लाम्दिक् 8 - लिम्बुपे़दःक्हाॽलाम् मिङ्देॽ पोगे़ 1 खे़ब्याङ् यहवे दाङ्बे़ल्ले़ मोसान् मे़त्तु, “फारोओ पेगे़ॽ हे़क्क्याङ् यहवे दाङ्बे़ल्ले़ अक्खे पाःत्तुर पत् मे़त्ते़ॽ, ‘आङ्गाॽ आमनाहाॽ पेःक्मा फाःक्ते़से़ॽ हे़क्क्याङ् मे़बेःक्काङ् खे़ङ्हाॽरे़ आङ्गाॽ माङ्से़वा मे़मे़त्ता॥ 2 खे़ने़ॽ मनाहाॽ पेःक्मा के़म्भाःक्तुसिन्ने़भग्र आङ्गाॽ खे़ने़ॽ के़रे़क् के़लाजेॽओ पे़दःक्हाॽ पाङ्घुङ्सिङ्ङाङ् तुक्खे चाःत्ने़॥ 3 निल वहःङ्ङिन् पे़दःक्हाॽरे़ सधे़क् मे़धिम्सुॽ, हे़क्क्याङ् खे़न् पे़दःक्हाॽ खे़ने़ॽ के़हिम्मो, के़इम्मादे़न् याक्फाङ्ङो, के़ने़त्नाओ, के़सुहाङ्युक्पाहाॽ नु के़मनाहाॽरे़ खुन्छिॽ हिम्हाॽओ हे़क्क्याङ् के़दःक् थोःक्मादे़न्नो नु फेॽरुम् सॽमा खप्प्याओआङ् मे़दाःॽ॥ 4 खे़न् पे़दःक्हाॽ खे़ने़ॽ नु खे़ने़ॽ के़मनाहाॽओ हे़क्क्याङ् के़रे़क् के़सुहाङ्युक्पाहाॽओ पित्चाक् पित्चाक् मे़बिन्ल मे़दाःॽ॥’” 5 खे़ब्याङ् यहवे दाङ्बे़ल्ले़ मोसान् मे़त्तु, “हारुने़न् मे़त्ते़ॽ, ‘के़दक्काःत्तिन् याङ्सिङ्ङे़ॽआङ् वहःङ्हाॽओ, खावाहाॽओ नु वरक्हाॽओ के़हुक्किन् सन्छे़ॽ, हे़क्क्याङ् मिस्र कुले़ःम् पे़दःक्हाॽ मे़दार॥’” 6 कल्ले़चोगुल्ले़ मिस्रबा च्वाःत्हाॽओ हारुने़ल्ले़ कुहुक्किन् सन्छु हे़क्क्याङ् पे़दःक्हाॽ मे़लःन्दे़आङ् लाजेन् सिदे़प् मे़दे़प्तु॥ 7 कर कित्चाक्हाॽरे़आङ् मिक्ले़ःङ्मालाम् हे़क्केए मे़जोगु, हे़क्क्याङ् लाजेॽओ पे़दःक्हाॽ मे़लःत्तुसि॥ 8 खे़ब्याङ् फारो हाङ्ङिल्ले़ मोसान् नु हारुने़न् खुन्छिॽ उःत्छे़ पाङ्घुसिआङ् मे़त्तुसि, “आङ्गाॽ नु आमनाहाॽलाम् पे़दःक्हाॽ खे़त्तुदेसुसिर फाॽआङ् यहवे दाङ्बान् पेलि फाक्ते़से़ॽ, हे़क्क्याङ् यहवे दाङ्बे़ल्ले़ कुलागि सिदुङ्जभा तोःन्छे़ खे़न्छिॽ मनाहाॽ पेःक्मा फाःक्तुङ्सिङ्ॽ॥” 9 मोसाःल्ले़ फारोन् मे़त्तु, “आङ्गाॽ सःत्तार खे़ने़ॽ के़लागि पेलिगे़न् तुवा चोगुङ्ॽ॥ खे़ने़ॽ, के़सुहाङ्गे़म्बाहाॽ नु के़मनाहाॽरे़ खुन्छिॽ लागि आङ्गाॽ आभे़ल्ले़ पेलि फाक्मा के़बोङ्बा खे़न् ये़म्मिन् निःन्धो चोगाङ् पिराङ्ङे़ॽ॥ खे़ब्याङ् के़रे़क् पे़दःक्हाॽ मे़मा हे़क्क्याङ् निल वहःङ्ङोरक् खोमे़दे़त् वेॽ आत्तिआङ् खोमे़न्दे़त्ने़न्॥” 10 फारोल्ले़ मे़त्तु, “ताःन्दिक् आङ्गाॽ आलागि पेलि फाक्ताङ् पिराङ्ङे़ॽ॥” मोसाःल्ले़ मे़त्तु, “खे़ने़ॽ के़बाःत्तुबा हे़क्केए आङ्गाॽ चोगुङ्ॽ, खे़ब्याङ् यहवे दाङ्बा निङ्वाॽफुमाङ्ङिन् हे़क्तङ्बा वेॽ हाःत्ताङ् होप् फाॽआङ् खे़ने़ॽ निङ्वाॽ के़घोसुॽ॥ 11 पे़दःक्हाॽ खे़ने़ॽ नु खे़ने़ॽ के़हिम्हाॽओलाम् हे़क्क्याङ् के़सुहाङ्गे़म्बाहाॽ नु खे़ने़ॽ के़मनाहाॽओलाम् मे़नुःङ् मे़बेःक्, हे़क्क्याङ् निल वहःङ्ङोरक् मे़याक्॥” 12 खे़ब्याङ् मोसान् नु हारुने़न् फारोओलाम् लःन्दे़सिआङ् पेगे़त्छि हे़क्क्याङ् लाजेॽओ के़दाबा पे़दःक्हाॽ मे़मार फाॽआङ् मोसाःल्ले़ यहवे दाङ्बान् पेलि फाक्तु॥ 13 यहवे दाङ्बे़ल्ले़ मोसाःल्ले़ पेलि फाक्तुबान् खे़प्सु हे़क्क्याङ् हिम्हिम्, लक्खुम् नु प्याङ्सि इक्ताप्हाॽओ के़वाॽबा पे़दःक्हाॽ हर्गुप् मे़स्ये़॥ 14 खे़न् के़सिबा पे़दःक्हाॽ मिस्रिहाॽरे़ मे़भुक्खुसिआङ् मे़लुप्सुसि हे़क्क्याङ् लाजेःन्ने नाम्सुमा हेःक्ते़॥ 15 आल्ल हाङ्ङिल्ले़ पे़दःक्हाॽ मे़स्ये़बा निसुआङ् यहवे दाङ्बाल्ले़ पाःत्तुबा हे़क्केए कुनिङ्वाॽओ हादिङ् थक्मा हेःक्ते़ हे़क्क्याङ् मोसान् नु हारुने़ल्ले़ खुन्छिॽ पाःन्निन् मे़घे़प्सुन्लो॥ याङ्नाहाॽलाम् मिङ्देॽ पोगे़ 16 याम्मो यहवे दाङ्बे़ल्ले़ मोसान् मे़त्तु, “हारुने़न् मे़त्ते़ॽ, खुने़ॽ कुदक्काःत्तिल्ले़ खाम्बाङ्ङिन् हिप्तुर हे़क्क्याङ् मिस्र लाजेॽ के़रे़क्पा खाम्हिःक्हाॽ याङ्ना मुजिक् मे़बोङ्ल॥” 17 खुन्छिॽ हे़क्केए चोगे़त्छु॥ हारुने़ल्ले़ तक्काःत्तिन् याङ्सिङ्ङाङ् कुहुक्किन् सन्छु हे़क्क्याङ् खाम्बाङ्ङोबा खाम्हिःक्किन् हिप्तु, खे़ब्याङ् मनाहाॽओ नु थक्साहाॽओ याङ्ना मुजिक्हाॽ मे़जुक्ते़॥ मिस्र लाजेॽ के़रे़क्पा खाम्हिःक्हाॽ याङ्नाए याङ्ना मुजिक् मे़बोःक्खे़॥ 18 फारोल्ले़ कुगित्चाक् के़जोःक्पाहाॽरे़आङ् मिक्ले़ङ्मालाम् याङ्नाहाॽ ताःप्मा मे़गोःत्तुसि, कर मे़न्छुक्तुन्॥ मनाहाॽओ नु थक्साहाॽओ याङ्नाहाॽ आम्भा मे़बत्छे़॥ 19 हे़क्क्याङ् कित्चाक्हाॽरे़ हाङ्ङिन् मे़मे़त्तु, “कन् याःम्बक्किङ्ग निङ्वाॽफुमाङ्ङिल्ले़ चोगुबारो!” कर हाङ्ङिन् हाबा हादिङ् थक्ते़आङ् युङे़ हे़क्क्याङ् यहवे दाङ्बे़ल्ले़ पाःत्तुबा हे़क्के मोसान् नु हारुने़ल्ले़ खुन्छिॽ पाःन्निन् खे़म्मा मे़दे़न्दे़न्लो॥ सिजाहाॽलाम् मिङ्देॽ पोगे़ 20 याम्मो यहवे दाङ्बे़ल्ले़ मोसान् मे़त्तु, “ताःन्दिक् तानाम्सा पोःक्काङ् हाङ्ङिन् वहःङ्ङो पेःक्किल्ले़ खुने़ॽ तुमे़आङ् मे़त्ते़ॽ, ‘यहवे दाङ्बे़ल्ले़ अक्खे पाःत्तु, आङ्गाॽ आमनाहाॽ पेःक्मा फाःक्ते़से़ॽ हे़क्क्याङ् खे़ङ्हाॽरे़ आङ्गाॽ माङ्से़वा मे़मे़त्तार॥ 21 आङ्गाॽ आबाःन्निन् खे़म्मा के़न्दे़न्ने़न्ने़भग्र आङ्गाॽ खे़ने़ॽ के़हिम्मो, खे़ने़ॽ के़सुहाङ्गे़म्बाहाॽरे़ खुन्छिॽ हिम्मो नु के़मनाहाॽरे़ खुन्छिॽ हिम्मो सिजाहाॽ पाङ्घुङ् तासुङ्सिङ्ङाङ् खे़ने़ॽ खुम्दिङ् पिने़॥ मिस्रबाहाॽरे़ खुन्छिॽ हिम्हाॽ, लाजेॽ सिङ्बुङ्ङिन् के़रे़क् सिजाहाॽरे़ सधे़क् तिम्ॽ, आङ्गाॽ पाःत्तुङ्बा कन् साम्दिङ् पाःन्निन् खे़प्से़ॽ॥ 22 “‘कर आङ्गाॽ खे़न् ये़न्नो आङ्गाॽ आमनाहाॽ मे़युङ्बा गोसेन लाजेःङ्ग ताङ्से़ःप्तुङ् हे़क्क्याङ् खे़प्मो सिजाहाॽ मे़न्दाने़न्॥ आङ्गाॽ हे़क्के चोगुङ्ॽ हे़क्क्याङ् खे़ने़ॽ के़लाजेॽओ आङ्गाॽ यहवे दाङ्बे़ल्ले़ए कन् याःम्बक्हाॽ चोगुङ्ल वाॽआ फाॽआङ् खे़ने़ॽ कुसिङ् के़निःत्तुॽ॥ 23 कम्भलॽरिक् आङ्गाॽ आमनाहाॽ नु खे़ने़ॽ के़मनाहाॽ एॽए से़न्दुङ्सिङ्ॽ॥ कन् निङ्वाॽ के़माबा याःम्बक्किल्ले़ मिक्सेःन्निन् ताःन्दिक् पोङ्ॽ॥’” 24 हे़क्क्याङ् यहवे दाङ्बे़ल्ले़ फारोल्ले़ कुहिम्मो नु सुहाङ्गे़म्बाहाॽरे़ खुन्छिॽ हिम्मो सिजाहाॽ साॽरिक् यरिक् कुबन्ज्याङ् कुबन्ज्याङ् पाङ्घु तासुसि॥ सिजाहाॽरे़ मिस्र लाजेॽओ के़रे़क् सक्मा हिःक्हिःक् मे़मे़त्तु॥ 25 खे़ब्याङ् फारोल्ले़ मोसान् नु हारुने़न् उःत्तुसिआङ् मे़त्तुसि, “खे़निॽ पेगे़म्मे़ॽ कर हाबा कन् लाजेॽओ खिनिॽ निङ्वाॽफुमाङ्ङो सिदुङ्जभा तोःन्दे़म्मे़ॽ॥” 26 कर मोसाःल्ले़ मे़त्तु, “हे़क्के चोःक्मा नुबा मे़बोङ्ने़न् थेआङ्भे़ल्ले़ आनिगे निङ्वाॽफुमाङ् यहवे दाङ्बाओ थक्साहाॽ वयागे़न् सिदुङ्जभा तोःम्मासि पाःन्निल्ले़ कुयाःम्बेओ मिस्रिहाॽ खुन्छिॽ याःक्ले़ॽ॥ मिस्रिहाॽरे़ खुन्छिॽ मिक् तगि आनिगे कन् थक्साहाॽ सिदुङ्जभा तोःम्मा हे़ःक्तुम्सिबे़ल्ले़ खे़ङ्हाॽरे़ आनिगे लुङ्ङिल्ले़ मे़बःत्तिगे़ मे़स्ये़रिगे़॥ 27 आनिगे सुम्यान्बा लाम् मुरे़क् खारे़क् थेआङ् के़होप्पादे़न्नो पेगिगे़आङ् खे़प्मो आनिगे यहवे दाङ्बाओ सिदुङ्जभा तोःम्दुम्बे़ खुने़ॽ आनिगे हे़क्तङ्बाए इङ्जाङ् पिरिगे़आङ् वयिगे़॥” 28 फारोल्ले़ मे़त्तुसि, “खिनिॽ साॽरिक् माःङ्लिक् के़म्बेगिन्ने़भग्र मुरे़क् खारे़क् थेआङ् के़होप्पादे़न्नो खिनिॽ पेःक्माआङ् यहवे दाङ्बा खिनिॽ निङ्वाॽफुमाङ्ङो सिदुङ्जभा तोःम्मा फाःक्निङ्ॽ॥ आङ्गाॽ आलागिआङ् पेलि फाक्ताम् आबिरे़म्मे़ॽ॥” 29 मोसाःल्ले़ मे़त्तु, “आङ्गाॽ कप्मोलाम्बा पेःक्कानुमे़ःन्ने, खे़ने़ॽ नु खे़ने़ॽ के़सुहाङ्गे़म्बाहाॽ हे़क्क्याङ् के़मनाहाॽलाम् ताःन्दिक्सा सिजा पन्ज्याङ्माहाॽ मे़मार फाॽआङ् आङ्गाॽ पेलिगे़न् तुवा चोगुङ्ॽ॥ कर यहवे दाङ्बाओ सिदुङ्जभा तोःन्छे़ पेःक्मारे़ लागि याप्मि मे़साक्ते़न्ने़आङ् याम्मो इङ्ले़क् मे़जोगे़न्ने़ॽ॥” 30 खे़ब्याङ् मोसान् फारोःन्नु से़रे़आङ् लाःक्कात् पे हे़क्क्याङ् सिजाहाॽ मे़मार फाॽआङ् यहवे दाङ्बान् पेलि फाक्तु॥ 31 खम्भ्याङ् यहवे दाङ्बे़ल्ले़ मोसाःल्ले़ कुबेलिन् खे़प्सु, हे़क्क्याङ् फारोन् नु कुसुहाङ्गे़म्बाहाॽ हे़क्क्याङ् खुने़ॽ कुमनाहाॽओलाम् सिजाःल्ले़ कुबन्ज्याङ्माहाॽ लत्छाआङ् मेःन्ने मे़मये़॥ 32 कर याम्मोआङ् हाङ्ङिन् हादिङ् के़धक्पा पोःक्खे़ हे़क्क्याङ् याम्मोआङ् इस्राइलिहाॽ पेःक्मा मे़भाःक्तुसिन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.