॽरे़ खुन्छिॽ सम्धाङ्बा से़ल्ले़ङ्गो के़भे़सिङ्बादे़न्नोलाम् इक्लाधिक् पारे़लःन्दे़॥ 26 खे़ङ्हाॽरे़ खुन्छिॽ सम्धाङ्बा के़भे़सिङ्बादे़न्निल्ले़ कुसम्धाङ् हिःक्कङ्कङ्बा मुधिङ्लुङ्ङिल्ले़ चोःक्मनाबा हाङ्युक्ना हे़क्के निगे़धाःप्पा थिक् ने़स्से़॥ हे़क्क्याङ् कन् हाङ्युक्नाःल्ले़ के़रे़क्नुःल्ले़आङ् थाःङ्धाक् मना हे़क्तङ्बा निगे़दे़प्पा थिक् युङे़॥ 27 खे़ल्ले़ कुगे़ङ्ङाङ् थोहाङ् ले़प्माङ् के़रे़क् पिसाङ् मि के़दिःप्पा, योःम्मनाबा पित्तोलि के़दिःप्पा मि हे़क्के लॽरे़॥ हे़क्क्याङ् कुगे़ङ्ङाङ् योहाङ् ले़प्माङ् कुहाङ्वा कुमाङ्वाःल्ले़ थोॽरुबा हुरुरु के़दिःप्पा मि हे़क्तङ्बा निदे़त्ते़॥ 28 वहित् थासुबा ये़न्नो खाॽमिःत्तो नाम्धिङ्गोन् निधाःप्पा हे़क्के से़ल्ले़ङ् से़ल्ले़ङ् के़ओःप्पाधिक् खुने़ॽ कुगब्रिङ् पिसाङ् पत्छे़॥ आङ्गाॽ यहवे दाङ्बे़ल्ले़ कुमिमिदिङ्ङिन् अक्तङ्बा निसुङ्॥ आङ्गाॽ कन् निसुङ्ङाङ् खाम्बाङ्ङो साम्बोन् हबत् फन्छिङ्ङाङ्, खे़ब्याङ् कुभारे़ आङ्गाॽ पाःन्छाःत्ताङ्ल पत्छाङ्बा इक्ला खे़प्सुङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.